ވަރަށް އެކުގައި އުޅުނު ފަސްޒުވާނެކެވެ. މަސައްކަތަކީ މިކުދިންގެ ކާނާއެވެ. ޢަޒުމަކީ ކުރިއަރާ މޮޅުވުމެވެ. އުމުރުގެ ގޮތުން ގައިބާރު އެންމެ ގަދަ އުމުރުފުރާއެވެ. ކަށިނޫފުރައިގެ ޒުވާނުންނެވެ. މިކުދިންގެ މަސައްކަތުގެ އަޚްލާގު ރަނގަޅުވީ ވަކި މީހަކު މިކުދިންގެ މަސައްކަތްބަލާ އެކަމަށް ހިތްވަރުދީ މުސާރަ ބޮޑުކޮށް ހަދާތީއެއްނޫނެވެ. މަސައްކަތުގައި ކުރިއަށްދާން ބޭނުންވާތީއެވެ. އާގޮތްތައް އުނގެނި ތިމާމީ މޮޅުމީހެއްކަން ސާބިތުކޮށްދޭން ބޭނުންވީތީއެވެ.

މިޒުވާން ކުދިންގެ ފުރަތަމަ މަސައްކަތަކަށްވެގެން އައީ ހައިވޭތަކުގެ މަގުތަކުން ދުއްވާފައިދާ އުޅަނދުފަހަރަށް ދިމާވާ ކުދިކުދި މައްސަލަ ހައްލުކޮށްދިނުމެވެ. މިމަސައްކަތުން ފަސްކުދިން ކައިބޮއެ އަސާސީބެނުންތައް ފުއްދެއެވެ. މިކުދިންގެ ގެދޮރަކީ ހައިވޭތަކާއި އިންވެގެންވާ ބިއަ ޖަންގަލީތަކެވެ.

މިކުދިންގެ ތެރެއިން އެއްމެ އިސްކޮށް ހަރަކާތްތެރިވާ ލީޑަރަކީ އަބްޝަރެވެ. އަވަހަށް ކަންކަން ދަސްކުރުމުގެ ތޫނުފިލިކަމާއި، މީހުންނާއި އެކުވެރިވެ ކަންކަން ކުރުމުގެ ޤާބިލިއްޔަތަކީ މީނާއަށް ގުދުރަތުން ލައްވާފައިވާ އެންމެ މާތްސިފަތަކެވެ. ހަށިގަނޑު ބިއަ މަސައްކަތްދަންނަ ހީވާގި ޒުވާނެކެވެ. އަސްގާޑިޔަލެއްގެ ފުރޮޅު ނައްޓާލާނެ ގޮތް މީހަކު ދެވަނަފަހަރަށް ބުނެދޭން ޖެހޭނެކަމަށް އަބްޝަރް ގަބޫލުނުކުރާ ކަހަލައެވެ. މީނާގެ ފުރަތަމަ އިޖާދަކަށްވީ ފަސޭހަކަމާއެކު ޖަންގަލީގެ ފުންވަޅުން ފެންނަގާނޭ ފަސޭހަގޮތް ހޯދާ ގިނަބަޔަކަށް އެގޮތް ތައާރަފްކުރުމެވެ. މެޝިންއެއް މަސައްކަތްކުރާގޮތް ފެނިއްޖެނަމަ އެމެޝިނެއް ނުވަތަ އެއައްވުރެ ފުރިހަމައަށް އެމެޝިނެއް ތައްޔާރުކުރެވޭތޯ އޭނާ ބަލާނެއެވެ. މީނާގެ އަނެއް ހަތަރު ބައިވެރިންގެ ހިތްވަރާއެކު މިހައިވޭތަކުގައި ދަތުރުކުރާ ހުރިހާ މުސާފިރުންގެ ރަހްމަތްތެރި ގުރޫޕަކަށް އަބްޝަރްގެ ގުރޫޕްވެއްޖެއެވެ.

އެއްދުވަހެއްގެ ހޫނުގަދަ މެންދުރުގެ ވަގުތުގައި އަބްޝަރްގެ ގުރޫޕު މެންދުރުގެ ނާސްތާއަށް އިންސާފުކުރަމުންދިޔަ ވަގުތުގައި ރަސްގެފާނުގެ އަސްގާޑިޔާކޮޅަށް ދިމާވި މައްސަލައެއްގައި މިގުރޫޕުގެ އެހީއަކަށް އެދި ރަސްގެފާނުގެ އަސްގާޑިޔަލުގެ އާރުކާޓީ އަތުވެއްޖެއެވެ. އަބްޝަރްގެ ބަހަކަށްވީ ރަސްގެފާނު ވިޔަސް އަދި އާދައިގެ ނިކަމެއްޗަކަށް ވިޔަސް މަސައްކަތް ކުރެވޭނީ ކައިގެން، ގައިގަ ވަރުޖެހިގެންކަމުގައެވެ. ނަމަވެސް ރަސްގެފާނުގެ އާރުކާޓީ މިކަން ގަބޫލެއްނުކުރިއެވެ. ނަތީޖާއަކަށްވީ އެންމެ ރަނގަޅަށް ނާސްތާއަށް އިންސާފުނުކުރެވި ރަސްގެފާނުގެ އަސްގާޑިޔަލުގެ މަސައްކަތައް ދާންޖެހުމެވެ. އަބްޝަރްގެ މޮޅު އުކުޅުތަކުގެ ބޭނުން ނުހަނު ފުރިހަމައަށް ހިފައި ހިނދުކޮޅެއްގެ ތެރޭގައި ޖެހުނުމައްސަލަ ހައްލުވެ ރަސްގެފާނުގެ ދަތުރަށް ފަށައިފިއެވެ. ދަތުރު ހަމަ ފެށުމާއެކު އަސްގާޑިޔަލުގެ ދުވެލި އާދަޔާހިލާފު ބާރުވެ ޖަންގަލީގެ ތެރެއަށްވަދެ، މަގުއޮޅި ރަސްގެފާނުގެ ހަށިކޮޅަށް އެކިވަރުގެ ޒަހަމްތައް ލިބިއްޖެއެވެ. ރަސްގެފާނުގެ ވިސްނުމަކަށްވީ މަގުމަތިން ދިމާވި ގާޑިޔާ މަރާމާތުކުރި ގުރޫޕްގެ ރޭވުމަކުން ގާޑިޔަލުގެ އަސްތައް ރުޅިއަރުވައި، އެސޮރުމެން ހަމައިންނައްޓުވާލީ ކަމުގައެވެ. ރަސްގެފާނުގެ އަމުރުފުޅަކަށްވީ އެފަސްމީހުން ހޯދައިގެން ގެނެސް ޝަރީޢަތުގެ މަޖިލީހަށް ހާޟިރުކުރާށެވެ.

ރަސްގެފާނުގެ އެންގެވުމުގެމަތިން މިފަސްމީހުން ގެނެވި ޝަރީޢަތްފެށި، ރަސްގެފާނު މިހުށައެޅުއްވި ހުށައެޅުމަކީ ޞައްޙަ މައްސަލައަކަށްވެ މީގެ ތެރެއިން މިކަމުގައި ބައިވެރިވިކަމަށްވާ ތިންމީހުންނަށް މަރުގެ އަދަބުދޭން ހުކުމް އިއްވުމެވެ. މީގެތެރޭގައި އަބްޝަރް ހިމެނެއެވެ. މުޅިސަހަރުތެރޭގައި މިވާހަކައިގެ އަޑުގަދަވެ މުޅި މުޖުތަމައު ބިރުވެރިކަމުގެ އައްސޭރިއަކަށްތިލަވެއްޖެއެވެ. ނަމަވެސް މިތިންމީހުންގެ އާއިލާއިން، ކުޑަމިނުން ކަރުނައަޅާ ރޯލާނޭ މީހެއްވެސް ނެތުމާއެކު މިތިން މީހުންނަށް ކުރި މާބޮޑު އަސަރެއްނެތެވެ.

މިއަދަކީ ސަހަރުގެ އެންމެންގެ ކުރިމަތީ އަބްޝަރްއާއި އޭނާގެ އަނެއް ދެބައިވެރިން މަރަށް ހާޟިރު ކުރެވޭދުވަހެވެ. ރަސްގެފާނުގެ ދަރުބާރަށް މީހުންއެއްވެއްޖެއެވެ. މިތިންމީހުންމެރުމަށް ކުރަންޖެހޭ ހުރިހާތައްޔާރީތަކެއްވަނީ ކޮށްނިންމާފައެވެ. އެއްވެތިބި އެންމެންވެސް އިންތިޒާރު ކުރަމުންދަނީ މިތިންމީހުން ހާޟިރުކުރެވި މިނިޔާއިއްވޭނޭ ވަގުތަކަށެވެ. ބަންދުކޮށްފައިވާ ގޮޅިތައް ބަލަހައްޓާ މީހުންދިޔައީ ތިންކުށްވެރިންގެ ބޮލާއި ތުނބުޅިމަތިމަސް ބާލުވާ އެންމެފަހުގެ ފެންވެރުމުން ފެންވަރުވާ ހުވަނދުލައްވާ ތައްޔާރުކުރަމުންނެވެ. ތިންކުށްވެރިން ތިބީ ބަސްހުއްޓިފައެވެ، ގަބުވެފައެވެ. ތިންމީހުންނަށްވެސް ހިތާ ހިތާ ސުވާލުކުރެވެނީ މިއީ ހަމަ މަރުގެ އަދަބު ލިބެންޖެހޭވަރުގެ ކުށެއްތޯއެވެ؟ ނަމަވެސް މިސުވާލުތަކަށް ލިބޭނެ އެއްވެސް ޖަވާބެއް ނެތެވެ. މިޝަކުވާ އަޑުއަހާނެ އިތުރުމީހަކު ނެތެވެ. ޖަންގަލީތެރޭގައި ފޮރުވާފައިވާ ފައިސާކޮޅު ހަވާލުކުރާނޭ ވާރިސަކުނެތެވެ. ކުރާނެ އެއްވެސް ކަމެއްނެތެވެ. ސަހަރުގެ އެންމެންހެން އެއްވެފައިވާ ދަރުބާރަށް ތިންމީހުން ހާޟިރުކުރެވިއްޖެއެވެ. ތިންމީހުންގެ މޫނުމަތިން ފެންނަނީ ސާދާކަމާއި ސާބިތުކަމެވެ، ޒުވާން ޖޯޝާއި، ކެތްތެރިކަމެވެ. ވަކިން ޚާއްޞަކޮށް ހިތްވަރުގަދަ އަބްޝަރް ފާހަގަކުރެވެއެވެ.

މިސަހަރުގައި މިފަދަ ނިޔާކަނޑައެޅޭ މީހުން މަރަނީ ދަންޖައްސައިގެންނެއްނޫނެވެ. އޭގެބަދަލުގައި ބޭނުންކުރަނީ އާދަޔާހިލާފު ބޮޑު މެޝިނެކެވެ. މިމެޝިންގެ މަތީގައި ކުށްވެރިޔާ ބަންޑުންބާއްވާ ކަނދުރާ މައްޗަށް، ޗޭނެއްގެ އެހީގައި ވައްޓާލެވޭ ތޫނުތިލަޔަކުން ކަރުބުރިކޮށްލެވެނީއެވެ. އެންމެން އެއްވެފައިވާ ދަރުބާރުގެ މެދުގައި އެއްކަލަބޮޑު މެޝިންއެވަނީ ބެހެއްޓިފައެވެ. ކުއްވެރިންގެތެރެއިން އެންމެ ފަހުންމެރުމަށް ހަމަޖެހިފައިވަނީ އަބްޝަރްއެވެ. ސަބަބަކަށްވީ މިކަމުގައި އެންމެބޮޑަށް ޝާމިލުވަނީ އޭނާކަމަށްވެފައި އޭނާއަށް އަނެއްދެމީހުން މަރާލާތަން ދައްކާ ނަފްސާނީގޮތުން ބަލިކަށިކުރުމެވެ.

ފުރަތަމަ ކުށްވެރިޔާގެނެސް މެޝިންގެމަތީ ބަންޑުން ބާއްވާ ތައްޔާރުކޮށް މެޝިންގެ ސުވިޗްޖެއްސި ވަގުތު ބިރުވެރި ބާރު އަޑަކާއިއެކު ތިލަ ފައިބައިގެން އައިސް ކުށްވެރިޔާގެ ކަނދުރާއާ ހަމައަށް އައިސް ތިލަ ހުއްޓިއްޖެއެވެ. ރަސްގެފާނަށާއި އެއްވެތިބި ސަހަރުގެ އެންމެނަށް މިކަންވީ އާދަޔާ ޚީލާފް ބޮޑުވެގެންވީ އަޖައިބަކަށެވެ.ވަޒީރުބޭކަލުންނާއި އެންމެހާ ބޮޑުން އެއީ މުޢުޖިޒާތެއްކަމަށް ގޮވާ އަޑުއުފުލިއެވެ. ރަސްގެފާނަށް ލަފާއަރުވާ ބޭފުޅުންގެ މަޝްވަރާއާއެކު އެއީ މުޢުޖިޒާތެއްކަމަށް ނިންމާ އެއީ އަދަބު ދޭން ނުޖެހޭމިހެއްކަމަށް ނިންމައިފިއެވެ. ދެވަނަ ކުށްވެރިޔާ ގެނެސް މެޝިންގެމަތީ ބާއްވައިފިއެވެ. އެއްވެފައިވާ މީހުންގެ ސަމާލުކަން މިފަހަރު މާބޮޑެވެ. އޭނާވެސް އެފަދަގޮތަކަށް ސަލާމަތްވޭތޯ ގިނަބަޔަކު ދުޢާކުރިއެވެ. މީނާވެސް މިފަދަގޮތަކަށް ސަލާމަތްވެއްޖެއެވެ. މިއީވެސް މުޢުޖިޒާތެއްކަމަށް ނިންމާ އޭނާވެސް ދޫކޮށްލީއެވެ. ނަމަވެސް އެއަށްފަހު ދަރުބާރުގައި ބަސްކިޔަންފެށީ އަބްޝަރްއެވެ. އޭނާއަށް ލިބިފައިވާ ކަންކަން ނުހަނު އަވަހަށް ދަސްކުރުމުގެ ކުޅަދާނަކަން ކެކިއުތުރި އަރައިގަތީއެވެ. އޭނާ ބުންޏެވެ. އެއީ މުޢުޖިޒާތެއްނޫނެވެ. އެވާގޮތަކީ ވެއްޓޭ ތިލައިގައި ޖަހާފައިވާ ވައިރު ވަކިހިސާބަކުން ތާށިވަނީއެވެ. މިހާރުވެސް އެތަން މިވެނިގޮތަކަށް ބަދަލުކޮށް މެޝިން ޖައްސައިފިނަމަ ބަރާބަރަށް މެޝިން މަސައްކަތް ކުރާނެއެވެ. މެޝިންގެ މަސައްކަތްކުރާމީހުން އަބްޝަރް ބުނިގޮތަށް މެޝިންގެ އެތަން ބަދަލުކޮށްފިއެވެ. އަދި އޭގެފަހުގައި މެޝިންގެ މަތީ ބާއްވަން މިޖެހެނީ އަބްޝަރް އެވެ. އަބްޝަރް މެޝިންގެމަތީ ބާއްވާ ހަމަ ސުވިޗް ޖައްސާލުމާއެކު ތިލަފައިބައިގެން ދިޔައީ އަބްޝަރްގެ ބޮލާއި ހަށިގަނޑު ވަކިކޮށް ފުރާނަ ހިފައިގެންނެވެ. އެފުރިހަމަ ސިކުނޑީގެ މަސައްކަތް އަބަދަށް ހުއްޓުވާފައެވެ. އެ މުޢުޖިޒާތުން ސަލާމަތްވި ދެއެކުވެރިން ހެއްވާފައެވެ. ނަމަވެސް ކުރާނޭ އެއްވެސް ކަމެއްނެތެވެ. އެމެޝިނަށް ޖެހިފައިވާ މައްސަލަ ހައްލުކުރުމުގެ ވިސްނުން އައި ދަނޑިވަޅުގައި އެމެޝިން ރަނގަޅުނުކޮށްފިނަމަ ތިމާގެ ފުރާނަ ސަލާމަތްވާނެކަމުގެ ވިސްނުން އަބްޝަރްއަށް އައިނަމަ ހަމަޔަގީނުންވެސް އެކަމުގައި އެހެން ބައިވެރިންނެކޭ އެއްގޮތަކަށް އެމުޢުޖިޒާތުގައި އަބްޝަރްވެސް ސަލާމަތް ވާނެއެވެ. އެކަމުގެ ދަނޑިވަޅުގައި އެކަމެއް ނުކުރެވިއްޖެނަމަ ކިތަންމެ ބޮޑު ގެއްލުމެއްވެސް ވެދާނެއެވެ.