ބަބުލް ރާއްޖެ އައީ މީގެ 12 އަހަރު ކުރިންނެވެ. އޭރު އަދި ޢުމުރުން 21 އަހަރެވެ. ބަންގްލަދޭޝްއިން ރަނގަޅު ވަޒީފާއެއް ނުލިބުމުން ރާއްޖެއައީ ވަރަށް ފޮނި އުއްމީދުތަކަކާއި އެކުގައެވެ. ޒަވާޖީ ހަޔާތެއް އޭރު ފަށައިފައި ނުވާތީ، ބަބުލްގެ ވިސްނުމުގައި ހުރީ ރަނގަޅު ވަޒީފާއެއް ހޯދައިގެން، އަމިއްލަ ޟަރޫރީ ބޭނުންތައް ފުއްދާލުމަށްފަހު ލިބޭ ލާރި މައިންބަފައިންނަށް ފޮނުވާށެވެ. ވަޒީފާއަށް ކުރިމަތި ލީއިރު ބަބުލްގެ އަތުގައި އޮތްހައިވެސް އެއްޗަކީ ކާރު ދުއްވުމުގެ ލައިސަންސެވެ. މީގެ އިތުރަށް ކިތަންމެ ކޮށިކޮށްވިޔަސް އިނގިރޭސިން ބަހެއް ބުނެލަން ބަބުލްއަށް އެނގުން އެއީ އޭނާއަށް ފައިދާކުރިކަމެކެވެ.

ރާއްޖެ އައިސް ބަބުލް އަށް ލިބުނީ އޭނާ ގެނައި އޮފީހުގެ ވޭން ޑްރައިވަރުގެ މަގާމެވެ. މަހުމުސާރައަށް 500 ރުފިޔާ ހަމަނުވެއެވެ. ނަމަވެސް އެމުސާރައަކީވެސް ބަންގްލަދޭޝްގައި ހަމަ ރަނގަޅު މުސާރައެއް ކަމުގައި ވެއެވެ. އެހެންކަމުން ކޮންމެ މަހަކު ލިބޭ މުސާރައިން ކުޑަ އެއްޗެއް އަތުގައި ބާއްވާފައި، ބާކީލާރިކޮޅު ޑޮލަރަށް ހަދާފައި ރަށަށް ފޮނުވާލަނީއެވެ. އެހެން ބިދޭސީންނާއި އަޅާބަލާއިރު ބަބުލްއަށް ލިބުނު ވަޒީފާއަކީ ވަރަށް ރީއްޗަށް ހެދުން އަޅައިގެން ‘ޑީސަންޓްކޮށް’ ހުންނަން ޖެހޭ ވަޒީފާ އެއްކަމުން، ބަބުލްވެސް ވަޒީފާ އަދާކުރަމުން ދިޔައީ ވަރަށް ހިތްހަމަ ޖެހިގެން ހުރެއެވެ.

ރާއްޖޭގައި މިވީ ބާރައަހަރު ތެރޭގައި އައިސްފައިވާ ކޮންމެ ހުކުރު ދުވަހަކީ އެހެން ކޮންމެ ބިދޭސީއެކޭ އެއްގޮތަށް ބަބުލްއަށްވެސް ހަފްތާތެރޭ އަންނަ އެންމެ އުފާވެރި ދުވަހެވެ. ރައްޓެހިންނާއި ބައްދަލުވެލައި، އެކަކު އަނެކެއްގެ ޝުޣޫރުތައް އަނެކުންނާއި ހިއްސާކޮށްލާ ދުވަހަކަށް ހުކުރު ދުވަސް އޮންނަނީ ވެފައެވެ. މިހެން އުޅުމުގެ ތެރޭގައި ބަބުލް ވެސް އެކި ދުވަސްވަރު މަތިން އަމިއްލަ ގައުމުގެ 3 ކުއްޖަކާއި ރައްޓެހިވިއެވެ. ނަމަވެސް ކަންތައްތައް ދިމާވާގޮތުން އެގުޅުންތައް ވިއްސިވިހާލިވެގެން ދަނީއެވެ.

މިހާރު ބަބުލް ވަނީ ދިވެހިބަސް ލިޔަން ކިޔަން ދަސްކޮށްފައެވެ. ދިވެހި ބަހުން ވާހަކަ ދައްކާއިރު އެއީ ބިދޭސީއެކޭ ހީވެސް ނުވާހާ ފަރިތައެވެ. ދިވެހި ރައްޓެހިންތައްވެސް ހޯދައިފިއެވެ. ބަބުލް ހިތްހަމަޖެހިގެން އުޅުނު ކަމުގައި ވިޔަސް ދިވެހި ޕާރޓޭންނާއި ފުރާވަރު އުމުރުގެ ކުދިންގެ ފަރާތުން ދުއްތުރާތައް އޭނާއަށްވެސް ދިމާވެއެވެ.

ވަޒީފާގައި ގިނަދުވަސް ވަމުން ދިޔުމާއި އެކު ވަޒީފާގެ ކްލަސިފިކޭޝަން ވެސް ބަދަލުވަމުން ގޮސް، މިހާރުގެ މުސާރަ ސަތޭކަ ޑޮލަރާއި ގާތްކުރެއެވެ. ބަބުލް އިތުރަށް ވިސްނާނެ އެއްވެސް ކަމެއް ދިމާނުވެ ދިވެހިރާއްޖޭގައި އުޅެމުން ދިޔައީ ވަރަށް އުފަލުގައެވެ. ނަމަވެސް ހުރިހާކަމެއް ބަދަލުވާން ފެށީ މިދިޔަ އަހަރުގެ ނޮވެމްބަރާއި ހިސާބުންނެވެ.

ދިވެހިރާއްޖޭގެ ވެރިކަން ބަދަލު ވެއްޖެއެވެ. އާއޮފީސްތައް އުފައްދާ ގިނަ އޮފީސްތަކެއް އުވާލަން ފަށައިފިއެވެ. ކަންތައްތައް ބަދަލުވެގެން ދާންފެށީ ވަރަށް ހަލުވިކޮންނެވެ. އާ ސަރުކާރުން އުވާލާ އޮފީސްތަކުގެ ތެރޭގައި ބަބުލް މަސައްކަތް ކުރި އޮފީސް ވެސް ހިމެނިފައިވާކަން ބަބުލްއަށް އެނގުނެވެ.

ނަމަވެސް ސަރުކާރުން ބުނަމުން ދިޔައީ އޮފީސްތައް އުވާލިޔަސް މިހާރު ވަޒީފާ ތަކުގައި ތިބިމީހުންނަށް އެހެން ވަޒީފާތައް ލިބޭނެކަމަށެވެ. ބަބުލް އަކީ ރާއްޖޭގައި ވަޒީފާ އަދާކުރާތާ ގިނަދުވަސް ވެފައިވާ މީހަކަށް ވެފައި، ވަޒީފާގައި ބަރާބަރު މީހެއްކަން އޮފީހުގެ ވެރިންނަށް އެނގޭނެއެވެ. އެހެންކަމުން ބަބުލް އުއްމީދު ދޫކޮށެއް ނުލައެވެ. ނަމަވެސް ބަބުލްގެ އޮފީސް އުވާލަނީ ކޮންއިރަކުން ކަމެއް އެތަނުގެ އެއްވެސް މުވައްޒަފަކަށް އަންގާފައެއް ނުވެއެވެ. އެނގޭހާވެސް ކަމަކީ ކޮންމެވެސް ދުވަހަކުން އުވާލާނެކަމެވެ.

ކުރިމަގު ބަނަވަމުން ދިޔައިރު އެހެން މައްސަލައެއް ބަބުލްއަށް ކުރިމަތި ވާންފެށިއެވެ. ރާއްޖޭގައި ޑޮލަރު ލިބުމުގެ ތާށިކަން ކުރިމަތި ވުމާއި އެކު، ބަބުލްއަށް ލިބޭ މުސާރަ ޑޮލަރަށް ބަދަލު ނުކުރެވި، އަދި ރަށަށް ނުފޮނުވިފައި ބަހައްޓަން ޖެހުނެވެ. މީހުންގެ ކައިރީ ކިޔައިގެންވެސް ޑޮލަރު ކޮޅެއް ލިބުން އެއީ މިހާރު ނާދިރު ކަމެކެވެ.

ވާނުވާ ނޭނގި 7 މަސްދުވަސް ވޭތުވުމަށް ފަހު، ބަބުލް ވަޒީފާއިން ކަނޑާލާ ރަށަށް ފޮނުވާލަން އުޅޭކަން އޮފީހުން އެންގީ މިދިޔަ ހަފްތާގެ ހޯމަ ދުވަހުއެވެ. ހޮނިހިރު ދުވަހު ފުރުވާލުމަށް އޮފީހުން ހުރިހާކަމެއް މިހާރު ވަނީ ނިންމާފައެވެ. ކުއްލި ގޮތަކަށް މިގޮތަށް އެންގުން ވެގެންދިޔައީ ބަބުލްއަށް ހަތަރު އުދަރެސް ފެނުޖެހުން ފަދަކަމަކަށެވެ. އަތުގައި ޑޮލަރެއް ނެތެވެ. ހުރީ ދިވެހި ފައިސާއެކަންޏެވެ. އެފައިސާ ރަށަށް ގެންގޮސްގެން ކުރާނެ ކަމެއް ނޯންނާނެއެވެ. ޑޮލަރު ހޯދުމަށް ކޮޅުކޮޅަށް ދުވެގެންވެސް ޑޮލަރު ލިބޭގޮތެއް ނުވިއެވެ.

ނަމަވެސް ބުރާސްފަތި ދުވަހު، އެންމެ ފަހުން ކަޅުބާޒާރުން ބަބުލް ޑޮލަރު ގަތީ އެނޫންގޮތެއް ނެތިގެންނެވެ. 16 ރުފިޔާގެ ރޭޓުން ޑޮލަރު ގަންނަން ޖެހުމުން ބަބުލްއަށް ވަރަށް ބޮޑު އެއްޗެއް ގެއްލިގެން ދިޔައެވެ. އެވަރުން އަދި ނިމުނީއެއް ނޫނެވެ. ޑޮލަރު ކޮޅުގަނެގެން އެރޭ ގެޔަށް އައިމަގުމަތީގައި، ކަޓަރު ހިފައިގެން ތިބި ޕާރޓޭންގެ ދެމީހުން ބަބުލް އާއި ދިމާކުރިއެވެ. ލާރި ކޮޅާއި ފޯނު ދޭން ބުނުމުން އެކަމަށް ބަބުލް އިންކާރު ކުރިއެވެ. އެހިނދު ބަބުލްގެ އަތުގައި އެމީހުން ކަޓަރު އެޅިއެވެ. އެނޫންގޮތެއް ނެތިގެން އެންމެ ފަހުން އަތުގައޮތް ފޯނާއި ޑޮލަރުކޮޅު އެމީހުންނަށް ބަބުލް ދިނީއެވެ.

ބަބުލް އޮފީހަށް އައިސް އެވާހަކަތައް ކިޔައިދިނީ ރޮވިފައި އިދެގެންނެވެ. ހޮނިހިރު ދުވަހު މާލެއިން ރަށަށްގޮސް އެއަރޕޯޓުން ގެޔަށް ދާނެ ލާރި ވެސް ބަބުލް އަތުގައި މިއަދު ނެތެވެ.

ދުވަހަކުވެސް ބަބުލް ވަޒީފާއަކަށް ގަޑިއެއް ނުޖެހެއެވެ. އޮފީހުގެ ވެރިޔަކާއި ޒުވާބެއް ނުކުރެއެވެ. އެއްކޮށް އުޅޭ ސްޓާފަކަށް ރުޅިމޫނެއް ނުދައްކައެވެ. ގަވާއިދާ ޚިލާފެއް ނުވެއެވެ. އެކްސިޑެންޓެއް ނުވެއެވެ. ޚިޔާނާތެއް ނުވެއެވެ. ދިވެހި ސަރުކާރަށް ޚިދުމަތްކުރީ ވަފާތެރިކަމާއި ލޯތްބާއި އެކީއެވެ. ނަމަވެސް މިއީ 12 އަހަރު ދިވެހިރާއްޖެއަށް ވަފާތެރިކަމާއި އެކު ޚިދުމަތް ކުރި އިންސާނަކަށް އޭނާގެ މަސައްކަތުގެ އަގު ލިބުން ހިތާމަވެރި ގޮތެވެ.