އެކިއެކި ކަންކަމުގައި ފުލުހުންގެ ބެލުމުގެ ދަށަށް ގެނެވޭ މީހުންގެ މަޢްލޫމާތާއި ފޮޓޯފަދަ ތަކެތި ފުލުހުން ދަނީ އާންމު ކުރަމުންނެވެ. އެހެން ނަމަވެސް، މިކަމަކީ ޤާނޫނީ ގޮތުންނާއި ޝަރުޢީ ގޮތުން ހަމަޖެހޭ ކަމެއް ނޫން ކަމަށް ބައެއް ޤާނޫނީ ވަކީލުން ވިދާޅުވެއެވެ. ގިނަ ޤާނޫނީ ވަކީލުން ވިދާޅުވާ ގޮތުގައި މައްސަލައެއްގެ ތުހުމަތުގައި ހައްޔަރުކުރެވޭ މީހުންނަކީ އެމީހުންގެ މައްޗަށް ކުށް ސާބިތުނުވާހާ ހިނދަކު ކުށްވެރިއެއް ނޫނެވެ.

ރާއްޖޭގައި ކުށްމަދުކޮށް އަމާން މާހައުލެއް ޤާއިމް ކުރުމުގެ ގޮތުން ފުލުހުން ކުރައްވަމުން ގެންދަވާ މަސައްކަތުގެ ދަށުން އެކި ވަރުގެ ކުށްވެރިންދަނީ ހައްޔަރު ކުރައްވަމުންނެވެ. އޭގެ ތެރެއިން ބައެއް ކުށްވެރިންގެ މަޢްލޫމާތާއި ފޮޓޯފަދަ ތަކެތި ފުލުހުން ދަނީ ޢާންމު ކުރަމުންނެވެ. އެހެން ނަމަވެސް، ފުލުހުން މި ޢަމަލުކުރަމުންދާ ގޮތާއި މެދު ގިނަ ޤާނޫނީ މާހިރުންގެ އިތުރުން، ތަޖުރިބާކާރު ޤާނޫނީ ވަކީލުން ދެކޮޅުހަދައެވެ. އެބޭފުޅުން ވިދާޅުވާ ގޮތުގައި އެމީހެއްގެ މައްޗަށް ޝަރުޢީ ކޯޓެއްގައި ކުށްސާބިތު ނުވާހާ ހިނދަކު އެމީހަކީ ކުށްވެރިއެއް ނޫނެވެ.

މައްސަލަ ތަކުގެ ތުހުމަތުގައި ހައްޔަރު ކުރެވޭ މީހުންގެ މަޢްލޫމާތު އާންމު ކުރާ ކުރުމާއި ބެހޭ ގޮތުން މަޝްހޫރު ޤާނޫނީ ވަކީލް އަބުދުﷲ ޝާއިރު ވިދާޅުވީ، އެގޮތަށް މީހުންގެ މަޢްލޫމާތު ހާމަކުރުމަކީ ކުރެވިގެންވާނެ ކަމެއް ނޫން ކަމަށާއި އެއްވެސް މީހަކީ ކުށްވެރިއެއް ކަމަށް ބެލެވޭނީ އެމީހެއްގެ މައްޗަށް ކުށެއް ޝަރީޢަތުގައި ސާބިތުވުމުން ކަމަށެވެ.

މީގެ އިތުރުން، މަޝްހޫރު ޤާނޫނީ ވަކީލު އަދި ރިޔާސީ ކޮމިޝަނުގެ އިސްތަރުޖަމާން އަބުދުﷲ ހަސީން ވިދާޅުވީ، އުސޫލެއްގެ ގޮތުން ފުލުހުންނަށް ކުށްކުށުގެ ތުހުމަތުގައި ހައްޔަރުކުރެވޭ މީހުންގެ މަޢްލޫމާތު އާންމު ނުކުރެވޭނެ ކަމަށާއި އެހެން ނަމަވެސް، ފުލުހުންގެ ތަހުޤީޤަށް ވަރަށް ބޮޑަށް ޔަޤީންވެ، ވަރަށް ބޮޑު މައްސަލައެއްގައި ފުލުހުންނަށް އެމީހުންގެ މަޢްލޫމާތު ހާމަކުރެވިދާނެ ކަމަށެވެ.

މިމައްސަލައިގާ ފުލުހުންގެ މީޑިއާ އޮފިޝަލަކު ވިދާޅުވީ، މިއީ ވަރަށް ގިނައިން ފުލުހުންނާއި ކުރިމަތި ކުރުވާ ސުވާލެއް ކަމަށާއި އެހެން ނަމަވެސް، ފުލުހުން އެކަން ކުރުން އެއްވެސް ޤާނޫނަކުން މަނާ ނުކުރާ ކަމަށެވެ. އަދި ފުލުހުން ކޮންމެ ކޮންމެ މައްސަލައެއްގައި ހައްޔަރު ކުރެވޭ މީހުންގެ މަޢްލޫމާތު އާންމު ނުކުރާ ކަމަށާއި ފުލުހުން ކުށުގެ ތުހުމަތުގައި ހައްޔަރުކުރެވޭ މީހުންގެ މަޢުލޫމާތު އާންމު ކުރަނީ އެކަން ވަރަށް ބޮޑަށް ސާބިތުވާ ވަރަށް ހެކި ލިބުމުން ކަމަށް ވެސް ފުލުހުންގެ މީޑިޔާ އޮފިޝަލު ވިދާޅުވިއެވެ. މީގެ އިތުރުން، ދުނިޔޭގެ އެހެން ޤައުމުތަކުގައި ވެސް ކުށްކުށުގެ ތުހުމަތުގައި ހައްޔަރު ކުރެވޭ މީހުންގެ މަޢްލޫމާތު އާންމު ކުރާ ކަމަށާއި ކުށެއްގެ ތުހުމަތުގައި ހައްޔަރު ކުރެވޭ މީހުންގެ މަޢްލޫމާތު ނޫސްވެރިންނަށް ހާމަކުރުމުން އެއާންމު ކުރުމާއި ނުކުރުމުގެ އިޙްތިޔާރު އޮންނަނީ އެމީޑިއާއަކަށް ކަމުގައިވެސް ފުލުހުން ފާހަގަ ކުރެއެވެ.

ފުލުންނަށް ކުށެއްގެ ތުހުމަތުގައި ހައްޔަރު ކުރެވޭ މީހުންގެ މަޢްލޫމާތު ހާމަނުކުރެވޭނެ ކަމަށް ގިނަ ޤާނޫނީ މާހިރުން ވިދާޅުވަމުންދާއިރު އެބޭފުޅުންގެ އެވާހަކައަށް ބާރުދޭ ކަންކަމުގެ ތެރޭގައި ދިވެހި ޖުމްހޫރިއްޔާގެ ޤާނޫނު އަސާސީގެ ފަންސާސް އެއްވަނަ މާއްދާ ހިމެނެއެވެ. ޤާނޫނު އަސާސީގެ ފަންސާސް އެއްވަނަ މާއްދާގެ (އ)ގައި ބުނެފައި ވަނީ، ކުށެއް ކުރިކަމުގެ ދަޢުވާ އުފުލިފައިވާ ކޮންމެ މީހަކަށްމެ، އެމީހަކު ކުށެއް ކޮށްފިކަން، އެކަށީގެންވާ މިންވަރެއްގެ ޝައްކެތްނެތި، ޝަރީޢަތުގައި ސާބިތުނުކުރެވޭ ނަމަ އެމީހަކީ ކުށެއް ނެތް މީހަކު ކަމުގައި ބެލުމުގެ ޙައްޤު ލިބިގެންވާ ކަމަށެވެ.

ބައެއް ޤާނޫނީ މާހިރުން ފާހަގަ ކުރާގޮތުގައި ފުލުހުންގެ ތަހުޤީޤަށް ސާބިތުވެ، ކޯޓުގައި ދައުވާކޮށް، ކޯޓު މަރުހަލާގައި ޝަޜީއަތުގައި އެމީހެއްގެ މައްޗަށް އެކުށް ސާބިތު ނުވާ ކަމަށާއި އެހެން އެކަން ވުމުން އެކުށުގައި ތުހުމަތު ކުރެވިފައިވާ މީހާގެ އަބުރާއި ޢިއްޒަތް މުޖުތަމަޢުގައި ގެއްލިގެންދާކަމަށާއި އަދި ޙާއްސަ ގޮތެއްގައި ޖިނާޢީ ދައުވާއެއް ޝައްކެއްގެ މައްޗަށް ކުށް ސާބިތުނުވާނެ ކަމަށެވެ.

ޤައުމުގެ އަމަން އަމާން ކަމާއި ސުލްޙަމަސަލަސްކަން ދެމެހެއްޓުމަކީ އަހަރެމެން އެންމެންގެ ޒިންމާއެއް ކަމަށް ވީހިނދު، ޤާނޫނާއި ޤަވާއިދަށް އިޙްތިރާމްކޮށް ޤާނޫނު އަސާސީ ދެމެހެއްޓުމަކީ އަހަރެމެންގެ ޒިންމާއެކެވެ. އަދި އެހެން މީހުންގެ އަބުރާއި ޢިއްޒަތަށް އިޙްތިރާމް ކުރުމަކީވެސް އަހަރެމެންގެ ޒިންމާއެކެވެ.