ރައްޔިތުންގެ މަޖިލީހުގެ މަސައްކަތް ތަކަށް ބަލާއިރު ނިމި ދިޔަ ހަފްތާއަކީވެސް ތަފާތު ގިނަ މަސައްކަތްތަކެއް މަޖިލީހުގައި ކުރިއަށް ދިޔަ ހަފްތާއެކެވެ. ކޮމިޓީ މަސައްކަތްތަކުގެ އިތުރުން އެންމެ ފާހަގަ ކުރެވުނު އެއްކަމަކީ 17 ވަނަ ރައްޔިތުންގެ މަޖިލީހަށް ފުރަތަމަ ފަހަރަށް ވަޒީރެއްގެ މައްޗަށް އިތުބާރު ނެތްކަމުގެ މައްސަލައެއް ވެއްދުމެވެ.

އަތޮޅު އޮފީސްތައް ބަދަލު ކުރުމުގެ މައްސަލަ

ސިޔާސީ ބޭނުމަށްޓަކައި އަތޮޅު އޮފީސްތައް އެއްރަށުން އަނެއް ރަށަށް ބަދަލު ކުރާތީ ރައްޔިތުންގެ މެދުގައި ބޮޑު ހަސަދަ ވެރިކަމެއް އުފެދެމުންދާ ކަމަށް ބުނެ ރައްޔިތުންގެ މަޖިލީހުގެ ތުލުސްދޫ ދާއިރާގެ މެމްބަރު ރޮޒައިނާ އާދަމް ކުއްލި މައްސަލައެއް މިދިޔަ ހަފްތާގައި ވަނީ މަޖިލީހަށް ހުށައަޅާފައެވެ. މިމައްސަލާގެ ބަހުސް ކުރަމުންދިޔައިރު ޑީއާރުޕީ އާއި އެމްޑީޕީގެ މެމްބަރުންގެ މެދުގައި ވަނީ ބަހުގެ ހޫނު ހަމަލާތަކެއް ބަދަލު ކުރެވިފައެވެ. އެމްޑީޕީ އަށް ނިސްބަތްވާ މެމްބަރުން ވިދާޅުވަމުން ދިޔައީ މިއީ އަތޮޅު އޮފީސްތައް ރަށްރަށަށް ބަދަލު ކުރި ފުރަތަމަ ފަހަރު ނޫންކަމަށާއި ކުރިންވެސް އެކި ދުވަސްވަރު ތަފާތު އަތޮޅު ތަކުގެ އަތޮޅު އޮފީސްތައް ބަދަލު ކުރިކަމަށެވެ. މިމައްސަލަ ބަލައިގަތުމަށް 61 މެމްބަރުންގެ ތެރެއިން 37 މެމްބަރަކު ވަނީ ވޯޓު ދީފައެވެ.

ޝަރުޢީ ކޯޓުތަކާބެހޭ ބިލް

ސަރުކާރުން ރައްޔިތުންގެ މަޖިލީހަށް ހުށައެޅި ޝަރުޢީ ކޯޓުތަކާބެހޭ ބިލް އަނބުރާ ގެންދިޔައީވެސް ނިމުނު ހަފްތާގައެވެ. މިބިލް އަނބުރާ ގެންގޮސްފައިވަނީ ރައްޔިތުންގެ މަޖިލީހަށް ބަލައިގަންނަން ފެނޭތޯ ބެލުމަށް ވޯޓަށް އަހަން ތައްޔާރު ވެފައި ވަނިކޮށެވެ. ބަންޑާރަ ނައިބު ވިދާޅުވީ 10 ވަރަކަށް ދުވަހުގެ ތެރޭގައި އަލުން އިސްލާހުކޮށްފައި ބިލް މަޖިލީހަށް ހުށައެޅޭ ވަރު ވާނެ ކަމަށެވެ. މިބިލަކީ ޝަރުޢީ ކޯޓުތައް އެކުލަވާލުމަށާއި އެކޯޓުތަކުގެ އިހްތިޞާސް ކަނޑައެޅުމާއި ބެހޭ ބިލެކެވެ.

ދަރިވަރުންގެ ލޯނު ބިލް

ކުޅުދުއްފުށީ ދެކުނު ދާއިރާގެ މެމްބަރު މުހައްމަދު ނަޝީދު މަޖިލީހަށް ހުށައެޅުއްވި ދަރިވަރުންގެ ލޯނު ބިލް މަޖިލީހަށް ބަލައިގަނެ ގައުމީ ތަރައްޤީގެ ކޮމިޓީއަކަށް ފޮނުވީވެސް ނިމި ދިޔަ ހަފްތާގައެވެ. މިބިލް މަޖިލީހަށް ބަލައިގަތީ ހާޒިރުވި މެމްބަރުންގެ އިއްތިފާގުންނެވެ. މިބިލް ގައުމީ ތަރައްޤީގެ ކޮމިޓީ އަށް ފޮނުވީ ތޮއްޑޫ ދާއިރާގެ މެމްބަރު އަލީ ވަހީދު ހުށައަޅާ ހިތަދޫ ދާއިރާގެ މެމްބަރު މުހައްމަދު އަސްލަމް ތާއީދު ކުރެއްވި ހުށައެޅުމަށް އެއްވެސް މެމްބަރަކު ދެކޮޅު ހަދާފައި ނުވާތީ އެ ހުށައެޅުން ފާސްވީކަމަށް ބަލައިގެންނެވެ.

ބ ފުޅަދޫ ރައްޔިތުންގެ ޕެޓިޝަން

ބ ފުޅަދޫ ރައްޔިތުންނަށް ދިމާވެފައިވާ ލަފާފުރުމުގެ ދަތިހާލަތު ހުރިގޮތް ސަރުކާރަށް އަންގައިދީ މިކަން ސަރުކާރުގެ ސަމާލުކަމަށް ގެނައުމަށްޓަކައި ބ ތުޅާދޫ ދާއިރާގެ މެމްބަރު ނާޒިމް ރަޝާދު ހުށައެޅުއްވި ޕެޓިޝަން މަޖިލީހަށް ބަލައިގަނެ ބަހުސްކޮށްފައިވަނީ ވެސް ނިމިދިޔަ ހަފްތާގެ ތެރޭގައެވެ.

ޑރ ޝަހީދުގެ މައްޗަށް އިތުބާރު ނެތްކަމުގެ މައްސަލަ

ޑީއާރުޕީ އާއި ޕީއޭ ކޯލީޝަނުން ފޮރިން މިނިސްޓަރ ޑރ ޝަހީދުގެ މައްޗަށް އިތުބާރު ނެތްކަމުގެ މައްސަލައެއް މަޖިލީހަށް ވަނީ ހުށައަޅާފައެވެ. މިއީ 17 ވަނަ ރައްޔިތުންގެ މަޖިލީހަށް ވަޒީރެއްގެ މައްޗަށް އިތުބާރު ނެތްކަމުގެ މައްސަލައެއް ހުށައެޅި ފުރަތަމަ ފަހަރެވެ. މިމައްސަލަ ހުށައަޅާފައިވަނީ 35 މެމްބަރެއްގެ ސޮޔާއި އެކު ކަމަށް ޑީއާރުޕީން މައުލޫމާތު ދެއެވެ. އަދި އިތުރު މެމްބަރުންގެ ތާއީދުވެސް މިމައްސަލާގައި ލިބޭނެކަމަށް އެފަރާތުން މައުލޫމާތު ދެއެވެ. ވަޒީރެއްގެ މައްޗަށް އިތުބާރު ނެތްކަމަށް ފާސްވާނީ 39 މެމްބަރުންގެ ވޯޓު ލިބިގެންނެވެ.

ޖެނީވާގައި ހުންނަވާ ދިވެހިރާއްޖޭގެ ސަފީރުކަމުގެ މަގާމަށް އިރުތިޝާމް އައްޔަން ކުރުމަށް މަޖިލީހުން ރުހުން ދިނުން

ޖެނީވާގައި ހުންނަވާ ދިވެހިރާއްޖޭގެ ސަފީރުކަމުގެ މަގާމަށް ހ. އޯކިޑް އިރުތިޝާމް އާދަމް އައްޔަން ކުރުމަށް މަޖިލީހުން ރުހުން ދިނީ ނިމިދިޔަ ހަފްތާގައެވެ. މިމަގާމަށް އިރުތިޝާމް އައްޔަން ކުރުމަށް ފެންނަކަމަށް 50 މެމްބަރަކު ވޯޓު ދިން އިރު ނުފެންނަ ކަމަށް ވޯޓު ދީފައިވަނީ 2 މެމްބަރުންނެވެ.

ހުޅުހެންވޭރު ދާއިރާގެ މެމްބަރު ރީކޯ މޫސާ މަނިކު ހުށައެޅި ގަރާރު

ހުޅުހެންވޭރު ދާއިރާގެ މެމްބަރު ރީކޯ މޫސާ މަނިކު ވަރަށް މުހިއްމު މައްސަލައަކާއި ބެހޭ ގޮތުން ގަރާރެއް މަޖިލީހަށް ހުށައެޅީވެސް މިދިޔަ ހަފްތާގެ ތެރޭގައެވެ. މިއީ، 10 ޑިސެމްބަރު 1982 ވަނަ އަހަރު އދ އިން ގާއިމްކޮށްފައިވާ ކަނޑުތަކާބެހޭ ބައިނަލްއަގްވާމީ މުއާހަދާ “ކޮންވެންޝަން އޮފްދަ ލޯ އޮފް ދަ ސީ” ދިވެހި ސަރުކާރުން ތަސްދީގު ކޮށްފައިވުމާއެކު އެމުއާހަދާގެ 76 ވަނަ މާއްދާގެ 8 ގައިވާ ފަދައިން ކޮންމެ ގައުމެއްގެވެސް އެގައުމެއްގެ އައްސޭރިފަށުން ފެށިގެން 200 ނޯޓިކަލް މޭލަށް ވުރެ އިތުރަށް އެގައުމެއްގެ ކޮންޓިނެންޓަލް ޝެލްފްގެ ސަރަހައްދު ފުޅާވެގެންދާ ހާލަތުގައި އެތަފްސީލުތައް މުއާހަދާ ތަސްދީގު ކުރާތާ 10 އަހަރުތެރޭގައި އދ އަށް ހުށައެޅުމަށް އެމުއާހަދާގައި ވާތީ އެންމެ އިސް އެއް ޒިންމާކަމުގައި ނިންމަވާ މިމަސައްކަތް އެންމެ ފުރިހަމަ ގޮތުގައި ނިންމުމަށް ސަރުކާރަށް ގޮވާލާ މަޖިލީހުގެ ގަވާއިދުގެ 68 ވަނަ މާއްދާގެ (ބ) ގެ ދަށުން ހުށައެޅި މައްސަލައެކެވެ. މަޖިލީހުގެ އިއްތިފާގުން މި ގަރާރުވަނީ ހުށައެޅުއްވި ގޮތަށް ފާސްކޮށްފައެވެ.