ޤައުމީދުވަހު ހެނދުނު، މިރަށުގެ ދެ ޖަމުއިއްޔާއަކާއި ރަށުއޮފީސް ގުޅިގެން ބަނދަރު ފެހިކުރުމަށް އެއް އަހަރުދުވަހުގެ މަޝްރޫޢެއް ފެށިކަން ރަނގަޅެވެ. ހީވާގޮތުން، އަހަރެއްފަހުން މިހާރު ދޮންވެލިގަނޑެއްގެ ގޮތުގައި އޮތް ސަރަހައްދު އޮންނާނީ ރުކުން ފުރިފައެވެ. ހަމަ ބޮޑު ރުއްފަލަކަށްވެފައެވެ.

ރުއް އަހަންނަށް ކިތަންމެ ރީއްތިކަމަށްވިޔަސް، ރުކަކީ ތަނެއްފެހިކުރުމަށް، އަހަންނަށް އެހާ ހިތްގައިމު އެއްޗެއްނޫނެވެ. ފެހިކުރުމަށް، އަހަންނަށް ހަމަ އެންމެރީތީ ހިޔާދޭ ބިޔަ ގަސްގަހެވެ. ފެހިކުރުމަށް ފެށި މަސައްކަތުގައި ރުއް އިންދުމުން އަހަންނަށް ވިސްނުނީ، ވެށްޓަށް ލޯބިކުރާ، ފެހިކަމާއި ގަޔާވާ، ކުޅުދުއްފުށީ މީހުންވެސް ގަބޫލުކުރަނީ، ރާއްޖޭގެ އެހެން ރަށްރަށުގެ މީހުންފަދައިން، ބަނދަރެއްގައިވިއްޔާ އިންދަންވާނީ، ރުއްކަމަށެވެ.

ރާއްޖެތެރޭގެ ގިނަ ރަށްރަށުގެ ބަނދަރުގައި އިންދާފައިވަނީ ރުކެވެ. ކުޅުދުއްފުށީ ބަނދަރު، ފެހިވެފައި އޮންނައިރު އަހަރެން ދެކެން ބޭނުންވަނީ، ރާއްޖެތެރޭ އެހެން ރަށްރަށުގެ ބަނދަރުތަކާއި ތަފާތުކޮށެވެ. ކުރިންވެސް ބުނިގޮތަށް، ރުކަކީ ތަނެއް ފެހިކުރަން އިންދަން އެންމެ އެކަށީގެންވާ ގަހެއް ކަމަކަށް އަހަރެން ގަބޫލެއް ނުކުރަމެވެ. ރުކުގެ ހިޔަލަކީވެސް، ރުއް ސާފުނުކުރާނަމަ، ބޭނުންކުރެވޭނެ ހިޔަލެއް ނޫނެވެ. ތަނެއްފެހިކުރުމުން ލިބޭނެ އެންމެ ބޮޑު ހިތްހަމަޖެހުމަކީ ހިޔަލުން އެލިބޭ ހިތްހަމަޖެހުމެވެ.

ރުއްބަރިއެއް އިންދައި، މުޅި ބަނދަރު ސަރަހައްދު ރުއްފަލަކަށް ހެދުމުގެ ބަދަލުގައި، ވައި ނިވަލަކަށް ފުރަތަމަ ފިތުރޯނު ކަހަލަ ލޮނަށްގަދަ، އަވަހަށް ހެދި ބިޔަވާ ގަސްބަރިއެއް ޖެހުމަށްފަހު، އާއްމުކޮށް ރާއްޖޭގައިހެދޭ، އުސްކޮށް ބިޔަވާ ޒާތުގެ ގަސް، ވަކިތަރުތީބަކުން އިންދާނަމަ ބަނދަރު ސަރަހައްދު، އެއް އަހަރުފަހުން އޮންނާނީ ހާދަ ހިތްފަސޭހަކޮށް، ނަލަކޮންނޭ ހިތަށްއަރައެވެ.

އަހަރެން ރުއް އިންދުމާއި ސަތޭކަ ޕަސެންޓް ދެކޮޅުވެރިކަން ދައްކަނީއެއް ނޫނެވެ. އެކަމަކު، ރުއްފަލަކަށް ބަނދަރު ސަރަހައްދު ބަދަލުކޮށްފާނެތީ ނުރުހެވެނީއެވެ. ފަހަރެއްގައި، ޤައުމީދުވަހު ފެށި މަޝްރޫއަކަށްވާތީ ޤައުމީ ގަސް އިންދީ ކަމަށްވެސްވުން ގާތެވެ.

އުންމީދުކުރަނީ، ބަދަރު ސަރަހައްދުން ހިރުނދާއި، ކާންޏާއި ބިޔަ ރަނިކަގަހާއި ޅޮސްވެސް ފެންނާނެކަމަށެވެ. ފިތުރޯނުވެސް ފެންނާނެކަމަށެވެ. ރަށުގެ ބަނދަރާއި ދިމާ މަލަމަތި ވަރަށް އުސްކޮށް ފެހިކޮށް ފެންނާނެ ކަމަށެވެ. ބިޔަ ގަސްތަކުގެ ތެރެއިން ރުއްރުކުގެ ފަންތައް ހެލިލާތަންވެސް ފެންނާނެކަމަށެވެ.

ބަނދަރުފެހިކުރަން ބަޔަކު އިސްނަގައި މަސައްކަތް ފެށީތީ ޝުކުރިއްޔާއެވެ.