އިންޓަނޭޝަނަލް ކުރުމުގެ ވާހަކައިގެ ފެށުން

ހަނިމާދޫ އެއާފޯޓް އިންޓަރނޭޝަނަލް ތަނަކަށް ބަދަލުކުރުމުގެ ވާހަކަ ފެށުނީ ވަރަށް ފަހުންނެވެ. ރައީސް މައުމޫނުގެ ވެރިކަމުގެ ފަހު ފަސް އަހަރުގައެވެ. ހަނިމާދޫ އެއާފޯޓް އިންޓަރނޭޝަނަލް ތަނަކަށް ބަދަލުކުރުމުގެ ވާހަކަ އެންމެ ސާފުކޮށް އެންމެނަށް އަޑުއިވޭގޮތަށް ބުނުއްވީ، އައްޑު އަތޮޅު ގަމު އެއާޕޯޓް އިންޓަނޭޝަނަލްކޮށް ހުޅުވުމުގެ ރަސްމިއްޔާތުގެ ތެރޭގައި އޭރުގެ ކެބިނެޓް މެންބަރު ޑރ. މަހުމޫދު ޝައުޤީއެވެ. އޭރުވެސް، އެއީ ސިޔާސީގޮތުން ބުނަންޖެހިގެން ބުނިއެއްޗެއްކަން އުތުރުގެ އެންމެނަށް އެނގެއެވެ.

މައުމޫން ސަރުކާރުން ތަރައްގީގެ މުހިންމު މަޝްރޫޢުތައް ރާއްޖޭގެ ދެކުނުކޮޅަށް އަޅާ ބަރުކޮށްލުމުން، ދެކުނާއި އުތުރުގެ ރައްޔިތުންގެ ބޮލަކަށްޖެހޭ ފައިސާގެ މިންވަރު ތަފާތު ބޮޑުވެފައިވާކަން އެއީ ސަރުކާރާއި ރައްޔިތުން ދަންނަކަމެކެވެ. ވީމާ، އޭރު، މައުމޫން ސަރުކާރުގައި ތިއްބެވި ވެރިން ދެކުނުގައި ބޮޑު މަޝްރޫޢެއް ފަށައިފިކަމަށްވާނަމަ، ކޮންމެވެސް ކަމެއް އުތުރުގައިވެސް ކޮށްދެއްވާނެކަމަށް ބުނުއްވުން އެއީ މައުމޫން ސަރުކާރުގެ ޚާއްސަ ސިފައެކެވެ. ބޭނުމަކީ، ކޮންމެވެސް ވަރަކަށް ރައްޔިތުން ހައްދާލާފައި ބޭތިއްބުމެވެ.

ހަނިމާދޫ އެއާފޯޓް އިންޓަރނޭޝަނަލް ތަނަކަށް ބަދަލުކުރުމުގެ ވާހަކަ ފެށުނީ މިބުނި ގޮތަށް އުތުރު ހައްދާލާފައި ބޭއްވުމަށެވެ. ގަން އެއާޕޯޓް ތަރައްގީކޮށް ހުޅުވި ދުވަސްވަރަކީ ސިޔާސީގޮތުން ރާއްޖެ ބަދަލުކުރުމަށް އިދިކޮޅުފަރާތްތަކުގެ ފިއްތުން އިތުރު ވަމުން އައި ދުވަސްވަރުކަމުން، އުތުރުގެ ރައްޔިތުންވެސް ޝާމިލްވާގޮތަށް ހުރިހާ ރައްޔިތުން ފޮނި އުންމީދެއްގެ ތެޜޭގައި ބޭތިއްބުން ސަރުކާރަށް އޮތީ ވަރަށް މުހިންމުވެފައެވެ.

އަބަދުވެސް އޮންނާނީ ވޯޓުހޯދާ ވަސީލަތަކަށް

ނިމިދިޔަ ރިޔާސީ އިންތިޚާބުގެ ކެންޕޭންގެ ތެރޭގައި ހުރިހާ ޕާޓީތަކަކުންވެސް، އުތުރުގެ ރައްޔިތުން، ޚާއްސަކޮށް ހއ. އާއި ހދ. ގެ ރައްޔިތުންގެ ތާއީދު ހޯދުމަށް ދެއްކި އެއް ވާހަކަޔަކީ ހަނިމާދޫ އެއާޕޯޓް އިންޓަނޭޝަނަލްކުރުމުގެ ވާހަކައެވެ. ހަގީގަތުގައި ރިޔާސީ އިންތިޚާބުގެ ކެންޕޭނުގެވެސް ކުރިން، އާދެ، ސިޔާސީ ޕާޓީ ހުއްދަވުމާއެކު ޕާޓީ ދަތުރުތަކުގައި ދިއްދުއާއި، ވައިކަރަދޫއާއި ހަނިމާދޫގެ އިތުރުން ކުޅުދުއްފުއްޓަށް އައިސް އަހަރެމެން، އުތުރު މީހުންގެ ހިތް އަތުލުމަށް ދެއްކި އެއް ވާހަކަޔަކީ އެއާޕޯޓް ވާހަކައެވެ. ދެން ދެއްކީ އުތުރާއި ދެކުނުގެ ތަފާތުގެ ވާހަކައެވެ.

އަދުގެ ސަރުކާރުންވެސް މިހާރު ދައްކާ ވާހަކަޔަކީ ހަމަ އެއާޕޯޓް އިންޓަނޭޝަނަލްކުރާ ވާހަކައެވެ. ހަމަ އެންމެ ބޭނުމެއްގައެވެ.

ދެހާސް ބާރަ އަދި ދެހާސް ތޭރަ ވަނަ އަހަރު އިތުރު ކުލަ ފޮޓޯބޭނުންކޮށް ޕަވަރޕޮއިންޓް ޕްރެޒެންޓޭޝަންތަކާއިއެކު، ހަނިމާދޫ އެއާޕޯޓްގެ ވާހަކަ މިއަދުގެ ސަރުކާރުން އިތުރަށް ދައްކާނެއެވެ.

ހަގީގަތަކަށް ނުވާނެ ސަބަބުތައް

ހަނިމާދޫ އެއާޕޯޓް ހަގީގަތަކަށް ނުވާނެ އެންމެ މުހިންމު ސަބަބަކީ، އެއާޕޯޓް އިންޓަނޭޝަނަލްކުރުމުގެ ވާހަކަ ފެށުނީ، ވިޔަފާރިއާއި އިގުތިސާދީ ވިސްނުމެއްގެ ތެރޭން ކަމަށް ނުވުމެވެ. އެވާހަކަ ފެށުނީ އޭރުގެ ސަރުކާރުން، ހަމަހަމަ ފުރުސަތު ހޯދައިދެއްވާކަން ދެއްކެވުމަށް، އުތުރުގެ ރައްޔިތުންގެ ލޮލުގައި އެޅުވި އަނދުނެއްގެ ގޮތުގައެވެ.

ދެން އޮތީ ހަހާސް ޓޫރިސްޓް އެނދުގެ ވާހަކައެވެ. އެއާޕޯޓް ތަރައްގީކުރުމަށް އިސްނެގި އިންޑިޔާގެ ޖީއެމް އާރު ގުރޫޕަށް މިހާގިނަ ރިސޯޓް ދިނުމަށް، ރާއްޖޭގެ ޓޫރިޒަމް އިންޑަސްޓްރީގައި ހަރާކާތްތެރިވާ ބޮޑުން އެއްބަސް ނުވާނެކަން އެއީ، ހަމަ ޔަގީން ކަމެކެވެ. އެހެން ނޫނަސް، މިހާރުވެސް ބޭނުންކުރެވޭ ހާލަތުގައި އޮތް އެއާޕޯޓެއް ފެންވަރު މަތިކޮށްލުމަށް، ހަދިޔާއެއްގެ ގޮތުގައި ތިރީހަކަށް ރިސޯޓް ރަށް ދިނުން އެއީ ގިނަ މީހުން ރޫހޭނެ ގޮތެއް ނޫނެވެ. މިކަމުގައި ސަރުކާރަށް އަންނާނެ ޕްރެޝަރު ކުޑައެއް ނުވާނެއެވެ.

އަނެއްކޮޅުން އެއާޕޯޓް އިންޓަނޭޝަނަލްކުރުން އެއީ މިވަގުތު ވިޔަފާރީގެ ގޮތުން ބަލާއިރު ކުރުން މުސްތަހީލުކަމެކެވެ. އެއާޕޯޓް އިންޓަނޭޝަނަލް ކުރާކަމަށް ވާނަމަ، ގާތްގަނޑަކަށް ތިންހާސް ޓޫރިސްޓް އެނދު ނޫނީ ބޭރުން ފަސިންޖަރުން ހަނިމާދޫ އެއާޕޯޓަށް އަންނަން ބޭނުވާ ސަބަބުތައް އުފަންކުރުވަން ޖެހެއެވެ. މިވަގުތު މިސަރަހައްދުގައި އޮތީ ހަތަރު ރިސޯޓެވެ.

ހަނިމާދޫ އެއާޕޯޓް އިންޓަނޭޝަނަލް ކުރާނަމަ، ކަންކުރެވެން އޮތީ ދެގޮތަށެވެ. އެއް ގޮތަކީ މިހާރުގެ ރަންވޭގެ އޮރިއެންޓޭޝަން ބަދަލުކުރުމެވެ. އާދެ ރަންވޭ އޮތް މިސްރާބު ބަދަލުކުރުމެވެ. މިކަމަށް ބޮޑު ޚަރަދެއް ހިނގާނެއެވެ. ސަރުކާރުގައި ފައިސާއެއް ނެތެވެ. އަނެއްގޮތަކީ އެރަށުން މީހުން ބޭލުމެވެ. ހަނިމާދޫމީހުން އެރަށުން ފައިބަން އެއްބަސްވާވަރަށް ސަރުކާރަށް އެރަށުމީހުން ރުއްސުމުގެ ކުޅަދާނަކަން ލިބިގެންވޭހެއްޔެވެ.؟ ހަނިމާދޫ މީހުން އެރަށުން ފައިބާނީ މިހާރުގެ ދިރިއުޅުމަށްވުރެ ތަނަވަސް ދިރިއުޅުމެއްގެ ޔަގީކަން ސަރުކާރުން ދީގެންނެވެ. އެ ޚަރަދު ދެހާސް ތޭރަވަނަ އަހަރުގެ ކުރިން ސަރުކާރުން ކުރާނެ ކަމަކަށް ނުފެނެއެވެ. ސަބަބަކީ، ދައުލަތުގެ މާލީ ނުކުޅެދުންތެރިކަމެވެ.

އެއާޕޯޓް އޮންނާނެ ގޮތުގެ ޕޮޓޯތައް ހަމަ ދައްކާލުމާއެކު އެއީ ބިލާހެއްކަން އެންމެންނަށް ޔަގީންވެއްޖެއެވެ. މި ބުނި ފޮޓޯތައްވަނީ މިސައިޓްގައިވެސް ޖަހާފައެވެ. ފޮޓޯތަކަށް ބަލާއިރު ހުޅުލޭ އެއާޕޯޓަށްވުރެ އެތައް ގުނައެއް ފުރިހަމައެވެ. ކުއްޔަށް ނަގައިގެން ފައިދާ އާއިއެކު ހިންގެން އޮތް ހުޅުލޭ އެއާޕޯޓް ތަރައްގިކުރަން ބަޔަކު ނުވެގެން އުޅޭއިރު، ހުވަފެނުންވެސް ނުފެންނަފަދަ މޮޅުގޮތަކަށް ހަނިމާދޫ އެއާޕޯޓް ތަރައްގީކުރަން ބަޔަކު އައުން އެއީ، ވަރަށް ނާދިރުކަމެކޭ ބުނެވިދާނެއެވެ.

ދިވެހިން ކުރަމުންދާ ތަޖުރިބާގެ އަލީގައި ލަދުވެތިކަމާއިއެކު ބުނަންޖެހެނީ، މާލޭގައި ހުރި ވަސީލަތްތަކަށްވުރެ، ރަނގަޅު ވަސީލަތްތަކެއް ދުވަހަކުވެސް ރާއްޖެތެރޭގައި ގާއިމު ނުކުރާނެ ވާހަކައެވެ.

ދެކެވޭ ވާހަކައިގައި ސިއްރެއް އެބަ އޮތްތަ؟

އެއާޕޯޓް އިންޓަނޭޝަނަލް ކުރުމާމެދު މިހާރު ދެކެވޭ ވާހަކަތައް ތަޙްގީގު މޭޒު މައްޗަށް ގެނެސް ކުރުގޮތަކަށް ބަލާލަމާހެއްޔެވެ؟

ހަނިމާދޫ އެއާޕޯޓާއި ގުޅިގެން މިހާރު އެންމެ ބާރަށް ދެކެވޭ ވާހަކަޔަކީ، ޖީ.އެމް އާރު ކިޔާ، އިންޑިޔާ ކުންފުންޏަކަށް ހަހާސް ޓޫރިސްޓް އެނދު ތަރައްގީކުރަން ފުރުސަތުދޭވާހަކައެއް ނޫނެވެ. އެކަމަކު އެއާޕޯޓް ތަރައްގީކުރުމަށްޓަކައި، ހަނިމާދޫއިން މީހުން ބާލާ ވާހަކައެވެ.

ހަގީގަތުގައި މީހުން ބާލާ ވާހަކަ މިދައްކަނީ އެއާޕޯޓް ތަރައްގީނުކުރާންވެގެން، ހަނިމާދޫ ރައްޔިތުންގެ ބޮލަށް މައްސަލަ ކަނޑާލާ، ރަނގަޅު، ފެންހިފޭ، ބަހަނާއެއް ސަރުކާރުން ދައްކަންވެގެންނެވެ. ހަނިމާދޫ މީހުން އެހެން ރަށަކަށް ބަދަލުވެގެން އެއާޕޯޓް ތަރައްގީކުރުން އެއީ މުޅި ރާއްޖެއަށް އެންމެ މަންފާހުރިގޮތް ކަމަށްވިޔަސް، ހަނިމާދޫ ރައްޔިތުން ރަށުން ފައިބަން އެއްބަސް ނުވުމުން، އެއާޕޯޓް ތަރައްގީ ނުކުރެވުނީ ކަމަށް ސަރުކާރުން ދައްކަން ބޭނުންވަނީ ކަމަށް ލަފާކުރެވިދާނެއެވެ.

ހަނިމާދޫ ރައްޔިތުން ރަށުން ފައިބަން އެއްބަސް ނުވާ ހިސާބުން ސަރުކާރުން އެހެން ގޮތެއް ނޫނީ ހައްލެއް ރައްޔިތުންނަށް ހުށަހަޅާނެއެވެ. އެއީ އިންޓަނޭޝަނަލް އެއާޕޯޓް ހއ. އަތޮޅަށް ބަދަލުކުރުމެވެ. މިގޮތުން އެންމެ އެކަށީގެންވަނީ، ހއ. ހަތިފުއްޓާއި އެރަށުގެ ފަޅު، ނުވަތަ ހއ. ހުވަރަފުއްޓަށް ފަޅުހިއްކައިގެން އެއާޕޯޓް ބަދަލުކުރުމެވެ.

ހއ. އަތޮޅަށް އެމްޑީޕީ ސަރުކާރުގެ ލޯ އަބަދުވެސް ހުއްޓޭނެއެވެ. ސަބަބަކީ އެ އަތޮޅަކީ ހދ އާއި ށ. އަތޮޅާއި ޚިލާފަށް އެމްޑީޕީގެ ބާރު އެންމެ ގަދަ އަތޮޅެވެ. އެންމެ ބޮޑު ސަޕޯޓެއް އޮތް އަތޮޅެވެ. ރައްޔިތުންގެ މަޖިލީހުގައިވެސް އެމްޑީޕީ ތަމްސީލުކުރާ ގިނަ މެންބަރުން އައިސްފައި ވަނީ ހއ. އަތޮޅުންނެވެ. އަނެއްކޮޅުން އެމްޑީޕީގައި ހިމެނޭ ހއ. އަށް ނިސްބަތްވާ މެންބަރުންނާއި އެކްޓިވިސްޓުންނަކީ ނަގާކިޔާ ހަރަކާތްތެރި ފަރާތްތަކެވެ.

ބައެއް ފަރާތްތަކުން ގަބޫލްކުރާ ގޮތުގައި ހަނިމާދޫ އެއާޕޯޓާއި ގުޅުވައިގެން މިހާރު ދެކެވޭ ވާހަކައިގެ ފަހަތުގައިވާ ސިއްރަކީ މިއެވެ.