މިޔަރާއި މިޔަރުން އުފައްދާ ބާވަތްތަކުގެ ވިޔަފާރި ކުރުމާއި އެތަކެތި އެކްސްޕޯޓް ކުރުން 2010 ޖުލައި 1 ވަނަ ދުވަހުން ފެށިގެން މަނާކުރެއްވުމަށް ވަޒީރުންގެ މަޖިލީހުން މިއަދު ނިންމަވައިފިއެވެ. ރައީސް އޮފީހުން މައުލޫމާތު ދޭގޮތުގައި މިކަން މިގޮތަށް ނިންމެވީ ނައިބު ރައީސް ޑޮކްޓަރ މުޙަންމަދު ވަޙީދު ރިޔާސަތު ބެލެހެއްޓެވި އެމަޖިލީހުގެ މިއަދުގެ ޖަލްސާގައި މިކަމާބެހޭގޮތުން މެންބަރުން މަޝްވަރާ ކުރެއްވުމަށްފަހުގައެވެ.

ހުސްވި ފެބްރުއަރީ މަހުގެ 23 ވަނަ ދުވަހު ބޭއްވެވި އެމަޖިލީހުގެ ޖަލްސާގައި 2010 މާޗް މަހުގެ 1 ވަނަ ދުވަހުން ފެށިގެން މިޔަރުގެ މަސްވެރިކަން ކުރުން މުޅިން މަނާކުރެއްވުމަށް ނިންމަވާފައިވާ ނިންމެވުމާމެދު މެންބަރުން މަޝްވަރާ ކުރެއްވުމަށްފަހު، މިކަމާގުޅޭ ކަރުދާހެއް ތައްޔާރު ކުރައްވައި 14 ދުވަހުގެ ތެރޭގައި ވަޒީރުންގެ މަޖިލީހަށް އަލުން ހުށަހެޅުއްވުމަށްވަނީ ނިންމަވާފައެވެ.

މި ގޮތުން ތައްޔާރުކުރެއްވި ކަރުދާހާބެހޭގޮތުން މިއަދުގެ ޖަލްސާގައި މެންބަރުން ވާހަކަފުޅު ދައްކަވައި، 2010 މާޗް މަހުގެ 1 ވަނަ ދުވަހުން ފެށިގެން މިޔަރުގެ މަސްވެރިކަން ކުރުން މަނާކުރެއްވުމަށް ނިންމަވައި އެ ނިންމެވުމާ އެއްގޮތަށް ޢަމަލުކުރެއްވުމަށް ކަނޑައެޅުއްވީ ކަމަށް ރައީސް އޮފީހުގެ ބަޔާނުގައި ވެއެވެ. އަދި މިޔަރުގެ މަސްވެރިކަން ކުރަމުންދާކަމަށް މިނިސްޓްރީ އޮފް ފިޝަރީޒް އެންޑް އެގްރިކަލްޗަރަށް ފާހަގަކުރެއްވިފައިވާ ފަރާތްތަކަށް، އިޤްތިޞާދީ އެހެން މަސައްކަތެއް ކުރުމަށް ނުވަތަ އެހެން ބާވަތެއްގެ މަސްވެރިކަމަކަށް އަހުލުވެރިކުރުވުމަށް އެހީތެރިކަން ފޯރުއްވައިދެއްވުމާއެކު، 2010 ޖުލައި 1 ގެ ފަހުން މިޔަރުގެ އެއްވެސް ބާވަތެއްގެ ވިޔަފާރިއާއި އެކްސްޕޯޓް ކުރުން މަނާކުރެއްވުމަށް ނިންމެވީކަމަށް ރައީސް އޮފީހުން ހާމަކުރެއެވެ.