މިދިޔަ އަހަރު ނިމެން އުޅެނިކޮށް، ގުރޭޑް ހަތެއްނިންމި ކުއްޖަކު، ޖަލާލުއްދީން ސުކޫލަށްގޮސް ކިޔަވަންވީ ކޮންސްޓްރީމެއްހޭ އަހަރެންގާތު އެހިއެވެ. އެކުއްޖާއަކީ އެންޓުރެންސް އިމްތިހާނުން ވަރަށް ރަނގަޅުނަތީޖާއެއް ހޯދި ކުއްޖެކެވެ. އަހަރެން އެހީ ކިޔަވަންބޭނުމީ ކޯޗެއްހޭ އެވެ. އެނާބުނީ ކޮމާސް ކަމަށެވެ. ކިޔަވަން ބޭނުން ދާއިރާއަކުން ކުރިއަށް ދިޔުމަށް އަހަރެންބުނީމެވެ. ފަހުންބަދަލުކުރަންޏާ، އުނދަގޫވާނެކަމަށް ބުނީމެވެ.

ދާދި އިހަށްދުވަހު އެކުއްޖާއާއި ދިމާވެގެން ‘ކޮބާ ކިޔެވުންގަނޑު ކިހިނެއްހޭ’ އަހާލުމުންބުނީ، ‘ވަރަށް ސަކަރާތްކަމަށާއި، ސުކޫލުން މަށަށް ‘ދިނީ’ ސައިންސް’ ކަމަށެވެ.

ސެކަންޑަރީ ތައުލީމު ރާއްޖޭގައި ކިޔަވައިދޭން ފެށުނީންސުރެވެސް، ކިޔަވާދެމުން އަންނަނީ ތިން ސްޓިރީމްއަށެވެ. ސައިންސް، ކޮމާސް، އަދި އާރޓްސް ސްޓްރީމްއަށެވެ. ކިޔަވާދަރިވަރުން، އެކުދިންގެ ހަޔާތުގައި އެންމެ ފުރަތަމަ ނަގަންޖެހޭ ނުވަތަ ނަގާ އެންމެ މުހިއްމު އެއް ޑިޝިޝަނަކީ ގުރޭޑު 7 ކަށްފަހު، ދެން ކުރިއަށް ދާނެ ރޮގެއް ޚިޔާރުކުރުމެވެ. މަތީ ތައުލީމުގެ ހަޔާތާއި، މަސައްކަތުގެ މައިދާނަށް ނުކުމެ، މަސައްކަތުގެ މާހައުލުވެސް ބިނާވެގެން ދާނީ އެކުދިން އެދުވަހު ޚިޔާރުކުރާ ސްޓިރީމެއްގެ މައްޗަށެވެ.

ކިޔަވާނެ ރޮނގެއް ނުވަތަ ސްޓްރީމެއް ޚިޔާރުކުރުމަކީ، ކުއްޖާއަށް ނުލާހިކު މުހިއްމުކަމަކަށް ވެފައިވީ ނަމަވެސް، ބައެއް ސުކޫލްތަކުން މިކަމުގައި ގެންގުޅެނީ ވަރަށް އެހެންކަހަލަ އުސޫލެކެވެ. ސުކޫލުގެ މަސްލަހަތު އިސްކޮށް، ކުއްޖާކުރިއަށް ދާން ބޭނުން ނުވާދާއިރާއަކަށް، ކުއްޖާވެއްދުމަށް ނުސީދާގޮތަކަށް ނަމަވެސް ބައެއް ސުކޫލްތަކުން މަސައްކަތްކުރެވެ. މިކަމުގައި ކުޅުދުއްފުށީގައި ހުރި ހަމައެކަނި ސެކަންޑަރީ ސްކޫލްކަމުގައިވާ، ޖަލާލުއްދީން ސުކޫލްވެސް މިހާރަކަށް އައިސްދަނީ ހިމެނެމުންނެވެ.

މިދިޔަ އަހަރު ގުރޭޑް 7 ނިންމާ، ފަހު އިމްތިހާނުހެދި، ކުޅުދުއްފުށީގެ ޕްރައިމަރީ ދެސުކޫލުގެ ކުދިންގެ ތެރިން ސައިންސް ސްޓްރީމަށް ނަގާފައިވަނީ އެންމެ މޮޅެތިކުދިން ސީޑްކޮށް ތަރުތީބުންނެވެ. އަދި ކޮމާސް ސްޓީރަމަށް ނިސްބަތުން އެއާއި ޖެހިގެންތިބި ކުދިންނެވެ. ނޭނގޭމީހަކު ބުނާނީ، ހުރިހާ މޮޅެތިކުދިން ކިޔަވަން ބޭނުންވީ ސައިންސުކަމުގައެވެ. ނަމަވެސް، ހަޤީޤަތަކީ، ސައިންސްގެ މާއްދާތަކަކީ، އޭގެ ވަރަށްބޮޑުބައެއް ފޮތާއި އެކިއެކި ތިއަރީތަކާއި ފޯމިއުލާތަކަށް ބިނާވެފައިވާ މާއްދާތަކަކަށް ވުމުގެ ސަބަބުން، އެމާއްދާތަކުން ކުދިން މާއްދާތަކުން ހޯދާ ނަތީޖާރަނގަޅުވުމެވެ. އެހެންގޮތަކަށް ބުނާނަމަ، ސުކޫލުގެ ނަތީޖާވެސް ރަނގަޅުވުމެވެ. ސުކޫލުން ހޯދާ އޭ ގުރޭޑުތައް ގިނަވުމެވެ. އޭގެބަދަލުގައި ކޮމާސް އަދި އާރޓްސް ސްޓްރީމަކީ، ހާއްސަކޮށް ކޮމާސް އަދި އިކޮނޮމިކްސް އަކީ ބޮޑަށް ލިޔުންތެރިކަމުގެ ހުނަރަށް ބިނާވެފައިވާ މާއްދާތަކަށް ވާއިރު، ގިނަކުދިންނަށް އެމާއްދާތަކުން ރަނގަޅު ނަތީޖާހޯދަން އުނދަގޫވުމެވެ. ނިސްބަތުން ދަށްކުދިންނަށް އެސްޓްރީމްތައް ދިނުމުން ނަތީޖާދާނީ ބޮއްސުންލައިގެންނެވެ. ހަގީގަތަކީ ގިނަކުދިންނަށް ރަނގަޅު ނަތީޖާ ހޯދަން އުނދަގޫވިޔަސް، އެކުދިންގެ ހިތުގައި މާއްދާތަކަށް އޮންނަ ޝައުގުވެރިކަން ކުޑަ ނޫންކަމެވެ.

މިއީ ފަހަރެއްގައިވެސް، ސްޓްރީމްތަކުގެ ތަފާތުކުރުން އަންނަންވީ ސަބަބެއްކަމުގައި އަހަރެންނުދެކެމެވެ. ނިސްބަތުން މޮޅެތިކުދިންނަށްވެސް، އެކުދިން ކުރިއަށްދާން ބޭނުންވާ ރޮނގަކުން ކުރިއަށް ދިޔުމަށް ފުރުސަތުދޭން ޖެހޭނެއެވެ. ސުކޫލަށް ލިބޭނެ، އޭ ގުރޭޑްތަކަކަށްޓަކައި ކޮމާސްކިޔަވަންބޭނުންވާ ކުދިންގެ ހުވަފެންތައް ގުރުބާންވިޔަދީގެން ނުވާނެއެވެ.

މިއީ އަހަރެން ޖަލާލުއްދީން ސުކޫލުންކިޔެވި އިރު މިކަން އޮތްގޮތެއްނޫނެވެ. މިވާގޮތެއް އޮޅުން ފިލުވުމަށް ޖަލާލުއްދީން ސްކޫލުން ބަހެއްލިބޭތޯ ބެލީމެވެ. ސްކޫލަށް ގުޅާ ތަންކޮޅެއް ސީނިއާރ މީހަކާއި ވާހަކަދައްކާލީމެވެ. އެބޭފުޅާ ވިދާޅުވީ ސްކޫލަށްވަންނަ ކުދިންނަށް ސްޓްރީމްތައް ދެނީ ކަނޑައެޅިފައިވާ ވަކި އުސޫލަކުން ކަމަށެވެ. އަދި ސްޓްރީމެއް ޚިޔާރުކުރުމަށް އެކުދިންނަށް އެއްފުރުސަތަށްވުރެ ގިނައިންދޭކަމަށެވެ. އަދި ކުދިންބޭނުންވާ ތަރުތީބުން އެކުދިންނަށް ސްޓްރީމްތައް ދިނުމަށް އިސްކަންދެވޭކަމަށެވެ. ނަމަވެސް، ވިދާޅުވީ ކުދިންބޭނުންނުވާ ސްޓްރީމްތައް ކުދިންނަށް ނުލިބުމުގައި ‘އެހެނިހެން’ ކަންކަމުގެ ނަތީޖާއަށް ބެލޭކަމުގައެވެ.

ކަންތައްތައް ކޮންމެގޮތަކަށްހުރި ނަމަވެސް، ހަގީގަތަކީ މިއަހަރުވެސް ކޮމާސް ސްޓްރީމް ދީފައިވާ ކުދިންގެ ނަތީޖާ ސައިންސުކުދިންނަށްވުރެ ނިސްބަތުން މާބޮޑަށްވެސް ދަށްކަމެވެ. ސްކޫލުންބަލާ އެހެނިހެން ކަންކަމާއިމެދު ސުވާލު އުފެދެއެވެ. ސްޓްރީމްތަކަށް ކުދިންނަށް ހަމަހަމަ ފުރުސަތުތަކެއް ދިނުމަށް ސްކޫލްބޯޑުގެ ފަރާތުން އަހަރެންއެދެމެވެ. ކުދިންނަށް ހެޔޮއެދޭ ފަރާތެއްގެ ގޮތުންނާއި، މުސްކުޅިދަރިވަރެއްގެ ހައިސިއްޔަތުންނެވެ. }{