ހުކުރު ދުވަހު ފެށުމަށް ހަމަޖެހިފައިވާ ފީފާ ވޯލްޑްކަޕަށް ކުޅުދުއްފުށީގެ ކްލަބް ޖަމިއްޔާތަކާއި އަމިއްލަ ފަރާތްތަކުން ތައްޔާރުވަމުން އެބަދެއެވެ. މިގޮތުން އެކި ހިސާބުތަކުގައި ބޮޑު ސްކްރީން ބެހެއްޓުމާއި، ތަންތަނުގައި ޓެންޓް ޖެހުމާއި، ފާރުތަކުގައި ވޯލްޑްކަޕާއި ގުޅޭ ކުލަތަކާއި ގައުމުތަކުގެ ދިދަ ކުރަހާ ޒީނަތްތެރިކުރަމުން އެބަދެއެވެ.

މިގޮތުން ކުޅުދުއްފުށީ ޒިގުޒެގް ފޯ ޔޫތު ލިންކޭޖްގެ ޒުވާނުން އިސްނަގައިގެން ކުޅުދުއްފުށީ ރަސްމީ ބޯޅަދަނޑުގައި ޓެންޓެއް ޖެހުމުގެ މަސައްކަތްތައް މިހާރު ދަނީ ކުރަމުންނެވެ. މިތަނުގައި ބޮޑު ސްކްރީން ބަހައްޓައިގެން މެޗުތައް ބެލުމުގެ އިންތިޒާމު ހަމަޖައްސާނެކަމަށް އެފަރާތުން މައުލޫމާތު ލިބިފައިވެއެވެ. އަދި މީގެއިތުރުން ޒިގްޒެގްގެ ފަރާތުން އިންތިޒާމްކޮށްގެން ވޯލްޑްކަޕް ގެ މެޗުތަކުން ރޭގަނޑު ކުޅެވޭ ދެމެޗު ދޭތެރެއިން ޕީއެސްޓޫ މުބާރާތެއް ބޭއްވުމަށް ހަމަޖެހިފައިވެއެވެ. އަދި މިތަނުން ކެންޓީނުގެ ހިދުމަތް ލިބެން ހުންނާނެ ކަމަށް ވެސް ޒިގްޒެގްއިން ހާމަކުރެއެވެ.

ރަސްމީ ބޯޅަދަނޑު ސަރަހައްދުގެ އިތުރުން ސުފުރާމަތި ރެސްޓޯރަންޓުގެ ފަރާތުންވެސް ދަނީ އެތަނުގެ ދެކުނުން އޮންނަ ހުސްބިމުގައި ވޯލްޑްކަޕްމެޗްތައް ދެއްކުމުގެ ތައްޔާރީތަކެއް ވަމުންނެވެ.