އަހަރެން މާލެއިން ފުރައިގެން ކުޅުދުއްފުއްޓަށް ކުރި އެންމެ ދިގު ދަތުރަކަށްވީ ހަފުތާއެއްގެ ތެރޭ ކުރެވުނު ދަތުރެވެ. އެއީ ބޯޓުގެކަމަރާގެ މަތީގައި، ލޮނުން ތަތްތެޅި، ވާރެއިން ފޯވެ، އަވިން ފިހެވިގެން ކުރެވުނު ދަތުރެކެވެ. ރަށަށް އައިސް ދެދުވަސް ވީއިރު މޫނުމަތިން ވަނީ ހަންފޮޅިފައެވެ. މި ނޫނަސް ވަރަށް ހާލުގައި، އަހަރެން ދަތުރުކުރީމެވެ. ނަމަވެސް އެއީ އެދުވަހެވެ. އެވާހަކަ އިހަށް ބާއްވަމާ ހިނގާށެވެ.

ކުޅުދުއްފުށީ ބޯޓެއްގައި އަރާމުގައި ދަތުރުކުރުމަށް އެޅޭނެ އެންމެ ބޮޑު ހުރަހަކީ ‘ކަނޑަށް ބަލިވުމެވެ.’ އާދެ، ބޯއެނބުރުމާއި ހޮޑުލެވުމެވެ. ވީމާ ބޯޓުމައްޗަށް އަރުވާނެ އިތުރު ބާލީހާއި، ރަޖާގެ ވާހަކައެއް މި ކުރު ލިޔުމުގައި ނުލިޔާނަމެވެ. ބޯޓުން ލުއިކާނާއާއި ބުއިމާއި ލިބެންހުރެއެވެ. މިހެންވެ، އެ އެއްޗެހީގެ ވާހަކައެއްވެސް ނުލިޔާނަމަވެ.

ކުޅުދުއްފުށީ ބޯޓުފަހަރުގައި ހޮޑުލުމާއި ފާޚާނާކުރެވޭނެ އިންތިޒާމްކުރެވިފައި ވީނަމަވެސް އަދިވެސް ކަނޑަށް ބަލިވުމަކީ ދަތުރުމަތީގައި ދިމާވާ ވަރަށް ބޮޑު މައްސަލައެކެވެ.

ދަތުރުމަތީގައި މީހަކު ބޯއަނބުރާ، ހޮޑުލައި، ބޯ ހިއްލާލަން ނުކެރި، ދެމިފައިއޮންނަންޖެހުމުން، އެކުރެވޭ އިޙްސާސަކީ، ލިޔުމަކުން، ބަޔާންކުރެވޭ ވަރަށްވުރެ، ހިތި އިޙްސާސެކެވެ. އެހެންކަމުން ދަތުރުމަތީގައި އެފަދަ ޙާލަތަކަށް ނުގޮސް ސަލާމަތްވާނެ ގޮތަކާމެދު ކަލޭ ފިކުރުކުރާނެއެވެ. ކަނޑުމަގުން ކުރާ ދަތުރުތަކުގައި ބަލިވާބަލިވުމަށް ފަރުވާގެ ގޮތުގައި ކުރެވިދާނެ އެތައްކަމެއްވެއެވެ. ބަލިނުވެ ސަލާމަތްވެވިދާނެ ވެސް އެތައް ގޮތެއް ވެއެވެ.

އެއްބަޔަކަށް ބޮނބިނަރެއްގައި ގޮށެއްޖަހައި، އަނގަޔަށްލުމުން ހޮޑުލުމަށް ލުއިކަމެއް ލިބޭހެން ހީވާއިރު، އަނެއްބައި މީހުނަނަށް ކަރަންފުލަކީ، އެންމެ މޮޅު ޙަކީމަށްވެގެން އުޅެފާނެއެވެ. ތަވީދަކީ ކަމަށް އޮތް އެންމެ މޮޅު ފަންޑިތަކަމަށް ގަބޫލުކުރާ މީހުންވެސް އުޅެއެވެ. ނަމަވެސް މިލިޔުމުގައި ބޮނބިނަރާއި، ކަރަންފުލާއި ތަވީދުގެ ވާހަކަ ތަފުސީލުކުރާކަށް ގަސްތެއް ނުކުރަމެވެ.

މިވެނި، އެވެނި ގޮތެއް ހަދައިފިނަމަ، ބޮލެއް ނުއަބުރާނޭ، ހޮޑެއްނުލެވޭނޭ، ކަމަށް ބައެއް މީހުން ހުވާކޮށްފައި، ބުނާއިރު، އަނެއްބައި މީހުންނަށް އެއީ އެއްވެސް ތާކުންތާކުޖެހޭ ގޮތަކަށް ނުވެއެވެ. ވީމާ، ވިސްނަންވީ ނުކުތާއަކީ، ތިމާޔަށް އެންމެ ރަނގަޅުގޮތް ފެންނަންދެން ތަފާތު އުކުޅުތަކާއި ފަރުވާ ތަޖުރިބާކުރުމެވެ.

އެންމެ ފުރަތަމަ ކަމަކަށް ބޯޓަށް އެރުމުގެ ކުރިން ރަނގަޅަށް ކާށެވެ. ފުރަންޖެހޭނީ، ބަނޑުވެސް ފުރައިގެންނެވެ. ނަމަނަމަ، ހައިބަނޑާހުރެ ދަތުރަށް ނުފަށާށެވެ. ކާއިރު ވިސްނަންވީ، ތެޔޮ އެއްޗެތި ނުކެއުމަށާއި އެސިޑްގެ މިންވަރު ވީހާވެސް ދަށް ކެއުން ކެއުމަށެވެ. މިގޮތުން ދޮންކޭލާއި ބަނަހާއި، ކިރު އަދި ފޮނިރޮށި ވަރަށް ރަނގަޅުވާނެއެވެ.

ފޮނިރޮއްޓަކީ ކުޅުދުއްފުށީ މީހުން ކަނޑުމައްޗަށް އަރާއިރު ވަރަށްގިނައިން ކުރީގައި ގެންދާ، އަހަރެންނަށް ވަރަށް މީރުވެސް އެއްޗެކެވެ. މި ޒަމާނުގެ ޒުވާނުންނަށް ފޮނިރޮށިކެއުންވެސް އެއީ ފަހަރެއްގައި ރަށުގެ ނާތަހުޒީބު ޢަމަލަކަށް ވެދާނެއެވެ. ނަމަވެސް ފޮނިރޮށްޓަކީ ދަތުރުމައްޗަށް ހަމަ އެއްވަނައިގެ އެއްޗެކެވެ.

ދަތުރަށް ފެށުމުގެ ކުރިން ރަނގަޅަށް އަރާމުކުރާށެވެ. ވަރުބަލިކަން މަތީހުރެ ކަނޑުމައްޗަށް އެރުން ރަނގަޅެއްނޫނެވެ. ސަބަބަކީ ދަތުރުކުރުން އެއީ، ބުރަކަމެކެވެ.

ދަތުރަށް އެރުމުގެ ކުރިންނާއި ދަތުރުމަތީ ގިނަގިނައިން ފެންބޯށެވެ. އަހަރެމެންނަށް ވާގޮތަކީ ދޯއްޔަށް (ފާޚާނާއަށް) ދާންޖެހިދާނެތީ ފެންވެސް ނުބޮނީއެވެ. ފެނުގެ އިތުރަށް ދިޔާ ތަކެތި ބޯށެވެ. ދަތުރުމަތީގެ ފަރުވާއަކަށް އިނގުރުލައިފައި ހުންނަ އެއްޗެއް ބޭނުންކުރުމުން (މިސާލަކަށް ބައެއްވައްތަރުގެ ބިސްކޯދު) މޭނުބައިކުރުން ކަންޓްރޯލް ވެދާނެއެވެ. ވިޓަމިން B-6 އަކީ ވެސް މިކަމަށް ބޭނުންކުރެވިދާނެ ވިޓަމިނެކެވެ. މޭނުބައިކުރުން މަތަކުރުމަށް ވިޓަމިން B-6 ބޭނުންކުރާއިރު ދުވާލަކު 10 އާއި 25 މިލިގުރާމަށްވުރެ އިތުރު ނުކުރާށެވެ.

މޭނުބައިކުރާގޮތްވާނަމަ، އަތުގެ ކުޑަހުޅުގައި އަޅާ ބޭންޑްވެސް މިހާރު ހުރެއެވެ. މި ބޭންޑް އެޅުމުން އަތުގެ ވަކި ހިސާބަކަށް ޕްރެޝަރުކުރުމުން މޭނުބައިކުރުން ރަނގަޅުކޮށްދޭކަމަށްވެއެވެ. މީގެ ބޭންޑް، ބަޔޯބޭންޑް.ކޮމް އިން ލިބެން އެބަހުއްޓެވެ. ބައެއްމީހުންނަށް އަތުކުރީގައި އަޅާ ބޭންޑް އެއީ ތަވީދާއި، އަނގަޔަށް ލާ ބޮނބިނަރު ފަދަ އެއްޗަކަށް ވުން ވެސް ހަމަ އެކަށީގެންވެއެވެ.

މޭނުބައިކުރުން ހައްލުވާ ޒާތު ބޭހެއް ބޭނުންކުރާށެވެ. މިގޮތުން އެންޓިހިސްޓަމިންސް ގެ ތެރޭގައި ހިމެނޭ ބޮނައިން އާއި ޑްރެމަމައިން ބޭނުންކުރެވިދާނެއެވެ. ޑްރެމަމައިން ބޭނުންކުރުމުން ނިދިއަންނަގޮތްވާނެއެވެ. ނަމަވެސް ބޮނައިން ބޭނުންކުރުމުން މި މައްސަލަ ދިމާނުވެއެވެ. މިހާރު ޑްރެމަމައިން ވެސް ނިދި ނާންނަގޮތަށް އުފައްދައިފިއެވެ. ދަތުރަށް ފެށުމުގެ ގާތްގަނޑަކަށް ދެގަޑިއިރު ކުރިން ބޭސް ބޭނުންކުރަން ފަށާށެވެ. ސްކޮޕޮލޮމައިން އަކީ ވެސް ކަނޑުމައްޗަށް ބަލިނަމަ ބޭނުންކުރެވިދާނެ ބޭހެކެވެ. މިބޭސް ދެގޮތަކަށް މިހާރު ލިބެންހުރެއެވެ. އެއީ ކަންފަތުގެ ފަހަތުގައި ތަތްކުރާ ޕެޗެއްގެ ގޮތުގަޔާއި ބޭސްގުޅައެއްގެ ގޮތުގައެވެ.

އިންޒާރެއްގެ ގޮތުގައި ބުނަމެވެ. މިއިން ކޮންމެ ބޭހެއްވެސް ބޭނުންކުރުމުގެ ކުރީން ޑަކްޓަރެއްގެ ލަފާހޯދަންޖެހޭނެއެވެ.

ދަތުރަށް އެރުމަށް ފަހު، ކަމަރާގެ ތެރޭ އަބަދު ނޯންނާށެވެ. އެހެން ފަސިންޖަރުންނަށް އުނދަގޫ ނުވާނޭހެން ހެލިފެލިވެ އުޅޭށެވެ. މިގޮތުން ކަމަރާގެ ފުރާޅު މައްޗަށްވެސް އެރިދާނެއެވެ. ހަނދުވަރު ނުދިނަސް، އުޑުމަތި ސާފު ކަޅުފޮއިރޭގަނޑުވެސް، ކަމަރާގެ ފުރާޅުމަތި ވަރަށް ހިތްގައިމުވާނެއެވެ. ފުރާޅުމައްޗަށް އަރަން ބޭނުން ނޫންނަމަ، ކަމަރާގެއިން ނުކުމެ ބޯޓުގެ ކޮންމެވެސް ހިސާބެއްގައި އިރުކޮޅަކު މަޑުކޮށްލެވިދާނެއެވެ. ނަމަވެސް އިންޖީނުގެ ދުމާއި،ވަސް ނުޖެހޭ ހިސާބެއްގައި ހުންނަން ހަނދާން ބަހައްޓާށެވެ. ބޯޓްގެ ދިރުބާކޮޅަށް ގޮސް އިނދެ، އެހެން ފަސިންޖަރަކާއި އަނގަތަޅާލައި، ބިސްކޯދެއް ކާލައި ހަދާށެވެ. ބިސްކޯދުފަދަ ދަތުގައި ތަތްލާއެއްޗެއް ކައިފިނަމަ، ދަތްއުނގުޅަން ހަނދާން ބަހައްޓާށެވެ. ނޫނީ، އަނގަނުބައިވެ ދަތުރު ޚަރާބުވެދާނެއެވެ.

ބޯޓްތެރޭ އުޅޭއިރު ފަޅުވެރިންގެ ލަފާހޯދާށެވެ. ދަތުރަށް ފެށުމާއިއެކު އުޅެނީ ކަނޑުމަތީގައި ކަން އަބަދުވެސް ހަދާންކުރާށެވެ.

އަމާން، އުފާވެރި ދަތުރަކަށް އެދެމެވެ.