އަހަރެމެންގެ ތެރެއިން ކޮންމެ މީހަކީވެސް އެމީހެއްގެ އަމިއްލަ ހަށިގަނޑު ރީއްޗަށް ބެހެއްޓުމަށް ސަމާލުކަން ދޭ މީހެކެވެ. މިހެން ބުނުމުން ކޮންމެ މީހަކުވެސް މިކަމަށް ސަމާލުކަން ދޭހެއްޔޭ ތިބޭފުޅުން ސުވާލުކޮށްފާނެއެވެ. އެހެންވިއްޔާ ބުނަލަން އޮތީ ބަޔެއްމީހުން ސަމާލުކަންދެއެވެ. އަނެއްބައިމީހުން ތިމާގެ ހުރި ކަންނެއްކަމުގެ ސަބަބުން ހަށިގަނޑަށް ވާނެ އެއްޗެއްވާން ދޫކޮށްލައިގެން ނުތިބެޔެކޭ ނުބުނެވޭނެތާއެވެ. އަހަރެމެން ބޮޑެތިވަމުން އައިއިރު “ރާންބޯ” މެން ވެލިބަސްތާ ކޮނޑު ޖަހާލައިގެން ދާއިރު އޭނާ ގަޔަށް އެރާލާފައި ހުންނަ ކަޓުތައް ލިބޭނެބާއޭ ހިތަށް އަރައެވެ. ނުވަތަ އެފަދަ ހަށިގަނޑެއް ބައްޓަން ކުރެވިދާނެބާއޭ ހިތަށް އަރައެވެ.

ރީތި ހަށިގަނޑެއް ހޯދުމަށް ކޮންމެ މީހެއްވެސް ކުރާ ދަތުރުގައި އެކި މީހުން ޚިޔާރު ކުރަނީ އެކި އޮޑިއެވެ. ބަޔެއްމީހުން ފިޓްނަސް ސެންޓަރެއްގައި މެމްބާޝިޕް ހަދައެވެ. އަނެއްބައިމީހުން އައުޓްޑޯ ކޮންމެވެސް ކުޅިވަރެއް ކުޅެން އާދަކުރެއެވެ. ހަށިގަނޑު ރީތިކުރުމަށް މޫދަށް އެރި ފަތާމީހުންވެސް މަދެއްނޫނެވެ.

ފިޓްނަސް  ސެންޓަރަކަށް ދިޔުން

ހަށިގަނޑު ބައްޓަޏްކުރުމަށް ފިޓްނަސް ސެންޓަރަކަށް ދިޔުމަކީ ކޮންކަހަލަ ކަމެއްހެއްޔެވެ؟ ނުވަތަ ޖިމް އަކަށް ކޮންމެހެން ދާންޖެހޭހެއްޔެވެ؟ މިކަމުގައި އެކިމީހުންގެ ޚިޔާލު ތަފާތެވެ. ބައެއް މީހުން ބުނާގޮތުން ޖިމް އަކަށް ނުދިޔަކަމުގައި ވިޔަސް ވޯކައުޓަށް ބޭނުންވާ މަދުއެއްޗެއް ގަނެގެން ގޭތެރޭގައި ވެސް ކަސްރަތު ކުރެވިދާނެއެވެ. ކޮންމެހެން މަހަކު ބޮޑު އަދަދެއް ދައްކާފައި ޖިމްއަކަށް ދާކަށް ނުޖެހެއެވެ.

ނަމަވެސް ޖިމްއަށް ދާމީހުންގެ ނަޒަރުން ވިސްނާއިރު ތަފާތެވެ. ކޮންމެ ދުވަހަކުވެސް ވަކިގަޑިއެއްގައި ތަނަކަށް ދާން ޖެހުމުން ތިމާގެ ޝެޑިއުލް އެގޮތަށް ރާވާލާ އެގޮތް އާދައަކަށް ބަދަލުކޮށްލެވެއެވެ. ކޮންމެ މަހަކު ވަކިވަރެއް އެތަނަށް ދައްކާތީ އެކަމަށް ތިމާ ކޮމިޓް ކުރެވޭލެއް ބޮޑުވާނެއެވެ. އަދި ޖިމްއަށް ދިއުމުން ހަށިގަނޑަށް އަންނަ ބަދަލުތައް ފެންނަން ފެށުމުން އަނެއްމަހުވެސް ނުގޮސްނުވާނެއެވެ. ނަމަވެސް ގޭގައި ވޯކައުޓް ކުރާނަމަ ގިނަފަހަރު އޮންނާނީ އެވަގުތު ނުދެވިފައި ކަމަށް ޖިމްއަށް ދާމީހުން ދެކެއެވެ.

ޖިމްއަށްވެސް ދާންވީއެވެ. ކުޅުދުއްފުށީ ޕޮލިސް ސްޓޭޝަނުގައި އެހެރަ ޖިމްގެ މެމްބާޝިޕް ފޯމު ފުރާ ނިކަންދާން ފަށާށެވެ.

އައުޓްޑޯ ކުޅިވަރެއް ގަވައިދުން ކުޅުން

ތިމާ ބޭނުންވަނީ ބޮޑީ އައްލާމެން އަފްރާހުމެން ވަރުގެ ބޮޑީއެއް ނޫންނަމަ އައުޓްޑޯ ކުޅިވަރެއް ކުޅެލައިގެންވެސް ފަރުޖައްސާލެވިދާނެއެވެ. ނަމަވެސް އެކުރާކަމެއް ގަވައިދުން ކުރުން ވަރަށް މުހިއްމެވެ. ކޮންމެ ދުވަހަކުވެސް އޮފީސް ނިންމާފައި ހަވީރު ފުޓްބޯޅަ، ބާސްކެޓްބޯލް ނުވަތަ މިފަދަ ކޮންމެވެސް ކުޅިވަރެއް ކުޅުމަށް އާދަކުރާށެވެ. މޫދަށް އެރުމަކީ ހަށގަނޑުގެ ހުރިހާ ގުނަވަނަކަށް ކަސްރަތުލިބޭ ކަމެކޭ ބުނެޔެއްނޫން ހެއްޔެވެ. މޫދު ކުޅިވަރަކީ ހަށިގަނޑު ވަރަށް ރީތިކޮށްދޭ ކަމެކެވެ.

ރާއްޖޭގައި ބާއްވާ މިސްޓަރ މޯލްޑިވްސް މުބާރާތުގައި، ރާޅާ އެޅުމާއި ވިންޑް ސާފް ކޮށްގެން ހަށިގަނޑު ރީތިވެފައި ހުރިމީހަކަށް އެއްވަނަ ލިބުނެވެ. މޫދު ކުޅިވަރުގެ ސަބަބުން އޭނާގެ ބައްޓަންހުރީ ވަރަށް ފުރިހަމަވެފައެވެ. މުބާރާތުގެ ކުރިން ޖިމް ހަދާލަން ޖެހުނީ އެންމެ 2 މަސް ދުވަހޭ އޭނާބުނެފައި ވެއެވެ.

ކޮންމެ މީހަކަށްވެސް އެމީހާ ބޭނުންވާ ހަށިގަނޑު ލިބިދާނެއެވެ. ބޭނުންވަނީ ހިތްވަރެކެވެ. ޖިމްއަށް ދާމީހާވެސް އެއްމަހުގޮސްފައި ފޫހިނުވެ ހުއްޓާނުލައި ކުރިޔަށް ދާށެވެ. އެއް ހަފްތާއަކުން 6 ގޮޅިއެއް ނާރާނެއެވެ. ގޭތެރޭގައި ވޯކައުޓް ކުރާމީހާވެސް ގަވައިދުން ވަގުތު ހުސްކުރާށެވެ. މަސައްކަތްކޮށްފިއްޔާ ތިހިރަ ޓައިރު ތަކަކީ ވިރުވާލެވޭނެ އެއްޗިއްސެވެ. ތިޔަ އުންމީދު ކުރާ ހަށިގަނޑު ލިބޭނެއެވެ.

—–

ގުޅޭ ލިޔުން:

ހަށިގަނޑު ރީތިކޮށްލާނީ ކިހިނެތް؟

ލޯބި ވެވޭވަރަށްވުރެ ފަލަވުމުން

އަހަރެންނަށް ބޭބެއޭ ނުގޮވާށެވެ.