ކުޑަދަރިފުޅު ނުކާތީ ކަންބޮޑުވޭ ހެއްޔެވެ؟ ކަންބޮޑުވާނަމަ ދަރިފުޅު ނުކަނީ ކީއްވެތޯ ވިސްނާލިން ހެއްްޔެވެ؟ ރަނގަޅަށް ނުކާނަމަ ދަރިފުޅު ހެދިބޮޑުވުމަށް ހުރަސް އެޅެއެވެ. ބަރުދަން ލުއިވެއެވެެ. އެހެންކަމުން ދަރިފުޅު ނުކަނީ ކީއްވެތޯ ދެނެގަތުން ވަރަށް މުހިއްމެވެ.

ކާހިތްނުވުމަކީ ދަރިފުޅަށް ކާންދިނުމަށް އުނދަގުވާ އެއް ސަބަބެވެ. ދަރިފުޅަށް އާންމުކޮށް ދެވޭ ކާނާ ތަކަކީ ދަރިފުޅަށް މާ ގާޔާވާ އެއްޗަކަށް ނުވެދާނެއެވެ. މިސަބަބާ ހުރެ ކުދިން ކެއުން މަތިން ފޫހިވެއެވެ. ބައެއް ފަހަރު އަނގަޔަށް ގެއްލުމެއް ވެފައި ހުރެއްޖެނަމަ ދަރިފުޅު ކެއުމާ ދުރައްދެއެވެ. ކުޅެން އުޅުމުގެ ތެރޭގައި އަނގަޔަށް ލާ އެއްޗަކުން ނުވަތަ އެހެންވެސް ގޮތަކުން އަނގައިގެ ހިރުގަނޑު ފަދަ ތަނަކަށް ގެއްލުމެއް ލިބިފައި ވާނަމަ ކުއްޖާ އަށް ކާން އުނދަވުން ގާތެވެ. މިފަދަ ކަމަކަށް ޝައްކުވާނަމަ ޑޮކްޓަރަށް ދައްކާލުން މުހިންމެވެ.

ކުޑަކުދިން ކެއުމާ ދުރުވަނީ ހަމައެކަނި މިފަދަ ސަބަބުތަކާ ހުރެއެއް ނޫނެވެ. ދަރިފުޅު ކާންދިނުމުގައިވެސް ރަނގަޅު އުކުޅުތައް ބޭނުން ކުރެވިދާނެއެވެ. އެގޮތުން ކުރެވިދާނެ ބައެއް ކަންކަން ހިމަނާލާނަމެވެ.

ކާންދިނުމުގައި ތަފާތު ބާވަތްތައް ހިމަނާށެވެ.

ދަރިފުޅަށް އެންމެ ފައިދާ ހުރި ބާވަތްތައް ކާންދިނުމުގެ ގޮތުން ކޮންމެ ފަހަރަކު އެކެއްޗެއް ދެވޭތަން ވަރަށް ގިނަ ފަހަރު އާދެއެވެ. ނަތީޖާއަކަށް ވަނީ އަބަދު އެކައްޗެއް ކައިކައި ކުދިން ކެއުން މަތިން ފޫހިވުމެވެ. މީގެ ބަދަލުގައި ތަފާތު ވައްތަރުތައް ދޭން އާދަކުރާށެވެ. މުހިއްމު މާއްދާތައް މަދުވެދާނެ ކަމުގެ ބިރު ހީވާނަމަ ‘ޓައިމް ޓޭބަލް’ އެއް ހަދާށެވެ. އެ ޓޭބަލް ތެރޭގައި އެކަށީގެންވާ ވަރަށް ދަރިފުޅަށް މުހިންމު ކާނާތައް ހިމަނާލާށެވެ.

ހަމަޖެހިގެން ކާންދެށެވެ.

ބުރަކޮށް ވަޒީފާގައި އުޅެމުން ދަރިފުޅު ބަލާ މައިން ހުސްވަގުތުކޮޅުގެ ގޮތުގައި އޮފީހުން ލިބޭ އެއްގަޑިއިރު ދަރިފުޅަށް ކާންދިނުމަށްޓަކައި ހުސްކުރެއެވެ. އެވަގުތުގައި ދަރިފުޅު ނުކާން ބޮޑާ ހާކާ ނަމަވެސް އުފާވެރި މޫނަކާއެކު ހަމަޖެހިގެން ކުއްޖާއަށް ކާންދޭން މަސައްކަތް ކުރުން މުހިންމެވެ. އަވަސް އަރުވާލައިގެން ކާންދޭން އުޅެފިނަމަ މާގޯސްވެދާނެއެވެ. އެހެންކަމުން ރުޅި އިސްކުރުމުގެ ބަދަލުގައި ދަރިފުޅު ހިތްހަމަ ޖައްސައިދީގެން ކާންދޭށެވެ.

ކުދިންގެ ސަމާލުކަން ދަމައިގަންނަ ގޮތަކަށް ކާއެއްޗެހި ހަދާށެވެ.

ދަރިފުޅަށް ތައްޔާރު ކުރާ ކާނާއަކީ ބަލާލަންވެސް ރީތި އެއްޗެއްސަށް ވާން ޖެހެއެވެ. ކުއްޖާގެ ސަމާލުކަން އެންމެ ފުރަތަމަ ލިބޭނީ ތައްޓަށް ކާއެއްޗެހި އަޅާފައި ހުންނަ ގޮތަށެވެ. ތަރުކާރީ އާއި މޭވާ ދޭ އިރު އެތަކެތި ތަށީގައި ރީތި ގޮތަކަށް އަތުރާލައިފިނަމަ އޭގައި ލާ ރަހަ މާ ކަމުނުދިޔަސް ކުދިން ގަޔަވާނެއެވެ. ކެރެޓް ފަދަ އެއްޗެހި އެކި ގޮތް ގޮތަށް ކަފައިގެން ކުޑަކުދިިންނަށް ރީތިވާ ގޮތަކަށް ‘ގާނިޝް’ ކުރުމަކީވެސް ބައެއް މީހުން ބޭނުންކުރާ އުކުޅެކެވެ.

ކާގަޑި ކައިރި ކޮށްފައި ‘ކޫސަނި’ ކަހަލަ އެއްޗެހި ނުދޭށެވެ.

ގިނަ މައިން ބަފައިން ކުދިން ރުއްސުމުގެ ގޮތުން އެކުދިން ކާހިތްވާ އެކި ކަހަލަ ލުއި ކާނާ އާއި ބުއިންތައް ގަނެދެއެވެ. އެހެން ނަމަވެސް ކާންދޭ ގަޑި ކައިރި ކޮށްފައި ދަރިފުޅަށް މިފަދަ އެއްޗެހި ދިނުން ރަނގަޅެއް ނޫނެވެ. ދޭނަމަ ކާގަޑީގައި ކުއްޖާގެ ބަނޑުގައި ޖާގައެއް ނޯންނާނެވެ.

ކާއެއްޗެހި ހެދުމުގައި ދަރިފުޅު ބައިވެރި ކުރާށެވެ.

ކެއްކުމަށް ބޭނުންވާ އެއްޗެހި ގަންނަންފިހާރައަށް ދާއިރު ދަރިފުޅު ގެންދާށެވެ. ހަރުގަނޑުން މޭވާ އާއި ތަރުކާރީ ފަދަ އެއްޗެހި ނަގާށެވެ. ހަމަ އެގޮތަށް ކައްކާ ގަޑީގައި ވެސް ކުއްޖާގެ އުމުރާ ގުޅޭ ބައެއް މަސައްކަތް ޖައްސާށެވެ. އެގަޑީގައި ވާހަކަ ދައްކައި ކުއްޖާގެ ހިޔާލުވެސް ހޯދާށެވެ. އޭރުން ކާގަޑިއަކީވެސް ދަރިފުޅަށް އުފާވެރި ވަގުތުކޮޅަކަށް ވާނެއެވެ.

ދާދި މިދާކަށް ދުވަހު އޮފީހުގައި އިނދެފައި، މުހިއްމު ކަމެއް ދިމާވެގެން ސަރުކާރު ސްޓޭޓް މިނިސްޓަރެއްގެ ނަންބަރަށް ގުޅާލީމެވެ. ނަންބަރަށް ޑައިލް ކޮށްލުމާއެކު އިވިގެން ދިޔައީ “ތީއޭ މިހިތުގެ ވިންދަކީ” ލަވައެވެ. އެދުވަހު ހިތަށް އެރިއެވެ. ތިމާގެ ލޯބިވެރިޔާ ގުޅާއިރު އިއްވަން ލައިފައި އިން ރާގު ގުޅާ ކޮންމެ މީހަކަށްވެސް އިވޭނެތާއެވެ. ތިމާގެ ލޯބިވެރިޔާއަށް ހަދިޔާކޮށްފައި އޮތް ލަވަ އެހެން މީހުން ގުޅާލުމުން އިވުން އެއީ ރަނގަޅު ގޮތްބާއެވެ؟ ދިރާގު މައިޓޯންސްގެ ހިދުމަތް އެންމެންގެ މެދުގައިވެސް މަގުބޫލުކަން ހޯދާފައިވާ އިރު، އެ ހިދުމަތް ބޭނުން ކުރުމަށް އިތުރު ގޮތްތަކެއް ހޯދަން ޖެހޭކަން ގިނަ ކަސްޓަމަރުންތަކެއް ދިޔައީ ފާހަގަ ކުރަމުން ނެވެ.

ކަސްޓަމަރުންނަކީ އެންމެ މުހިއްމު ސްޓޭކްހޯލްޑަރ ކަމުގައި އަބަދުވެސް ދެކޭ ދިރާގުން ވަނީ ކަސްޓަމަރުންގެ ހިޔާލުތައް އަޑުއަހައި، ވަރަށްފަހުން އެހިދުމަތް ފުޅާކޮށްފައެވެ. ދިރާގުގެ މަލްޓިޕްލް މައިޓޯން ހިދުމަތް ތައާރަފް ކުރުމުން، ދިރާގުގެ ކަސްޓަމަރުންނަށް މިހާރު މައިޓޯންސްގެ ގޮތުގައި ތަފާތު އެކި ލަވަތައް ނެގެން ހުރެއެވެ. ވަކި މީހަކު ގުޅުމުން ވަކިލަވައެއް ނުވަތަ ވަކި ބަޔަކު ގުޅުމުން ވަކި ރާގެއް އިވޭގޮތަށް ދިރާގުން ވަނީ އެހިދުމަތް ކަސްޓަމައިޒް ކޮށްފައެވެ. އެހިދުމަތް ފުޅާކުރުމާއެކު މައިޓޯންސް ހިދުމަތުގެ މަގުބޫލުކަން ވަނީ އިތުރު ވާން ފަށާފައިކަން ދިރާގުން ހާމަކުރެއެވެ.

“މައިޓޯންސްގެ ހިދުމަތަށް ބަދަލު ގެނައުމުން ވަރަށް ބޮޑު ތަރުހީބެއް ލިބެމުންދަނީ. ކުރިން އެންމެ ޓޯނެއްގެ ހިދުމަތް ދިންއިރު މިހިދުމަތް ބޭނުން ނުކުރާ މީހުންވެސް، ޕާސަނަލައިޒް ކުރެވޭ ގޮތަށް ހިދުމަތް ބަދަލު ކުރުމުން މިހިދުމަތް ބޭނުން ކުރަން ފަށައިފި” ދިރާގުގެ މާކެޓިންގ، ކޮމިއުނިކޭޝަން އެންޑް ޕަބްލިކް ރިލޭޝަން އެގްޒެކެޓިވް އިމްޖާދު ޖަލީލު ވިދާޅުވިއެވެ.

އިމްޖާދު މައުލޫމާތު ދެއްވިގޮތުގައި ދިރާގުގެ މައިޓޯންސްއަށް ގެނައި ބަދަލާއެކު ތަފާތު 10 މައިޓޯންސް ގުޅުއްވާ ފަރާތްތަކަށް އަޑު އިވޭނެހެން ސެޓްކޮށްލެވެން ހުންނާނެއެވެ. އަދި މީގެ އިތުރުން ކަސްޓަމަރުން އިހުތިޔާރު ކުރާ ޓޯނެއް ވަކިވަކި ބޭފުޅަކަށް ނުވަތަ ވަކި ގުރޫޕަކަށް އަޑު އިވޭނެހެން ސެޓްކޮށްލުމުގެ ފުރުސަތު ލިބިގެންދާނެކަމަށްވެސް އިމްޖާދު ވިދާޅުވިއެވެ.

މަލްޓިޕްލް ރިންގްޓޯން އެކްޓިވޭޓް ކުރަށްވާނީ 155 އަށް ގުޅުއްވައިގެންނެވެ. ނުވަތަ “ޓޯން” ޖެއްސެވުމަށްފަހު ޓޯން އައިޑީ 155 އަށް އެސް.އެމް.އެސް އެއް ފޮނުއްވައިގެންނެވެ. ފޮނުއްވާ ކޮންމެ އެސްއެމްއެސް އަކަށް ޗާޖު ކުރެވޭނީ 1 ރުފިޔާއެވެ. އަދި އިހްތިޔާރު ކުރައްވާ ކޮންމެ މައިޓޯނަކަށް ޗާޖު ކުރެވޭނީ 4 ރުފިޔާއެވެ.

މައިޓޯންސް ޕާސަނަލައިޒް ކުރައްވާނީ އެސް.އެމް،އެސް މެދުވެރިކޮށެވެ. އެއްވެސް ފަރާތެއް ގުޅުއްވުމުން އެފަރާތަކަށް އަޑު އިވޭނެހެން ވަކި މައިޓޯނެއް ޕާސަނަލައިޒް ކުރެއްވުމަށް ‘set’ ޖެއްސެވުމަށްފަހު ޓޯން އައިޑީ އަދި މޮބައިލް ނަންބަރާއި އެކު 155 އަށް އެސްއެމްއެސް ފޮނުވުމުން މިހިދުމަތް ލިބޭނެއެވެ. މިއީ އިތުރު ޗާޖަކާއި ނުލާ ލިބޭނެ ހިދުމަތެކެވެ.

ހިދުމަތަށް އެކްޓިވޭޓް ކުރުމަށް ޖެހެނީ 155 އަށް ގުޅާށެވެ. ނުވަތަ ‘tone’ ޖެއްސެވުމަށްފަހު ޓޯން އައިޑީ ޖައްސަވާފައި 155 އަށް އެސްއެމްއެސް އެއް ފޮނުވިދާނެއެވެ. މިހިދުމަތާއި ގުޅޭ އިތުރު މައުލޫމާތު އޮޅުން ފިލުވުމަށް ‘help’ ޖައްސަވާފައި 155 އަށް ފޮނުވުމުން މައުލޫމާތު ލިބިގެން ދެއެވެ.

ދިރާގު މައިޓޯންސް ހިދުމަތަށް ގެނެވުނު ބަދަލާއި ގުޅިގެން ދިރާގުގެ މެނޭޖަރ މާކެޓިންގ ކޮމިއުނިކޭޝަންސް އެންޑް ޕަބްލިކް ރިލޭޝަންސް މުހައްމަދު މިރުޝާން ހަސަން ވިދާޅުވީ، ދިރާގުގެ މައިޓޯންސް ފްލެޓްފޯމަކީ އެކި އެކި ދިވެހި އަދި ބޭރުގެ އާޓިސްޓުންގެ ރާގުތަކާއި ލަވަތަކުގެ އެންމެ ގިނަ ރިންގްބެކް ޓޯންސް ހުންނަ ފްލެޓްފޯމެއެވެ.

ދިރާގަކީ އަބަދުވެސް ކަސްޓަމަރުންގެ ހިޔާލުތައް ބަލައިގަނެ ކަސްޓަމަރުން ބޭނުންވާ ގޮތަށް ހިދުމަތްތައް ބައްޓަން ކުރަމުން އަންނަ ކުންފުންޏެކެވެ. މިހާރު ގައިމުންވެސް އެދުވަހު ގުޅާލި ސްޓޭޓް މިނިސްޓަރުގެ ރިންގް ބެކްޓޯން ވަނީ ބަދަލު ކޮށްފައެވެ. އަދި އެވީގޮތަކީ ކޮބައިތޯ ސުވާލު ކޮށްލުމުން ވިދާޅުވީ “ދިރާގު މައިޓޯންސް ޕާސަނަލައިޒް ކުރުމުގެ ހިދުމަތް ބޭނުން ކުރަން ފެށީ” ކަމަށެވެ.

ސޯޝަލް ނެޓްވޯކްތަކުގެ ތެރެއިން އެތައް މިލިޔަން މީހުންނެއްގެ މަގުބޫލުކަން ހޯދާފައިވާ ފޭސްބުކް ޕަބްލިކް ލިމިޓެޑް ކުންފުންޏަކަށް ބަދަލުކޮށް އާއްމުންނަށް ހިއްސާ ވިއްކަން ނިންމައިފިއެވެ.

މަޝްހޫރު ސޯޝަލް ނެޓްވޯކް ފޭސްބުކްގެ އިނީޝަލް ޕަބްލިކް އޮފަރިން (އައިޕީއޯ) ގައި 10 ބިލިޔަން އެމެރިކާ ޑޮލަރުގެ ހިއްސާ ވިއްކާނެކަމަށް އެމެރިކާގެ ވޯލްސްޓްރީޓް ޖާނަލް އާއި ފައިނޭންޝަލް ޓައިމްސްގައި ރިޕޯޓް ކޮށްފައިވެއެވެ. މިއީ ބޮޑެތި ކުންފުނިތަކާ އަޅާބަލާއިރު، ގޫގުލްއިން 2004 ވަނަ އަހަރު އަލަށް އާއްމުކޮށް ހިއްސާ ވިއްކި ވަރަށްވުރެ 5 ގުނަ ބޮޑު އަދަދެކެވެ. އެއަހަރު ބޮޑެތި ކުންފުނިތަކުގެ ތެރޭގައި ގުނާލެވޭ ގޫގުލް އިން ވިއްކީ 1.9 ބިލިޔަން އެމެރިކާ ޑޮލަރުގެ ހިއްސާއެވެ.

މިހާތަނަށް އެމެރިކާގެ ހިއްސާގެ ބާޒާރުގައި އެންމެ ބޮޑު އައިޕީއޯ އަކަށް ގޮސްފައިވަނީ މަޝްހޫރު ކާރު ކުންފުނި ޖެނެރަލް މޮޓޯސް އެވެ. 2010 ވަނަ އަހަރު ހިއްސާ ވިއްކައިގެން އެކުންފުނިން 20 ބިލިޔަން ޑޮލަރު ހޯދިއެވެ.

ބޮޑު އަދަދެއްގެ ހިއްސާ ވިއްކައިގެން އެންމެ ބޮޑެތި ކުންފުނި ތަކުގެ ލިސްޓަށް ފޭސްބުކް ވަންނައިރު، އެކުންފުނީގެ ހިއްސާ ވިއްކުމުގައި އަންޑަރައިޓަރެއްގެ ބައި އަދާކުރާނީ މަޝްހޫރު ފައިނޭންޝަލް ޖަޔަންޓް މޯގަން ސްޓޭންލީއެވެ. އަދި ގޯލްޑްމަން ސެޗް ވެސް އެހީތެރިވެދޭނެއެވެ.

ފޭސްބުކް ހިއްސާގެ ބާޒާރުގައި ލިސްޓް ކުރުމުން މާކެޓް ކެޕިޓަލައިޒޭޝަން (ހިއްސާގެ ބާޒާރުގައި ކުންފުނީގެ ރައުސްމާލުގެ އަގު) 75 ބިލިޔަން އާއި 100 ބިލިޔަން އެމެރިކާ ޑޮލަރާއި ދެމެދުގެ އަދަދަކަށް އަރާ ދުނިޔޭގެ އެންމެ ބޮޑެތި ކުންފުނިތަކުގެ ލިސްޓު ވެސް އެންމެ ކުރިއަށް ފޭސްބުކް ޖެހިލާނެ ކަމަށް ރިޕޯޓްތައް ބުނެއެވެ.

ފޭސްބުކް އަކީ 2004 ވަނަ އަހަރު އެމެރިކާގެ ހާވާޑް ޔުނިވާސިޓީގައި ތައުލީމު ހާސިލް ކުރަމުންދިޔަ މާކް ޒުކަބާގް އާއި އޭނާގެ ބައިވެރިން ވެގެން އުފެއްދި ވެބްސައިޓެކެވެ. ކުޑަދުވަސްކޮޅެއްގެ ތެރޭގައި ފޭސްބުކް އާއްމުންގެ މަގުބޫލުކަން ހޯދިއެވެ.

އިޝްތިހާރު ކޮށްގެން މައިގަނޑު އާމްދަނީ ހޯދާ ފޭސްބުކް، 2010 ވަނަ އަހަރުގެ ފުރަތަމަ 9 މަސްދުވަހުގެ އަންކޮންފާމްޑް ހިސާބުތަކުން ދައްކާގޮތުން، ވަނީ 1.2 ބިލިޔަން ޑޮލަރު އާމްދަނީއެއް ހޯދާ، ސާފު ފައިދާގެ ގޮތުގައި 355 މިލިޔަން ޑޮލަރު ހޯދާފައެވެ. ފޭސްބުކް އަކީ ޕްރައިވެޓް ކުންފުންޏެއް ކަމުގައި ވާތީ އެކުންފުނިން ހޯދަމުންދާ އާމްދަނީގެ ކޮންފާމް ރިޕޯޓްސް ހޯދުމަކީ އަދި ދަތިކަމެކެވެ.

މާބަނޑުވުމުން ކޮންމެ އަންހެނެއްގެ ވެސް އުންމީދަކަށް ވާނީ ސިއްޙަތު ސަލާމަތުން ހެޔޮހާލުގައި އޭނާގެ ދަރިފުޅު އުފަން ކުރުމެވެ. އެހެންކަމުން ބަލިވެ އިނުމުން ގިނަ އަންހެނުން އެހެންޏާ ނުވާ ވަރަށް ޞިއްޙަތާ މެދު ސަމާލުވެއެވެ. ގަވާއިދުން ޑޮކްޓަރުގެ އިރުޝާދުތައް ހޯދައެވެ.

މާބަނޑު ދުވަސްވަރަކީ އާންމުކޮށް ކާން އާދަވެފައި ހުންނަ އެއްޗެހި ނޫން ތަފާތު ‘ކޫސަނި’ އެއްޗެހި ކާހިތްވާ ދުވަސްވަރެކެވެ. ހާއްސަކޮށް ތަފާތު ހުތްކަން ގަދަ މޭވާ ކެއުމަށް މާބަނޑު އަންހެނުން ބޭނުންވެ އެވެ. އެހެންކަމުން ހުތް އަނބު، ކުންނާރު ފަދަ ހުތް އެއްޗެހި މާބަނޑުވުމާއި ވިހެއުމާ ދޭތެރޭގައި އެވާ 9 މަސްދުވަހު ގޭގައި ހުސްނުކޮށް ބަހައްޓަ އެވެ. މިފަދަ މޭވާތަކަކީ އޭގައި ވިޓަމިން ސީ ވަރަށް ގިނައިން އެކުލެވޭ އެއްޗެހި ކަމުގައި ވިޔަސް މާ ގިނައިން ކާނަމަ ގެއްލުން ބޮޑު އެއްޗެއްސެވެ.

ހުތް ކަން ގަދަ މޭވާ ތަކަކީ އޭގައި ‘އެސިޑް’ އެކުލެވޭ ބާވަތްތައްކަމުން އޭގެ ސަބަބުން ބަނޑުގައި ރިއްސުން ފަދަ ސިއްހީ މައްސަލަތައް ދިމާވުން އެކަށީގެންވެ އެވެ. އެހެންކަމުން އެފަދަ އެއްޗެހި މާ ގިނައިން ކެއުން ބުއްދިވެރި އެއް ނޫނެވެ.

ހުތް ރަހަ ފިޔަވާ މާބަނޑު އަންހެނުން ދެން އެންމެ ގަޔާވާ ރަހަޔަކީ ކުޅި ރަހަ އެވެ. މާބަނޑު ދުވަސްވަރު ވަރަށް ގިނަ އަންހެނުން ކުޅިކޮށް ކާން ބޭނުންވެ އެވެ. ކާން ކިތަންމެ ހިތް އެދުނަސް އެއީ ސިއްހަތައް ކިހާ ގެއްލުން ހުރި ކަމެއްތޯ ބަލާލުން މުހިއްމެވެ.

މާ ކުޅިކޮށް ކާނަމަ ބަނޑަށް އުނދަގޫވެ މާގިނައިން ބޮޑުކަމު ދެވެން ފެށުން ގާތެވެ. މީގެ ސަބަބުން ހަށިގަނޑުން ގިނަ އަދަދަކަށް ފެން ބޭރުވެ ހަށިގަނޑަށް ވަރަށް ނުރައްކާ ވެއެވެ. ހާއްސަކޮށް ވައިގެ މައްސަލަ ހުންނަ މީހުންނަށް ނުރައްކާ ބޮޑެވެ. އެހެން ކަމުން އެންމެ ރަނގަޅު ގޮތަކީ ކުޅިކޮށް ކެއުމުގައި ވަކި މިންގަނޑެއް ހިފެހެއްޓުމެވެ.

ބަލިވެ އިންނަ ދުވަސްވަރު ގިނަ ވަގުތު އަރާމުކުރުމަށް ޑޮކްޓަރުން އިރުޝާދު ދެއެވެ. އެހެންކަމުން އަންހެންވެރިން ތައްޔާރީ ކާނާއާ ރައްޓެހިވެ އެވެ. އެކި ގޮތް ގޮތަށް ބަންދުކޮށްފައި ހުންނަ ނޫޑުލްސް ފަދަ އެއްޗެއްސަކީ ފަސޭހައިން ތައްޔާރު ކޮށްލައިގެން ކައިލެވޭނެ އަނގަޔައްވެސް މީރު އެއްޗެއްސެވެ. މި ތަކެއްޗަކީ ގިނަ އަދަދަކަށް ލޮނާއި ތެޔޮ އެކުލެވޭ އެއްޗެއްސެވެ. މީގެ އިތުރުން މިކަހަލަ ތައްޔާރީ ކާނާ ތަކަކީ އެއެއްޗެހީގެ ރަހަ ގިނަ ދުވަސްވަންދެން ތާޒަ ކަން މަތީގައި ބެހެއްޓުމަށްޓަކައި ‘ޕްރިޒަވޭޓިވްސް’ އަޅައިގެން ހަދާފައި ހުންނަ އެއްޗެއްސެވެ.

ތަފާތު ލުއި ބުއިންތަކަކީވެސް މާބަނޑު އަންހެނަކަށް ރަނގަޅު އެއްޗެއް ނޫނެވެ. މިފަދަ ފިނި ބުއިންތައް އާންމުކޮށް ބޯނަމަ ފައިދާ ހުރި އެއްޗެއް ބޯނެ ޖާގަ ބަނޑަކު ނޯންނާނެ އެވެ. މީގެ ބަދަލުގައި ކިރާއި ޖޫސް ފަދަ ހަށިގަނޑަށް ފައިދާ ހުރި އެއްޗެއް ބުއިން މާ ރަނގަޅެވެ. ގިނައިން ފެން ބުއިމަކީވެސް މުހިންމު ކަމެކެވެ.

ބަލިވެ އިނުމުން ކާ ހިތްވާ އެއްޗެހީގެ ބަދަލުގައި ފައިދާ ހުރި ބާވަތްތައް އިސްކަން ދިނުން މުހިންމެވެ. މިގޮތުން ފެހިކަން ގަދަ ފަތާއި ‘ވިޓަމިން ސީ’ އަދި ‘ވިޓަމިން އޭ’ ގިނަ ބާވަތްތައް ކެއުން ރަނގަޅެވެ. މީގެ އިތުރުން ‘ފޮލިކް އެސިޑް’ އާއި ‘ފައިބަރ’ އަދި ‘ކެލްސިއަމް’ އަކީވެސް މާބަނޑު އަންހެނެއްގެ ކެއުމުގައި ހިމެނެންޖެހޭ މުހިންމު މާއްދާތަކެވެ.

ފުރިހަމަ ޞިއްޙަތެއްގައި ހުރުމަށް މުހިންމީ ހަމައެކަނި ރަނގަޅު ކާނާއެއް ނޫނެވެ. އެކަށީގެންވާ ވަރަށް ނިދުމަކީވެސް މުހިންމު ކަމެކެވެ. ހަށިގަނޑަށް އެކަށީގެންވާ ވަރަށް ނިދި ނުލިބޭނަމަ ދެން ދިމާވާ މައްސަލަތައް ވަރަށް ގިނައެވެ.

އެކި އެކި ސަބަބު ތަކާހުރެ ނިދަން އުނދަގޫ ވުން ނުވަތަ ނުނިދުމަކީ ވަރަށް ގިނަ މީހުންނަށް ދިމާވާ މައްސަލައެކެވެ. މާގިނައިން ކޮފީ ބުއިން ނުވަތަ ކެފެއިން އެކުލެވޭ އެއްޗެހި ބުއިމަކީ ނުނިދުމަށް މެދުވެރިވާ ސަބަބު ކަމަށް ބައެއް މީހުން ދެކެއެވެ. އެހެންނަމަވެސް ނިދުމަށް ހުރަސް އަޅާ ހަމައެކަނި ސަބަބަކީ ކެފެއިން އެއް ނޫނެވެ.

އެމެރިކާގައި ކުރެވުނު ދިރާސާއަކުން ދައްކާ ގޮތުގައި ނިދަން އުނދަގޫވާ މައިގަނޑު ސަބަބު ތަކުގެ ތެރޭގައި ހަށިގަނޑުގެ އެކި ތަންތާގައި ރިއްސުން ހިމެނެއެވެ. މިގޮތުން ބުރަކަށީގައި ރިހުމާއި ބޮލުގައި ރިއްސުމުގެ އިތުރުން ހުުޅުހުޅުގެ މަސްތަކުގައި ރިއްސުމަކީވެސް ހަމަ ނިދި ލިބުމަށް ހުރަސް އަޅާ ކަންކަމެވެ.

މާބޮޑަށް ކަންކަމާ ވިސްނާ ފިކުރުކޮށް ހަދާނަމަ ނިދަން އުނދަގޫވެއެވެ. އާއިލީ މައްސަލަތަކާއި އުޅޭ ވަޒީފާގެ ގޮތުން ދިމާވާ މައްސަލަތަކުގެ ސަބަބުން ގިނަ ދުވަސްތަކެއް ވަންދެން ހަމަ ނިދި ނުލިބި ހުންނަން ޖެހިއްޖެނަމަ އާންމުކޮށް ނިދާ އުޅޭ ވަގުތު ބަދަލުވެ ރޭގަނޑު ނިދުމަށް އުނދަގޫވެއެވެ.

އާންމުކޮށް ނިދާ ވަގުތާއި ހޭލާވަގުތަށް ހަށިގަނޑާއި ސިކުނޑި ހުންނާނީ ހޭނިފައެވެ. ތިމާ އުޅޭ ގައުމާއި ‘ޓައިމްޒޯން’ ތަފާތު އެހެން ގައުމަކަށް ދިއުމުން އާންމުކޮށް ނިދާ ވަގުތު ހަމަޔަކަށް އެޅުމަށް ދުވަސްކޮޅެއް ނަގައެވެ. އެހެންނަމަވެސް އާންމުކޮށް އެކި އެކި ޤައުމުތަކަށް ދަތުރުކޮށް އުޅޭ މީހެއްނަމަ ނިދާ ގަޑި އަބަދު ބަދަލުވަމުން ދާތީ ނިދުމުގައި އުނދަގޫތަކާ ކުރިމަތިލާންޖެހެއެވެ.

ޑޮކްޓަރުންނާއި ނަރުހުން އަދި މިނޫންވެސް ނައިޓް ޑިއުޓީ އަދާކުރާ މީހުންނަށް ނިދުމުގައި އާދަވެފައި ވަކި ގަވާއިދެއް ނެތުމުގެ ސަބަބުން ނިދުމުގައި ދަތިތަކާ ކުރިމަތިލާން ޖެހޭ ކަމަށް ދިރާސާތަކުން ދައްކައެވެ.

ހަށިގަނޑުގައި ހުންނަ އެކި އެކިއެކި ހޯމޯން ތަކަށް އަންނަ ބަދަލު ތަކުގެ ސަބަބުންވެސް ބައެއް ފަހަރު ނިދުމަށް ހުރަސް އެޅެއެވެ. މިގޮތުން އަންހެންވެރިން، މައްސަރު ކަންތަކުގެ ދުވަސްވަރާއި މާބަނޑު ދުވަސްވަރު އަދި އުމުރުން ގިނަ ދުވަސްވެ މައްސަރު ކަންތައް ހުއްޓޭ ދުވަސްވަރު (މެނުޕޯސް) ނިދަން އުނދަގޫވާކަމަށް ދިރާސާތައް ބުނެއެވެ. އެއީ މިފަދަ ދުވަސްވަރުތަކުގައި ވަރަށް ގިނަ އަންހެނުންނަށް އުރަމަތީގައި ރިއްސުމާއި އުނަގަނޑުގައި ރިއްސުން ފަދަ މައްސަލަތައް ދިމާވާތީއެވެ.

މާކެޓްގައި ހިމެނޭ އެހެން ފަރާތްތަކުގެ އުފެއްދުންތަކާއި ތަފާތު ޑިޒައިންތަކެއް އަބަދުވެސް ނެރެމުން އަންނަ އެޕަލްގެ އުފެއްދުންތައް އަހަރެމެންގެ ތެރޭގައި މަޝްހޫރު ވާންފެށީ ދާދިފަހުންނެވެ. ސްމާޓްފޯން މާކެޓްގައި މިހާރު ރަސްކަން ކުރަމުންދާ އެޕަލްގެ ފޯނުތައް ނުވަތަ އައިފޯންތައް އަހަރެމެންގެ ތެރެއަށް އައީވެސް އެޕަލް އައިފޯނުގެ ނަމުގައި މާކެޓް ސިއްސުވާލި ތަފާތު ފީޗަރ ތަކެއް ހިމެނޭ ފޯނަކުންނެވެ.

އެޕަލް އައިފޯން އަހަރެމެންނަށް ދަސްވީ އެހިސާބުން ކަމުގައި ވިޔަސް، އެޕަލްއިން ވަނީ އެމީހުންގެ ފުރަތަމަ އައިފޯން މީގެ ތިރީހަކަށް އަހަރު ކުރިން ތައްޔާރު ކޮށްފައެވެ.

ފޮޓޯއިން އެ ފެންނަ ލޭންޑް ފޯނަކީ އެޕަލް އިން އެންމެ ފުރަތަމަ އުފެއްދި އައިފޯނެވެ. 1983 ގައި އެޕަލް އިން އުފެއްދި މި ލޭންޑް ފޯނަކީ ޓަޗް ސްކްރީނަކާއެކު ފޯނު އަތްގަނޑެއް ހިމެނޭ ލޭންޑް ލައިން ފޯނެކެވެ. ސްޓައިލަސް އެއްބޭނުން ކޮށްގެން ޓަޗް ކުރެވޭ އެ ފޯނުގެ ސްކްރީން އިހަށްދުވަހު ތައާރަފްކުރި އައިޕެޑްގެ ސްކްރީން ވަރުވެއެވެ.

މި އައިފޯން އުފެއްދީ އެޕަލްގެ ފުރަތަމަ ޕޯޓަބަލް ކޮމްޕިއުޓަރު އެޕަލް އެލްއެލްސީ އުފެއްދުމުގައި ވެސް އިސްރޯލެއް އަދާކުރި ހާމުޓް އެސްލިންގަރ އެވެ. އެސްލިންގަރ އޭގެ ފަހުން ފްރޮގްޑިޒައިން ކިޔާ އަމިއްލަ ކުންފުންޏެއް އުފެއްދިއެވެ.

އެޕަލްގެ މާޒީގައި އުފައްދާފައިވާ ތަފާތު ޕްރޮޑަކްޓްތަކުގެ މައުލޫމާތުތައް އެމެރިކާގެ ސްޓެންފޯޑް ޔުނިވާސިޓީގެ އާކައިވް ތަކުގައި ފޮރުވާފައި ހުންނާނެކަމަށް އެޕަލް އިން ބުނެއެވެ. ސްޓެންފޯޑް އިން މަޑުމަޑުން ދަނީ އެފަދަ މައުލޫމާތުތައް ޖާނަލިސްޓުންނާ ހިއްސާކުރަމުނެވެ.

ޑައިޓް ކުރާއިރު މުހިއްމީ ކާއެއްޗެހި ކެވޭ މިންވަރު ކޮންޓްރޯލު ކުރުން އެކަންޏެއް ނޫނެވެ. އެކެވޭ އެއްޗަކުން ލިބޭ ނިއުޓްރިޝަނަށް ވެސް ބަލައިގެން އުޅުން މުހިއްމެވެ. ތިރީގައި މި ހިމަނާލާ 5 ކާނާއަކީ، ރީތިކޮށް ހަށިގަނޑު ބެހެއްޓުމަށާއި، ޑައިޓް ބެލެންސް ކުރުމަށް އެހީވެދޭނެ ކާނާއެވެ.

1. ފެހިކަން ގަދަ ތަރުކާރީ / ލީފީ ވެޖެޓަބަލްސް

ގިނަ ބޭފުޅުން މިފަދަ ތަރުކާރީ އެހާ ކާހިތެއް ނުވެއެވެ. ނަމަވެސް މިބައި ޑައިޓްގައި ހިމެނުމަކީ ވަރަށް މުހިއްމު ކަމެކެވެ. ބްރޮކޮލީ، އަސްޕަރަގަސް، ލެޓިއުސް އަދި ސްޕިނަޗްއަކީ ވަރަށް ގިނައިން ވިޓަމިން ސީ، ވިޓަމިން ކޭ، ފޮލިކް އެސިޑް އަދި ފައިބަރ ހުންނަ ތަރުކާރީ އެވެ. މިތަކެތި ހަޖަމްކުރުމުގައްޔާއި ބަލިތަކުން ރައްކާތެރި ވުމުގައި ވަރަށް އެހީވެދެއެވެ. ހާއްސަކޮށް ފައިބަރ އެވެ. މީގެ އިތުރުން މިބާވަތުގެ ތަރުކާރީގައި، އަޔަން، މެގްނީސިއަމް، ޕޮޓޭސިއަމް އަދި ކެލްސިއަމް ފަދަ ދަގަނޑުގެ ބާވަތް ހިމެނެއެވެ.

2. ގޮވާމުގެ ބާވަތް / ގްރެއިންސް

ކޮންމެ ގޮވާމެއްގައި 96 ނިއުޓުރިޝަން އެކުލެވެއެވެ. ހެނދުނުގެ ނާސްތާ އަކަށް ވީޓް ސިރިއަލް ނުވަތަ ވީޓް ބުރެޑް ޚިޔާރުކުރައްވާށެވެ. އެހެނީ އޭގެން ހަށިގަނޑަށް ނުހަނު ގިނަ ފައިދާ ތަކެއް ލިއްބައިދެއެވެ. އަދި ބަދަން ކާބޭފުޅުން ބަރުވެދާނެތީ ހާސްވެ ނުލައްވާށެވެ. އެހެނީ އޭގެން ބަރުދަން އިތުރެއް ނުވާނެއެވެ.

3. ޔޯގަޓް

އެންމެ ރަގަޅު ބާވަތުގެ ޔޯގަޓަކީ، ލޯފެޓް ނުވަތަ ޕުލެއިން ޔޯގަޓެވެ. ސަބަބަކީ، އެންމެ ބޭނުން ވަރަށް އޭގައި ޕްރޮޓިންސް، ކެލްސިއަމް އަދި ވިޓަމިންސް ހުންނާތީއެވެ. މީގެ އިތުރުން ޔޯގަޓްގައި ބަލިތަކުން ރައްކާތެރިކޮށްދޭ ބެކްޓީރިއާވެސް ހުރެއެވެ. އެހެންކަމުން، ދުވާލަކު ދެތިން ޔޯގަޓް ތަށި ޑައިޓުގައި އެކުލަވާލާށެވެ. ނަމަވެސް ބުއްދިވެރި ގޮތަކީ ހަކުރު ނާޅާ ޔޯގަޓް ކެއުމެވެ.

4. މޭވާ

މޭވާގައި ހުންނަ ފައިބަރއަކީ ބަރުދަން މައްޗަށް ދިއުން ކޮންޓުރޯލް ކޮށްދޭ ބާވަތެކެވެ. އަދި އޭގައި ހުންނަ އެންޓިއޮކްސިޑެންޓްގެ ސަބަބުން ބަލި ޖެހުމުމުން ރައްކާތެރިކޮށްދީ ހަނދާން ނެތޭވަރު ދަށްކޮށްދެ އެވެ. އެހެންކަމުން، ހަފްތާއަކު ތިންފަހަރު މޭވާ ކާން އާދަކުރާށެވެ.

5. ބަދަން / ނަޓްސް

ހިތް ހުއްޓުމާއި ކެންސަރުން ދުރުކޮށްދޭ ބާވަތްތައް ކަމުގައިވާ، ޕްރޮޓީންސް، މެގްނީސިއަމް، ވިޓަމިން ބީ އަދި ވިޓަމިންއީ ބަދަނުގައި ހުރެއެވެ. އަދި އޭގައި ހުންނަ ފެޓްސްއަކީ ހިތަށް ފައިދާ ކުރުވަނިވި އެއްޗެއް ކަމަށްވިއަސް ބަދަން އެހާގިނައިން ކެއުން ރަގަޅެއް ނޫނެވެ. ހުހާ ބަދަން ކާން ބޭނުން ނޫންނަމަ، ޔޯގަޓް، ސެލެޑް ނުވަތަ ސިރިއަލްއާ އެއްކޮށްގެން ކެއުންވެސް ހަމަ ރަގަޅުވާނެއެވެ.

މިހާރުވެސް އެދޫނިތައް އެތާތިބެއެވެ.
އަހަރެމެންގެ ވާހަކަ ތަކަށް ކަންފަތްދީގެން ތިބޭހެންނެވެ.
އެކަމަކު އޭގެ ފަހުން ވޭތުވީ ކިތައް އަހަރު ހެއްޔެވެ.
އެ އަހަރުތައް ހަނދާން ނައްތާލާށޭ ތިބުނަނީ ނުވާނެ ކަމެއްކަން އެނގިހުރެއެވެ.

މިހާރުވެސް ހަމަ އެރާޅުތައް އެވެލިގަނޑަށް ބީއްސައެވެ.
ބައެއްފަހަރު އަހަރެމެން ހިނގި ފިޔަވަޅުތައް ފެންނަކަހަލައެވެ.
އެފިޔަވަޅުތަކުގެ އަސަރު އެރާޅުތަކާ އެކުވިތާ ކިހާ ދުވަހެއް ހެއްޔެވެ.
އެދުވަސްތައް ހަނދާން ނައްތާލަން ތިއަންގަނީ ނުވާނެ ކަމެއްކަން އެނގިހުރެއެވެ.

އަދިވެސް އިސްތަށިގަނޑުގައި ތިއަސަރު ވާކަހަލައެވެ.
އެއީ އެއްދުވަސްވަރެއްގައި ކަލާކުރި ކަމެކެވެ.
އެވެސް ހަމަ ހީވުމެކެވެ.
އެހީވުންވެސް ހަނދާނުން ފުހެލުމަށް ތިއަންގަނީ ނުވާނެ ކަމެއްކަން އެނގިހުރެއެވެ.

ހިތުގެ އެތިކޮޅުކޮޅު ވަކިވަކިން ގެނެސް އެއްކޮށް ދިނީމުއެވެ.
ލޮލަށް ކަރުނައިގެ ބަދަލުގައި އުފާވެރިކަން ގެނެސްދިނީމުއެވެ.
ތުންފަތުގައިވާ އުދާސްކަމުގެ ބަދަލުގައި ހިނިތުންވުން ގެނެސްދިނީމުއެވެ.
އެހެޔޮކަން ހަނދާން ނައްތާލަން ތިއަންގަނީ ނުވާނެކަމެއްކަން އެނގިހުރެއެވެ.

ހަނދުވަރުގެ އަލީގައި ވަކި ނުވާންބުނެ ޔަގީންކޮށް ދިނީމުއެވެ.
އެހަނދުވަރު އަދިވެސް ދެއެވެ.
އެކަމަކު އެވައުދު އުވާލިތާ ކިހާ ދުވަހެއް ހެއްޔެވެ.
އެވައުދުތަށް އުވާލާ ހިތުގެ އުފާ ހިތާމަޔަށް ބަދަލުކުރި ހަނދާން ނައްތާލަން ތިއަންގަނީ ނުވާނެކަމެއްކަން އެނގިހުރެއެވެ.
އަހަރެންގެ ހަޔާތުގައިވާ ކަލާގެ ހަނދާންތައް ނައްތާލާނީ ކިހިނަކުން ހެއްޔެވެ.

ބޮލުން އިސްތަށި ފޭބުމަކީ ދުނިޔޭގެ ހުރިހާ ހިސާބެއްގައިވެސް ވަރަށް ގިނަމީހުން ކަންބޮޑުވާ އާންމު މައްސަލައެކެވެ. އެގޮތުންދިވެހިންގެ ތެރޭގައިވެސް މިމައްސަލަ ކުރިމަތިވާ މީހުން ވަރަށް ގިނައެވެ. ޚާއްޞަކޮށް އަންހެން ބޭފުޅުންނެވެ. ރާއްޖެތެރޭގެ ބައެއް ރަށްރަށުގައި ފެންވަރަން ބޭނުންކުރެވޭ ފެނުގެ ސަބަބުންވެސް މިމައްސަލަ ކުރިމަތިވެއެވެ. އެހެންނަމަވެސް މިއީ އިސްތަށި ފޭބުމަށް މެދުވެރިވާ ހަމައެކަނި ސަބަބެއް ނޫނެވެ.

ކޮންމެ އަންހެން ކުއްޖަކުވެސް ބޭނުންވަނީ ރީތި ލޫޅާފަތި ހަށިގަނޑެއްގެ ވެރިޔަކަށް ވާށެވެ. ލައި އުޅޭ ހެދުންތައް ކިރިޔާ ބާރު ވިޔަސް އެދެން ކަންތަކާ ޖެހުނީ އެވެ. ދެން އެޖެހުނީ ‘ޑައިޓް’ ކުރަން ފަށާށެވެ. ގިނަ ބަޔަކު ޤަބޫލު ކުރާގޮތުގައި ‘ޑައިޓް’ ކުރުމަކީ ނުކައި ހުރުމެވެ. އެހެން ކަމުން ހިކުމުގެ ނަމުގައި ނުކައި ހުރުމުން ހަށިގަނޑަށް ބޭނުންވާ މުހިއްމު މާއްދާތަކެއް މަދުވެގެންދެއެވެ. މިގޮތުން އިސްތަށިގަނޑަށް ބޭނުންވާ ވިޓަމިނާއި މިނެރަލްސް މަދުވެއެވެ. އަދި މިކަމުގެ ސަބަބުން އިސްތަށިގަނޑު އާދަޔާ ޚިލާފަށް ބަލިވެ، އިސްތަށި ބުރިވުމާއި ބުޑުންް ލުހިގެން ދިޔުންފަދަ ކަންކަމަށް މަގުފަހިވެއެވެ.

ދުންފަތަކީވެސް އިސްތަށިގަނޑަށް ހުރި ނުރައްކަލެކެވެ. މީގެ ސަބަބުން އިސްތަށިގަނޑަށް ބޭނުންވާ ‘އޮކްސިޖަން’ ލިބޭ މިންވަރު މަދުވެއެވެ. މީގެ އިތުރުން ދުންފަތަކީ އުމުރަށް ވުރެ އަވަހަށް އިންސާނާ މުސްކުޅި ކޮށްލާ އެއްޗެއް ކަމަށް ހޯދުންތަކުން ދައްކައެވެ. މިގޮތުން ބޮލުން އިސްތަށި ފޭބުމާއި ތަލަ ވުމަކީވެސް މުސްކުޅި ވުމުގެ ނިޝާންތަކެވެ.

އާދަޔާ ޚިލާފަށް ކަންކަމާ ވިސްނާ ފިކުރު ކުރުމަކީވެސް އިސްތަށި ފޭބުމަށް މަގުފަހި ކުރުވާ ކަމެކެވެ. ސަބަބަކީ މިފަދަ ވަގުތު ތަކަކީ ހަށިގަނޑުގައި އައު އިސްތަށި އުފެއްދުމަށް ހުރަސް އަޅާ ދެ ހޯމޯން ކަމުގައިވާ ކޯޓިސޮލް އާއި ނޯރާ ޑްރިނަލައިން ހަށިގަނޑުގައި އުފެދޭ މިންވަރު އިތުރުވާ ވަގުތެވެ.

އިރުގެ އަލީގެ ސަބަބުން އިސްތަށިގަނޑަށް ބޭނުންވާ ވިޓަމިން ޑީ އުފައްދާ މިންވަރު މަތިވެއެވެ. އެހެންނަމަވެސް ވިސްނާލަންވީ ކަމަކީ މާ ގިނަ ވަގުތު އަވީގައި އުޅޭނަމަ އޭގެން ކުރާ ފައިދާއަށްވުރެ ގެއްލުން ބޮޑުވާނެކަމެވެ. އޭރުން އިސްތަށިގަނޑު މުރަނަވެ ދެކަފިވާންވެސް ފަށައެވެ.

އިސްތަށި ގަނޑާއި ދަތްތަކާއި ހުރި ގުޅުން ވަކި ކުޑައެއް ނޫނެވެ. ދަތްފަނި ކެއުމަކީވެސް އިސްތަށި ފޭބުމަށް މަގުފަހިކުރުވާ ކަމެކެވެ. ދަތުގެ މައްސަލަތައް ހުންނަ މީހުން ބޮލުގެ ތަންތަންކޮޅު ތަލަވުމަކީވެސް ދިމާވާ މައްސަލައެކެވެ. މިހެން ދިމާވަނީ ހަށިގަނޑުގައި ވައިޓް ބްލަޑް ސެލް އުފައްދާ މިންވަރު މަތިވެ އޭގެ ސަބަބުން އިސްތަށި އުފެދުމަށް ހުރަސް އެޅޭތީއެވެ.

އިސްތަށިގަނޑަށް ލިބޭ ގެއްލުމުގެ ސަބަބުން ލިބިފައި ހުންނަ އުނިކަން ފިލުވާލުމަށްޓަކައި ގިނަ އަންހެން ކުދިން ދެން މިސްރާބު ޖަހާނީ ކޮންމެވެސް ‘ސެލޫން’ އަކަށެވެ. އެތަނުން ބޭނުންކުރާ ކެމިކަލް ތަކެއްގެ އެހީގައި އިސްތަށިގަނޑަށް ވަގުތީ ރީތިކަމެއް ގެނެސް ދެއެވެ. ނަމަވެސް އިސްތަށިގަނޑު ބުޅި ކުރުމާއި ފަން ކުރުންފަދަ ކަންކަމަށް އެތަންތަނުން ބޭނުންކުރާ ގިނަ ޕްރޮޑަކްޓްސް ތަކަކީ އިސްތަށިގަނޑު ހަލާކުކޮށްލާ ގިނަ ކެމިކަލް ތަކެއް ހިމެނޭ އެއްޗެއްސެވެ.

އާއަހަރު ލައިގަތުން ފާހަގަކުރުމަށް ކުޅުދުއްފުށީގައިވަނީ މިޔުޒިކް ޝޯއެއް ބާއްވާފައެވެ. ފުޓުބޯޅަމެޗެއްވެސް ކުޅެފައެވެ. މިހުރީ ވަރަށް ރަނގަޅުކަންކަމެވެ. އުފާވެރިކަންކަމެވެ. އުފާކޮށްލާ، މުނިފޫހިފިލުވާނޭ އިތުރު ހަރަކާތްތަކަކަށް ކުޅުދުއްފުށި މިއޮތީ ބޭނުންވެފައެވެ.

އަހަރެންނަށް ވިސްނޭގޮތުގައި މިރަށަކީ މުނިފޫހިފިލުވުގެ ހަރަކާތްތައް ވަރަށް ފުޅާކޮށް ހިންގިދާނެ ރަށެކެވެ. އެކަށީގެންވާ އާބާދީއެއް އޮތުމާއި ހުނަރުވެސް ޒުވާނުންގެ ހުރީމައެވެ. ވަސީލަތްވެސް ހުރީމައެވެ.

އެންމެ ފުރަތަމަ މިރަށުގައި އޮތް މިޔުޒިކް ގުރޫޕްތައް ހަރަކާތްކުރުވަންވެއްޖެއެވެ. ކޮންމެވެސް ބަޔަކު އިސްނަގައިގެން މިޔުޒިކް ކުޅޭށާއި ލަވަކިޔަން ދަސްކޮށްދިނުމުގެ މަސައްކަތް ފަށަންވެއްޖެއެވެ. އަދި ތަފާތުވައްތަރުގެ ނެށުމާއި، ތަމްސީލްކުޅުންވެސް ކުރިއަރުވަންވެއްޖެއެވެ. ސަގާފީކުޅިވަރުތައް ޒުވާނުންނަށް ދަސްކޮށްދީ އެ ކުޅިވަރުތައް ބޭއްވުމުގައި ކޮންމެވެސް ބަޔަކު އިސްނަގަންވެއްޖެއެވެ.

ޝޯއެއް ބޭއްވުމަކީ ޚަރަދު ހިނގާނޭ ކަމެކެވެ. ވީމާ ވިޔަފާރީގެ ވިސްނުމެއްގެ ތެރެއިން މުނިފޫހިފިލުވުމުގެ ހަރަކާތްތައް ރޭވުން މުހިންމެވެ. މިޔުޒިކާއި، ނެށުމާއި، ތަމްސީލް ޝޯތައް ބޭއްވުމަށް، މިހާރަށްވުރެ ކުޑަ އަގަކަށް ތިލަދެކުނު ސިނަމާ ދޫކުރެވިދާނެއެވެ. އަދި ބައެއް ފަހަރަށް، އާއްމުންނަށް ހިލޭ، ކުޅިބަލަން ވަދެވޭ ކަހަލަ ތަނެއްގައިވެސް ތަމްސީލާއި، ނެށުމާއި މިޔުޒިކްގެ ހަރަކާތްތައް ދައްކާލެވިދާނެއެވެ. މިގޮތުން އަހަރުގެ ވަކި ދުވަސްތަކެއްގައި، ފަންނުވެރިންގެ ފެސްޓިވަލެއް އިންތިޒާމުކުރެވިދާނެއެވެ. މުނިފޫހިފިލުވުމާއި ވިޔަފާރި ޕުރޮމޯޓްކުރުން ގުޅުވާލެވިއްޖެނަމަ، މިއީ ވަރަށް ފަސޭހަކަމެކެވެ. މިހާރުވެސް، އީދުކުޅިވަރުތައް މިރަށާއި އަދި އެހެން ރަށްރަށުގައިވެސް ބާއްވަނީ ވިޔަފާރިވެރިންގެ އެހީތެރިކަމާއެކުގައެވެ.

ސަގާފީ ކުޅިވަރުތަކާއި، ޒަމާނީ ނެށުމާއި، މިޔުޒިކާއި، ތަމްސީލްގެ އިތުރުން، ކުރެހުމާއި، ފޮޓޯނެގުމާއި، މަސައްކަތްތެރިކަމުގެ ތަފާތު ދައްކާލުންތައް ވެސް އާންމުކޮށް ބާއްވާ ރަށަކަށް ކުޅުދުއްފުށި ބަދަލުކޮށްލަންވެއްޖެވެ. އެއިރުން ކުޅުދުއްފުށިވާނީ ވަރަށް ހަރަކާތްތެރި، ރާއްޖޭގެ ކޮންމެ ހިސާބަކުން ވެސް މީހުން ޒިޔާރަތްކުރާހިތްވާ ތަނަކަށެވެ. އެހެން ރަށްރަށާއި ތަފާތު ރަށަކަށް ވެސްމެއެވެ. މިކަމުން ނުކުންނާނެ ރަނގަޅު ނަތީޖާއާއިމެދު ވިޔަފާރީގެ ވިސްނުމަކުން ވީސްނާލާށެވެ. އެއަށްފަހު އިޖްތިމާއީ ދުޅަހެޔޮކަމަށް ކުރާނޭ ރަނގަޅު އަސަރާއިމެދު ވިސްނާލާށެވެ.

އަހަރެންނަށް ފެންނަ އަނެއް ކުޅުއްދުއްފުއްޓަކީ، ވަރަށް އުފާވެރި، ފޫހިފިލާ، ޒަމާނީ ކުޅުދުއްފުއްޓެކެވެ. ރޭގަނޑާއި ދުވާލު އަވަސް ހަރަކާތުން ހަލަބޮލިވެފައިވާ، ކުޑަވަރެއްގެ ސިޓީއެކެވެ.