ދުނިޔޭގެ އެންމެ ބޮޑު އަދި ޝަރަފްވެރި ފުޓުބޯޅަ މުބާރާތް “ވޯލްޑްކަޕް” މިހާރު މިވަނީ ބޯމަތިވެފައެވެ. ދުނިޔޭގެ ކަންކޮޅުތަކަށް ވަނީ ފުޓުބޯޅައިގެ އީދު އައިސްފައެވެ. ސައުތު އެފްރިކާގައި މިފަހަރު ބޭއްވޭ ވޯލްޑްކަޕާއި އެކު އަހަރެމެންގެ ތެރެއަށްވެސްވަނީ ވަރަށް ތަފާތު މުޅިންއާ ބަސްތަކެއް ތައާރަފްވެފައެވެ. އެހެންކަމުން އަހަރެމެން ދުވަހުގެ މުއާމަލާތުގެ ތެރެއަށް މިހާރު ވަދެފައިވާ ތިން ބަހަކަށް ބަލައިލާނަމެވެ.

ޒަކޫމީ

ޒަކޫމީ އަކީ މިފަހަރުގެ ވޯލްޑްކަޕްގެ ރަސްމީ މެސްކޮޓަށް ދެވިފައިވާ ނަމެވެ. މިފަހަރުގެ މެސްކޮޓުން ފެނިގެންދަނީ ލެޕަޑް އެކެވެ. ފެހި ކުލައިގެ އިސްތަށިގަނޑެއް ލިބިފައިވާ މިލެޕަޑްގެ ގައިގާ ވާ ރީނދޫ ކުލައާއި ފެހި ކުލައިން ދައްކައި ދެނީ މުބާރާތް ބާއްވާ ގައުމު، ސައުތު އެފްރިކާގެ ކުޅުންތެރިން ބޭނުންކުރާ ޖޯޒީގައި ހިމެނޭ ކުލަތަކެވެ.

ޒަކޫމީގެ “ZA” އަކީ ބައިނަލްއަގްވާމީ ގޮތުން ސައުތު އެފްރިކާގެ ނަން ކުރުކޮށް ބޭނުންކުރެވޭ ގޮތެވެ. އަދި “kumi” ގެ މާނައަކީ ދިހައެކެވެ. އެފްރިކާގެ އެކިބަސްތަކުގައި ކޫމީގެ މާނައަކީވެސް ދިހައެކެވެ. ޒަކޫމީ ކެރެކްޓަރ އަށް ދެވިފައިވާ ރަސްމީ މޮޓޯއަކީ “ޒަކޫމީގެ ގޭމަކީ ކުޅިވަރުގެ ރޫޙާއި އެއްގޮތް ގޭމެ”ކެވެ. މި ކެރެކްޓާ ފަރުމާކޮށްފައިވަނީ ސައުތު އެފްރިކާގެ ކޭޕްޓައުންގެ އެންޑްރީސް އޮޑެންޑާލް ކިޔާމީހެކެވެ.

ޖަބުލާނީ

ޖަބުލާނީ އަކީ މިފަހަރު ވޯލްޑްކަޕް ކުޅޭ ރަސްމީ ބޯޅައަށް ދެވިފައިވާ ނަމެވެ. އެފްރިކާގެ އިސިޒުލޫ ބަހުން ޖަބުލާނީގެ މާނައަކީ “އުފާވެރިކަން ގެނެސްދިނުމެ”ވެ. ކުޅިވަރު ސާމާނު އުފެއްދުމުގައި ދުނިޔޭގެ އެއްވަނަ ކުންފުނި އެޑިޑާސްއިން ފަރުމާކޮށް އުފައްދާފައިވާ މިބޯޅައަކީވެސް ވޯލްޑްކަޕްގެ ބޯޅަ އުފެއްދުމުގެ ސިލްސިލާއަށް އެކުންފުނިން އަމުނާލި އިތުރު ބޮޅެކެވެ. 1970 ވަނަ އަހަރުގެ ވޯލްޑްކަޕް ކުޅެވުނު “ޓެލެސްޓަރ” އިން ފެށިގެން އެންމެ ފަހުން ޖަރުމަނުގައި ބޭއްވުނު ވޯލްޑްކަޕްގައި ބޭނުންކުރެވުނު “ޓީމްޖީސްޓް” އާއި ހަމައަށް ކޮންމެ ވޯލްޑްކަޕަކަށްވެސް ވޯލްޑްކަޕް ބޯޅަ އުފެއްދި އެޑިޑާސްގެ 11 ވަނަ ވޯލްޑްކަޕް ބޯޅަ، ޖަބުލާނީ އަކީވެސް އެތައްދުވަހެއްގެ ދިރާސާތަކަށްފަހު “ކޮށާމަށައިގެން” ހަދާފައިވާ ބޯޅައެކެވެ. މިފަހަރުވެސް ބޯޅައިގެ ފެންވަރު ރަނގަޅުވިއިރު، އެހެންފަހަރު ތަކެކޭވެސް އެއްފަދައިން ފާޑުކިއުންތައް އަމާޒުވިއެވެ.

އާއްމުކޮށް ފުޓުބޯޅަ ތައްޔާރުކޮށްފައި ހުންނަނީ 32 ހަކަން ނުވަތަ 32 “ހެކްސަގޮނަލް” ޕެނަލް ހިމެނޭގޮތަށެވެ. ޖަރުމަނުގައި ބޭނުންކުރެވުނު “ޓީމްޖީސްޓް” ގައި ހިމެނުނީ 14 ޕެނަލްއެވެ. ނަމަވެސް ޖަބުލާނީގައި ނިމެނެނީ އެންމެ 8 ޕެނަލެވެ. ބޯޅައިގައި ހުންނަ ކުދިކުދި އުން ތަކެއްގެ ސަބަބުން ގޯލްކީޕަރުންނަށް ބޯޅަ ތަތްކޮށްލަން ފަސޭހަވެފައި، މަތިން ޖަހާއިރު ގޮލްފް ބޯޅަ ދާގޮތަށް އޮމާންކަމާއެކު ދަތުރު ކުރާނެއެވެ.

އެޑިޑާސްއިން ހާމަކުރާ ގޮތުން ޖަބުލާނީ، ނަންބަރު 11 އާއި ވަރަށްބޮޑަށް ގުޅިފައިވެއެވެ. މިއީ އެޑިޑާސްގެ 11 ވަނަ ވޯލްޑްކަޕް ބޯޅައެވެ. އެފްރިކާގައި ހިމެނެނީ 11 ޓްރައިބެކެވެ. ފުޓުބޯޅަ ޓީމެއްގައި ހިމެނެނީ 11 ކުޅުންތެރިންނެވެ. މިފަދަ އެތައްބައިވަރު މާނަތަކަކާއި ގުޅިފައިވާ ޖަބުލާނީގައި ހިމެނީވެސް 11 ކުލައެވެ.

ވުވުޒެލާ

ވުވުޒެލާ އަކީ ސައުތު އެފްރިކާގައި ބޭނުންކުރާ ދުންމާރިއަކަށް ކިޔާނަމެކެވެ. ބައެއްފަހަރު “ލެޕަޓާޓާ” އޭވެސް ކިޔާ ވުވުޒެލާއަކީ ދިގުމިނުގައި 1 މީޓަރު ހުންނަ ޓިނުން ހަދާފައިވާ، އެއެއްޗަކުން ބާރުއަޑެއް ނުކުންނަ ދުންމާރިއެކެވެ. ނުވަދިހައިގެ ތެރޭގައި އެގައުމުގެ މީހުންގެ މެދުގައި މަގުބޫލުވި ވުވުޒެލާގެ ޕްލާސްޓިކް ވައްތަރު އުފައްދަން ފެށީ 2001 އެއްވަނަ އަހަރު އެގައުމުގެ މަސިންސިޑޭން ސްޕޯޓްސް އޭކިޔާ ކުންފުންޏަކުންނެވެ. ތުންފަތާއި ފުއްޕާމެޔަށް ވަރަށް ބާރުލައިފައި ފުމެންޖެހޭ މި ދުންމަރިން ނުކުންނަނީ ރަށްތަކުގެ އައްސޭރި ފަށުގައި ހުންނަ ލައިޓްހައުސްތަކުން ގޮއްވާ “ފޮގްހޯން” ގެ އަޑެވެ. ބައެއްފަހަރު އެތުގެ އަޑާވެސް ވުވުޒެލާގެ އަޑުވައްތަރެވެ.

ސައުތު އެފްރިކާގެ ފުޓުބޯޅަ ލީގުގެ މެޗުތައް ކުޅޭއިރު ވުވުޒެލާ ފުމުމަކީ އާއްމުކަމެކެވެ. އެކިޓީމުތަކުގެ ސަޕޯޓަރުން ބޭނުންކުރަނީ އެކިކުލައިގެ ވުވުޒެލާއެވެ. ބައެއްފަހަރު ސްޓޭޑިއަމްތަގައި ވުވުޒެލާ ފުމުން މަނާކުރެވިފައި ވެއެވެ. ބުނެވޭގޮތުން ވުވުޒެލާއިން އިވޭ އަޑަކީ ކުޅުންތެރިންނާއި ކޯޗުންގެ ސަމާލުކަން މެޗުން ގެއްލުވާލާ އުނދަގޫ ކުރުވާ އެއްޗެކެވެ. އެފްރިކާގެ ފްލޯކް ވާހަކަތަކުގައި ކިޔާގޮތުން ވުވުޒެލާ ފުމެގެން ބެބޫން ފަދަ ޖަނަވާރުތައް ރޯނާކޮށްލައެވެ. ނުވަތަ މަރާލައެވެ. މެޗުތަކުގެ ފަހު ފަނަރަމިނެޓަށް އެޅީމާ އިދިކޮޅު ޓީމުގެ ސަޕޯޓަރުން، ކުޅުންތެރިންގެ ކުޅުން މަރާލުމަށް ހަތިޔާރެއްގެ ގޮތުގައި ހުއްޓައިނުލާ ވުވުޒެލާ ފުމެއެވެ.

މެޗު ފަށައިގެން ވަރަށް ހަމަހަމަ ކުޅުމެއް ކުޅެމުންގޮސް ކޮންމެ ކޮންމެ ޓީމަކުންވެސް 6 ޕޮއިންޓް ހޯދާފައި އޮއްވާ ހަވީރު 16:27 ގައި ޒުވާނުންގެ މަރުކަޒުގެ ހޯލުން ވަނީ ކަރަންޓް ކަނޑައިގެން ގޮސްފައެވެ. ކަރަންޓްގެ މައްސަލަ ހައްލު ކުރުމަށް މެޗުގެ ކުޅުން ފަށައިގެން ފުރަތަމަ ކުއާޓަރ ނިމުނު އިރު 12-11 އިން ކުރީގައި އޮތީ ޒިގްޒެގެވެ. ދެވަނަ ކުއާޓަރގައިވެސް ފެނިގެން ދިޔައީ ވަރަށް ހަމަހަމަ ފޯރިގަދަ ކުޅުމެކެވެ. ކޮންމެ ޓީމަކުންވެސް ޕޮއިންޓަކަށްފަހު ޕޮއިންޓެއް އަޅަމުން ދިޔައިރު ދެޓީމުގެ ޑިފެންސް ކުރުން ވަރުގަދަކަން ފާހަގަ ވިއެވެ. މިކުއާޓަރ ނިމުން އިރު ސްކޯއަކީ 26-24 އެވެ.

ތިންވަނަ ކުއާޓަރ ފަށައިގެން ކުޅުދުއްށިން ލީޑު ފުޅާކުރަން މަސައްކަތް ކުރިއެވެ. ނަތީޖާއަކަށް ވީ މި ކުއާޓަރ ނިމުނު އިރު 5 ޕޮއިންޓަށް ލީޑު ފުޅާކުރުމެވެ. މިކުއާޓަރ ނިމުނީ 35 ޕޮއިންޓް 30 ޕޮއިންޓުން ޒިގްޒެގް ކުރީގައި އޮވެގެންނެވެ. ހަތަރުވަނަ ކުއާޓަރ ވެގެންދިޔައީ ޒިގްޒެގްގެ ކުއާޓަރ އަކަށެވެ. މިކުއާޓަރގައި ޒިގްޒެގް އިން ޑޮމިނޭޓް ކުރަމުން ދިޔައިރު މެޗު ފެށިނީންސުރެން ސަޕޯޓަރުން ދެމުންދިޔަ ތަރުހީބު އެއްވާނެއްގައި ހިފަހައްޓާލައިފައި ހުއްޓެވެ. މިކުއާޓަރގައި ޒިގްޒެގް އިން 15 ޕޮއިންޓް ހޯދާ 14 ޕޮއިންޓްގެ ލީޑެއް ހޯދިއެވެ. ހިރިޔާއަށް ހޯދުނީ 6 ޕޮއިންޓެވެ.

މެޗުނިމިގެންދިޔައީ 50 ޕޮއިންޓް 36 ޕޮއިންޓުން ޒިގްޒެގް މޮޅުވެގެންނެވެ. މެޗުގެ މޮޅު ކުޅުންތެރިޔަކަށް ހޮވުނީ ޒިގްޒެގްގެ މުހައްމަދު ނިޝާންއެވެ. އެއަށްފަހު މުބާރާތުގެ އެންމެ މޮޅު ފަސްކުޅުންތެރިން އިއުލާން ކުރެވުނެވެ. އެންމެ މޮޅު ފަސްކުޅުންތެރިންނަކީ ޒިގްޒެގް ގެ އަހުމަދު އައުޝަން (11)، މުޙައްމަދު ހަސަން (10)، އާދަމް މުޙައްމަދު (8)، ޢަލީ ނާއިލް (6) އަދި ހިރިޔާގެ އަބްދުއްޔައުގޫބު (10) އެވެ. މުބާރާތުގެ އެންމެ މޮޅު ކުޅުންތެރިޔަކަށް ހޮވުނީ ޒިގްޒެގްގެ ޖޯޒީ ނަންބަރު 4، ހުސެއިން އިބްރާހިމެވެ.

މުބާރާތުގެ ވަނަވަނައަށް ދިޔަ ޓީމުތަކަށާއި ކުޅުންތެރިންނަށް ތައްޓާއި ހަނދާނީ ލިޔުން ދެއްވީ ޝަރަފްވެރި މެހެމާނު، މިނިސްޓަރ އޮފް ހިއުމަން ރިސޯސް، ޔޫތު އެންޑް ސްޕޯޓްސް އޮނަރަބަލް ހަސަން ލަތީފެވެ. މި މުބާރާތުގެ މެއިން ސްޕޮންސަރ އަކީ ދިރާގު އެވެ.

ޒިގްޒެގް ފައިނަލަށް ގޮސްފައިވަނީ ގުރޫޕް ސްޓޭޖްގައި ކުޅުނު ހަތަރު މެޗުންވެސް މޮޅުވެ ސަތޭކަ ޕަސެންޓް ރިކޯޑާއި އެކުއެވެ. ގުރޫޕުގެ ފަހުމެޗުގައި ހޯމަ ދުވަހުގެ ރޭ ޒިގްޒެގް ވަނީ އެޓީމު ފައިނަލްގައި ބައްދަލުކުރަންޖެހޭ ހިރިޔާއާއި ބައްދަލުކޮށް 59 ޕޮއިންޓް 63 ޕޮއިންޓުން މެޗު ކާމިޔާބުކޮށްފައެވެ. މެޗުގެ މޮޅު ކުޅުންތެރިޔަކަށް ހޮވުނީ ޒިގްޒެގްގެ އަހުމަދު ނަޖީލެވެ.

ޒިގްޒެގް އިން މިމުބާރާތުގައި ކުޅުދުއްފުށި ތަމްސީލް ކުރަމުންދާއިރު އަދި ރަނގަޅު ކާމިޔާބީތަކެއް ހޯދަމުންދާއިރު، މިމުބާރާތުގައި ދެން ވާދަކުރާ އެނެއް ދެޓީމުގެ ސަޕޯޓަރުންގެ އަދަދާއި އަޅާބަލާއިރު، ކުޅުދުއްފުށީގެ ސަޕޯޓަރުންގެ އަދަދު މަދުކަން ފާހަގަ ކުރަންޖެހެއެވެ. ހާއްސަކޮށް ހިންނަވަރު ހިރިޔާއަށް ސަޕޯޓްކުރަން އިންޑޯރހޯލަށް ދާ ސަޕޯޓަރުން ގިނައެވެ. ނަމަވެސް ކުޅުދުއްފުށިން ސަޕޯޓްކުރަންދާ ކުދިންގެ އަޑު މަޑު ނޫންކަންވެސް މިފުރުސަތުގައި ފާހަގަކުރަމެވެ.

މިއަދު ކުޅެވޭ ފައިނަލް މެޗުގައި ރަށުޓީމަށް ސަޕޯޓުކުރުމަށް މާލޭގައި އުޅޭ ކުޅުދުއްފުށީގެ ވީހާވެސް ގިނަބަޔަކު ޒުވާނުންގެ މަރުކަޒަށް ދިއުމަށް ކުޅުދުއްފުށި ޑޮޓްކޮމްއިން އެދެމެވެ. މެޗު އޮންނާނީ ޒުވާނުންގެ މަރުކަޒުގެ އިންޑޯހޯލުގައެވެ. ވަނުން ހިލެއެވެ.

ފުރަތަމަ ބުރުގައި ކުޅުނު މެޗު ފަދައިން ރޭވެސް މެޗު ފެށުނީންސުރެން ކޮންޓްރޯލް މެޗު ކޮންޓްރޯލް ކުރަމުން ދިޔައީ ޒިގްޒެގެވެ. ފުރަތަމަ ކުއާޓަރގައި ޒިގްޒެގް އިން 25 ޕޮއިންޓް ހޯދިއިރު ހަވަރު ސްޕޯޓްސްއަށް ލިބުނީ 12 ޕޮއިންޓެވެ. ނަމަވެސް ދެވަނަ ކުއާޓަރގައި ހަވަރު ސްޕޯޓްސް އިން ކުޅުން ކޮންމެވެސް ވަރަކަށް ރަނގަޅުކޮށް، މިކުއާޓަރގައި ޒިގްޒެގްގެ ލީޑް ހަނިކުރިއެވެ. މިކުއާޓަރގައި ޒިގްޒެގް އަށް 11 ޕޮއިންޓް ހޯދުނުއިރު، ހަވަރު އިން ވަނީ 14 ޕޮއިންޓް ހޯދާފައެވެ. ދެކުއާޓަރ ނިމިގެން ދިޔައިރު ސްކޯރ އަކީ 36 ޕޮއިންޓް 26 ޕޮއިންޓެވެ.

ތިންވަނަ ކުއާޓަރގައި ކުޅެންނުކުމެ ޒިގްޒެގް އިން 26 ޕޮއިންޓް ހޯދާ ޖުމްލަ 62 ޕޮއިންޓަށް އެރުވިއެވެ. މިކުއާޓަރގައި ހަވަރު ސްޕޯޓްސް އަށް ހޯދުނު 11 ޕޮއިންޓާއެކު އެޓީމަށް ލިބުނީ 37 ޕޮއިންޓެވެ. ހަތަރު ވަނަ ކުއާޓަރއަށް ޒިގްޒެގް އިން ނުކުތީ ރަށުން ބޭރުގެ އެއްވެސް ކުޅުންތެރިއެއް ނުހިމަނާ، ހަމައެކަނި ރަށު ކުޅުންތެރިންނާއި އެކުއެވެ. މިކުއާޓަރގައި ޒިގްޒެގް 22 ޕޮއިންޓް ހޯދިއިރު ހަވަރު ސްޕޯޓްސްއަށް ހޯދުނީ 12 ޕޮއިންޓެވެ.

މެޗު ނިމިގެންދިޔައީ 35 ޕޮއިންޓްގެ ލީޑެއްގައި އޮވެގެން ޒިގްޒެގް މޮޅުވެގެންނެވެ. މެޗުގެ މޮޅުކުޅުންތެރިޔަކަށް ހޮވުނީ ކުޅުދުއްފުށީ ޒިގްޒެގަށް 13 ޕޮއިންޓް ހޯދައިދިން އައުޝަންއެވެ.

ޒިގްޒެގްގެ ފުރަތަމަ މެޗާއި ހިލާފަށް ރޭގެ މެޗު ވެގެންދިޔައީ ވަރަށް ވާދަވެރި މެޗަކަށެވެ. މެޗުގެ ފުރަތަމަ ކުއާޓަރ ފަށައިގެން ވަރަށް ހަމަހަމަ ކުޅުމެއް ކުޅުމަށްފަހު، ކުއާޓަރ ނިމުނީ 13 ޕޮއިންޓް 12 ޕޮއިންޓުން ޒިގްޒެގް ކުރީގައި އޮވެގެންނެވެ. ދެވަނަ ކުއާޓަރގެ މެދެއްހާ ހިސާބުން ހިރިޔާއިން ލީޑު ނެގިކަމުގައި ވިޔަސް ޒިގްޒެގް އިން ވަނީ މިކުއާޓަރގައިވެސް ލީޑު ހޯދާފައެވެ. މިކުއާޓަރގައި ޒިގްޒެގް އިން 14 ޕޮއިންޓް ހޯދިއިރު ހިރިޔާއަށް ހޯދުނީ 11 ޕޮއިންޓެވެ. މިކުއާޓަރ ނިމުނު އިރު ސްކޯއަކީ 27 ޕޮއިންޓް 23 ޕޮއިންޓެވެ.

ތިންވަނަ ކުއާޓަރގައި ހިރިޔާއިން ވަނީ ރަނގަޅު ކުޅުމެއް ދައްކާ 12 ޕޮއިންޓް ހޯދާފައެވެ. މި ކުއާޓަރގައި ޒިގްޒެގަށް ހޯދުނީ 11 ޕޮއިންޓެވެ. ހަތަރު ވަނަ ކުއާޓަރ ގައި ޒިގްޒެގްގެ ކުޅުން ވަރަށް ބޮޑުތަން ރަނގަޅުވެގެން ދިޔައެވެ. ނަތީޖާއަކަށްވީ 23 ޕޮއިންޓް ހޯދާ ލީޑު ފުޅާކުރުމެވެ. މި ކުއާޓަރގައި ހިރިޔާއަށް ހޯދުނީ 11 ޕޮއިންޓެވެ.

މެޗުނިމިގެން ދިޔައީ 61 ޕޮއިންޓް 46 ޕޮއިންޓުން ޒިގްޒެގް މެޗު ކާމިޔާބުކޮށްގެންވެ. މެޗުގެ މޮޅު ކުޅުންތެރިޔަކަށް ހޮވުނީ ޒިގްޒެގްގެ ޖޯޒީ ނަންބަރު 4، ހުސެއިން ނިހާދު އަހުމަދެވެ.

ޒިގްޒެގް ވަނީ މުބާރާތުގައި ކުޅުނު ފުރަތަމަ މެޗުގައި ތިނަދޫ ހަވަރު ސްޕޯޓްސް ބޮޑު ތަފާތަކުން ބަލިކޮށްފައެވެ. ކުޅުނު ދެމެޗުން މޮޅުވެ ޒިގްޒެގް މިހާރު އޮތީ ގުރޫޕުގެ އެއްވަނައިގައެވެ. ދެވަނައިގާ ހިރިޔާ އޮތްއިރު، ކުޅުނު ދެމެޗުން ބަލިވެ ހަވަރު ސްޕޯޓްސް އޮތީ ޓެބަލްގެ ފުލުގައެވެ.

މިމުބާރާތުގެ ދެވަނަ ބުރުގެ ފުރަތަމަ މެޗުގައި ހިރިޔާއާއި ހަވަރު މާދަމާރޭ ބައްދަލުކުރާނެއެވެ.

މެޗު ފަށައިގެން ދެޓީމުންވެސް ކުޅެމުން ދިޔައީ ވަރަށް ހަމަހަމަ ކުޅުމެކެވެ. އެހެން ކަމުން ފުރަތަމަ ކުއާޓަރ ނިމުނު އިރު ޒިގްޒެގަށް ނެގޭވަރުވީ އެންމެ ޕޮއިންޓެއްގެ ލީޑެކެވެ. ފުރަތަމަ ކުއާޓަރ ނިމިގެން ދިޔައީ 20 ޕޮއިންޓް 19 ޕޮއިންޓުން ޒިގްޒެގް ކުރީގައި އޮވެގެންނެވެ.

ނަމަވެސް ދެވަނަ ކުއާޓަރ އާއި ހިސާބުން ޒިގްޒެގްގެ ކުޅުން ވަރުގަދަކޮށް ޕޮއިންޓަކަށް ފަހު ޕޮއިންޓެއް އަޅަމުން ދިޔައެވެ. މިކުއާޓަރގައި ހަވަރު ސްޕޯޓްސް 16 ޕޮއިންޓް ހޯދިއިރު ޒިގްޒެގްއިން ވަނީ އޭގެ ދެގުނަ، 32 ޕޮއިންޓް ހޯދާފައެވެ. މިކުއާޓަރ ނިމުނީ 52 ޕޮއިންޓް 35 ޕޮއިންޓުންނެވެ.

ތިންވަނަ އަދި ހަތަރުވަނަ ކުއާޓަރގައި ވެސް ޒިގްޒެގް ދިޔައީ މެޗު ކޮންޓްރޯލް ކުރަމުންނެވެ. ޒިގްޒެގް ތިންވަނަ ކުއާޓަރގައި 36 ޕޮއިންޓް އަދި ހަތަރު ވަނަ ކުއާޓަރގައި 21 ޕޮއިންޓް ހޯދިއެވެ. ހަވަރު ސްޕޯޓްސްއަށް މިދެކުއާޓަރގައި ހޯދިފައިވަނީ 11 ޕޮއިންޓަކާއި 14 ޕޮއިންޓެކެވެ. ތިންވަނަ ކުއާޓަރ ނިމުނު އިރު ސްކޯ އަކީ 88 ޕޮއިންޓް 46 ޕޮއިންޓެވެ.

މެޗުނިމުނީ 109 ޕޮއިންޓް 60 ޕޮއިންޓާއި އެކު 49 ޕޮއިންޓްގެ ތަފާތަކުން ޒިގްޒެގް މޮޅުވެގެންނެވެ. މިމެޗުގައި ޒިގްޒެގަށް އެންމެ ގިނަ ޕޮއިންޓް ހޯދައިދިނީ ޖޯޒީ ނަންބަރު 11 އަހުމަދު އައުޝަންއެވެ. އޭނާ ޒިގްޒެގަށް 27 ޕޮއިންޓް ހޯދައިދީފައި ވެއެވެ. ހަވަރު ސްޕޯޓްސްއަށް އެންމެ ގިނަޕޮއިންޓް ހޯދައިދިނީ އެޓީމުގެ 8 ނަންބަރު މުހައްމަދު ފައިސަލް އެވެ. އޭނާ ހަވަރު ސްޕޯޓްސްއަށް 19 ޕޮއިންޓް ހޯދައިދިނެވެ. މެޗުގެ މޮޅު ކުޅުންތެރިޔަކަށް ހޮވުނީ ޒިގްޒެގަށް 24 ޕޮއިންޓް ހޯދައިދިން، ޖޯޒީ ނަންބަރު 04، ހުސައިން ނިހާދު އަހުމަދެވެ.

މިމުބާރާތުގެ ފުރަތަމަ މެޗުގައި ހިންނަވަރު ހިރިޔާއާއި ތިނަދޫ ހަވަރު ސްޕޯޓްސް ބައްދަލުކޮށް 68 ޕޮއިންޓް 62 ޕޮއިންޓުން މެޗު ކާމިޔާބު ކުރީ ހިންނަވަރު ހިރިޔާއެވެ. މިމުބާރާތުގައި މިރޭ ބައްދަލުކުރާނީ ކުޅުދުއްފުށީ ޒިގްޒެގް އާއި ހިންނަވަރު ހިރިޔާއެވެ. މިމުބާރާތުގައި ކޮންމެ ޓީމެއް ކޮންމެ ޓީމަކާ 2 ފަހަރު ބައްދަލު ކުރާނެއެވެ.

ހަތަރުވަނަ އެޓޯލް ބާސްކެޓްބޯލް ޗެމްޕިއަންޝިޕް މުބާރާތުގައި ކުޅުދުއްފުށީ ޒިގްޒެގް މާދަމާރޭ ގދ ތިނަދޫ ހަވަރު ސްޕޯޓްސް އާއި ބައްދަލު ކުރާއިރު މި މުބާރާތަށް ތައްޔާރު ވުމުގެ ގޮތުން 3 މެޗެއް ވަނީ ކުޅެފައެވެ. ފުރަތަމަ ޑިވިޝަންގެ ޕޮލިސް ކްލަބާ ބައްދަލުކޮށް 39 ޕޮއިންޓް 13 ޕޮއިންޓުން އެ މެޗް ޒިގްޒެގް ކާމިޔާބު ކުރިއިރު ފުރަތަމަ ޑިވިޝަނުގެ 2 ޓީމުކަމަށްވާ ސިފައިންގެ ކްލަބާ ހަރިކޭންގެ މެޗުން ކުޅުދުއްފުށީ ޓީމު ވަނީ ބަލިވެފައެވެ. ހަރިކޭނާ ބައްދަލު ކުރިމެޗް 62 ޕޮއިންޓް 54 ޕޮއިންޓުން ހަރިކޭން ކާމިޔާބު ކުރިއިރު ސިފައިންގެ ކުލަބް އަތުން 8 ޕޮއިންޓްގެ ތަފާތަކުން ވަނީ ބަލިވެފައެވެ.

ޓައިމް ޒޯން ގެ އޮފިޝަލް ސުޕޮންސަރ އާއެކު ނުކުންނަ ކުޅުދުއްފުށީ ޒިގްޒެގް ޓީމުގެ ކޯޗަކަށް ހަމަޖައްސާފައިވަނީ ކުރީ ދެ އަހަރުވެސް ކުޅުދުއްފުއްޓަށް ތަށި ހޯދައިދިން ކޯޗް އަހްމަދު ރިޔާޒެވެ. ކުޅުދުއްފުށީގެ ހުނަރުވެރި ކުޅުންތެރިޔާ އަހްސަން ޓިމުގެ ކެޕްޓަންކަން ކުރާއިރު ޓީމުގެ ވައިސް ކެޕްޓަނަކީ އާދަމް މުޙައްމަދު (ބޮންތި) އެވެ. މާދަމާރޭގެ މެޗު އޮންނާނީ ޒުވާނުންގެ މަރުކަޒުގެ އެތެރޭހޯލުގައި 20:30 ގައެވެ.

ޖަލާލުއްދީން ސްކޫލުގެ “ކުޅޭ ބިމުގައި” ބާއްވާ މި މުބާރާތުގެ މަޤްޞަދަކީ ސްކޫލް ތަކުގެ މުވައްޒަފުންގެ މެދުގައި އެކުވެރިކަން އާލާކޮށް، މިފަދަ ކުޅިވަރުގެ ހަރަކާތް ތަކުގައި ބައިވެރި ވުމުގެ ފުރުޞަތު ދިނުމާއި ޞިއްޙީ ގޮތުން ދުލަހެޔޮ އަދި ހަށިހެޔޮ ބަޔަކަށް މުވައްޒަފުން ހެދުމަށް ކަމަށް އެފަރާތުން މައުލޫމާތު ދެއެވެ.

މި މުބާރާތުގައި އަންނަ އަންގާރަ ދުވަހުގެރޭ ބައްދަލު ކުރާނީ ޑެއާރ ޑެވިލްސް އާއި ވެލޯސިޓީ އެވެ. ފުރަތަމަ ބުރުގެ މެޗުތައް މިމަހުގެ 20 ން 25 ށް ބޭއްވުމަށް ފަހު ސެމީ ފައިނަލް ގެ މެޗްތައް ކުޅޭނީ 27 28 30 މިތިން ދުވަހު އެވެ. ފައިނަލް މެޗް ކުޅުމަށް ހަމަޖެހިފައިވަނީ ނަޞްރުގެ ދުވަހުގެ ގޮތުގައި ފާހަގަ ކުރަމުންދާ ނޮވެމްބަރު މަހުގެ 3 ވަނަ ދުވަހުއެވެ.

މިއީ ކުޅުދުއްފުށީގައި ބޭއްވޭ ދެވަނަ ފުޓްސަލް މުބާރާތެވެ. މީގެ ކުރިން “ކޮރަލް” ދަނޑުގައި ކުޅޭ ކުޅުންތެރިން އިންތިޒާމް ކޮށްގެން ވަނީ ފުޓްސަލް މުބާރާތެއް ބާއްވާފައެވެ.

މެޗު ނިމުމުން މުބާރާތުގެ އެކިވަނަތަކަށާއި މުބާރާތުގައި އެހީތެރިވެދެއްވި ބޭފުޅުންނަށް އިނާމާއި ހަނދާނީ ލިޔުން ބައްސަވައިދެއްވީ މެޗުގެ ޝަރަފުވެރި މެހެމާން ކުޅުދުއްފުށީ ކައުންސިލަރ އާދަމް ވަހީދުއެވެ. މުބާރާތުގެ އެންމެ މޮޅު ކުޅުންތެރިޔަކަށް ހޮވިފައިވަނީ ބާނި ޔުނައިޓެޑްގެ ޖާޒީ ނަންބަރ 8 އަހުމަދު ޤާސިމްއެވެ. މުބާރާތުގަ އެންމެ ގިނަ ލަނޑުޖަހި ކުޅުންތެރިޔަކަށް ހޮވިފައިވަނީ މިނީ ޒިގްޒެގްގެ ޖާޒީ ނަންބަރ 7 މުހައްމަދު ހަސަނެވެ. ފެއާޕްލޭ ޓީމަކަށް ހޮވުނީ އަންމުއެވެ. މުބާރާތުގެ ރަނާއަޕް ޓީމަކީ ކުއަޑްސްއެވެ. ޗެމްޕިއަންޓީމަކީ ކްލަބް ނަފާއެވެ.

ރޭ ކުޅެވުނު ފައިނަލް މެޗު ފެށުމުގެ ކުރިންވަނީ ކުޅުދުއްފުށީ ދެކުނު އަވަށު ޒުވާނުންގެ ދިރުމުގެ ވެބްސައިޓް ލޯންޗް ކޮށްފައެވެ. މިސައިޓްގެ އެޑްރެހަކީ www.zuvaanungedhirun.com އެވެ.

މުބާރާތް އިންތިޒާމް ކުރި ފަރާތުން މިސައިޓަށް މައުލޫމާތު ދީފައިވާ ގޮތުގައި ޖުމްލަ 11 ޓީމް ބައިވެރިވި މި މުބާރާތް 12 ފަރާތަކުން ސްޕޮންސަރ ކޮށްފައިވެއެވެ. އަދި މުބާރާތް ކުރިއަށްދަނީ 11 ޓީމް ތިން ގުރޫޕަކަށް ބަހާލައިގެން ކަމަށް ވެސް އެފަރާތުން މައުލޫމާތު ދެއެވެ. ކުޅުދުއްފުއްޓަށް އަލަށް ފުޓްސަލް ތައާރަފު ކުރުމުގެ މަގްޞަދުގައި ބޭއްވޭ މިމުބާރާތް ކުރިޔަށް ދާނީ މިމަހުގެ 22 ން އޮކްޓޯބަރ މަހުގެ 2 ވަނަ ދުވަހުގެ ނިޔަލަށެވެ. މިމުބާރާތް ބޭއްވުމުގެ އިތުރު ބޭނުންތަކުގެ ތެރޭގައި “ކޮރަލްސް”ގެ ކުދިންގެ މެދުގައި އެކުވެރިކަން އާލާ ކުރުމާއި، ކޮރަލްސް ދަނޑުގައި ކުޅޭ ކުޅުންތެރިންނަށް ވާދަވެރި މެޗްތަކެއް ކުޅުމުގެ ފުރުޞަތު ދިނުން ކަމަށް އެ މައުލޫމާތު ދެއްވިއެވެ. އަދި އެންމެ މުހިއްމު އެއް މަޤްޞަދަކީ، ފެންވަރު ރަނގަޅު މުބާރާތްތަކެއް ބޭއްވުމަށް އެހެން ފަރާތްތަކަށްވެސް ހިތްވަރު ދިނުން ކަމުގައި މި މުބާރާތް އިންތިޒާމް ކުރި ފަރާތުން ހާމަކުރެއެވެ.

މި މުބާރާތުގައި ކުޅެމުންދަނީ ހަމައެކަނި “ކޮރަލްސް” ދަނޑަށް ނިސްބަތްވާ ކުޅުންތެރިންނެވެ. މި މުބާރާތުގައި އިއްޔެ ވަނީ ދެ މެޗް ކުޅެފައެވެ. ފުރަތަމަ މެޗްގައި ބައްދަލު ކޮށްފައިވަނީ ހަތްތުރާ އާއި ކްއާޒާރ އެވެ. ރައްޔިތުންގެ މަޖިލީހުގެ ކުޅުދުއްފުށީ އުތުރު ދާއިރާގެ މެމްބަރު އަބްދުލް ޣަފޫރު މޫސާ ޝަރަފްވެރި ކޮށްދެއްވި މިމެޗް 2-7 ން ކާމިޔާބު ކޮށްފައިވަނީ ހަތްތުރާ ޓީމެވެ. މި މެޗްގެ އެންމެ މޮޅު ކުޅުންތެރިއަކަށް ހޮވިފައިވަނީ ހަތްތުރާގެ ޖާޒީ ނަންބަރު 99 ސައުދު ހަސަނެވެ.

އިއްޔެ ހަވީރު ކުޅެވުނު ދެވަނަ މެޗްގައި ބައްދަލު ކޮށްފައިވަނީ ފިފްޓީ ފިފްޓީ އާއި ޒީރޯ ގްރެވިޓީ އެވެ. މިމެޗް ތަފާތު ބޮޑު ނަތީޖާ އަކާއި އެކު ކާމިޔާބު ކޮށްފައިވަނީ ޒީރޯ ގްރެވިޓީ އެވެ. 2 – 11 ން ޒީރޯ ގްރެވިޓީ މިމެޗް ކާމިޔާބު ކުރިއިރު މި މެޗްގެ އެންމެ މޮޅުކުޅުންތެރިއަކަށް ވެސް ހޮވިފައިވަނީ އެޓީމުގެ ޖާޒީ ނަންބަރ 21 ޒައިދު މުޙައްމަދެވެ. މިމެޗު ޝަރަފްވެރި ކޮށްދެއްވީ ދިރާގު ކޭ.އޯ.ސީ ގެ މާކެޓިން އެންޑް ސޭލްސް އޮފިސަރ އަލްފާޟިލް މުޙައްމަދު އަބްދުﷲ އެވެ.

ކޮރަލްސް ފުޓްސަލް ކަޕް 2009 ގައި މިއަދު ހަވީރު ވެސް ދެމެޗު ކުޅެފައިވެއެވެ. ކުޅުދުއްފުށީ ސަރަޙައްދީ ބަނދަރު ވަގުތީ ގޮތުން ހިންގުމާއި ޙަވާލުވެ ހުންނެވި އަލްފާޟިލް އަހުމަދު އާތިފް ޝަރަފްވެރި ކޮށްދެއްވި މިމެޗުގައި ބައްދަލު ކޮށްފައިވަނީ ޕިންކް ޕޭންތަރ އާއި ވީ-އޭބަލް އެވެ. 6-2 އިން ޕިންކް ޕޭންތަރ މޮޅުވި މިމެޗުގެ މޮޅުކުޅުންތެރިޔަކަށް ހޮވުނީ ޕިންކް ޕޭންތަރ ގެ އަހުމަދު ދާއޫދެވެ.

މަތިއުތުރު ޕްރޮވިންސްގެ ސްޓޭޓް މިނިސްޓަރ އަލްފާޟިލް މުޙައްމަދު ހުނައިފް ޝަރަފްވެރި ކޮށްދެއްވި މިއަދު ކުޅެވުނު ދެވަނަ މެޗުގައި ރިއަލް އާއި ޑެސިބަލް ބައްދަލުކޮށް 6-5 އިން މެޗު ކާމިޔާބު ކުރީ ރިއަލްއެވެ. މިމެޗުގެ މޮޅު ކުޅުންތެރިޔަކަށް ހޮވުނީ އެޓީމުގެ އަސްވަދު ރަޝީދެވެ.

މިމުބާރާތުގައި މާދަމާ ކުޅެވޭ ފުރަތަމަ މެޗުގައި 16:15 ގައި ބައްދަލުކުރާނީ ޑިސިޕްލިން އާއި ފާސްޓް ފީޓެވެ. އަދި 17:10 ގައި ފެށޭ ދެވަނަ މެޗުގައި ބައްދަލުކުރާނީ ހަތްތުރާއާއި ފިފްޓީ ފިފްޓީއެވެ.

ކޮރަލްސް ފުޓްސަލް ކަޕް 2009 ގެ ޝެޑިއުލް ޑައުންލޯޑް ކުރައްވާ