ލޮނުޒިޔާރަތް މަގުން ހެންވޭރަށް ދުއްވާފައި ދިޔައީ ވަރަށް ބާރަށެވެ. ކަލާފާނު ސްކޫލަށް ކޮއްކޮ ބަލައި ދާންޖެހެނީ 1:30 ށް ކަމުގައި ވިޔަސް އެދުވަހު އަހަރެންނަށް އޮފީހުން ނުކުމެވުނީ ވަރަށް ލަސްވީފަހުންނެވެ. ފޭސްބުކްގައި ކިތައްމެ ގިނައިރަކު އިނަސް ފޫހިވާގޮތެއް ނުވެއެވެ. އެހެންވެ ގަޑި ޖެހިގެން ދިޔައިރުވެސް ހޭވެރިކަން ނުވެއިނދެވުނީއެވެ.

ލޮނުޒިޔާރަތް މަގުން އަހަރެން ދުއްވަމުން ދިޔައީ ވަރަށް ބާރަށެވެ. އޭރުވެސް ގަޑި ޖެހުނުތާ 15 ވަރަކަށް މިނިޓް ވެދާނެއެވެ. ކުއްލިއަކަށް ބުރަކި ޖައްސަން ޖެހުނީ ކުރިމަތިން ދުއްވާފައި ދިޔަ ކާރު ހުއްޓުނީމައެވެ. އެހެންނަމަވެސް ކާރުގެ ކަނައަތް ފަރާތުން ކުޑަ ޖާގައެއް އިނުމުން އެތަނުން އަނެއްކާވެސް ސްޕީޑް ބާރުކޮށްލީމެވެ. ކާރުގެ ފަހަތު ދޮރާ ހަމަވިކަން އެނގުނެވެ. ކުއްލިއަކަށް ކާރުގެ ދޮރު ހުޅުވުމާއެކު ދުއްވަން އިން ސައިކަލުގެ ހުންގާނު ދޮރުފަތުގައި ޖެހި ވިއްސައިގެން ގޮސް 10 ފޫޓް ދުރައް ވެއްޓުނެވެ.

ހޭވެރިކަން ވީއިރު އަހަރެން އޮތީ ހޮސްޕިޓަލުގައި ކަން އެނގުނެވެ. މަޑުމަޑުން ދެލޯ ހުޅުވާލުމަށްފަހު ވަށައިގެން ބަލާލީމެވެ. އެހެންނަމަވެސް ގައިގައި އެވަރުގެ ބާރެއް ނެތެވެ. އަނެއްކާވެސް ދެލޯމަރާލީމެވެ. އަހަރެންނަށް އެއްވެސް ތަދެއް އިހުސާސެއް ނުވެއެވެ. އެކަމަކު ގައިގެ އެއްވެސް ގުނަވަނެއް ހަރަކާތް ކުރާނެ ހިތްވަރެއް ނެތެވެ.

އަހަރެން ހޮސްޕިޓަލުގައި އެނދުމަތި ކޮށްފައި އޮންނަތާ މިވީ ތިން ދުވަހެއެވެ. މިއަދު އަހަރެންގެ ގައިގެ އެކިތަންތަނުގައި ރިއްސާ ކަން އަހަރެންނަށް އިހުސާސްވެއެވެ. އަދި ވަރަށް ބޮޑަށް ބޯފަޅައިގެން ގޮސްފައިވާކަން އެނގުނެވެ. ކަނައަތު ފަޔާއި ވައަތުގެ ކޮނޑު ހުޅުކައިރިން ބިނދިފައި ވާކަންވެސް އެނގުނީ މިއަދުއެވެ. އަހަރެން ކުޑަކޮށް އެނދުގެ ބޯލާކޮޅު އުސްކޮށްލުމަށް މަންމަ ކައިރީ ބުނީމެވެ. އެވަގުތު އަހަރެންގެ ކައިރީގައި ތިބީ މަންމަ އާއި އެންމެ ދޮށީ ދައްތައެވެ. ބޭބެ ދިޔައީ ބޭހެއް ނަގަން ކަމަށް މަންމަ ބުންޏެވެ.

އަހަރެންގެ ފޯނުގެ މަތިން ހަނދާން ވީވެސް އެވަގުތުއެވެ. ފޯނު ނަގާ ބަލާލުމުން ވަރަށް ގިނަ ކޯލް ތައް މިސް ވެފައިވާކަން އެނގުނެއެވެ. އަދި ނުދަންނަ ނަންބަރަކުން ތަކުރާރުކޮށް އެއް މެސެޖެއް ކޮށްފައިވެއެވެ. ރަށްޓެހިންގެ މެސެޖްތަކަށް ވުރެ އަހަރެއްގެ ސަމާލުކަން ހުއްޓުނީ ނުދަންނަ އެ ނަންބަރުން ކޮށްފައިވާ މެސެޖަށެވެ. “ސޮރީ،ސޮރީ ޕްލީޒް ފޮގިވް މީ” މިހެން ލިޔެފައިވާ ވިއްސަކަށް މެސެޖް ފޯނަށް ލިބިފައިވެއެވެ. އެއް ނަންބަރަކުންނެވެ. ފުރަތަމަ އެއީ ކޮން ނަންބަރެއްތޯ ބަލާލީމެވެ. އަހްމަދު އާތިފްގެ ނަމުގައި ނަގާފައިވާ ނަންބަރެކެވެ. އެނަންބަރަށް ގުޅާލީމެވެ. ކޮންމެ ފަހަރަކުވެސް ފޯނު ކަނޑާލަނީއެވެ. ފޯނު ކަނޑާލުމަށް ފަހު ދެން އަންނަނީ ކުރިންވެސް އެ ނަންބަރުން ފޮނުވާފައިވާ މެސެޖެވެ.

މިއަދަކީ އަހަރެން ހޮސްޕިޓަލުން ދޫކޮށްލާނެކަމަށް ޑޮކްޓަރު ބުނެފައިވާ ދުވަހެވެ. މިއަދުވެސް އަހަރެންގެ ފޯނަށް މެސެޖްކުރާ ނަންބަރަށް ގުޅާލީމެވެ. މިއަދު ފޯނު ނުނަގާއިރު މެސެޖެއްވެސް ނުކުރެއެވެ. އިރުއިރުކޮޅުން ފޯނަށް ބަލާލަމެވެ. އެމެސެޖް އަންނާނެ ވަގުތަކަށް އިންތިޒާރު ކުރެވޭ ކަހަލައެވެ.

ހަވީރު ފަސްގަޑި ބައިވަނީއެވެ. ރަށްޓެހީންނާއި އާއިލާގެ މެންބަރުން އަހަރެންގެ ކައިރިއަށް އަންނަ ވަގުތު ޖެހުމުގެ ކުރިން ކުޑަކޮށް ރީތިވެލީމެވެ. ދަތް އުނގުޅާލައި ބޯ އޮމާންކޮށްލީމެވެ. އަހަރެންގެ ކައިރީގައި މަންމަ އާއި ކޮއްކޮގެ އިތުރުން ދެން ތިބީ އަހްމަދާއި ރިޝްވާންއެވެ. އެއީ އަހަރެންގެ އެންމެ ގާތް ދެރަހްމަތްތެރިންނެވެ. ކުއްލިއަކަށް އަހަރެން އޮތް 54 ނަންބަރު ކޮޓަރީގެ ދޮރުހުޅުވާލުމަށްފަހު އެތެރެއަށް މީހަކުވަނެވެ. އަދި އަތުގެ އިޝާރާތުން އޭނަގެ ފަހަތުގައި ހުރި މީހަކަށް އަހަރެން ދައްކާލިއެވެ. އޭނާގެ ފަހަތުގައި ހުރި މީހެއް ދޮރު ކައިރީ ދަމާފައި ހުރި ފަރުދާގެ ސަބަބުން އަހަރެންނަށް ފެންނަގޮތެއް ނުވެއެވެ.

އިރުކޮޅަކު އެހެން ހުރެފައި އެމީހަކު ބޭރަށް ނުކުތެވެ. އޭރުވެސް ފަރުދާގެ ފުރަގަހުގައި އެ ކުއްޖަކު ހުރިކަން އަހަރެންނަށް އެނގުނެވެ. ފުރަތަމަ ފެނުނީ މާބޮނޑިއެކެވެ. އެމާބޮނޑި ހިފަހައްޓައިގެން ހުރެ އެތެރެއަށް ވަދެގެން އެ އަންނަނީ ދުވަހަކުވެސް އަހަރެންނަށް ފެނުނު ކުއްޖެއް ނޫނެވެ. އޭނަގެ މޫނުމަތިން ލަދުވެތިކަމާ ހިތްނުތަނަވަސް ވެފައިވާކަން ފާޅުވާން ހުއްޓެވެ. އޭނަގެ އެތޫނު ދެލޮލުން އަހަރެންނާ ދިމާއަށް ބަލާލުމުން އަހަރެންގެ ހިތުގެ ވިންދު އަވަސްވިއެވެ. ބޮލުގައި ހުރި ތަދު ފިލައިގެން ދިޔަ ކަހަލައެވެ. އޭނާ މަޑުމަޑުން އައިސް އަހަރެންގެ ކައިރީ ހުއްޓުނެވެ.

“ސޮރީ. ރިއަލީ އައި އެމް ސޮރީ” އޭނާގެ އެ އަޑު އަހަރެންގެ ކަންފަތުގައި ޖެހުމާއެކު އަހަރެންގެ އެތެރެހަށީގައި ހުރި ތަދު އެއްކޮށް ފިލައިގެން ދިއައެވެ. އޭނާ އަހަރެންގެ ކަނައަތުގައި ހިފަހައްޓާލިއެވެ. އެފިނިފިނި މަޑު އަތުން އަހަރެންގެ އަތުގައި ފިރުމާލުން އަހަރެންގެ އިސްތަށިތައް ކޮޅަށް ޖެހުނެވެ. ފާޑެއްގެ ތުރުތުރު އެޅުމެއް ހަށިގަނޑުގައި އަޅާލިއެވެ. އޭނާ އެހާވެސް ރީއްޗެވެ. އަނެއްކާވެސް އެ ޖުމްލަ އޭނާ ތަކުރާރު ކޮށްލިއެވެ. އަހަރެންނަށް ނުދަންނަ ނަންބަރަކުން މެސެޖް ކުރަނީ އެކުއްޖާކަން ޔަގީންވިއެވެ. އަހަރެންގެ ހިތަށް ފިނިކަމެއް އިހްސާސް ކުރެވުނެވެ.

“ކިހިނެތްވީ ސޮރީ އޭ ތިބުނީ. އަނެއްކާ ކިހިނެތްވީ” އަހަރެންނަށް އޭނަ އާއި ވާހަކަ ދެއްކުނީ ގާތް ރަހްމަތްެރި އަކާ ވާހަކަ ދައްކާގޮތަށެވެ. އަލަށް ފެނުނު ކުއްޖެއް ހެން ހިއެއް ނުވެއެވެ.

އަހަރެން އެކްސިޑެންޓްވީ ކާރުގައި އިނީ އެހަންކުއްޖާ ކަމަށާއި އޭނައަށް ކާރުގެ ދޮރު ހުޅުވާލެވުނީ ފަހަތުން އެއްޗެއް އާދޭތޯ ނުބަލާކަމުގައި ބުންޏެވެ. އަދި އަހަރެން އެކާރުގެ ދޮރުފަތުގައި ޖެހި އެކްސިޑެންޓް ވީފަހުން ހޮސްޕިޓަލަށް ކޮންމެ ދުވަހަކު ހަވީރު އަންނަ ވަހަކައާއި އެކަމަކު އަހަރެން ރުޅި އައިސް ދާނެތީ ވަންނަން ނުކެރިގެން އަނބުރާ ދަނީ ކަމުގައި ބުންޏެވެ.

އަހަރެންނަށް މިހާ ބޮޑު އަނިޔާއެއް ލިބުނީ އެކުއްޖާގެ ސަބަބުންކަން އެނގުނީމަވެސް އޭނަ ދެކެ ރުޅި އާދެވޭ ގޮތެއް ނުވިއެވެ. އޭގެ ބަދަލު އަހަރެންނަށް އޭނަ ފެނުމުން ބަލީގެ ޝިފާ ލިބުނު ކަހަލައެވެ. އަހަރެންނަށް ލިބުނު އަނިޔާތަކުގެ ފަރުވާ އަކީ ވެސް އެއަނިޔާ ދިން ފަރާތްކަމުގައި ވެއްޖެއެވެ.

މިހާރު އަހަރެންނަކީ ލޯބިލޯބި ކުއްޖެއްގެ ބައްޕައެވެ. އަހަރެންގެ ދަރިފުޅުގެ މަންމައަކީ އަހަންނަށް މިހާތަނަށް ލިބުނު އެންމެ ބޮޑު އަނިޔާ ލިބުމަށް މެދުވެރިވި ކުއްޖާ އެވެ. އާއެކެވެ. ލޯތްބަކީ މިޒާތުގެ އެއްޗެކެވެ.

(ފުރަތަމަ ބަޔާގުޅޭ)

ފާއިޒު ހަވީރު ކުޅެންގޮސް އައިސް ވަނީ ފެންވަރާށެވެ. ފާއިޒު ފާހާނާ އަށް ވަދެ ފެންވަރަން ފެށިތަނާހެން ފަހަތުން މީހަކު ގަޔަށް ފުމެލިހެން ހީވެގެން ފަހަތަށް ބަލާލިއެވެ. ފާއިޒަށް ހީވި ގޮތެއް ކަމަށް ބަލާ އަނެއްކާވެސް ފެންވަރަން ފެށިއެވެ. ދެވަނަ ފަހަރުވެސް ހަމަ އެގޮތަށް ކުރީފަހަރަށްވުރެ ބާރަށް ފުމެލިހެން ހީވިއެވެ. މިފަހަރު ފާއިޒު ކުޑަކޮށް ހިތްނުތަނަވަސްވާ ގޮތް ވިއެވެ. އަވަސް އަވަހަށް ފެންވަރާލުމަށްފަހު ފާހާނާއިން ނުކުތެވެ.

“ފާއިޒް…ކީއްވެ ހާދަ ފާޑަކަށްތި ހުރީ. އަނެއްކާ ފަޔަށް ތަދުކޮށްލީތަ މިއަދުވެސް..” ފާއިޒް ހުރި ގޮތުން ޝިފާނާ ސުވާލުކުރިއެވެ.

“އާނ. މިއަދުވެސް އެއްކަލަ ނާޒިމް ފަހަތުން އައިސް ކުޑަހުޅަށް ޓެކްލް ކުރީ.. އޭނަ ދަންޏާ ކުޅެން ދާހިތްވެސް ނުވޭ. ވަރަށް ގެރި ވާނެ.” ފާއިޒް ފެށީ ކުޅިވަރުގެ ވާހަކައެވެ.

“ކޮބާ މަންމަ ނާދޭތަ އަދިވެސް” ފާއިޒް ބުންޏެވެ.

“މަންމަ އަންނާނެތަ މިރޭ. އެކިހިނެތްވީ؟” ޝިފާނާ ސުވާލުކުރިއެވެ.

“އާން އަދި އެވާހަކަ ނުބެނެވޭދޯ. މިރޭ ދެމީހުން ކުޑަކޮށް ބޭރަށް ޖައްސާލަން ކަމަށް މިއުޅެނީ. އެހެންވެ މަންމަ ކައިރީ މިއަދު ބުނިން މިރޭ މިގެއަށް ޖައްސާލައްޗޭ ބޭބީ ކައިރީ މަޑުކޮށްލަން.” ފާއިޒް ގެ ނައިކީ ބޮޑީ ސްޕްރޭ ޖަހަން ހުރެ ޖަވާބު ދިނެވެ.

ފާއިޒް އާއި ޝިފާނާ ކައިވެނި ކޮށް ދަރީން ލިބުނުކަމުގައި ވިޔަސް މިހާރުވެސް ދެމީހުން ހިނގާލަން ދިޔުމަކީ އާދައެކެވެ. މަދުވެގެން ހަފްތާއަކު އެއްފަހަރު ދެމީހުން އެކީ ގެއިން ބޭރުގައި ހުސްވަގުތުކޮޅެއް ހޭދަކުރެއެވެ. ކައިވެނީގެ ކުރިން މާފޮޅުވަން އާންމުކޮށް ގޮސް އުޅޭތަންތަނަށް ދާހިތްވެއެވެ. ބާޒާރު ކުރުމަށާއި ރަހްމަތްތެރީންގެ ގޭގެ އަށް ޒިޔާރަތް ކޮށްލުމަށް ހަފްތާގެ އެއްރޭ ހުސްކުރެވޭތޯ ބަލައެވެ.

ޝިފާނާގެ މޫނު މަތިން މިރޭ ތަފާތު އުފާވެރިކަމެއް ފެންނަން ހުއްޓެވެ. ރޭ ފާއިޒް ޑިއުޓީ އަށް ދިއުމަށް ފަހު ގެއަށް އައިސް އެ ހޭދަ ކުރި ވަގުތަކީ ޝިފާނާގެ ހިތުން ފިލައިގެންދާނެ ވަގުތުތަކެއް ނޫނެވެ. ބައެއް ފަހަރު އެއީ ހުވަފެނެއްބާވައޭ ވެސް ޝިފާނާ ހިތައް އަރައެވެ. ދެ އަހަރު ދުވަހުވެސް އެފަދަ އުފާވެރި ރެއެއް ނާންނަކަހަލައެވެ. ފާއިޒްގެ ހިތްވަރު އެރޭ ތަފާތެވެ. ޝިފާނާ އަށް ލިބުނު އަރާމު އޭގެ ކުންނަށް އެރޭ ދިޔައެވެ. އެހެނަސް ޝިފާނަ އެވާހަކަ ފާއިޒް ކައިރީ ބުނާކަށް ބޭނުމެއް ނުވެއެވެ. މިރޭވެސް ދަންވަރު ޑިއުޓީ އަށް ދިއުމަށްފަހު ފާއިޒް ގެއަށް އައުމަށް ޝިފާނާގެ ހިތް އެދެމުން ދިޔައެވެ.

***************************

ފާއިޒް ބޭނުންވީ ބާޒާރުކޮށްލުމަށްފަހު އާއިލާގެ ބައެއް ގޭގެއަށް ދާށެވެ. އެހެނަސް ޝިފާނާގެ ޕްލޭން ތަފާތެވެ. ކުޑަ ދުވަސްކޮޅަކަށްފަހު ދެމީހުން އެކީ ބޭރަށް ނުކުމެވުމުން ޝިފާނާ ބޭނުންވީ ބާޒާރަށް ދިއުމަށްފަހު ބީޗަށް ދާށެވެ. ފާއިޒަށް މިރޭ ފާހާނާތެރެއިން ދިމާވި ކަންކަން ހަނދާން ވުމުން ފުރަތަމަ ޝިފާނާގެ ޕްލޭނާ ދެކޮޅު ހެދިކަމުގައި ވިޔަސް ފަހުން ޝިފާނާ ބޭނުންވާގޮތް ފާއިޒްވެސް ގަބޫލުކުރިއެވެ.

ގެއަށް ބޭނުންވާ ބައެއް ސާމާނު ގަތުމަށްފަހު ދެމީހުންވެސް މިސްރާބު ޖެހީ ކައިވެނީގެ ކުރިން ދެމީހުން މާފޮޅުވި ބީޗަށް ދިއުމަށެވެ. ހަނދުވަރުގެ އަލީގައި ހަނދާ ތަރިތައް ހެކިކޮށް ދެމީހުން ވަޢުދުތައްވި އެ ދޮންވެލި ގޮނޑުދޮށަށް ދިއުމަށެވެ.

ފާއިޒް އާއި ޝިފާނާ މަޑުމަޑުން ހިނގަމުންދިޔައެވެ. ފާއިޒް އަތުން ޝިފާނާގެ އުނަގަނޑު މަތީ އަތް އަޅުވާލައިގެން ކޮނޑާ ކޮނޑު ޖައްސައިގެން ވަލުތެރެއިން ގޮނޑުދޮށަށް ދެވެން އޮތް މަގުން ހިނގަމުން ދިޔައެވެ. ދެމީހުންވެސް ދައްކަމުން ދިޔައީ މާޒީގެ ވާހަކަތަކެވެ. ކުރިން އެގޮނޑުދޮށުގައި ދެމީހުން އުޅުނު އުފާވެރި ރޭތަކުގެ ވާހަކަތަކެވެ.

ފާއިޒް ސިއްސައިގެން ދިޔައީ ކުރިމައްޗަށް އެއްޗެއް ވެއްޓުމުންނެވެ. ފާއިޒް ގައިގައި އެއެއްޗަކުން ނުޖެހުނީ ހަމަކިރިޔާއެވެ. ޝިފާނާވެސް ސިއްސައިގެން ދިޔަގޮތުން ފާއިޒްގެ ގައިގައި ބައްދައިގަތެވެ.

“އޭ އެއީ ކާއްޓެކޭ. ނަސީބެއްނު ބޮލުގަ ނުޖެހުނުކަން ދޯ. ދެން ހިނގާބަލަ.” ފާއިޒް އަށް އެއީ ކާއްޓެއްކަން އެނގުމުން ހިތުގައި އުފެދުނު ބިރުވެރިކަން ފިލައިގެން ދިޔައެވެ.

އަނެއްކާވެސް ހަމަ އެގޮތަށް ފާއިޒް ސިއްސައިގެން ދިޔައީ ބާރަށް އެއްޗެއް ވެއްޓުނު އަޑަށެވެ. މިފަހަރު ފާއިޒްގެ ފަހަތަށެވެ. މިފަހަރު ފާއިޒަށް ކުރިއަށް ދުއްވައިގަނެވުނެވެ.

“ހިނގާ ދެން ގެއަށް ދާން. ދެން ނުކެރޭނެ ކުރިއަށް ދާކަށް.” ޝިފާނާއަށް ރޮވެން ފެށިއެވެ.

“އޭ ދެން ބިރުނުގަނެބަލަ. މަވެސް މިހުރީ އެއްނު. އެއީވެސް ކާއްޓެކޭ. ރުއްރުކުން ކާށިވެސް ފައިބާނެދޯ. ދެން ނެތޭނުން ރުކެއްވެސް ހިނގާދާން. މިހިސާބަށް އާދެވުނީމަ މިތާ މަޑުކޮށްލާފަ ދެވޭނީ. ކިހާ ރީތި ހަނދުވަރެއް މިދެނީ.” ފާއިޒް ބޭނުންވީ ބީޗަށް ދިއުމަށެވެ.

ދެމީހުންވެސް ގޮނޑުދޮށަށް ނިކުމެވެންދެން ތިބީ ވާހަކަ ނުދައްކައެވެ. ގޮނޑުދޮށަށް ނުކުމެ ހަނދުވަރުގެ އަލީން ދިއްލިފައިވާ މޫދާ އެ ދޮންވެލި ތުނޑި ފެނުމުން ހިތުގައި ހުރި ބިރުވެރިކަން ފިލައިގެންދިޔައެވެ.

“ހޫން. މިއޮތީ އާދެވިފަ. ވަރަށް ދުވަސްވެއްޖެ ދޯ މިތަނަށް ނާދެވޭތާ؟ ލޯބީ އަދިވެސް ކަޑަވެފައިތަ ތިހުރީ؟ ދެން އާދެބަ ކައިރިއަށް!” ފާއިޒް ޝިފާނާގެނެސް މެޔާ ކައިރިކޮށްލިއެވެ.

“ނޭގެ މިރޭ ނެތް އެހާ މޫޑެއް. ދެން ހިނގާ ދޯ ދާން. މިހާރު ނޭގެ ބޭބީ ހޭނުލާކަމެއްވެސް.” ޝިފާނާ ފުން ނޭވާއެއް ބޭރަށް ދޫކޮށްލިއެވެ. ޝިފާނާ ބޭނުންވީ އަވަހަށް ގެއަށް ދާށެވެ.

ދެމީހުންވެސް ގެއަށް ދިއުމަށްޓަކައި ހިނގައިގަތެވެ. މިފަހަރު ފާއިޒް ހަޅޭލަވައިގަތީ ފާއިޒްގެ ގައިގައި އެއްޗަކުން ޖެހުމުންނެވެ. އެހިސާބަކީ ވިނަ ހެދިފައި ހުރި ހިސާބެއްކަމުން ކާއްޓެއް އެތަނަށް އަންނަންވީ ގޮތެއް ފާއިޒަކަށް ނުވިސްނުނެވެ. ފާއިޒްގެ ކަނައަތު ކޮނޑުގައި އެޖެހުނީ ކާއްޓަކުން ކަން ފާއިޒަށް ޔަގީނެވެ. ދެމީހުން ދުއްވައިގަތީ މީހުން އުޅޭ ހިސާބަކަށް ދެވޭތޯއެވެ. ޝިފާނާ ދުއްވައިގައިތީ އަރައިގެން ހުރި ފައިވާން ވެސް ދޫކޮށްލާފައެވެ. ދެމީހުންނަށް ވަކި ހިސާބަކަށް ދެވުނުތަނާހެން ކުރިމަތިން އަލިފާންގަނޑެއް ހުރަސްވިތަން ފެނުނެވެ. އެކަމަކު އެ އަލިގަނޑު ފެނުނީ ހަމައެކަނި ފާއިޒަށެވެ.

“ފާއިޒް… އޭ . ފާއިޒް ދެން ތެދުވެބަ ޑިއުޓީ އަށްވެސް މިރޭ ނުދަނީތަ؟ މިހާރު އެއޮށް ގަޑިޖެހެނީ.” ޝިފާނާ ފާއިޒަށް ގޮވަން ފެށިއެވެ.

“ޝިފާނާ. ކޮންތާކު މިއޮވެވުނީ. އޭ!!!” ފާއިޒަށް ފެނުނު ހުވަފެނުގެ ސަބަބުން ފާއިޒު ހުރީ ވަރަށް ބިރުގެންފައެވެ.

“ހެހެހެ. މިރޭވެސް ހުވަފެނެއް ފެނުނީތަ؟ އޭ. މީ ހުވަފެނެއް ނޫނޭ. ދެން ތެދުވެބަ. ހެޔޮ އެއްޗެއް ކިޔައިގެން ނިދާބަލަ. މަންމަ ވެސް ގެއަށް އައިސް އިނދެއިނދެފަ އެދިޔައީ. މިރޭ ބާޒާރަށް ދާން ވެގެން މަންމަ ކައިރީ ބުނީމެއްނު” ޝިފާނާ ފާއިޒަށް ހުރިހާ ކަމެއް އޮޅުންފިލުވަދޭންފެށިއެވެ.

“ކީއްވެ މަންމަ އައީމަ ނުގޮވީ. އަހަރެންނަށް ނިދުނީއޭ. ޝިފާނާ ފެންވަރަން ވަން ގޮތަށް ނިކުންނާކަށް ނޭގުނުވިއްޔާ. ވަރަށް ބިރުވެރި ހުވަފެނެއް ދެންމެ ފެނުނީ. މާދަމާ ކިޔައިދޭނަން އިނގޭ.” ފާއިޒް ތެދުވެ އެނދުގައި އިށީނެވެ.

(ނުނިމޭ)

އާވި އަރަމުން ދިޔަ ލަވާޒާ ތަށީގައި ތުންޖަހާލާފައި، ޝެރިން ތަށި ބަހައްޓާލިޔެވެ. ޝެރިން ގެ ޖާޒުބީ ތުންފަތުގައި ޖައްސާފައި ހުރި މަޑު ފިޔާތޮށި ކުލަ ހުދުކުލައިގެ އެތަށީގެ ބޭރަށް ތައްގަނޑެއްހެން ނެގިގެން ދިޔައެވެ. ކުޅުދުއްފުށީ އުތުރު އަވަށުގައި ހުންނަ އޮލިވް ނުއާ ރެސްޓޯރަންޓްގެ އެންމެ އެތެރެ މޭޒުގައި ޝެރިން އެކަނިމާ އެކަނި މަޑުކޮށްލައިގެން އެއިނީ ނާއިފްގެ ޚިޔާލުތަކުގެ ތެރެއަށް ޣަރަގު ވެފައެވެ. ޝެރިން ގެ ތުންފަތުގައި ހުރި މަޑު ފިޔާތޮށި ކުލައިގެ ލިޕްސް ޓިކަކީ ނާއިފް ޝެރިންނަށް ދިން އެންމެ ފުރަތަމަ ހަދިޔާއެވެ. ލިޕްސްޓިކާއެކު ޖައްސާފައިހުރި ޗެރީ ލިޕްގްލޮސްގައި ދުވަނީ ނާއިފްއަށް އެންމެ މީރު ޗެރީ ވަހެވެ.

ރެސްޓޯރަންޓްގެ އެ މޭޒަކީ ދެމީހުން އެންމެ ފުރަތަމަ ބައްދަލުކުރި ތަނެވެ. ރެސްޓޯރަންޓަށް ވަންނަ އެއްވެސް މީހަކަށް އެމޭޒުގައި އިންނަ މީހެއް ނުފެންނާނެއެވެ. އަދި ވަދެގެންއަންނަ މީހުންނެއްވެސް އެމޭޒުގައި އިންނަ މީހާއަކަށް ނުފެންނާނެއެވެ. ރެސްޓޯރަންޓްތެރެ ވަރަށް ހަމަހިމޭނެވެ.

“އަހަރެން ނާއިފް އަށް ގުޅަންވީތަ؟ ނޫނީ ނާއިފް ގުޅަންދެން މަޑު ކުރަންވީ ކަންނޭނގެ!” ޝެރިން ގެ ފިޔާތޮށި ކުލައިގެ ނޮކިޔާ އެކްޕްރެސް މިއުޒިކް ފޯނުގެ ސްކްރީންގައި އިން ނާއިފްގެ ފޮޓޯއަށް ބަލަން އިނދެފައި ހިތާހިތާ ކިޔާލެވުނެވެ.

ދެމީހުންގެ ގުޅުމަށް އެއްއަހަރު ވާން މަހަކަށް ވެފައި ވަނިކޮށް ރޭ ދެމީހުން ކުރި ޒުވާބަކީ އަދި މިހާތަނަށް ދެމީހުންކުރި އެންމެ ބޮޑު ޒުވާބެވެ. ޝެރިންނަށް ޝެރިންގެ ކުށް ގަބޫލުކުރެވެއެވެ. ނާއިފް ޝެރިންނަށް ދޭ ސަމާލުކަން ކުޑަވާހެން ހީވެ މާބޮޑަށް ޝަކުވާ ކުރެވެނީއެވެ. ނަމަވެސް ދެރައީ ނާއިފްއަށް ނާއިފްގެ ކުށް ގަބޫލު ނުކުރެވޭތީއެވެ. ނާއިފް ޝެރިންނަށް ދޭ ސަމާލުކަން ކުޑަކަމަކަށް ނާއިފް ގަބޫލެއް ނުކުރެއެވެ. ފަހަކަށް އައިސް ދެމީހުންގެ ދެމެދު ކުރެވޭ ކޮންމެ ޒުވާބެއްގެ މައިގަނޑު ސަބަބަކަށް ވަނީ ޝެރިންގެ އެޝަކުވާއެވެ.

ޝެރިން އެ ޝަކުވާ ނުކުރަންވީ ސަބަބެއް ނެތެވެ. ފަހަކަށް އައިސް ނާއިފްގެ އުޅުމަށް ބަދަލުތަކެއް އައިކަން ޝެރިން ގަބޫލުކުރެއެވެ. ދެމީހުން ރައްޓެހިވިތާކައިރީގައި ކޮންމެ މަހަކުވެސް ދެމީހުން ގެ ގުޅުމަށް އިތުރު މަހެއް ފުރޭ އިރު އެދުވަސް ދެމީހުން ފާހަގަ ކުރެއެވެ. ނާއިފްގެ ގެޔަށް ޝެރިން ގެންދެޔެވެ. އަގުބޮޑެތި ހަދިޔާ ގެނެސްދެއެވެ. ކަރުގައި އަޅާފަށާއި އަތުގައި އަޅާ ކެވެއްޔެވެ. ހޭންޑް ބޭގާއި ފައިވާނެވެ. އެރޭރޭ ފިނިފެން މަލުގެ ތަންމަތި ތަކުގައި ޝެރިން ނިންދެވިއެވެ. އަލީމަގު ފުއްޓަރުގައި ހަނދުވަރުގެ އަލިކަމުގައި ދެމީހުން ލޯބީގެ “ޑާންސް” ކުރިއެވެ.

“ދުވަހަކުވެސް ޝެރިން ދޫކޮށްފައި އަހަރެން ނުދާނަން” ޝެރިންގެ ކަނދުރާގައި ބޮސްދީފައި ވައިއަޑަކުން ކަންފަތް ބުޑުގައި ކޮންމެ ރެއަކުވެސް ނާއިފް ބުނެއެވެ.

ނަމަވެސް ދެމީހުންގެ ގުޅުމަށް ހަމަސްވީފަހުން އެ ލޯބި ފަނޑުވާން ފެށިއެވެ. ދެމީހުން އެކުގައި ބުރު ޖަހަންދިއުން މަދުވެގެން ދިޔައެވެ. ނާއިފްގެ ގެޔަށް ނުގެންދާތާ ޝެރިންގެ ގެޔަށް ނާއިފް ދަނީވެސް ހަފްތާއަކު އެއްފަހަރުއެވެ. ލޯބީގެ ހަދިޔާތައް މަޑުމަޑުން މަދުވާން ފެށިއެވެ. ކޮކާހަނދުވަރުގެ ތެރެއަށް ދެމީހުން ނުދާތާ މިހާރު ހަތަރު މަސްވެއްޖެއެވެ. ލޯބީގެ އެ ޗެޕްޓަރ ނިމި މުޅިންއާ ޗެޕްޓަރ އެއް ފެށިފައިވާ ކަހަލައެވެ.

ޝެރިން ޝަކުވާ ކުރަން ފެށީ އެހިސާބުންނެވެ. ނާއިފްގެ ޖަވާބަކަށް ވަނީ ބިޒީވުމެވެ. ތެދެކެވެ. ނާއިފްއަށް ޕްރޮވިންސް އޮފީހުން ޕްރޮމޯޝަން ލިބުނެވެ. ދުވާލުގެ އިތުރުން ރޭގަނޑުވެސް މަސައްކަތްތައް ނުނިމޭތީ މަސައްކަތް ކުރަން އުޅެއެވެ. ރޭގަނޑު ގެޔަށް އާދެވޭ އިރު ހުންނަނީ ވަރުބަލިވެފައެވެ. އެކަމަކު ކޮންމެ ރެޔަކުވެސް އެހާ މަސައްކަތް ހުރޭބާވައެވެ؟

“މަގާމުގެ ކުރިއެރުމާއެކު މަސައްކަތްވެސް ގިނަ. ދެން ކިހިނެތް އަވަހަށް ގެޔަށް އަންނަނީ” ނާއިފް ޝެރިންނަށް ދެނީ އަބަދުވެސް އެޖަވާބެވެ.

ނަމަވެސް ޝެރިންނަށް އެޖަވާބު އިވިއިވި ފޫހި ވެއްޖެއެވެ. އިތުރަށް އެނގެން ބޭނުންވާތީ ގިނަ ސުވާލުތައް ކުރަން ފެށުނީއެވެ. ނާއިފްގެ ގާތަށްވެސް އެކަމާ ރުޅި އާދެވުނީއެވެ. ރުޅި އަންނާނެ ޗާންސަކަށް ނާއިފް ބަލަބަލާ ހުރިކަހަލައެވެ.

“އަހަންނަށް ތި ޖަވާބު އިވިއިވި ފޫހިވެއްޖެ. ގިވް މީ އަ ބްރޭކް. މިއޮށްހުރިހާ ދުވަހު އަހަރެން ނާއިފްގެ ތިޖަވާބު އަހާ ގަބޫލު ކޮށްފިން. ބަޓް ނޮޓް އެނީމޯ” ޝެރިންގެ ހިތުގައި ހުރި އިހުސާސްތައް ބޭރުކޮށްލީ ރަނގަޅު ގޮތެއް ވާނެކަމުގެ އުއްމީދުގައެވެ.

“އޯކޭ އެހެންވިއްޔާ. ޔޫހޭވް ޔުއަރ ބްރޭކް” ނާއިފް އަނެއްކާވެސް ކުރު ޖަވާބެއް ދިނުމަށްފަހު ފޯނު ކަނޑާލިއެވެ.

ޝެރިންވެސް ގޮތް ދޫކުރަން ބޭނުން ނުވާތީ ނާއިފަަކަށް ނުގުޅައެވެ. ނާއިފް ގުޅާނެކަމަށް ހީކޮށެވެ. ފޯނަށް ބަލަން އެހެން އޮށްވާ ޝެރިންނަށް ނިދުނީއެވެ

މިއަދު ހަތަރުދަން ނިމިދިޔައިރުވެސް ނާއިފް އެއް ނުގުޅައެވެ. ޝެރިން ފެންވަރާ ރީތިވެލައިގެން އޮލިވްނުއާ ރެސްޓޯރަންޓަށް ދިޔައީ ސިކުނޑި ހަމަޖައްސާލަން އެކަނިވެލައި، ކޮފީއެއް ބޯލާށެވެ. ނާއިފް އަދިވެސް ވާނީ އޮފީހުގައިކަން ޝެރިންނަށް އެނގެއެވެ.

އެންމެ ފަހުން ޝެރިން ނިންމީ ނާއިފްއަށް ގުޅާށެވެ. ސްޕީޑް ޑައިލް 2 އަށް ފިތާލުމާއެކު ނާއިފްގެ ފޯނަށް ރިންގްވާން ފެށިއެވެ. އެވަގުތު ނާއިފްގެ ރިންގް ޓޯން “ވަކަ ވަކަ އިޓްސް ޓައިމް ފޮރ އެފްރިކާ” ރިންގްޓޯން އެ ރެސްޓޯރަންޓްގެ ތެރެއިން އިވެން ފެށިއެވެ. ރިންގް އިވޭ މޭޒުކައިރިއަށް ޝެރިން ދިޔައިރު ނާއިފް އެހެން އަންހެން ކުއްޖަކާއި އަތާއަތް ޖޯޑުކޮށްގެން ތިބިތަން ފެނުމާއިއެކު އެމޭޒުމަތީގައި ހުރި ފެންތަށި ނާއިފްގެ މޫނަށް ޖަހާފައި ބޭރަށް ނުކުންނަން ދުއްވައިގަތެވެ.

-ނިމުނީ-

ފާއިޒަށް އެއާޕޯޓުން ވަޒީފާ ލިބުނުތާ މިވީ ދެއަހަރެވެ. ފާއިޒުގެ އަންހެނުން ޝިފާނާ ވަޒީފާއިން ވަކިވި ފަހުން ވެސް މިވީ ދެއަހަރެއެވެ. ޝިފާނާ އަށް ކުއްޖަކު ލިބުމުން ފާއިޒު ޝިފާނާ ވަޒީފާއަށް ނުގޮސް ގޭގައި މަޑުކުރަން އެދުނެއެވެ. ޝިފާނާވެސް ބޭނުންވަނީ އެގޮތެއެވެ. ފާއިޒު ކުރިން އުޅުނު ރިސޯޓުން ކެނޑިގެން ހަނިމާދޫ އަށް ދިރިއުޅުން ބަދަލު ކުރީ އަންހެނުންނާ ދަރިފުޅުގެ ހައްޤުގައެވެ. އަނބިދަރީން ކައިރީގައި އުޅުމަކީ އުފާވެރި ހިތްހަމަޖެހޭ ކަމެއްކަން އެނގޭތީއެވެ.

“ފާއިޒް، އޭ. ފާއިޒް މިރޭ ޑިއުޓީ އަށްވެސް ނުދަނީތަ؟” ޝިފާނާ އެނދުގެ މަގަތުގައި އިނދެ މަޑުމަޑުން ގޮވާލިއެވެ.

ފާއިޒަކީ ހަނިމާދޫ އެއާޕޯޓް ސެކިއުރިޓީ އޮފިސަރެކެވެ. ފާއިޒް ދަންވަރު ޑިއުޓީއަށް ދިއުމުގެ ކުރިން ކުޑައިރުކޮޅަކު ނިދާލައެވެ. ފާއިޒް ތެދުވެ ފެންވަރައިގެން ނުކުތްއިރު ޝިފާނާ އަށް އޮތީ ނިދިފައެވެ. ފާއިޒް ތައްޔާރުވެގެން ޑިއުޓީއަށް ދާން ނުކުތެވެ. ދަންވަރު ޑިއުޓީއަށް ދާއިރު ގޭގެ ބޭރު ދޮރު ތަޅުލަނީ ފާއިޒެވެ. އެއީ ޝިފާނާ އަށް ދޮރު ތަޅުލާފަ އެކަނި ކޮޓަރިއަށް ވަންނަން ނުކެރޭތީއެވެ. ކޮޓަރި ދޮރާ، ބޭރު ދޮރު ތަޅުލުމަށްފަހު ފާއިޒު މަގުމައްޗަށް ނުކުމެ ބަލާލިއެވެ. ރެއަކީ ވަރަށް ވިއްސާރަ ރެއެއް ކަމުން މަގުމަތިން އެއްވެސް މީހަކު ނުފެނެއެވެ. ވަރަށް އަރާމު ރެޔެކެވެ. މަގުމައްޗަށް ނުކުތުމުން އިހްސާސް ކުރެވުނު އަރާމު ފިނީގެ ސަބަބުން ފާއިޒު ހުރީ ދެ ހިޔާލެއްގައެވެ.

ޝިފާނާ އަށް ނިދުނުތާ މާގިނައިރެއް ނުވާނެއެވެ. ފާއިޒު ގައިގައި ފިރުމާހެން ހީވެގެން ހޭލެވުނެއެވެ. “ފާއިޒް، ކީއްވެ ތިއައީ އެހާ އަވަހަށް؟” ލޯމަރައިލައިގެން އޮވެ މަޑުމަޑުން ޝިފާނާ ސުވާލުކުރިއެވެ.

“ވަރަށް ބޯކޮށް ވާރެވެހޭތީ މިރޭ ނުދާނަން ޑިއުޓީއަކަށް، އެއަށްވުރެ ލޯބި ކައިރީ އޮވެ ނިދާލަން ބޭނުން” ފާއިޒް ޝިފާނާ އާ ގާތްވެލިއެވެ.

ޝިފާނާ ފުން ނޭވާއެއް ދޫކޮށްލުމަށް ފަހު “އޯކޭ” އޭ ބުންޏެވެ. ފިނި ރޭގެ ފިނިކަން ފިލުވާލަން ފާއިޒްގެ އެހީ ބޭނުންވެއެވެ.

ޝިފާނާ އަށް ހޭލެވުނީ ފަތިސް ނަމާދު ބަންގީގެ އަޑަށެވެ. ޝިފާނާ ސިއްސައިގެން ދިޔައީ ކައިރީގައި ފާއިޒް ނެތީމައެވެ. “ފާއިޒް” ޝިފާނާއަށް ހިތާހިތާ ކިޔާލެވުނެއެވެ.

“ރޭގަ ފާއިޒް….، އެވާނީ ހުފަނަކަށް.” ޝިފާނާ އަމިއްލަ ނަފްސާ ވާހަކަ ދައްކަން ފެށިއެވެ. އަނެއްކާވެސް އެނދުގައި އޮށޯވެ ނިދާލެވޭތޯ ދެލޯ މަރާލިއެވެ.

ފާއިޒަށް ގެއަށް އާދެވުނު އިރު ޝިފާނާ އޮތީ ދަރިފުޅު ގޮވައިގެން ބޭރު ޖޯލިފަތީގައެވެ. ފާއިޒް ފެނުމާއެކު ޝިފާނާގެ މޫނަށް ހިނިތުންވުން ގެނުވައެވެ. ވާނީ ވެސް އެހެންނެވެ. ޝިފާނާގެ ފުރަތަމަ ލޯބިވެރިޔަކީވެސް އަދި އަލަތު ފިރި އަކީވެސް ފާއިޒެވެ. ފާއިޒުގެ އޯގާތެރިކަން ޝިފާނާ ދުވަހަކުވެސް ހަނދާނެއް ނުނެތޭނެއެވެ. އެދެމަފިރިންނަކީ ނަމޫނާ ދެމަފިރިންނެވެ. އެކަކު އަނެކަކު ދެކެ ލޯބިވެއެވެ. އަޅާލައެވެ. އިތުބާރުކުރެއެވެ. އިހްތިރާމް ކުރެއެވެ. ދެމީހުންގެ ވިސްނުންވެސް މަދުފަހަރަކު މެނުވީ އެއްގޮތެވެ.

- ނުނިމޭ -

ފުރަތަމަ ނަޒަރުން ލޯބިވެވިދާނެ ހެއްޔެވެ؟ ފުރަތަމަ ނަޒަރުން ހިތް ދެވިދާނެ ހެއްޔެވެ؟ ފުރަތަމަ ނަޒަރުން އިންތިޒާރު ކުރެވިދާނެ ހެއްޔެވެ؟

އެކަންކަން އެހެންވާކަމަށް މީހުން ބުނެ އުޅެއެވެ. އެހެންނަމަވެސް، އަހަރެން އެކަމެއް ޤަބޫލެއް ނުކުރަމެވެ. އެއީ ސަބަބެއް ނެތިއެއް ވެސް ނޫނެވެ.

އަހަރެންނަށް އިނާޔާ ފެނުނު އެންމެ ފުރަތަމަ ފަހަރު ވެސް ވީ ފޫއްސެވެ. އައީ ރުޅިއެވެ. ހިތަށް އެރީ ސަހަރޯއެވެ. އަދި އެންމެ ފަހުން ނިމުނީ، އަހަރެންގެ މުޅި ދުވަސް އެކީ ޚަރާބު ވެސް ވެގެންނެވެ. އެންމެ ކަމެއް، ދެކަމެއް ވެގެންނެއް ނޫނެވެ. ކޯނިކޯންޏަށް އައި އެތައް ކަމަކާ ހުރެއެވެ. އިނާޔާއާ ހުރެއެވެ.

އެދުވަހަކީ، އަހަރެންނަށް ވަކާލާތުކުރުމުގެ ހުއްދަ ލިބިގެން، މައްސަލައެއްގައި އެންމެ ފުރަތަމަ ކޯޓަށް ދިޔަ ދުވަހެވެ. އަހަރެންގެ ޤާނޫނީ ޙަޔާތް ފެށުނު ދުވަސް ވެސް މެއެވެ. އެދުވަހު، އަހަރެންނަށް އިނާޔާގެ މުސީބާތް ލައިގަތީ، ހެނދުނު 8 ވެސް ނުޖަހަނީހެވެ. އަހަރެން ނިދިން ރަނގަޅަށް ހޭ ވެސް ނުލަނީހެވެ. އޭނާ ކުރި ފޯނުކޯލަކުންނެވެ.

“އައްސަލާމް ޢަލައިކުމް. ހެލޯވ. މިއީ އިނާޔާ ޙަމީދު. މަދަނީ ކޯޓުގެ ސެކެއްޓަރީ. އަޅުގަނޑު މިގުޅުއްވަނީ މަދަނީ ކޯޓުގެ އަރިހުން. މިއަދު 10 ޖަހާއިރު އޮތް ތިބޭފުޅާގެ މައްސަލަ ކެންސަލްވި ވާހަކަ ވިދާޅުވީ އިނގޭތޯ. އަލުން މައްސަލައިގެ ޗިޓް ތިބޭފުޅާއަށް ހަމަ މިއަދު ފޮނުވާނަން. މަޢުލޫމާތަށްޓަކާ އަޅުގަނޑު މިވާހަކަ ވިދާޅުވީ. އޯކޭ؟ ކަޓް.”

އަހަރެންނަށް، ޖަވާބުގައި އެކައްޗެއް ވެސް ނުބުނެވެނީސް، އޭނާ ފޯނު ޖެހީއެވެ. އެވަގުތު އަހަރެންގެ ހިތަށް އެރިއެވެ. ވަރެއްގެ އަންހެނެއްތާއެވެ! ބަހުގެ ހަމަތައް އޮޅުވާލައިގެން، އެހާ ރުންކުރުކޮށް ފަތިވަރެއް ދަމާލުން އެއްކިބާގައި ބާއްވާފައި، އަހަރެންނަށް އެއްޗެއް ބުނުމުގެ ފުރުސަތު ދިން ނަމަވެސް އެންމެ ރަނގަޅުތާއެވެ! ހާދަހާވާ ދަށް ފެންވަރުގެ ކުއްޖެކެވެ. ބަހުގެ ހަމައާއި ފޯނުގެ އަދަބުތައް ވެސް ނޭނގެނީބާވައެވެ؟ ކާކު ވަޒީފާ ދިން ކުއްޖެއް ބާވައެވެ؟ ކޮންތާކު ޖާހިލެއް ބާވައެވެ؟

އަހަރެން ގަޑި ބަލާލީމެވެ. އޭރު 7:45 ވެއްޖެއެވެ.

އަހަރެން އެނދުމަތީގައި އޮވެ ވަގުތުން، ނައުޝާދަށް ގުޅީމެވެ. އަދި އޭނާގެ ސަރިޔަތް ކެންސަލްވި ވާހަކަ ބުނީމެވެ. އެކަމުންވީ ފަސޭހައަށް ވުރެ ބޮޑަށް އަހަރެންނަށް ކުރެވުނީ ލަނޑެއް ލިބުމުގެ އިޙްސާސެވެ. އެއީ، ފަތިސް ވަންދެން ހޭލާ ހުރެގެން، އެމައްސަލައަށް އެވަރަށް ތައްޔާރުވެފައި، ސަރިޔަތް ކެންސަލުވުމުން، ކުރީރޭ ހަތަރުދަމު ކުރި މަސައްކަތް ބޭކާރުވީތީއެވެ. އެސަރިޔަތް ކެންސަލްނުވިނަމަ، އަލުން އެކަމާ އުޅޭކަށް، އަދި ތައްޔާރުވާކަށް ނުޖެހުނީސް ވިއްޔާއެވެ. އެއާއެކު، ވެފައިވާ ވަރުބަލިން އަހަރެން އަނެއްކާ ވެސް ނިދޭތޯ ބެލީމެވެ.

ދެން ވެސް ހޭލެވުނީ ފޯނުކޯލެއްގެ އަޑަށެވެ.

“އޭ ވަރަށް ސޮރީ އިނގޭ… އިނާޔާ އިނގޭ މީ. އަޅުގަނޑަށް އޮޅުނީއޭ… ވަރަށް ސޮރީ. ތިބޭފުޅާގެ މައްސަލަ އެބައޮތް 10 ޖަހާއިރަށް… އަވަހަށް އާދޭ. ޤާޟީ ވެސް އެބަ އާދޭ އިރުކޮޅަކުން.”

އަނެއްކާ ވެސް އިނާޔާގެ އަޑެވެ. އެހެންނަމަވެސް، މިފަހަރު ވާހަކަ ދެއްކީ ތަންކޮޅެއް މައިތިރިކޮށެވެ. އޭނާގެ އަޑުގައި ހާސްކަމެއް ވެސް އެކުލެވިގެންވެއެވެ. އެފޯނުކޯލުން އަހަރެންގެ ގާތަށް އައީ ރުޅިއެވެ. ކޯޓުތަކުގެ މުވައްޒަފުންގެ ފެންވަރު ދަށްކަމުންނާއި، މިފަދަ ދެއުޅިއެއް ނުވާ ކަމެއް ކުރީތީއެވެ. އެހެންނަމަވެސް، އަހަރެންނަށް އެއްޗެއް ބުނުމުގެ ފުރުޞަތެއް މިފަހަރު ވެސް ނުދީ އޭނާ ފޯނު ބޭއްވީއެވެ. އަހަރެންނަށް ދަތްކުޑި ވިކިއްޖެއެވެ.

އަހަރެން ގަޑި ބަލާލިއިރު، 10 ޖަހަން ހުރީ ވިއްސަކަށް މިނެޓެވެ. އެހެންވެ، ވަގުތުން އެނދުން ފުންމާލީމެވެ. އަދި އަނެއްކާ ވެސް ނައުޝާދަށް ގުޅާ، ސަރިޔަތް އޮތް ވާހަކަ ބުނީމެވެ. އޭނާ ފުރަތަމަ ވެސް ކަނޑާލީ ޗޮކެކެވެ.

“އާނ. އެކަމަކު، ސަރިޔަތް ކެންސަލްވި ވާހަކަ ރާމިޒު، ބުނުއްވީމަ، އަޅުގަނޑު މިހިރީ ތައްޔާރު ވެސް ނުވެ. އަނެއްކާ 10 ޖަހަން މިހާރު ތިހިރީ 15 ވަރަކަށް މިނެޓް. އެކަމަކު ވެސް މިދަނީ އިނގޭތޯ.” ނައުޝާދުގެ އަޑުން، މިކަމާ ނުރުހުންވެފައިވާކަން ފާހަގަކުރެވުނެވެ.

އަހަރެން ކުޑަކޮށް ޖެހިލުންވިއެވެ. އެއީ ނައުޝާދަކީ އަހަރެންގެ ފުރަތަމަ މުވައްކިލަށްވެފައި، އަހަރެންގެ ވަކާލާތުކުރުމުގެ ޙަޔާތް މިފަދަ ލައިނުގަތުމަކާއެކު ފެށުމުން، އޭނާގެ އިތުބާރު އަހަރެންނާ މެދު ކުޑަވެދާނެތީއެވެ. އަނެއްކޮޅުން، އާވަކީލުންގެ ތަޖުރިބާ ނުހުންނާނެތީ، އެމީހުންނަށް މީހުން ކުރާ އިތުބާރު ވެސް ކުޑަވުން އެއީ ޠަބީޢީކަމެކެވެ. އެހެންވެ، ވަކީލެއްގެ އާކޮޅުގައި، އޭނާގެ މުވައްކިލުންނަށް މިފަދަ ގޯހެއް ފެންނަން އެއްވެސް އާވަކީލަކު ބޭނުމެއް ނުވާނެއެވެ.

ސަރިޔަތް ފެށުމުގެ 2 މިނެޓް ކުރިން، އަހަރެމެން، މަދަނީ ކޯޓުގެ ކައުންޓަރަށް ޗިޓް ޙަވާލުކުރީމެވެ. އެވަގުތު އެތެރެއިން ނުކުމެގެން އައި ކުއްޖަކު “އެތެރެއަށް ދުރުވޭ!” ބުނެފިއެވެ. ރުންކުރު އަޑަކުންނެވެ.

އެއީ، އިނާޔާކަން އަހަރެންނަށް ޔަޤީންވިއެވެ. އަދި ވަގުތުން އަހަރެންގެ މޫނު ކުނި ކޮށްލެވުނެވެ. ހިތުން ރުޅި އާދެވުނެވެ. ވީ ފޫއްސެއް ބުނަން ވެސް ނޭނގެއެވެ. އޭނާގެ ފޯނުކޯލު ނައިނަމަ، މިހެން ލައިނުގަނެގެން އުޅޭކަށް ނުޖެހުނީހެވެ. އަދި ނައުޝާދުގެ ކުރިމަތީގައި އަހަރެން މިހެން ލަދުގަންނާކަށް ވެސް ނުޖެހުނީހެވެ. ހުރިހާ ވެސް ނުބަޔަކީ، އިނާޔާއެވެ. އޭނާގެ ސުންޕާކަމެވެ.

އަހަރެންމެން އޭނާގެ ފަހަތުން ހިނގަމުން ދިޔައިރު، އޭނާގެ ބޮލުން ފެށިގެން ފަޔާއި ހަމައަށް އަހަރެން ބަލާލީމެވެ. އިސްކޮޅުން ކުރެވެ. އެއީ ވެސް ގޯހެކެވެ. އިސްތަށިގަނޑު ވެސް ފޫކޮޅާ ހަމައަށް ދިގެވެ. އެއީ އަދި އަމުދުން އަހަރެން ވަރަށް ނުރުހޭ ސްޓައިލެކެވެ. އޭނާ ލައިގެން ހުރީ ޕާކިސްތާނު ހެދުމެކެވެ. ކޮނޑުގައި ދޯޕައްޓާއެއް އަޅާފައިވެއެވެ. އެއީ، އަހަރެން ދުވަހަކު ވެސް ޤަބޫލުކުރާނެ ހެދުމެއް ނޫނެވެ. ދިވެހިން މާ “އިންޑިޔާވަންތަ” ބަޔަކަށް ހަދާ ހެދުމަކަށްވާތީއެވެ.

އަހަރެންނަށް ރުހެވޭނެ އެއްވެސް ކަމެއް، ސިފައެއް ވެސް އޭނާގެ ކިބައިންނެއް ނުފެނުނެވެ. އަދި އަހަރެންގެ ހިތަށް އެރިއެވެ. މީ ކޮންތާކުން އައިސްގެން އުޅޭ އަންހެނެއް ބާވައެވެ؟

ސަރިޔަތް ކުރާ ކޮޓަރިއަށް އަހަރެމެން ވެއްދުމަށްޓަކާ އޭނާ ދޮރުހުޅުވާދިނެވެ. އަދި އަހަރެން އެކޮޓަރިއަށް ވަނުމަށް ފިޔަވަޅު އެޅިތަނާ، އޭނާގެ އިނގިލިން ނޭފަތްކޮށްޓާލިއެވެ. އަހަރެންގެ ފަކުރުން ހަލާކުވިއެވެ. އަދި ހިތަށް އެރިއެވެ. މީހާދަހާ ގޮތެއް ވެސް ނެތް އަންހެނެކެވެ. އަދަބެއް ސަދަބެއް ނެތް މަރުމޯލެކެވެ.

އަހަރެމެން ސަރިޔަތް ކުރާ ކޮޓަރިއަށް ވަދެ ގޮނޑީގައި އިށީނީމެވެ. އެއާއެކު، އޭނާ އެދޮރު ލައްޕާފައި އައިތާކަށް ޣާއިބުވެއްޖެއެވެ.

އަހަރެމެން މަޑުކޮށްގެން ތިބީމެވެ. ގަޑިން 10:05 ހިނގައިފިއެވެ. އަހަރެން އިނީ ކުޑަކޮށް ހިތް އަވަސްވެފައެވެ. އަލަށް ވަކާލާތުކުރެވޭ ދުވަސް ކަމަށްވާތީ ކުޑަކޮށް ހިތް ބިރު ވެސް ގަނެފައެވެ. އެހެންނަމަވެސް، އަހަރެން، ނައުޝާދަށް އެކަން ފާހަގަވިޔަކަ ނުދެމެވެ.

އަހަރެމެން މަޑުކޮށްގެން ތިބީމެވެ. ޤާޟީގެ އިންތިޒާރުގައެވެ.

ގަޑިން 10:30 ވެއްޖެއެވެ. އަހަރެންގެ ހާސްކަން އިތުރުވަމުންދެއެވެ. ނިތްކުރިން ކުޑަކޮށް އޮށްދާ ވެސް ހިއްލަން ފަށައިފިއެވެ. އެއްވެސް މީހަކު އެކޮޓަރިއަކަށް ނާދެއެވެ. ނައުޝާދު ވެސް އެއްޗެއް ނުބުނެ އިނެވެ. އެންމެ ފަހުން ގަޑިން 11:15 ހިނގައިފިއެވެ. އެހިސާބުން ނައުޝާދުގެ ކެތްތެރިކަން ކޮޅުންލިއެވެ.

“ރާމިޒު ތިޔަހެން އިންނަވަނީތޯ؟ މިއީ 10 ޖަހާއިރު އޮތް ސަރިޔަތެއް. މިހާރު ބައްލަވާ ގަޑި. ކޮންމެ ވެސް ކަމެއް ކުރައްވަންވީ ނޫންތޯ؟ އަޅުގަނޑުމެން ވަކީލަކަށް ފީއެއްދީގެން މިއުޅެނީ، މިކަމުގެ ބޮލުގެ ރިހުން އަޅުގަނޑުމެން ނުނަގަންވެގެން. އެކަމަކު ރާމިޒު ވެސް ހަމަ ތިޔަ އިންނަވަނީ. ކައުންޓަރަށް ވަޑައިގެން މިވާގޮތެއް އައްސަވަންވީ ނޫންތޯ؟” ނައުޝާދު އިނީ ވަރަށް ބޮޑަށް ހިތްހަމަނުޖެހިފައެވެ.

އަހަރެން އެއްޗެކޭ ނުބުނެ ގޮނޑިން ތެދުވީމެވެ. އަދި އެކޮޓަރީގެ ދޮރު ހުޅުވާލާފައި ނުކުންނަން ފިޔަވަޅު އެޅިތަނާ ގައިގައި އައިސް ލައިގަތީ އިނާޔާއެވެ. އޭނާ ޖެހިގަތް ގޮތުން އަހަރެންގެ އައިނު ބިންމައްޗަށް ވެއްޓި ތެޅިއްޖެއެވެ.

އަހަރެންގާތަށް އައީ އަމަށަކު ރުޅިއެއް ނޫނެވެ. ވަގުތުން އިނާޔާ ދިމާއަށް ބަވައިގަތީމެވެ.

“ތީ ހާދަހާ ގޮތެއް ނެތް މީހެކޭ! އަހަރެމެންނަށް ހެނދުނު ގުޅާފައި ސަރިޔަތް ކެންސަލްވީ ވާހަކަ ބުނެފައި، އަނެއްކާ ނީސްތާއްޓަށް އަހަރެމެން އަރުވާފަ މިތަނަށް ގެނެސް، ކޮޓަރިއަށް ވައްދާފައި، ކިހިނެތް ހަދާނަމޭ ހިތާތަ ކަލޭ ތިއުޅެނީ؟ މިހާރު ތި ތަޅާލީ މަގޭ އައިނު. ފުކެއް ބޮޑުވަރެއްނު. މީތަ މިތަނުގައި އުޅޭ މީހުންގެ ފެންވަރަކީ. ކަންކަން ކުރަން ނޭނގެންޏާ ތިބެބަލަ ގޭގަ. ކަލޭމެން އޮފީސްތަކަށް ވަދެގެން ތިއުޅެނީ ކޯއްޗެއް ހޯދަންތަ؟ ކަންކަން ކުރަން ނޭނގެންޏާ ދޭބަލަ އައި ރަށަށް އަނބުރާ!” އަހަރެން ހުރީ ހަމައިން ނެއްޓިފައެވެ. އަދި އަހަރެންގެ އަޑު ބާރުކަމުން، އެވަގުތު ކޯޓު ތެރޭގައި ތިބި ހުރިހާ އެންމެން އަހަރެންނާ ދިމާއަށް ނަޒަރު ހުއްޓާލިއެވެ.

“ވަރަށް ބޮޑަށް މާފުކުރައްވާ… އަޅުގަނޑަށް އޮޅުނީ… ފަހަރެއްގައި ވެސް މިހެން ވާނެ ކަމެއް ނޭނގޭ… މިއީ އަޅުގަނޑުގެ ވެސް ފުރަތަމަ ދުވަސް މިއޮފީހުގައި… އަޅުގަނޑު ތިބޭފުޅާއަށް އައިނެއް ހައްދައި ދީފާނަން… މާފުކުރައްވާ…” އިނާޔާ ރޯން ފެށިއެވެ.

އެއާއެކު، ނައުޝާދު ސަރިޔަތް ކުރާ ކޮޓަރިން ނުކުމެގެން ކައުންޓަރާ ދިމާއަށް ހިނގައިގަތެވެ. އަހަރެން ވެސް އިނާޔާ ރޯން ބަހައްޓާފައި ހިނގައިގަތީމެވެ. އައިނު ނެތުމުން، މީހެއްގެ މޫނު ވެސް، ތަނެއް ވެސް އެހާ ސާފެއް ނުވެއެވެ.

“ބައްލަވާ ރާމިޒު. އެހެރަ ގަމާރު އަހަރެމެން ގެންގޮސް އެވެއްދީ ނުބައި ކޮޓަރިއަކަށް. ޤާޟީ ސަރިޔަތަށް ވަޑައިގެން، އަހަރެމެން ޙާޒިރުނުވާ ކަމަށް ނިންމަވާ ވަޑައިގެންފިއޯ. އަހަރެމެންނަށް ކިހާ ބޮޑު ގެއްލުމެއް މިލިބުނީ؟ ކިހާ ވަގުތެއް މިދިޔައީ؟ މިހިރަ އަންހެނާއަކީ ބޮޑު މުރައްކަބު ޖާހިލެއްނު ރާމިޒު؟” ނައުޝާދުގެ އަޑުގައި ވެސް ވަނީ ރުޅިވެރިކަމެވެ.

އިނާޔާ ހުއްޓާނުލާ ރޮމުން ގެންދިއައެވެ. ކޯޓުގެ އެހެން ކުއްޖަކު އޭނާ ކައިރިއަށް ގޮސް، އޭނާ އެތެރެއަށް ވެއްދިއެވެ. މުޅި ކޯޓުގައި ތިބި ހުރިހާ އެންމެންގެ ސަމާލުކަން އަހަރެމެންނާ ދިމާއަށް ހުއްޓިފައިވެއެވެ. އަހަރެންގެ ހިތުގައިވަނީ އަދި ވެސް އިނާޔާއާ ދިމާއަށް ބަވާލުމެވެ.

ނައުޝާދާއި އަހަރެން ކައުންޓަރުން ހަމަޖައްސަން ޖެހޭ ކަންކަން ހަމަޖެއްސުމަށްފަހު، ކޯޓުން ނުކުތީމެވެ. އަހަރެންގެ އައިނު ނެތުމުން، ވަރަށް އުނދަގޫވިއެވެ.

އަހަރެން ގެއަށް ދިޔަ ގޮތަށް ގޮސް އެރީ އެނދަށެވެ. އަންހެން ކުއްޖަކާ ދިމާއަށް އެގޮތަށް ބަވާލުމަކީ މޮޅުކަމެއް ބާވައޭ އަހަރެން ވިސްނާލީމެވެ. އެހެންނަމަވެސް، އަހަރެންނަށް ވިސްނުނީ، މިހުރިހާ ކަމަކީ ވެސް އޭނާގެ ކުށް ކަމުގައެވެ. އޭނާއާ ދިމާއަށް ރުޅިއައިސްގެން ހަޅޭއްލަވައިގަތުން ހަމަ ޙައްޤު ކަމުގައެވެ.

އެހެން ނަމަވެސް، އަހަރެންގެ ހިތަށް ދެން އެރީ، އަހަރެންގެ ހަމަ އެއްވެސް ކުށެއް މިކަމުގައި ނެތީބާވައެވެ؟ އަހަރެން ރޭ ހަތަރު ދަމު ނުނިދާ ހުންނަންވީ ކީއްވެގެން ހެއްޔެވެ؟ ނައުޝާދު މިމައްސަލަ އަހަރެންނާ ހަވާލުކުރިތާ މިހާރު 2 ހަފްތާވީއެވެ. އަހަރެން އެންމެ ފަހު ވަގުތާ ހަމައަށް ތައްޔާރުނުވެ ހުރީ ކީއްވެގެން ހެއްޔެވެ؟ ކޯޓަށް ދާން ޖެހޭކަން އެނގޭ އިރު ވެސް ހެނދުނު ނުހޭލާ ހުރީ ކީއްވެގެން ހެއްޔެވެ؟ އަދި ކޯޓަށް ދާން އޮތަސް ނެތަސް، ވަކީލުންނަކީ އަދި އެނޫން ވެސް މީހުންނަކީ ހެނދުނު ނިދާފައި ތިބެން ޖެހޭ ބައެއް ހެއްޔެވެ؟ އަހަރެންގެ ރުޅި މައިތިރި ނުވި ސަބަބަކީ އެއީ ނޫންބާވައެވެ؟ އަދި ކުއްޖެއްގެ އިސްކޮޅުން، ލާފައި ހުންނަ ހެދުމަކުން، އޭނާ ދެކެ ރުޅިއަންނަން އަހަރެންނަކީ ކާކު ހެއްޔެވެ؟

ކޮންމެއަކަސް، މުޅި އެ ދުވަސް ހޭދަވެގެން ދިޔައީ، އެކަހަލަ ގޮތަކަށެވެ. އަހަރެންގެ މޫޑުވަނީ މުޅިން ޚަރާބުވެފައެވެ. ކާހިތެއް ވެސް ނުވިއެވެ. އަހަރެންގެ ވަކާލާތުކުރުމުގެ ޙަޔާތް ފެށުނުލެއް ގޯސްކަމުންނެވެ.

އެހެން އޮވެ ނިދުނުކަމެއް ވެސް އަހަރެންނަކަށް ނޭނގެއެވެ.

އަހަރެންނަށް ނިދިން ހޭލެވުނީ ފޯނު ރިންގުވާން ފެށި އަޑަށެވެ.

“ހެލޯވ ރާމިޒު… މިއީ އިނާޔާ. އަޅުގަނޑު މިގުޅުއްވީ ރާމިޒުގެ އައިނު ހައްދައިދޭން. އަޅުގަނޑާ ބައްދަލުކުރައްވާ މާލޭ އޮޕްޓިކަލްސް ކުރިމަތިން މިރޭ 8 ޖަހާއިރު. އަޅުގަނޑު ހުންނަވާނަން އެތަނުގައި…”

އަނެއްކާ ވެސް ބަހުގެ ހަމަތައް އޮޅުވާލައިގެން އިނާޔާ ވާހަކަ ދެއްކިއެވެ. އެކަމަކު، މިފަހަރު އޭނާގެ ރާގާއި، އަޑު ވެސް ތަފާތެވެ. އަދި ފޯނު ވެސް ނުބޭއްވިއެވެ.

“އެންމެ ރަނގަޅު. އަޅުގަނޑު ދާނަން.” އަހަރެން ބުނީމެވެ.

އެރޭ އަހަރެން އިނާޔާއާ ބައްދަލުކުރީމެވެ. އެހެންނަމަވެސް، އޭނާގެ އަތުން އައިނު ހެއްދުމުގެ ޚަރަދެއް ނުހޯދަމެވެ. އޭގެ ބަދަލުގައި، އޭނާ ގޮވައިގެން ދިޔައީ ކޮފީއަކަށެވެ. އަދި، އެދުވަހު ވީ ހުރިހާ ކަމަކާ އަހަރެން މާފަށް އެދުނީމެވެ.

އިނާޔާ ވެސް އަހަރެންގެ ކިބައިން މާފަށް އެދުނެވެ. އަދި އޭނާގެ ވަނަވަރު ވެސް އަހަރެންނަށް ކިޔައިދިނެވެ.

އެރޭގެ ކޮފީ ނިމިގެން ދިޔައީ އަހަރެމެން ދެމީހުން ދެ އެކުވެރިންނަށް ވެގެންނެވެ.

އޭގެ ފަހުން އައި ދުވަސްތަކުގައި އަހަރެންނާ އިނާޔާއާ ކޯޓުން ވަރަށް ގިނައިން ދިމާވެއެވެ. އަދި އަހަރެމެންގެ އެކުވެރިކަން ވެސް އާލާވަމުން ދިޔައެވެ. އަދި އަހަރެންނަށް އޭނާ ދަސްވަމުން ވެސް ދިޔައެވެ. އޭނާ ގޮވައިގެން ތަންތަނަށް ދިޔުން ވެސް ޢާންމުވިއެވެ. އޭނާގެ ކިބައިން އަހަރެންނަށް ފެނުނު ނުރުހެވޭ ކަންތައްތައް މަޑުމަޑުން ބަދަލުވަމުން ދެއެވެ. އަދި އަހަރެން ބުނާ ގޮތަށް އޭނާ ހަދާ ވެސް މެއެވެ.

އެދުވަސްތަކުގައި އަހަރެންނަށް ދަސްވީ، އޭނާއަކީ، އަހަރެން ހީކުރިހާ ގޯސް ކުއްޖެއް ނޫންކަމެވެ. އޭނާގެ މައިންބަފައިން ވަކިވެފައިވުމުގެ ސަބަބުން، ފުރިހަމަ ތަރުބިއްޔަތެއް ލިބިފައިނެތީއެވެ. އެހެންނަމަވެސް، އަހަރެންގެ ކިބައިން އޭނާ ވަރަށް އަވަހަށް ކަންތައްތައް ދަސްކުރަމުން ގެންދިޔައެވެ.

އަހަރެމެންގެ އެކުވެރިކަން ބަދަހިވެ ތަރައްޤީވަމުން ދިޔައެވެ. އަދި އަހަރެންނާ އޭނާއާ އެންމެ ފުރަތަމަ ދިމާވިތާ ތިން އަހަރުވާން ގާތްވެފައިވަނިކޮށް އައި ކުޑަ ޢީދު ދުވަހެއްގައި އަހަރެމެން ދެމީހުން ކައިވެނިކުރީމެވެ. ކުޑަކުޑަ ޙަފްލާއެއްގައެވެ. އެތަނުގައި ނައުޝާދު ވެސް ހުއްޓެވެ.

“ކޮބާ ތީ ކޯޓު ތެރެއިން އުފެދުނު ލޯބިދެއްތޯ؟ މީހުން ބުނޭ ނުރުހުމަކީ ލޯބީގެ ފެށުމޭ.” ނައުޝާދު ސަމާސާކޮށްލިއެވެ.

“އާދެ، އެކަމަކު މިއީ ހަމަ ގައިމު ވެސް ފުރަތަމަ ނަޒަރުން އުފެދުނު ލޯތްބެއް ނޫން ދެއްތޯ؟ އެކަން ނައުޝާދަށް ވެސް އެނގިވަޑައިގަންނަވާނެ” އަހަރެން ވެސް ރައްދުގައި ސަމާސާކޮށްލީމެވެ.

އެއާއެކު، އިނާޔާ އަހަރެންގެ އުނަގަނޑުގައި މަޑުމަޑުން ޖެހިއެވެ.

**********

މެންދުރު ފަހު ތިނެއް ޖަހަން ފައިކުރުކޮށްލާފައި ހުއްޓައި ފާއިޒް އޭނާގެ އަންހެނުން އިނާދާ އާއެކު އޭޑީކޭއިން ނުކުތް އިރު، ދެމީހުންވެސް ތިބީ އުފަލުން ގޮސް ފޮޅިފައެވެ. މިއީ ފާއިޒު އެންމެ ދެކެން ބޭނުންވި އެއްދުވަހެވެ. އިނާދާ މިއަދު އެއިނީ ފާއިޒުގެ އަލަތު ދަރިފުޅަށް ބަލިވެއެވެ.

މީގެ ދެއަހަރެއްހައި ދުވަސް ކުރިން ހުރާ ތުނޑިމަތިން ދެމީހުން ބައްދަލުވެ، ދެމީހުންގެ ގުޅުން ބަދަހިވަމުން ދިޔައީ ނުހަނު ހަލުވި ކަމާއެކުއެވެ. ލިބިފައި ހުރި ރީތިކަމުގެ އިތުރުން އުޅުން ރަނގަޅު ކަމަށް މުޅި ރަށުގައިވެސް މަޝްހޫރު އިނާދާ އަށް ފާއިޒު ލޯބި ހުށަހެޅުމުން، އިނާދާ އެއްވެސް އިންކާރެއް ނުކުރެއެވެ. ދެމީހުން ރައްޓެހިވިތާ އަހަރެއްހާ ދުވަސްނުވަނީސް ކައިވެނީގެ ގޮށް ޖަހާލެވުނެވެ. ފާއިޒަކީ އަބަދުވެސް ތުއްތު ކުދިންނާ ވަރަށް ދޯޅު ފިރިއެއްކަން އިނާދާ އަށް އެނގެއެވެ. އެހެން ދެމަފިރިއެއް ތުއްތުކުއްޖެއް ގޮވައިގެން ދާމަންޒަރު ފެންނަ ކޮންމެ ފަހަރަކު ފާއިޒު އިނާދާ އަށް ބަލާލާގޮތުން ފާއިޒު ދަރިފުޅެއް ބޭނުންވާ ވަރު އިނާދާ އަށް އިޙްސާސް ކުރެވެއެވެ. ފާއިޒުގެ އެއުއްމީދު ވީހާވެސް އަވަހަށް ހާސިލް ކޮށްދޭން އިނާދާ ހުރީ އަޒުމް ކަނޑައަޅައިގެންނެވެ.

ޑިސެމްބަރު މަހު ބޮޑު ޗުއްޓީގައި މާލެއިން ޝޮޕިން ކޮށްލުމަށް ދެމަފިރިން މާލެއައީ މިދިޔަ ހަފްތާގައެވެ. ދެމީހުން މިއަދު މެންދުރު ފަހު ކައިގެން ތަށި ދޮންނަން ހުއްޓާ އިނާދާ މޭ ނުބައި ކުރަން ފެށިއެވެ. އަދި ދެތިން ފަހަރު ހޮޑު ލެވުމުން ފާއިޒު ގަސްދުކުރީ އިނާދާ ގޮވައިގެން ހޮސްޕިޓަލަށް ދާށެވެ. އޭޑީކޭއަށް ގޮސް ޑޮކްޓަރަށް ދެއްކުމުން، އިނާދާ ބަލިވެއިން ކަމުގެ އުފާވެރި ހަބަރު ޑޮކްޓަރު ދެއްވިއެވެ. އޭޑީކޭއިން ނުކުތް އިރުވެސް ދެމީހުންގެ މޫނުމަތީގައި ވަނީ ހިނިތުންވުމެވެ. ދެމީހުން ހިނގާފައި ގޮސް ސޯސަންމަގު ލައިޓު ކައިރީގައި މަޑުކޮށްލީ ހިނގާ މީހުންގެ ލައިޓް ފެހި ވަންދެންނެވެ. ކުޑައިރުކޮޅެއް ފަހުން ހިނގާމީހުންގެ ލައިޓް ޖެހުމާއި އެކު ދެމީހުން ސޯސަންމަގު ހުރަސްކުރަން ހިނގައިގަތެއެވެ.

*************

18 އަހަރުގެ ނާޒްނީ ވަޒީފާ އަދާކުރަނީ ސޯސަންމަގު ކަންމަތީގައި ހުންނަ ސްޓަރ ކެމިސްޓްގެ ފާމަސިސްޓް އެހީތެރިޔަކަށެވެ. ނާޒްނީ އަކީ ސަކަމިޒާޖެއްގެ ކުއްޖެއްކަމުން މިދިޔަ އަހަރު އަމީނިއްޔާ ސްކޫލުގައި އުޅުނު އިރު ކިޔެވުމަށް މާބޮޑު ސަމާލުކަމެއް ނުދެއެވެ. އެހެންކަމުން ނާޒްނީއަށް މާރަނގަޅު ނަތީޖާއެއް ޖީސީއީގައި ގެނެވިފައެއް ނުވެއެވެ. ނަތީޖާ ކަރުދާސް ލިބުމުން ނާޒްނީ ނިންމީ ފިހާރައެއްގައި އެސިސްޓެންޓެއްގެ ގޮތުގައި މަސައްކަތް ކުރާށެވެ.

މިއަދަކީ ނާޒްނީގެ ކޮއްކޮ ނިލޫގެ 10 ވަނަ އުފަން ދުވަހެވެ. ނާޒްނީގެ އިތުރު އެހެން ކޮއްކޮއެއް ނުހުންނާތީ ނާޒްނީ ނިލޫދެކެ ވަރަށް ލޯބިވެއެވެ. ނާޒްނީ ނިންމައިގެން ހުރީ އަމިއްލަ މުސާރައިން ނިލޫއަށް ރަނގަޅު ބާތުޑޭ ޕްރެސެންޓެއް ދިނުމަށެވެ. އެކެއްޖެހިއިރު ފިހާރައަށް ދިޔައިރު ނާޒްނީ އައީ ހަވީރު ގެޔަށް އަންނައިރު ނިލޫއަށް ޕްރެސެންޓެއް ގެންނާނެކަމަށް ޕްރޮމިސް ކޮށްފައެވެ. ނާޒްނީ ނިންމީ އަޟްރު ނަމާދަށް ބަންގި ގޮވުމުގެ ކުރިން ތަނަކަށްގޮސް ހަދިޔާއެއް ގަތުމަށެވެ. އެހެންކަމުން 3 ޖަހަން ދެތިން މިނެޓަށް ވުމުން، ފާމަސިސްޓް ކައިރީގައި ބުނެލާފައި ނާޒްނީ ފިހާރައިން ނުކުތެވެ.

************

ފެކަލްޓީ އޮފް އިންޖިނައަރިންގ ޓެކްނޮލޮޖީގައި ޑިޕްލޮމާ ނިންމުމަށްފަހު އަޝްރަފް ސްޓެލްކޯއަށް ވަތްފަހުން އަދި މާގިނަ ދުވަހެއް ނުވެއެވެ. ހުޅުމާލޭގައި ހުންނަ ސްޓެލްކޯގެ އިންޖީނުގޭގައި ޓެކްނީޝަނެއްގެ މަގާމުގައި މަސައްކަތް ކުރާ އަޝްރަފް ރޭ ބާރަ ޖެހިއިރު ޑިއުޓީ ނިންމާފައި މާލެ އައިއިރު މެންދަމު އެކެއް ޖަހަން އުޅެއެވެ.

މާލެއައިސް ޑީޑީޑެންޓަލްސް ކްލިނިކާއިން ވެގެން ހުރި ކުއްޔަށްދޭ ކޮޓަރި ބަރިން އަޝްރަފް ކުއްޔަށް ހިފައިފާހުންނަ ކޮޓަރިއަށް ދިއުމުގެ ކުރިން، އަޝްރަފް ދިޔައީ އޭނާގެ އެންމެ ގާތް އެކުވެރިޔާ އިއްބެގެ އަތުން ޕެންޑްރައިވް އެއް ބަލައެވެ. އަޝްރަފް އިއްބެގެ ގެޔަށް ދިޔައިރު އިއްބެ އިނީ އެޗްބީއޯއިން ދައްކަމުން ދިޔަ “ޑައިހާޑް 4″ ބަލާށެވެ. ދެމީހުން ފިލްމުގައި ޖެހިފައި ތިއްބާ ދެގަޑި ބައިވިއިރުވެސް ނޭނގުނެވެ. ފިލްމު ނިމުމުން ބަލާއައި ޕެންޑްރައިވް ހިފައިގެން އަޝްރަފް ގެޔަށްގޮސް ނިދަން އޮށޯތުމުގެ ކުރިން މެއިލް ޗެކްކޮށްލާނަމޭ ހިތާ ކޮމްޕިއުޓަރު ކައިރީގައި އިށީނެވެ. މެއިލް ޗެކްކުރުމަށްފަހު ފަހަރަކު ސައިޓަކަށް ވަންނަމުން ދަނިކޮށް ފަތިސްވެއްޖެކަން އަޝްރަފަށް އެނގުނީ ބަންގީގެ އަޑު އިވުމުންނެވެ. އެހާލަސްވެދާނެކަމަށް އަޝްރަފް ކުޑަކޮށްވެސް ހިއެއް ނުކުރެއެވެ. އަވަސްއަވަހަށް ފަތިސް ނަމާދު ކޮށްލައިގެން އަޝްރަފް ނިދަން އޮށޯތެވެ.

އަޝްރަފަކީ ނިދި ގަދަ ޒުވާނެއް ކަމުން އަނެއް ދުވަހު ހޭލެވުން އިރު ދެގަޑި ސާޅީސް ފަހެއް ހިނގައިފިއެވެ. އަޝްރަފް ގެ ޑިއުޓީ ޝިފްޓް ފެށޭގަޑިއަކީ ތިންގަޑި ބައި ކަމުން، ހުޅުމާލޭ 3 ޖަހާއިރުގެ ފެރީއަށް އޭނާ އަރަން ޖެހޭނެއެވެ. ދުވަހަކުވެސް އޮފީހަށްދާން ގަޑިޖެހިފައި ނުވާ އަޝްރަފް ހޭލުމަށް ފަހު އަވަސްއަވަހަށް ފާހާނާއަށް ވަދެ މަތި ހަދާލައިގެން ނުކުމެ، ސައިކަލަށް އަރާ ނައްޓާލި އިރު ތިނެއްޖަހަން ހުރީ އެންމެ ތިންމިނެޓެވެ. އަޝްރަފްގެ ވަންޓޫފައިވްގައި ބާރުބާރަށް ގޮސް ސޯސަންމަގަށް އެޅިއިރު ލައިޓު އިނީ ފެހިވެފައެވެ. ލައިޓު ނިވެން ވާއިރަށް މަޖީދީމަގު ހުރަސް ކުރުމަށް ސައިކަލުގެ ސްޕީޑް ފަންސާހުން ހަތްދިޔަށް ނެގިއެވެ. ނަމަވެސް މަޖީދީ މަގާ ހަމައަށް ނުދެވެނީސް ލައިޓް ފެހިން އޮރެންޖަށްވެ، އޮރެންޖުން ރަތަށް ބަދަލުވެއްޖެއެވެ. އަޝްރަފް ނިންމީ ލައިޓުގައި މަޑުނުކޮށް “ލައިޓު ފަޅާލައި” ހުރިސީދަލަށް ދާށެވެ. ދުއްވާ އެއްޗެހީގެ ލައިޓް ރަތްވުމުން ހިގާމީހުންގެ ލައިޓް އޭރު ހުރީ ފެހިވެފައި ކަމުން މަގުހުރަސް ކުރަން މަޑުކޮށްގެން ތިބިމީހުން އޭރު ހިނގައި ގަނެފިއެވެ.

ލައިޓު ހުރަސްކޮށް މަޖީދީމަގުގެ މެދާހަމައަށް ދެވުނުތަނާ ކުރިމަތިން މަގު ހުރަސްކުރަން ހިނގާފައި ދިޔަ ދެމީހަކު އަޝްރަފްގެ ލޮލުގައި އަޅައިގަތެވެ. އެވަގުތު އެމީހުންގެ ގައިން ނައްޓަންވެގެން އައިބާރުމިނުގައި ވައަތް ފަރާތަށް ސައިކަލް ގެ ހުންގާނު އަނބުރާލުމާއެކު ސައިކަލް ކޮންޓްރޯލުން ނެއްޓި، ޓްރެފިކް ލައިޓް ކައިރީގައި ހުރި ޗެންޗޭނުގައި ސައިކަލް ޖެހުމާއެކު އަޝްރަފް ވިއްސައިގެން ގޮސް ކަންމަތީގައި ހުރި ބޭސްފިހާރައިގެ ކުރިމަތީގައި ހުރި އަންހެން ކުއްޖާ އާއެކު ބިއްލޫރިގަނޑުގައި ދެމީހުން ޖެހި ބިއްލޫރި ގަނޑު ތެޅި ހުރިހާ ބިއްލޫރިއެއް ކުދިކުދި ވެގެން ފޭބިއެވެ.

(ނިމުނީ)

ދުނިޔޭގެ ތެރެއަށް އަހަރެން ފުރަތަމަ ނޭވާލި ދުވަހަކީ، ބަހާރު މޫސުމްގެ ފިނި، ރީތި ދުވަހެކެވެ. އަރާމު، ހިތްގައިމު ދުވަހެކެވެ. މުޅި ގުލްޝަނަށް ޝަބްނަމުގެ ތިކިތައް ތިޔާގިވެ، ގަސްތަކުގެ މަލަމަތި އުޖާލާވެފައިވާ ސާފު ދުވަހެކެވެ. ދިހުން އަރާ ބަޅިނދާއި ކޮކާތައް އަޒާދުކަން މަތީ، އުފަލުން ނަށަމުން، ލަވަކިޔަމުން، ހެމުން، އުދުހެމުން ދިޔަ ދުވަހެކެވެ.

އަހަރެން މޯޅިއަކަށް ދެމިލައި، ފުންނޭވާއެއްލައި، މައްޗަށް، އުދަރެހަށް ބަލާލީމެވެ. އަހަރެންގެ ޙަޔާތުގައި ވެސް މުޅިން އަލަށް ފެނުނު ދުވަހުގެ އިރު، ގަސްކަރަމަތިން ނުހަނު ދީލަތިކަމާއެކު، އޭގެ ރަންދޯދިތައް ހަދިޔާކުރަމުން، ފަތުރައިދެމުން، ގުލްޝަނަށް ހިބަކޮށްދެމުން، އަރަމުން ދިޔައެވެ. އޭގެ ތުނި އަލިކަމުން، އަހަރެންގެ މައުޞޫމް ހިތަށް ވެރިކޮށްދިން އުފާވެރިކަން، ހިތްހަމަޖެހުމާއި ލޮބުވެތިކަން މިއަދު ވެސް އަހަރެން ހަނދާން އެބަހުއްޓެވެ.

އިރުގެ އަލިކަމުން އަހަރެންގެ ހިތަށް ފިނިކަން ގެނެސްދިންކަމުގައި ވިޔަސް، އަހަރެންގެ ވަށައިގެންވާ އަޚުންނާއި އުޚުތުންގެ ކިބައިން ފެނުނީ ގިލަންވެރިކަމެވެ. އެމީހުންގެ މޫނުމަތިވަނީ މިލާފައެވެ. ނާއުންމީދުން ކިލަނބުވެފައެވެ. އެމީހުންގެ ޖިސްމުތަކުގައި ވަނީ އަނަރޫފަކަމެވެ. ބުރުސޫރައިގައި ކިލަނބުކަމެވެ. އެއީ ދުނިޔޭގެ ޠަބީޢަތްކަމުގައި އަހަރެންގެ މަންމަ އަހަރެންގެ ގާތުގައި ބުންޏެވެ. އެއީ، ކޮންމެ މަލަކަށް ވެސް އަންނާނެ ދުވަހެއް ކަމުގައި ހަނދާންކޮށްދިނެވެ. އެހަނދާން ތަކުރާރު ވެސް ކޮށްދިނެވެ. އެހެނަސް، އަހަރެންގެ މަންމަގެ ބަސްތަކުގެ ތެރެއިން އަހަރެންނަށް ޤަބޫލުކުރަން ދަތިވި ހަމައެކަނި ބަހަކީ އެއީއެވެ.

އަހަރެންގެ މަންމަގެ ކުރިމަތީގައި އަހަރެން ފަރިވެ ފޮޅެމުން ދިޔައެވެ. އަހަރެންގެ ޝަރަފުގައި ހިތާއި ހަށިގަނޑު ވެދުންކުރުމަށްޓަކާ ބަޅިނދުތައް ޒިޔާރަތް ކުރަމުން ދިޔައެވެ. އަހަރެންގެ ހުދު ކަރުގަނޑުން ޝަރާބެއް ލިބުން އެދިގެން، އުދުހި އުޅުނު ކޮކާތަކާއި މާބުރުތައް އަހަރެންނަށް ބަލައި، އަހަރެންގެ ގާތަށް ލެފެމުން ދިޔައެވެ. އަހަރެންގެ ޢަބީރުން، މުޅި ގުލްޝަނަށް ހުވަނދުލަމުން، ވަސްމީރުކުރަމުން ދިޔައެވެ. އަދި ގުލްޝަންގެ ތެރޭގައި އަހަރެންގެ މަޤުބޫލުކަން އިތުރުވެ، މާތަކުގެ ރާނީގެ މަގާމު ވެސް އަހަރެންނަށް ލިބިގެން ދިޔައެވެ. މަންމަގެ ނަޞީބުކަން ވެސް ނޭނގެއެވެ. އަހަރެންގެ މިހުރިހާ ކަމެއް ދުށުމަށް ދުނިޔޭގައި ހުރުމުގެ ފުރުޞަތެއް ނުލިބި، އަހަރެންގެ މަންމަ ވެސް ގުލްޝަނުގެ އަގެއް ނެތް ވެއްޔަށް ވެގެން ހިނގައްޖެއެވެ.

ދުވަސްތައް ތަކުރާރުވަމުން، އެނބުރެމުންދެއެވެ. އަހަރެންގެ ރީތިކަމާއި ޗާލުކަމުން އެހެން މާތައް ނިހާއީ ހަސަދައިން ފޯވެފައިވެއެވެ. އަހަރެންގެ ސާފު ބޯކިރުފޮދެއް ފަދަ ހުދު ފިޔަތަކުން ލިބިފައިވާ ނަލަކަމާ ހެދި އަހަރެންނަށް ލިބެމުންދާ ޝައުޤުވެރިކަމުގެ މައްޗަށް އެހެން މާތައް ތުންފިއްތައި، ރުންކުރުވެފައިވެއެވެ. އެހެންނަމަވެސް، އަހަރެންގެ ދުނިޔޭގައި ގިރިޓީވެއެވެ. އުފަލާއި އަރާމާއި މަސްތުވެއެވެ. އަހަރެންނަށް އަހަރެން ފިޔަވައި އެހެން އެއްވެސް މަޚްލޫޤެއް މުހިންމެއް ނޫނެވެ. ހުރިހާ ވެސް އެއްޗަކީ، ފިކުރަކީ އަހަރެންނެވެ. އަހަރެންނާއި އަހަރެންގެ ރީތިކަމެވެ. އަހަރެންނާއި އަހަރެންގެ ޗާލުކަމެވެ. އަހަރެންނާއި، އަހަރެންގެ ނަފްސާއި މަށެވެ. އަހަރެންގެ ޖާޒުބިއްޔަތެވެ. އަހަރެންގެ ޢަބީރެވެ. އަހަރެންގެ ޝައުޤުވެރިކަމެވެ.

އަހަރެންގެ އެމަސްތީ ދުނިޔެއިން ނުކުމެ ހޭވެރިކަމެއްވީ، އަހަރެންގެ ގާތައް ހުޅިރީތި މާބުރާއި، ދިހުން އަރާ ބަޅިނދާއި ކޮކާތައް އައުން ކުއްލިއަކަށް ހުއްޓުމުންނެވެ. އަހަރެންނަށްޓަކައި ފިދާވަމުންދިޔަ ޢާޝިޤުންތައް ހުސްވުމުންނެވެ. އަހަރެންގެ އެކުވެރިންތައް ގެއްލުމެވެ. އަހަރެންނާ ކައިރިން، އަހަރެންނާއެކު އުޅުނު އެންމެން ހުސްވުމުންނެވެ. އެހިނދު އަހަރެންގެ ވަށައިގެން ބަލައިލީމެވެ. އަހަރެން ދުނިޔެއަށް ފުރަތަމަ ނޭވާލި ދުވަހު ބަލާލިހާ ތޫނު، ފުން ނަޒަރަކުންނެވެ.

އަހަރެންނަށް ފެނުނީ އަހަރެންގެ ލޮލަށް ދުވަހަކު ވެސް ޤަބޫލުކުރެވޭނެ މަންޒަރެއް ނޫނެވެ. އަހަރެންގެ ހިތަށް އެންމެ ސިކުންތަކަށް ވެސް ތަސައްލީއެއް ލިބޭނޭ ކަމެއް ނޫނެވެ. އަހަރެން އިން ގަހުގެ ކައިރިން، ދާދި ގާތުން، ހެދިފައި ހުރި އެހެން ފިނިފެންމާ ގަހެކެވެ. އެގަހުގެ އާރޯކަމާއި ތާޒާކަމެވެ. އަދި އެގަހުގައި ފޮޅިފައި އިން ޝާއްބަ ލޭ ރަތްކުލައިގެ ރީތި ފިނިފެންމަލެކެވެ. އެމަލުގެ ރީތިކަމުން، އުޖާލާކަމުން، އަހަރެންނަށް ވެސް އިސްދަށަށް ޖަހާ ލެވުނެވެ. އަދި އެއަށް ވުރެ ވެސް ހިތަށް ގިލަންވެރިވީ، އެމަލުގެ ވަށައިގެން އަހަރެންގެ ގާތުގައި އުޅުނު ހުރިހާ މާބުރަކާއި ކޮކާލަކާއި ބަޅިނދަކާއި، ކުޅަނދުރެއް މުގޯލިއަޅާތަން ފެނިފައެވެ. އެމަލަށްޓަކައި ޤުރުބާންވަމުން، އެކަކު އަނެކަކާ ވާދަކުރަމުން، ކުރިއަރަމުންދާ ތަން ފެނިފައެވެ.

އަހަރެން ވީ ދެރައިން، އަނެއްކާ ވެސް އިސްދަށަށް ޖަހާލީމެވެ. އަދި އަހަރެންގެ ފިޔަތަކަށް ބަލާލީމެވެ. އެފިޔަތަކުގެ އޮފުދާރުކަން ކެނޑި ރާޅުވެއްޖެއެވެ. ސާފު ހުދުކަން ކެނޑި ކިލަނބުވެއްޖެއެވެ. އޮމާންކަން ކެނޑި ކުރަކި ވެއްޖެއެވެ. ރޯޝަނީކަން ވެސް މޯޅި ވެއްޖެއެވެ. އަހަރެންގެ ގައިގައިވަނީ ހުސް ރުލެވެ. މުސްކުޅިކަމުގެ އަސަރުތަކެވެ. އެއާއެކު އަހަރެން ފެންކަޅިވެއްޖެއެވެ.

އަހަރެން އަނެއްކާ ވެސް އިސް ދަށަށް ޖަހައިލީމެވެ. އެއާއެކު ކުއްލިއަކަށް ވީނުވީއެއް ނޭނގި، އަހަރެން މޫނުވަތަށް ވެއްޓިއްޖެއެވެ. ވެއްޓި ގޮސް ވަރަށް ބާރަށް ތަނެއްގައި ޖެހިއްޖެއެވެ. އަހަރެންނަށް ވީތަދެއް ބުނަން ވެސް ނޭނގެއެވެ. އަހަރެން ދެ ލޯ ހުޅުވާ ބަލާލިއިރު، އަހަރެންނަށް އޮވެވުނީ، ގުލްޝަނުގެ ކަޅު ފަސްގަނޑުގައެވެ. ދެންވާނީ ކިހިނެތްކަން އަހަރެންނަށް އިޙުސާސްކުރެވިއްޖެއެވެ. އަހަރެންގެ އެހެން އަޚުންނާއި އުޚުތުން އަދި މައިންބަފައިންނަށް ވެސް ޖެހުނީ މިޙާލެވެ. އެމީހުންގެ ވެސް ނިމުމަކީ މިއީއެވެ. މަޑުމަޑުން އެނބުރި މައްޗަށް ބަލާލިއިރު،، އާރޯ ރަތް ފިނިފެންމަލުގެ ޖަޒުބާތުގައި މުޅި ގުލްޝަން ޖެހިފައިވާތަން ފެނުނެވެ. އެމަލުގެ ހުވަނދު އެގަހުގެ މުލާ ހަމައަށް ވެސް ފޯރައެވެ. އަހަރެންގެ ޙާލަތު ވިސްނުނީ ދެނެވެ. އެއާއެކު އަހަރެންގެ ބަޑިފަޅައިގެން ދިޔައެވެ.

(4 ވަނަ އަދަދާއި ގުޅޭ)

“ކިހިނެތް އެނގެނީ؟ ދެމީހުން ރަނގަޅަށް ދަސްކޮށްގެންނެއް ނޫން އަހަރެމެން އާންމުކޮށް ކައިވެނިކޮށް އުޅެނީ. ދެން ކައިވެނި ކުރީމާ މައްސަލަތައް ޖެހެން ފަށަނީ. އެއާއެކު އަހަރުމެންގެ ގައިގައި ހުންނަން ޖެހޭނެ ހިތްވަރު އެމައްސަލަތައް ރީތިގޮތުގައި ހައްލުކުރުމުގެ. ޝިޔާނާއަށް އެނގޭތަ؟ މައްސަލައެއް ނުޖެހޭ އެއްވެސް ގުޅުމެއް ނޯންނާނެ ދުނިޔޭގައެއް. އަނެއްކާ ދެމަފިރިންގެ ދެމެދުގައި މައްސަލައެއް ނުޖެހެންޏާ އެއީ ވެސް މައްސަލައެއް. އެކަމަކު، އެކަންކަން ހައްލުކުރަން އެނގުން މުހިންމީ. ޝިޔާނާއަށް ވާގޮތަކީ، ކަމަކާ ކެރިގެން ކުރިމަތިލާކަށް ނުކެރޭ. މައްސަލައެއް ޖެހުނީމާ، އެވާހަކަ ބުނަން ނުކެރި ޝިޔާނާ ބޭނުން ގޮތަށް ނިންމާލަނީ. އަނެއް މީހާ އެހީމަ ވެސް ނުބުނޭ. ތިހެން ހިތުގައި ހުރިހާ ކަމެއް ފޮރުވައިގެން އިނުމަކީ ވަރަށް ގޯސްކަމެކޭ ޝިޔާނާ. އަހަރެންނަށް އެނގޭ ރޭގައި އަހަރެން ޝިޔާނާއަށް ބިރު ނުދެއްކިނަމަ، މިވަރަށް ވެސް ޝިޔާނާ ކިޔައިނުދޭނެކަން. އެއީ މައްސަލައެއް ޝިޔާނާ. އެހެން ހަދައިގެން ނުވާނެ. ކައިވެންޏެއް ދެމިއެއް ނޯންނާނެ އެގޮތަށް. ޝިޔާނާއަށް ދިރިއުޅުމެއް ނުފެނިގެން ވެސް އުޅެނީ އެހެންވެހެން އަހަރެންނަށް ހީވޭ. ތިކުރީ މިހާރު 7 ވަނަ ކައިވެނި.” ހުޝާމް ބޮޑު ބަޔާނެއްހެން ބުންޏެވެ.

“އަހަރެން މިއައީ ހުޝާމްގެ ލެކްޗަރެއް އަޑުއަހާކަށް ނޫނޭ! ހުޝާމްގެ ސުވާލުތަކަށް ޖަވާބުދޭން. މިހާރު ޖަވާބު ލިބިއްޖެއެއްނު! ދެން އަހަރެން ދަނީމި!” ހުޝާމް ޝިޔާނާގެ ދިރިއުޅުމާ ބެހޭ ގޮތުން ވާހަކަ ދެއްކުމުން ޝިޔާނާ ވަރަށް ހިތްހަމަ ނުޖެހި އިނދެ ބުންޏެވެ. އަދި ގޮނޑިން ތެދުވިއެވެ.

“ޝިޔާނާ މަޑުކޮށްބަލަ. އަދި އެބައޮތް އެއް ސުވާލު. އޭރުން އެނިމުނީ. ދެން އަހަރެން ޝިޔާނާއަކަށް އުނދަގުލެއް ނުކުރާނަން.” ހުޝާމް ބުންޏެވެ.

ޝިޔާނާ އަނެއްކާ ވެސް އިށީނެވެ.

“ޝިޔާނާ ތިބުނި ގޮތުން ވިއްޔާ، ޝިޔާނާ ކުރިން އިން އަނެއް 5 މީހުންގެ ގާތުން ވެސް ވަރިވީ ހަމަ އެމީހުންގެ ވެސް ބަލިކަށިކަމުންތަ؟ އެހެންވެއްޖެނަމަ އެއީ ވަރަށް ބޮޑު އިއްތިފާޤެއް. އެހެންނޫންނަމަ، ޝިޔާނާއަށް ހީވޭތަ ޝިޔާނާގެ އެދުން އާންމު އިންސާނުންނަށް ވުރެ ގަދައީއޭ؟” ހުޝާމްގެ ސުވާލަކީ ވަރަށް ބާރު ހުރި ސުވާލެކެވެ.

“އަހަރެންނަކަށް ނުޖެހޭ ހުޝާމާ ނުގުޅޭ ސުވާލުތަކަށް ޖަވާބުދޭކަށެއް. އަހަރެން މިއައީ ވެސް ހުޝާމާ ގުޅޭ ސުވާލުތަކަށް ޖަވާބުދޭން. އެއީވެސް، އަހަރެންނަށް އިންޒާރުދީ ބިރުދެއްކީމަ. އަހަރެން އުންމީދުކުރަން ދެން އަހަރެންނަށް އުނދަގުލެއް ނުކުރާނެކަމަށް.”

އެހެން ބުނެފައި ޝިޔާނާ ގޮނޑިން ތެދުވެ ގޮސް ތަޅުގައި ހިފާލިއެވެ. އަދި އަނެއްކާ ވެސް ފަހަތަށް އެނބުރިފައި ބުންޏެވެ.

“އަހަރެން ވެސް އެބައޮތް ސުވާލެއް ކޮށްލަން ހުޝާމާ. ރޭގައި ބުނީމެއްނު، އަހަރެން ހަޅޭއްލެވިޔަސް ނަވީނެއް ނުހޭލާނޭ. ކިހިނެތް އެކަން ހުޝާމަށް އެނގެނީ. އޭނާއަށް ހުޝާމް އެއްވެސް ކަމެއް ކުރިންތަ؟” ޝިޔާނާ ހުޝާމާ ހަތަރުކަޅި ހަމަކޮށްފައި އެސުވާލު ކުރިއެވެ.

ސުވާލުގެ ލަފްޒުތައް ޝިޔާނާގެ ދުލުން ނުކުމެ ވައިގެ ތެރޭ އުދުހިފައި ގޮސް ހުޝާމްގެ ކަންފަތަށް ވަނުމާއެކު، ހުޝާމް ތެޅިގަތެވެ.

“ކިހިނެތްވީ؟” ހުޝާމް ވެސް ކުރީ ސުވާލެކެވެ.

“އަހަރެން މިއެހީ ހުޝާމް ނަވީނަށް އެއްވެސް ކަމެއް ކުރިންހޭ؟” ޝިޔާނާގެ ސުވާލު ތަކުރާރުކޮށްލިއެވެ.

“ނޫން. ނުކުރަން. އަހަރެންގެ ހިތް ބުނީ ނަވީނެއް ނުހޭލާނޭ. އަޑެއް ވެސް ނީވޭނޭ. އެހެންނު ވީވެސް.” ހުޝާމް ބުންޏެވެ.

“އެންމެ ރަނގަޅު. އަހަރެން ދަނީ.”

އެހެން ބުނެފައި ޝިޔާނާ އަވަސް އަވަހަށް އެކޮޓަރިން ނުކުތެވެ. އަދި، އޭނާ އައި މަގުން ލާފައި ގޮސް އޭނާގެ ކޮޓަރިއަށް ވަނެވެ.

ނަވީންވީ މިއުޒިކް ބަލާލަން ގޮހެވެ. ޝިޔާނާ ވެސް އޭނާއާއެކު ދިޔައެވެ. އެހެންނަމަވެސް، ގަޑިން 11 ޖަހަން ވަރަށް ކައިރިވެފައިވަނިކޮށް، ނަވީންގެ ގާތުގައި، ބޮލުގައި ކުޑަކޮށް ރިއްސާތީ ޖައްސާލަން ދަނީއޭ ކިޔާފައި އައީއެވެ. އޭނާ ހުޝާމް ގާތަށް ދިޔައީ އެތަނުން ކޮޓަރިއަށް އައި މަގުމަތީގައެވެ.

ޝިޔާނާ ފާޚާނާއަށް ވަދެ ހެދުން ބަދަލުކޮށްގެން އޮށޯތެވެ. އޭގެ ދިހަވަރަކަށް މިނެޓްފަހުން ނަވީން ވެސް އައެވެ. އަދި އޭނާ ވެސް ހެދުން ބަދަލުކޮށްލައިގެން ނިދާލަން ޖައްސާލިއެވެ.

************

ހަތަރު ދުވަހަށް ފަހު، ޝިޔާނާއާއި ނަވީންގެ މާމުއިހަނދު ނިންމާލައި މާލެ އަންނަން ތައްޔާރުވަމުން ދިޔައެވެ. ޝިޔާނާ ދަބަހަށް އެއްޗެހި އަޅަމުން ގެންދިޔައެވެ. ނަވީން ވެސް، ފާޚާނާގައި ހުރި ފުޅިތަކާ އެއްޗެހި ގެނެސް ޝިޔާނާ އަތަށް ދިނެވެ.

“ލޯބީ. އަންނާނަން އިނގޭ ބިލް ނިންމާލާފައި.” ނަވީން ޝިޔާނާގެ ގާތުގައި ބުންޏެވެ.

“އާނ. އެންމެ ރަނގަޅު” ޝިޔާނާ ޖަވާބު ދިނެވެ.

ނަވީން ކޮޓަރިން ނުކުމެގެން ދިޔަތާ މިނިޓްކޮޅެއް ވެސް ނުވަނީސް ފޯނުވާން ފެށިއެވެ. ޝިޔާނާ އަވަސް އަވަހަށް ގޮސް ފޯނު ނެގިއެވެ.

“ހެލޯވ؟” ޝިޔާނާ ބުންޏެވެ.

“ފުރަނީދޯ މިއަދު؟” އެއީ ހުޝާމްގެ އަޑެވެ.

“ހުޝާމަށް ކޮންކަމެއް؟” ޝިޔާނާ އުންމީދު ކުރީ ނަވީން ގުޅީ ކަމަށެވެ. އެހެންނަމަވެސް ހުޝާމްކަން އެނގުމުން ރުންކުރުވެލާފައި ބުންޏެވެ.

“މިގުޅީ ވާހަކައެއް ބުނަން. ނަވީން އެބަހުރި…”

“އަހަރެން ހުޝާމްގެ އެއްވެސް ވާހަކައެއް އަޑުއަހާކަށް ބޭނުމެއް ނޫން.” ހުޝާމްގެ ވާހަކަ ނުނިމެނީސް ޝިޔާނާ ބުންޏެވެ.

“އަހަރެން ޝިޔާނާއަށް ކައިވެނީގެ ހަދިޔާއެއް ދޭ ވާހަކަ ބުނަން އަސްލު މިގުޅީ.” ހުޝާމް އޭނާގެ ޖުމްލަ ފުރިހަމަކުރިއެވެ.

“ހުޝާމް އަހަރެންނަށް ރަނގަޅީ، ހުޝާމް އަހަރެންގެ މަތިން އެއްކޮށް ހަނދާން ނައްތާލިއްޔާ. އަހަރެންނަށް ނުގުޅިއްޔާ.” ޝިޔާނާ ބޭނުންވާ ގޮތް ހުޝާމަށް ހާމަކޮށްދިނެވެ.

“ޝިޔާނާމެންގެ ބިލަށް 50 ޕަސެންޓް ޑިސްކައުންޓް ދޭން އަހަރެން ބޭނުން. އެހަދިޔާ ކަމުދޭތަ؟” ޝިޔާނާ ފޯނު ބާއްވާނެހެން ހީވާން ފެށުމުން ހުޝާމް އަވަސް އަވަހަށް ބުންޏެވެ.

ޝިޔާނާ ހުރީ ބުނާނެ އެއްޗެއް ނޭނގިފައެވެ.

“މިހަދިޔާ ރަނގަޅުތަ؟” ހުޝާމް އަނެއްކާ ވެސް އެހިއެވެ.

ދެން ވެސް ޝިޔާނާ އެއްޗެއް ނުބުނެއެވެ.

“ޝިޔާނާ ލަސްކުރާ ވަރަކަށް، ނަވީންގެ ބިލް ނިންމުން ލަސްވާނެ. އެހެންވީމާ އަވަހަށް ޖަވާބުދީ.” ހުޝާމް ޝިޔާނާގެ ޖަވާބަކަށް އެދެމުން ދިޔައެވެ.

“ހުޝާމް…” ޝިޔާނާ ފެށިއެވެ.

“އާނ؟” ހުޝާމް އިނީ ޝިޔާނާގެ ޖަވާބުގެ އިންތިޒާރުގައެވެ.

“އަހަރެން ހުޝާމްގެ ތިހަދިޔާއަށް ވަރަށް ބޮޑަށް ޝުކުރިއްޔާއޭ ބުނަން އޮތީ. އެހެންނަމަވެސް، އަހަރެންނަށް ތިހަދިޔާގައި ހިފޭކަށް ނެތް.” ޝިޔާނާ ވިސްނުންތެރިކަމާއެކު ބުންޏެވެ.

“އެއީ ކީއްވެ؟” ހުޝާމް އުންމީދުކުރި ޖަވާބަށް ނުވުމުން، އަނެއްކާ ވެސް ސުވާލުކުރިއެވެ.

“ހަމަ ހިފެންނެތީ މިހާރު. އަހަރެން ހުޝާމްގެ އެއްވެސް ވާހަކައެއް ވެސް، ހުޝާމް ހުރީ މިރިސޯޓުގައި ކަމެއް ވެސް، އަދި ތިޑިސްކައުންޓް ދިނީ ހުޝާމް ކަމެއް ވެސް، ހުޝާމާ އަހަރެންނާ އޮތީ ކޮން ގުޅުމެއް ކަމެއް ވެސް ނަވީނަށް އެނގެން ބޭނުން ނުވަނީ. އެހެންވެ.” ޝިޔާނާ ހުޝާމަށް ކިޔައިދިނެވެ.

“އެންމެ ރަނގަޅު. ދެން ބާއްވަނީ. އަހަރެންނަށް ވަރަށް އުނދަގޫވާނެ ޝިޔާނާގެ މަތިން ހަނދާން ނައްތާލަން. އަހަރެން އަބަދު ވެސް ޝިޔާނާ ދެކެ ލޯބިވާނަން. ޝިޔާނާއަށް އެއްވެސް ދަތިކަމެއް ޖެހިއްޖެއްޔާ އަހަރެންނަށް ގުޅާ. އަހަރެން ހުންނާނަން ޝިޔާނާގެ އިންތިޒާރުގައި މުޅި އުމުރަށް. އަހަރެން އަދި ވެސް ބޭނުން ޝިޔާނާ.” ހުޝާމް އާދޭހުގެ ރާގެއްގައި ބުންޏެވެ.

“ދެން ބާއްވަނީ. ނަވީން އަތުވެދާނެ.” ހުޝާމްގެ އެއްވެސް ވާހަކައަކަށް ޝިޔާނާ ޖަވާބެއް ނުދިނެވެ.

ޝިޔާނާ ފޯނު ބާއްވާފައި، ކުޑަކޮށް ހަމަޖެހިލިއެވެ. އޭނާގެ މޫނުމަތިން ވެސް އެއްވެސް ކަމެއް ހިނގާފައިވާ ކަމުގެ އެއްވެސް އަސަރެއް ނަވީނަށް ފެންނާކަށް އޭނާ ބޭނުމެއް ނުވިއެވެ. އެހެންކަމުން، ބާކީ ހުރި އެތިކޮޅު ދަބަހަށް އަޅާފައި، އެންމެ ފަހު ފަހަރަށް ލޯގަނޑުން އޭނާގެ ސޫރަ ދެކިލާފައި، ޝިޔާނާ ދަބަސްތައް ކޮޓަރިން ނެރުނެވެ. އަދި އޭނާ ވެސް ކޮޓަރިން ނުކުމެ ބޭރުގައި ހުރި ގޮނޑީގައި އިށީނެވެ.

(ނުނިމޭ)

ފާރިސްކަރައިގެ ރަސްކަލުންކުރެ މާތްވެގެންވާ ތޫނުފިލި ރަސްކަލަކު އެއް ދުވަހަކު ބާލުޚާނާއެއްގައި ހުންނަވައިފައި، ބައްލަވައިލެއްވި ގޮތަކުން ފެނިވަޑައިގަތް ޕަރީޒާދެއް ފަދަ އަންހެނަކުގެ ރީތިކަންމައްޗަށް އެ ރަސްގެފާނުންގެ ފުރާނަފުޅަށް ދިޔައީ ގުޑުން އަރައިގެންނެވެ. އަރިހުގައި ހުންނެވި ޚައްދާމަކަށް ވިދާޅުވިޔޭ.

އެހެރަ ފެންނަ ގެޔަކީ، ކާކުގެ ގެޔެއް ހެއްޔެވެ؟ އެގޭގެ ފެންޑާޔެއް މަތީގައި، ފިނިކުރާން ނުކުމެ ސިހުމަކާނުލައި މުޅި މި ދޭހަށް އަލިއަރުވައިގެން އެހުރީ ކޮންފަދަ ޕަރީޒާދެއް ހެއްޔެވެ؟

ޚައްދާމު ދެންނެވިޔޭ. އެއީ މަނިކުފާނުންގެ ވަޒީރުންކުރެ ފީރޯޒުގެ ގަނޑުވަރެވެ. އެމީހަކީ، އޭނާގެ އަނބި ކަނބަލުންނެވެ.

ރަސްގެފާނު: އާނދޮގޭޔޭ. ވިދާޅުވެފައި ބާލުޚާނާ އިން ފައިބައި ވަޑައިގެން ފީރޯޒު ބަލައި ފޮނުއްވައި ގެންނަވައިފައި ވަރަށް ބޮޑު ލަޝްކަރެއްގެ މައްޗަށް ވެރިކުރައްވައިފައި އެވަގުތަށް އެރަސްގެފާނަށް ނުކިޔަމަންތެރި ވެގެން އުޅޭ ބޮޑު ރަށެއް ފަތަޙަ ކުރައްވާން ފޮނުއްވައިފި އެވެ.

ފީރޯޒު ލަޝްކަރާއިގެން ނިކުތްރެއި ރަސްގެފާނު ފީރޯޒުގެ ގެޔަށް ވަޑައިގެން އިރު އޮއްސި އަނދިރިވުމާއި އެކުގައި ދޮރުގައި ޓަކި ދެއްވައިފިއެވެ. ފީރޯޒުގެ އަނބިކަމަނާއީ، ވިސްނުން ގަދަ ތަންދޮރު ދަންނަ މީހަކު ކަމުން ރަސްގެފާނު ޓަކި ދެއްވާ ގޮތްވެސް ދަނެއެވެ. ރަސްގެފާނު މިނޫނަސް އެގެޔަށް ވަޑައިވެސް ގަނެއެވެ.

މި ކަމަނާ އަވަހަށް އައިސް ދޮރު ހުޅުވައިލައިފައި މަސާރީއަކާއި (މަސާރީ: އެނދުގެ ވަށައިގެން ދަމާ ފޮތިގަނޑު) ނިވައިވެ ހުއްޓައި ރަސްގެފާނު ވެދެވަޑައިގެންފިއެވެ.

މި ކަމަނާ: އަނެއްކާ ޚަބަރަކީ ކޮބައިތޯ؟ އަޅުގަނޑުގެ ފިރިކަލުންނަށް ވީކީއްތޯ.

ރަސްގެފާނު ވަޑައިގެން ވަޒީރުގެ ދާންމަތީގައި އިށީނދެވަޑައިގެންފައި: ޚަބަރު ރަނގަޅޭ އޭނާއަކަށް ކަމެއް ނުވެޔޭ. އިރާދަ ކުރެއްވިޔާ ނަޞްރު ލިބިގެން އަންނާނެއެވެ.

މި ކަމަނާ: މަނިކުފާނުންގެ މާތްވެގެންވާ އަލިކަމުން މި ގޭތެރެ އަލިކުރައްވައި އަޅުގަނޑަށް، މިހައި ޢިއްޒަތެއް ދެއްވުމުގެ ސަބަބަކީ، ކޮބައިތޯ ދަންނަވާން ހިތަށް އަރަޔޭ. ޢަފޫ ކުރެއްވުމާއެކު އެންގެވުމުގެ އުފާވެރިކަން ދެއްވާނޭކަމަށް ހީކުރަމެވެ.

ރަސްގެފާނު: އެއީ ހަމަ ހާލު ބަލައިލަން އާދެވުނީއެވެ. ލޮލަށް ފެނުނު ފެނުމަކުން ޖާނަށް ކުޅަ އަސަރަކާހުރެ އިޚްތިޔާރަކާނުލައި އެޅުނު ފިޔަވަޅުތަކެކެވެ. އެއްވެސް އަގެއް ނެތި ގެއްލޭނީ ބާވަޔޭ ހީވެއެވެ.

މިކަމަނާ: ސުބްޙާނަﷲ ޔޭ. މަނިކުފާނުންގެ އެންމެ ފިޔަވަޅުފުޅެއްގެ އަގު މުޅި މި ގެޔާއި މިގޭގައި ހުރި ތަކެތީގައި ނުވެ އެވެ. އަދި މިހުރިހައި ތަކެއްޗަކީ، އަޅުގަނޑުގެ ޖާނާއެކު މަނިކުފާނުގެ މިލްކު ނޫންތޯއެވެ؟

މިހެން ދެންނެވުމާއެކު، ވަރަށް ފަރި ގޮތަކަށް ހިނގާފައި އައިސް، ރަސްގެފާނު އަރިހުގައި ވަރަށް ރީތި ރަންގިރިޓީ ކޮށްފައި އޮތް ފޮތެއް ބާއްވާފައި ދަންނަވައިފިއެވެ. ނިކަމެތި އަޅުގަނޑަށް، މި ހުރެވުނީ މަނިކުފާނުންގެ އަރިހުގައި އިށީނދެ މަނިކުފާނުންގެ މާތް ހިތްޕުޅަށް އުފާފުޅެއް ލިބިވަޑައިގަންނަވާނޭ ގޮތެއް ދެއްކޭނޭ ފަދަ ސިފަޔެއްގައެއް ނޫނެވެ. ބައިގަޑިޔެއްހާ އިރުން އަޅުގަނޑުގެ ކަންތައް ޞުލްޙަ ކޮށްލައި ނަލަވެލައިގެން އަންނާންދެން، ފޫހިފުޅު ފިލުވައިލެއްވުމަށް، މި ފޮތް ބައްލަވައި ލައްވާށެވެ.

މިހެން ދަންނަވާފައި ބައްތިތައް ބޮޑުކޮށްލައިފައި. ހިނގާފައި ދިޔަގޮތުން ރަސްގެފާނަށް ހީފުޅުވީ، އުދުހިވަޑައިގެންނެވިއްޖެ ހެންނެވެ. އަވަހަށް މި ފޮތް ނަންގަވައިފައި ބައްލަވައި ލެއްވި އިރު ފުރަތަމަޔަށް ފެނިވަޑައިގަތީ………(އުރުދޫ ޅެންބައިތެކެވެ)

މި ބައިތުގެ މައްޗަށް ޝަރަޙައެއްގެ ގޮތުން ވަރަށް ގިނަ ވާހަކަތައް އެފޮތުގައި ހުއްޓެވެ. މި ވާހަކަތަކުގެ ތެރޭގައި، وَلاَ تَقْرَبُواْ الزِّنَى إِنَّهُ كَانَ فَاحِشَةً وَسَاء سَبِيلاً މި އާޔަތްވެސް އޮތެވެ.

މިބައިތުގެ ތަރުޖަމާއީ، މުދަލުން ހަމަޔަށް ޒަކާތް ދިނުން މަނަޢަވެއްޖެއްޔާ، އެތަނަކަށް ވާރެއިވެހުން މަދުވާނެއެވެ. ޒިނޭގެ ކަންތައް ހިނގާން ފަށައިފިއްޔާ، އެތަންމިތާނގައި ވަބާގެ ބަލިތައް ފެށިދާނެއެވެ. މިއެވެ.

ރަސްގެފާނު މި ފޮތް ބައްލަވައިލައްވާފައި، ވަރަށް ލަދުފުޅުގަތުމާއިއެކު، މާތް ރަސްކަލާނގެ ކިބަޔަށް، ތެދުނިޔަތުން ތައުބާވެ ވަޑައިގެން އަވަސް އަވަހަށް ނުކުމެވަޑައިގެންފި އެވެ.

ގަތް ލަދުފުޅާއި، ހިތްޕުޅަށް ކުޅަ އަސަރުބޮޑުކަމުން ރަސްގެފާނުން ގެންގުޅުއްވި ކުޑަ ބޮންތިކޮޅެއް އިންނެވި މަސަންދުގެ ދެބާލީސްކޮޅު ދޭތެރޭގައިވެ ހަނދުމަފުޅު ނެތި ހިނގައްޖެއެވެ.

މި ކަމަނާ އެއަށް ފަހު، އެ މަސަންދަކާއި (މަސަންދު: ތަންމަތި އަޅާފައި ހުންނަ އެނދު) ގާތެއް ނުވެއެވެ. މިކަން މިހެން ހިނގާފައިވާތާ އަހަރެއްހައި ދުވަހުން ފީރޯޒު އެދުރުވި ހަނގުރާމައަކުން، ނަޞްރު ލިބި އެރަށް ފަތަޙަ ކުރައްވައިގެން ވަރަށް އުފާވެރި ކަމާއެކު ރަށަށް ދުރުވެ ރަސްގެފާނުންގެ ފައިވާންފުޅުދެކެ، ހަވާލުވެގެން ނުކުންނެވި ކަންތައް ރަނގަޅަށް ފުދުނުކަމުގެ އިނާމާއި ތަޝްރީފު ލިބިގެން ގެޔަށް ދުރުވެއްޖެއެވެ.

ގެޔަށް ދުރުވެ އޭނާގެ މަސަންދުގައި ހަމަ އިށީންނަވާފައި ދެކެލެއްވީ ރަސްފާނުންގެ ބޮންތި ކޮޅެވެ. މީނާ އަނބިކަމަނާއަށް ގޮވައިލައިފައި އައުމުން ބުނުއްވައިފިޔޭ. ކަމަނާ އިހަށް ދުވަސްކޮޅަކަށް ކަމަނާގެ ބައްޕާގެ ގަނޑުވަރަށް ވަޑައިގަންނަވާންވީ އެވެ. މިހިރީ ހަނގުރާމައިން ލިބުނު ތަކެއްޗާއި، ހަނގުރާމައިގައި ނަޞްރު ލިބި ފަތަޙަވުމުން ރަސްގެފާނުންގެ ފަރާތްޕުޅުން ލިބުނުތަކެތީގެ ހިސާބެވެ.

މި ހުރިހައި ތަކެތި މިހުރީ ކަމަނާއަށާއި، ކަމާނާގެ ބައްޕައަށާ މަންމައަށާއި، ކޮއްކޯމެންނަށާއި، މި އެއްމެންނަށް އަޅުގަނޑުގެ ކިބައިންހުރި މި ދަތުރުގެ ހަދިޔާ ވެދުމެވެ. މި ތަކެތި، ގަބޫލުކުރެއްވުން އެދެމެވެ. ދެން މި ކަމަނާ މި ކަމަނާގެ ބައްޕާގެ ގަނޑުވަރަށް، ވަޑައިގެންފިއެވެ. ވަޑައިގަތުމާއިއެކު، މި ކަމަނާގެ ހުރިހައި އެއްޗެތިކޮޅަކާއި، އެތައްގިނަ މުދައުތައް މި ގަނޑުވަރަށް އަތުވެއްޖެއެވެ.

އަށެއްކަ ދުވަހުގެ ތެރޭގައި މިކަމަނާ އެ ފިރިކަލުން ބަލައި ފޮނުއްވައި އުޅުއްވި އެވެ. ފިރިކަލުން މި ދާ މީހަކު ގާތުގައި އާނ. ހޫނ. މި ކަހަލަ ބަހެއް ބުނުއްވައިފައިމެ ނުދުރުވިއެވެ.

ރަސްގެފާނުންގެ އާއިލާގެ ކަންތައް ހުންނަމަގަކީ، ކޮންމެ ހޯމަ ދުވަހަކު ރަސްގެފާނުންގެ ޚާއްޞަ ދަރުބާރަށް ހުރިހައި ފަނޑިޔާރުން ޙާޟިރުވާނެތެވެ. ދައުލަތުގެ މާތް ބޭފުޅުންނާއި، އަމީރުން، ވަޒީރުންގެ މައްޗަށް ހުރިނަމަ ހުރި ދަޢުވާއެއް އުފުލި އެދުވަހަކީ، އެ ދަރުބާރުގެ ސަރިޔަތްތައް ހިނގާ ދުވަހެވެ. ދެން މި ކަމަނާ މިހާލުކޮޅުގައި އިންނަވާތާ، އަހަރެއްހައި ދުވަސްވުމަށްފަހު، އެއްދުވަހަކު، ރަސްގެފާނުން މި ނަންގަތް ސަރިޔަތުގެ ދަރުބާރުގައި ވަޑައިގެން އިންނަވަނިކޮށް، އެކަމަނާގެ ބޭބެ ފުންމައިގެން ތެދުވެ، އަދަބު އަދާކޮށްފައި ދަންނަވައިފި އެވެ.

އަޅުގަނޑުގެ ދަޢުވާޔެއް މި އިންނެވި ފީރޯޒުގެ މައްޗަށް އޮވެއްޖެ އެވެ. އެދަޢުވާޔަކީ…
އެކަލޭގެފާނުން އަޅުގަނޑުގެ ވަރަށް ރަނގަޅު ބަގީޗާއެއް ކިރިއްޔާއަށް ހިއްޕަވައިގެން ދުވަސްކޮޅަކު ގެންގުޅުއްވާފައި، މިހާރު އެބަގީޗާއާ މެދުގައި އެހީތެރިކަން ކުޑަކުރައްވައިފިއެވެ. ބަލަހައްޓާ މީހަކު ނެތެވެ. ހިކި ގޮފި ކޮށައި ފެންދޭ މީހެއް ނެތެވެ. ދުލެއް ނުމެ ކުރައްވާމެޔޭ. ނުވެއް ބައްލަވާމެޔޭ.

ފީރޯޒު: އެބަގީޗާއަކީ، އަޅުގަނޑު ވަރަށް ބޭނުން ބަގީޗާއެއްކަމުން އަދި ދޫކުރާން ނުކެރި ހުންނަނީޔޭ. އެކަމަކު އެބަގީޗާގެ ތެރެއިން ސިންގާ ވަދެއުޅޭ އަސަރެއް ފެނިފައި ގަތްބިރަކުން، މިވަގުތަށް ވަނީ ތިޔަ ބުނުއްވާފަދައިން ވެފައެވެ.

ރަސްގެފާނު ކުޑަކޮށް ބާލީސްކޮޅަށް ލެނގިވަޑައިގެން އޮންނަވައިފައި، ތެދުވެ ވަޑައިގެން ވިދާޅުވެއްޖެއެވެ. ތިޔަކަން ހިނގިގޮތް އަހުރެން ދެނެހުރީމެވެ. ކަލޭގެފާނުންގެ ތިޔަ ބަގީޗާއަށްވުރެ ރައްކައުތެރިކަންބޮޑު ބަގީޗާއެއް ދުނިޔޭގައިވެސްވާނީ ވަރަށް މަދުންނެވެ. ތިޔަ ބުނާ ސިންގާޔަށް ވެގެން ދިޔަ ގޮތަކުން އެބަގީޗާގެ ތެރެޔަށް އެއްފަހަރަކު ވަންމެޔޭ. އެއަށްފަހަކު ނުވަދެޔޭ. އެތަނުން ދިމާވީ ރައްކައުތެރި ކަމުގެ ގޮތްތައް މޮޅުކަމުން އެސިންގާ މުޅިން ބަގީޗާ ބަގީޗާތަކަށް ވަނުން ވެސް ހުއްޓީޔޭ ބުނާތީ އެހީމެވެ. ކަލޭގެފާނުންގެ ބަގީޗާގައި މާތް ރަސްކަލާގެ ކަލާގެފާނަށް ބަރަކާތް ލައްވާނެތޭ.

(3 ވަނަ އަދަދާއި ގުޅޭ)

“އަހަރެން ބޭނުމެއް ނޫން މިއުފާވެރިކަން ގެއްލިދާކަށެއް. އެކަމަކު އަހަރެން އެބައޮތް ވާހަކައެއް ބުނަން. ފަހަރެއްގައި ނަވީން ރުޅިއައުން ވެސް އެކަށީގެންވޭ މިވާހަކަ އަހާފައި. މިބުނަން އުޅެނީ، މިމާހައުލާ އެހާ ގުޅޭ ވާހަކައެއް ވެސް ނޫން.” ޝިޔާނާ އިސްދަށަށް ޖަހައިގެން އިނދެ ލަސްލަހުން ބުނެލިއެވެ.

“އަހަރެންނަށް އެންމެ ރަނގަޅޭ. އަހަރެން ރުޅިއެއް ނާންނާނެ. މިއުފާވެރިކަމެއް ވެސް ނުގެއްލޭނެ. މިއަދު ދުނިޔޭގައި ވެސް ހުރި އަހަރެން އެންމެ ލޯބިވާ މީހަކީ ތިއީ. އަހަރެންގެ ހުރިހާ އުފާތައް ވަނީ ޝިޔާނާއާ ގުޅިފައި. ލޯބި އުފަލުން ބެހެއްޓުމަށް އަހަރެން ކޮންމެ ފަދަ ކަމެއް ވެސް ކޮށްފާނަން. އަހަރެން ވަރަށް، ވަރަށް ލޯބިވޭ ޝިޔާނާ ދެކެ.” ނަވީން ޝިޔާނާގެ ދަތް ދޮޅީގައި މަޑުމަޑުން ހިފާލައި، ކައިރިވެލާފައި ބުންޏެވެ.

“ޔަޤީންތަ އަހަރެން މިވާހަކަ ބުނީމާ ރުޅިއެއް ނާންނާނެކަން؟” ޝިޔާނާ ކުރީ ސުވާލެކެވެ.

“ހަމަ ޔަޤީން. އަޅެ ބުނެބަލަ. އަހަރެން ބޭނުމެއް ނޫން އަހަރެންގެ އަންހެނުން ތިހެން ފިކުރު ބޮޑުވެފައި، ނުތަނަސްވެފައި އިންނާކަށް. ބުނީމަތާދޯ އަހަރެންނަށް އެނގޭނީ ކަމެއް ކޮށްދޭން ވެސް؟” ނަވީން ވެސް ނިންމާލީ ސުވާލަކުންނެވެ.

“އާނ. އެންމެ ރަނގަޅު.” ޝިޔާނާ ވާހަކަ ފެށިއެވެ.

ނަވީން އިނީ ޝިޔާނާ ބުނާ އެއްޗެއްގެ އިންތިޒާރުގައި ކެތް މަދުވެފައެވެ.

“އެއީ… އެއީ އަހަރެންގެ ދަރިފުޅު… ދަރިފުޅު މަތިން ހަމަ ހަނދާންވާތީ. އަހަރެން… އޭނާގެ މުޅި ޢުމުރުގައި ވެސް އޭނާއާ ވަކިން ހޭދަކުރި ހަމައެކަނި ދުވަހަކީ… މިއަދު. އޭނާ އަހަރެން ވަރަށް ހޯދާނެ… އަހަރެން މިއިންނަނީ އެކަމާ ކަންތައް ބޮޑުވެފަ…” ޝިޔާނާ ހުއްޓަ ހުއްޓާފައި، ނަވީންގެ ލޮލަށް ބަލަހައްޓައިގެން އިނދެ ބުންޏެވެ.

ޝިޔާނާ ހެދީ މުޅިއަކުން ދޮގެއް ނޫނެވެ. އެކަމަކު އެއީ މުޅިއަކުން ތެދެއް ވެސް ނޫނެވެ. އެހިނދު، އޭރު އޭނާގެ ހިތުގައި ހިނގަމުން ދިޔަ ޝުޢޫރަކީ، މިއީ ފިރިމީހާއަށް އޮޅުވާލުން ކަމުގައެވެ. އަދި އެއީ، އޭނާ ކުރަން އެއްގޮތަކަށް ވެސް ބޭނުންވާ ކަމެއް ނޫން ކަމެވެ. އެމީހުންގެ ކައިވެންޏަށް އަދި މިއުޅެނީ ދެ ދުވަސް ވެސް ނުވެގެންނެވެ.

“އެހެންތަ؟ ތިކަމާތަ ތިއިންނަނީ ހާސްވެފައި؟ ޝިޔާނާ ރަނގަޅު. ތިވަރުން ފޮރުވައިގެން އުޅެން ޖެހޭ ވަރުގެ ކަމެއްތަ ތިއީ؟ ޝިޔާނާއަކީ ކާކުކަން އެނގިހުރެއެއްނު އަހަރެން ޝިޔާނާއާ ކައިވެނިކުރީ ވެސް… އަވަހަށް ހިނގާ ދަރިފުޅަށް ގުޅަން. އަދި ނުމެއް ނިދާނެއެއްނުދޯ؟ އަހަރެން ބޭނުމެއް ނޫނޭ ޝިޔާނާގެ ދަރިފުޅާ ޝިޔާނާއާ ދެމެދު ހުރަހަކަށްވާކަށް. ހިނގާ އަވަހަށް ގުޅަން. ތިއީ އެވަރުގެ ކަމެއް ވެސް ނޫނެއްނު. އަހަރެން އަދި ހީކުރީ، ޝިޔާނާ ތަނެއްގައި ރިއްސާތީ އުޅެނީކަމަށޭ. ސާބަސް އެކަމަކު ލޯބީ. ތިހެން އަޅެ ބުނިނަމަ ކުރިން. އޭރުން ތިހެން ހާސްވެފައި ނިތްކުރިން އޮށްދާ ހިއްލަ ހިއްލާ އިންނާކަށް ނުޖެހުނީހެއްނު. ހިނގާ އަވަހަށް ހަނާއަށް ގުޅަން.” ނަވީން ބޮޑު ފައްޗަކަށް ހުރިހާ ވާހަކަތަކެއް އަމުނާލިއެވެ. އަދި އެނދުމަތީގައި އޮތް އޭނާގެ ފޯނާދިމާއަށް ލެފިލިއެވެ.

ނަވީނަށް އޮޅުވާލުމުގައި ޝިޔާނާއަށް ކާމިޔާބުވީތީ، އޭނާއިނީ އެކަމާ އާޝޯޚްވެފައެވެ. ވާހަކައެއް ހަދާލަން އޭނާ ވެސް ހާދަ މޮޅޭ ހިތަށް އެރިއެވެ. އެހެންނަމަވެސް، ނަވީންގެ ހުޝިޔާރުކަމާ ދޭތެރޭ ޝިޔާނާ ފަރުވާކުޑަކޮށްގެން ނުވާނެކަން ވެސް އޭނާއަށް އެނގެއެވެ.

“އަން. މިއޮތީ ހަނާގެ ނަމްބަރަށް ގުޅާފައި.” ޝިޔާނާގެ އަތަށް ފޯނު ދިއްކޮށްލަމުން ނަވީން ބުންޏެވެ.

****************

ކޮޓަރީގައި ހުރި ގަޑިން 10.45 ވީކަން އިޢުލާން ކުރިއެވެ. ހުޝާމް، އޭނާގެ އެނދުން ތެދުވެ، ފާޚާނާއަށް ވަދެ، ބޮލުގައި އަތްފުނާއަޅާލައި، ޓީޝާޓް ރަނގަޅުކޮށްލިއެވެ. މިއަދު ހަތަރުދަމު، އޭނާއަށް ކުރެވެނީ އެންމެ ޚިޔާލެކެވެ. އެއީ މިރޭ 11 ޖަހާއިރު ޝިޔާނާއަށް ބައްދަލުކުރުމުގެ ޚިޔާލެވެ.

ޝިޔާނާއަކީ، ހުޝާމްގެ ފުރާނައަށްވުރެ ވެސް އޭނާ ލޯބިވީ އިންސާނެކެވެ. އޭނާ ޝިޔާނާއާ ކައިވެނިކުރީ ވެސް ލައްކަ ދުވަހު މަޑުކޮށްފައެވެ. މުޅި ޢާއިލާއާއި ރައްޓެހިންނާ ވެސް ދެކޮޅަށެވެ. އެހެންކަމުން، ޝިޔާނާ އޭނާއާ ވަކިވެގެން ދިޔުން ހުޝާމަށް ތަހައްމަލުކުރަން ޖެހުނީ އެކަނިވެރިކަމުގެ އިންތިހާގެ ގޮތުގައެވެ. އަމުދުން، ސަބަބެއް، ވީކަމެއް ޚުދު އޭނާއަށް ވެސް ނޭނގި އޭނާ ގާތުން ޝިޔާނާ ގަދަކަމުން ވަރިވެގެން ދިޔުމުން އޭނާ ދުނިޔެއިން މޮޔަ ނުވީ ވެސް ހަމަ ކިރިޔާއެވެ.

އޭނާ ޝިޔާނާއާ އަލުން ގުޅެން ކުރި ހުރިހާ މަސައްކަތެއް ވެސް ވީ ބޭކާރެވެ. ހުޝާމްގެ ގާތުން ޝިޔާނާ ގަދަކަމުން ވަރިވި ދުވަހު ކޯޓުގައި ބައްދަލުވި ގޮތަށް، އޭނާއާ ޝިޔާނާ ހުރިހާ ގުޅުމެއް ކަނޑާލިއެވެ. އޭނާ ގުޅާ ގުޅާ ޝިޔާނާ ފޯނު ވެސް ނުނަގައެވެ. ގެއިން ވެސް ބައްދަލެއް ނުކުރިއެވެ. އެންމެ ފަހުން، ހުޝާމްގެ މަންމަ ޝިޔާނާ ގާތަށް ފޮނުވައިގެން ވެސް ޝިޔާނާ އެވާހަކައެއް ނުދެއްކިއެވެ.

މިހުރިހާ ކަމަކަށް ފަހު، ހުޝާމް މާލެދެކެ ވެސް ފޫހިވިއެވެ. އަދި ވަތަނިއްޔާގައި އޭނާ ހުރި އެކައުންޓެންޓްގެ ވަޒީފާ ދޫކޮށް، ރިސޯޓަކުން ވަޒީފާ ހޯދިއެވެ. އެގޮތުގައި މިހާރު ދެ އަހަރު ވެއަތުވެގެން ދިޔައިރު، ހުޝާމް މާލެއައީ އެންމެ ފަހަރަކުއެވެ. އެއީ ވެސް މަންމަ ވަރަށް ބޮޑަށް ބަލިވެގެންނެވެ.

****************

ރެއަކީ ފިނި ރެއެކެވެ. ހުޝާމް އިނީ ބަރ ގައި އިށީނދެލައިގެންނެވެ. މުޅި އެތަނަށް ވެސް ވެރިވެފައިވަނީ ހަމަހިމޭންކަމެވެ. ކައުންޓަރުގެ ކައިރީގައި އިށީނދެ ތިބި ދެތިން ގެސްޓުން ފިޔަވާ އެހެން އެއްވެސް މީހަކު އެތަނުގައެއް ނެތެވެ. ރެއަކީ، ރަށުގެ އަނެއްކޮޅުގައި، މިއުޒިކް ކުޅޭ ރެއެއްކަމުން، ހުރިހާ ގެސްޓުންވީ އެކޮޅަށް ގޮހެވެ.

ކުއްލިއަކަށް ހުޝާމްގެ ލޮލުގައި އަޅައިގަތީ، ރަތްލޭ ކުލައިގެ ހެދުމެއްގައި، ހިނގަމުން އޭނާގެ ކައިރިއަށް އަންނަމުންދާ ޝިޔާނާއެވެ. ހުޝާމަށް އެކަން ޤަބޫލެއް ވެސް ނުކުރެވުނެވެ. ޝިޔާނާ އޭނާގެ ގާތަށް ދުވަހަކު ވެސް އަތުވެދާނެކަމާ މެދު އޭނާވަނީ އުންމީދު ވެސް ކަނޑާލާފައެވެ.

“މިހިރީ އައިސް. ހުޝާމް ބޭނުންވާ ސުވާލެއް ކުރޭ އަވަހަށް. އަހަރެންނަކަށް މާގިނަ އިރަކު ނުހުރެވޭނެ.” ޝިޔާނާ ހުޝާމާ އަރާ ހަމަވުމާއެކު އެންމެ ފުރަތަމަ ވެސް ބުނި ޖުމްލަތަކަކީ އެއީއެވެ.

“އެއްޗެއް ބޭނުންތަ؟” ހުޝާމް ކުރީ ސުވާލެކެވެ.

“ނޫން. ބޭނުމެއް ނޫން. މިއައީ ހުޝާމް ބޭނުންވާ ހުރިހާ ސުވާލުތަކަކަށް ޖަވާބު ދޭން. އަހަރެން ބޭނުމެއް ނޫން އެއްވެސް މީހަކު އަހަރެންގެ ދިރިއުޅުމަށް އުނދަގޫ ކުރާކަށް. އެހެންވީމާ، ހުޝާމް ބޭނުންވާ އެއްޗެއް އަހަރެން ގާތުން މިހާރު އަހާ. އޭގެ ފަހުން އަހަރެން ބޭނުމެއް ނޫން ހުޝާމް އަހަރެންނަށް އެއްވެސް ބިރެއް ދައްކާކަށް، އިންޒާރެއް ދޭކަށް.” ޝިޔާނާ ނުރުހުމާއެކު ބުންޏެވެ.

“އެންމެ ރަނގަޅު. ހިނގާ އަހަރެންގެ ކޮޓަރިއަށް. އެހާ ދުރެއް ނުވާނެ މިތަނަކާ. އޭރުންނެއްނު ވާހަކަ ދެއްކޭނީދޯ؟” ހުޝާމްގެ އެދުން އޭނާ ފާޅުކުރިއެވެ.

“މިތަން ރަނގަޅޭ ވާހަކަ ދައްކަން. އަހަރެންނަށް ރޭ އެވީ ކަންތައްތަކުން ހުޝާމަކަށް ދެން ނެތް އެއްވެސް އިތުބާރެއް ކުރެވޭކަށް.” ޝިޔާނާ ހުރީ ވަރަށް ރުންކުރުވެފައެވެ.

“ޝިޔާނާ. އަހަރެންގެ ވެސް ހުރެއޭ ގޮތާ ފޮތާ. އަހަރެންނަކީ އެހާ އަދަބެއް ނެތް މީހެއްކަމަށް ޝިޔާނާ ހީކުރަން ފެށީ ކޮންއިރަކުތަ؟ ހިނގާ އަހަރެންނާ އެކީ ކޮޓަރިއަށް. އަހަރެން، ކަލާނގެ ގަންދީ މިބުނަނީ… އަހަރެން ޝިޔާނާގެ ގައިގައި އިނގިލިކުރި ވެސް ޖައްސާނުލާނަން.” ހުޝާމް ތަންކޮޅެއް ބާރަށް ބުންޏެވެ.

ހުޝާމްގެ ހުވައާއެކު ޝިޔާނާގެ ސިކުނޑީގައި ވެސް ހިނގައިގަތީ، މިތަނުގައި ދެމީހުން ވާހަކަ ދައްކަން ތިބިތަން މީހަކަށް ފެނުމަށްވުރެ، ހުޝާމްގެ ކޮޓަރީގައި ތިބިއްޔާ ރަނގަޅުވާނެ ކަމަށެވެ. އަދި ދެން، ހުޝާމްގެ ގޮތް ވެސް ޝިޔާނާއަށް އެނގޭތީ، އެކަމާ އޭނާ ޖެހިލުމެއް ވެސް ޙަޤީޤަތުގައެއް ނުވެއެވެ. ހުޝާމަކީ ހަރުކަށިކޮށް ވާހަކަ ދައްކަން އެނގުނަސް، އަތުންފައިން ގޯހެއް ހަދާނެ މީހެއް ނޫންކަން މާކުރިން ވެސް ޝިޔާނާއަށް އެނގެއެވެ.

“އެންމެ ރަނގަޅު.” ޝިޔާނާ އެއްބަސްވިއެވެ. އަދި ހުޝާމާއެކު، އޭނާގެ ކޮޓަރިއަށް ދިޔުމަށް ހިނގައިގަތެވެ.

ބަރ އިން ނުކުމެ، ކުޑަކުޑަ ތަންކޮޅަކަށް ދެވުނު ތަނާ އެތަނުގައި ހުރި ކޮޓަރި ބަރިއެއް ޝިޔާނާއަށް ފެނުނެވެ. އޭގެ ތެރެއިން، “އެކައުންޓްސް ޑައިރެކްޓަރ” ޖަހާފައިވާ ކޮޓަރިއާ އަރާހަމަކޮށް، ހުޝާމް ދޮރުހުޅުވާލިއެވެ.

ހުޝާމް ކޮޓަރިއަށް ވަދެ، ޝިޔާނާ އިށީނުމަށްޓަކައި ގޮނޑިއެއް ކައިރިކޮށްދިނެވެ. އަދި އޭނާ އެނދުމަތީގައި އިށީނދެ،ވާހަކަ ފެށިއެވެ.

“އަހަރެން އަހަން ބޭނުންވަނީ، އަހަރެންނަށް މިވީހާ ތަނަށް ވެސް ޖަވާބު ނުލިބި އޮތް ސުވާލެއް. އަހަރެން ވަރަށް މަސައްކަތްކުރިން އޭގެ ޖަވާބު ހޯދަން. އެކަމަކު ޝިޔާނާއަށް އެނގޭނެ ޝިޔާނާ ކަންތައް ކުރިގޮތް. އެވާހަކަ އިތުރަށް ދެއްކުން މުހިންމެއް ނޫން. ޝިޔާނާ ބުނެބަލަ. ކީއްވެ އަހަރެން ގާތުން ވަރިވީ؟” މާގިނަ ވާހަކަތައް ނުދައްކައި ހުޝާމް ސީދާ ޕޮއިންޓަށް ދިޔައެވެ.

“އަހަރެން ބޭނުން ނުވީ އުޅެން. އަހަރެންނަށް އެނގޭ އޭރު ހުޝާމަށް ލިބޭ މުސާރަ. އެއިން އަހަރެންނަށް އެނގުނު ހުޝާމަކަށް އަހަރެންނާއި އަހަރެންގެ ދަރިފުޅަށް ޚަރަދުކޮށްފައި، ހުޝާމްގެ މަންމައަށް ޚަރަދުކޮށްފައި، އަދި ހުޝާމްގެ ކަންތައްތައްކޮށްފައި، ގޭކުލި ދައްކައިގެން އުފަލަކުން ނޫޅެވޭނެކަން. އަނެއްކާ އަހަރެން ބޭނުން ނުވީ އަހަރެންގެ ދަރިފުޅުގެ ފަރާތުން ހުޝާމަށް އިތުރު އުނދަގުލެއް ޖައްސަން ވެސް.” ޝިޔާނާ ސަބަބުތައް ކިޔައިދޭން ފެށިއެވެ.

“އެއީ…؟ އެހެންވެ ވަރިވީ…؟” ހައިރާންވެ އިނދެ ހުޝާމް ވެސް ސުވާލުކުރިއެވެ.

“ނޫނޭ. އަދި ނިމުނީކީ ނޫން. އަހަރެން ބޭނުންވާ ކަންކަން ހުޝާމަކަށް ފުރިހަމައެއް ވެސް ނުކޮށްދެވޭ. އެއަށްވުރެ… އަހަރެން ދެރަ ވެސް ވޭ މިހެން ބުނަން.. އެކަމަކު ހުޝާމް މާ ބަލިކަށި އަހަރެންނަށް އުފާ ހޯދައިދެވޭ ވަރަށް ވުރެ. އެކަން އެނގޭނެ ހުޝާމަށް.” ޝިޔާނާ އިސްދަށަށް ޖަހައިގެން އިނދެ ބުންޏެވެ.

“ތިއީ ދޮގެއް ނޫން. އަހަރެން ވެސް އެއްބަސް. އެކަމަކު، އަހަރެންނަކަށް ހިއެއް ނުވޭ ތިއީ ކައިވެންޏެއް ރޫޅާލުމަށް ރަނގަޅު ސަބަބެއްހެން. އެންމެ ކުޑަމިނުން ޝިޔާނާ ކޯޓުގައި ވެސް ތިވާހަކައެއް ނުބުނޭ. ބުނީ ފޫހިވަނީއޭ.” ހުޝާމް ޝަކުވާގެ ރާގަކަށް ބުންޏެވެ.

“އަހަރެން ބޭނުން ނުވީ ކޯޓުގައި ހުޝާމު ފަޟީހަތްކުރަން. އެހެންނޫނަސް، ކައިވެންޏެއް ރޫޅާލުން ހުއްދަ ސަބަބެއްނު އެއީ.” ޝިޔާނާ ޔަޤީންކަމާއެކު ބުންޏެވެ.

“އެންމެ ރަނގަޅޭ. އެކަމަކު ޝިޔާނާއަށް އެނގޭތަ؟ ކައިވެންޏަކީ، ވަރަށް މާތް ގުޅުމެއް. ކުޅިވަރަކަށް ކުރާ ކަމެއް ނޫން. ދެމަފިރިންގެ ހިތްހަމަނުޖެހުންތައް ވެސް ހުންނާނެ. ހިތް ނުރުހޭ ކަންތައްތައް ވެސް ހުންނާނެ. އެކަމަކު، އޭގައި އެންމެ ރަނގަޅުވާނީ ދެމަފިރިން އެވާހަކަ ދެއްކިއްޔާ. އަދި ވާހަކަ ދައްކައިގެން ޙައްލު ކުރެވޭތޯ ބެލިއްޔާ. ޝިޔާނާ ހަމަ ފޫހިވާއިރަށް ކޯޓަށް ގޮސް ގަދަކަމުން ވަރިވީމަ، އެއީ އަހަރެންނަށް ކުރެވޭ ބޭއިންސާފެއް. އެހެން ހަދައިގެން ނުވާނެ.” ހުޝާމް ނަސޭހަތެއްހެން ޝިޔާނާއަށް ކިޔައިދިނެވެ.

“އަހަރެން ކޯޓަށް ދިޔައީ އެވާހަކަ ހުޝާމާ ދައްކާނެ ގޮތެއް ނޭނގިގެން ބޯހަލާކުވެގެން. އަނެއްކާ، އަހަރެންގެ ދަރިފުޅާ ހެދި ހުޝާމަށް ވަރަށް އުނދަގޫވާކަން ވެސް އެނގޭ. އެހެންވެ އަހަރެން ބޭނުން ނުވީ ހުޝާމަށް އިތުރަށް އުނދަގޫ ޖައްސަން.” ޝިޔާނާ އޭނާގެ ނަފްސު ދިފާޢުކުރިއެވެ.

“އަހަރެން ޝިޔާނާއާ އިނީ، އެދަރިފުޅު ހުންނަކަން އެނގިގެން. އަދި ޚަރަދުކުރަން ޖެހޭނެކަން ވެސް އެނގިގެން. އެހެންވީމާ، އަހަރެންނަކަށް ނުވޭ އޭނާއަކީ ބުރައެއް ކަމުގައެއް. އަހަރެން ވަރަށް ލޯބިވޭ ހަނާ ދެކެ ވެސް. އެކަން އެނގޭނެ ޝިޔާނާއަށް ވެސް. އަހަރެންގެ ހަމައެކަނި ޕޮއިންޓަކީ، ކަމެއްވީމާ، އެކަން ހައްލުކުރަން ވާހަކަ ނުދައްކައި، ޝިޔާނާ ކޯޓާ ހިސާބަށް ދިޔާމަ. އަދި ކޮބާ؟ ވީކިހިނެތްތޯ ބަލަން އަހަރެން ކުރި މަސައްކަތަށް ޝިޔާނާ އެއްވެސް ވަރަކަށް އިޖާބައެއް ނުދިން. އެއީ ވެސް މައްސަލައެއް. މިހާރު ޝިޔާނާ އަނެއްކާ ވެސް ތި ކައިވެނި ކުރީ. ދެން ވެސް ޝިޔާނާ ހިތްހަމަ ނުޖެހޭ ކަމެއް ވާއިރަށް، ކޯޓަށް ގޮސް ހަމަ އެކުޅިގަނޑު ކުޅޭނީތަ؟ އޭނާ ގާތުގައި އެއްވެސް ވާހަކައެއް ނުދައްކާ، ޝިޔާނާ ބޭނުންވާ ގޮތަށް ކަންކަން ނިންމާލާނީތަ؟” ހުޝާމް ޝިޔާނާގެ އަނގަ ބައްދާލިއެވެ.

“އަހަރެން އުންމީދެއް ނުކުރަން އެކަހަލަ ކަމެއް ވެދާނެކަމަކަށް ނަވީނާއެކު. އަހަރެން ނަވީނާ މިއިނީ އޭނާއަކީ ކާކުކަން ރަނގަޅަށް އެނގިގެން. ކުރިން ކުރި ކައިވެނިތަކާ މިކައިވެންޏާ ތަފާތުވާނެ.” ޝިޔާނާ ބުންޏެވެ.

(ނުނިމޭ)