ފިލިޕީންސްގައި ތިބި ދިވެހިން ރަޖިސްޓްރީވާން އެދެފި

ފިލިޕީންސްގައި ދިރިއުޅޭ ދިވެހިން ޑާކާގައި ހުންނަ ދިވެހި ރާއްޖޭގެ އެމްބަސީގައި ރެޖިސްޓްރީ ވާން ސަރުކާރުން އެދެފިއެވެ.

މިހާރު ހަލުވިކަމާއިއެކު ފެތުރެމުންދާ ކޮވިޑް-19 ވައިރަސް އާއި ގުޅިގެން ފިލިޕީންސްގެ ވެރިރަށް މެނީލާ ވަނީ ލޮކްޑައުން ކޮށްފައެވެ.

ކޮރޯނާއާ ގުޅޭ މައުލޫމާތު ހިއްސާކުރުމަށް ރޭ ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ސަރުކާރުގެ ތަރުޖަމާނު މުހައްމަދު މަބްރޫކު އަޒީޒު ވިދާޅުވީ ގިނަ އަދަދެއްގެ މެޑިސިން ކިޔަވާ ދިވެހި ދަރިވަރުން މެނީލާގައި އެބަތިބި ކަމަށާއި އެކުދިންގެ ހާލަތު ބަންގްލަދޭޝްގައި ހުންނަ ދިވެހި ހައިކޮމިޝަނާއި ފޮރިން މިނިސްޓްރީ ގުޅިގެންބަލަމުންދާ ކަމަށެވެ.

މި ވައިރަސް ޖެހިފައިވާ 64 މީހަކު ފިލިޕީންސް އިން ފެނިފައިވާއިރު ފަސް މީހަކު މިހާތަނަށް ވަނީ މަރުވެފައެވެ.

މި ނުރައްކާތެރި ވައިރަހަށް ރާއްޖެއިން ނުވަ މީހަކު ޕޮޒިޓިވްވެފައިވާއިރު ރާއްޖޭގައި މިހާރު އޮތީ އާންމު ސިއްހަތުގެ ކުއްލި ނުރައްކާ އިއުލާނުކޮށްފަ އެވެ.