ރަންދެލި ރިސޯޓުން ވައިރަހަށް ޝައްކުވާ މީހަކު އެކަހެރިކޮށް ރިސޯޓް މޮނިޓަރިންގއަށް

ކޮވިޑް-19 އަށް ޝައްކުކުރެވޭ އަލާމާތްތައް ހުރެގެން ޝެވަލް ބްލޮންކް ރަންދެލި ރިސޯޓު (ނ. ރަންދެލި)އިން ބިދޭސީއެއްގެ ސާމްޕަލް ނަގައި ޓެސްޓު ކުރަމުން އަންނަ ކަމަށް ހެލްތު ޕްރޮޓެކްޝަން އެޖެންސީން ބުނެފިއެވެ.

އެކަން ހާމަކޮށް އެޗްޕީއޭއިން ކުރި ޓުވީޓެއްގައި ބުނީ ޓެސްޓްގެ ނަތީޖާ ލިބެންދެން އޭނާ ހޯމް އައިސޮލޭޝަނަށް ދާން އަންގާފައިވާ ކަމަށެވެ. އަދި އެ ރިސޯޓު މިހާރު މޮނިޓަރިންގެ ހާލަތަކަށް ގެނެސްފައިވާ ކަމަށެވެ. އެ ހާލަތުގައި ރިސޯޓަށް އަރައި ފޭބުން ވަގުތީގޮތުން މަނާވާނެއެވެ.

މިހާތަނަށް ކޮރޯނާވައިރަހަށް ރާއްޖެއިން ޕޮޒިޓިވްވެފައިވަނީ 13 މީހުންނެވެ އެ އެންމެންނަކީ ވެސް ބިދޭސީންނެވެ. އެއީ ހަތަރު ރިސޯޓަކާއި ސަފާރީއަކުންނެވެ.