ހަތަރުވަނަ ދިވެއްސަކު ޕޮޒިޓިވްވެއްޖެ

އިނގިރޭސި ވިލާތުން އައިސް ކަރަންޓީން ފެސިލިޓީގައި ހުރި ހަތަރުވަނަ ދިވެއްސަކު ކޮވިޑް-19 އަށް ޕޮޒިޓިވް ވެއްޖެ ކަމަށް ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން ދާދި ދެންމެ ބުނެފި އެވެ.

އެޗްޕީއޭއިން ކުރި ޓުވީޓެއްގައި ބުނީ ޕޮޒިޓިވްވީ ކަރަންޓީން ފެސިލިޓީ ވެލިދޫ އައިސޮލޭޝަންގައި ބަހައްޓާފައި ހުރި ދިވެއްސެއް ކަމަށާއި އެއީ ވެސް އިނގިރޭސި ވިލާތުން އެނބުރި އައި މީހެކެވެ.

އެ ބައްޔަށް ރާއްޖޭން ހަތަރު ދިވެހިން މިހާތަނަށް ވަނީ ޕޮޒިޓިވްވެފަ އެވެ. އެ އެންމެންނަކީ ވެސް އިނގިރޭސިވިލާތުން އެނބުރި އައި މީހުންނެވެ.

މިހާތަނަށް ވަނީ 19 މީހަކު ކޮވިޑް-19 އަށް ޕޮޒިޓިވްވެފަ އެވެ. އޭގެ ތެރެއިން 13 ބިދޭސީން ވަނީ ރަނގަޅުވެފަ އެވެ. އެ 13 މީހުންގެ ތެރޭގައި ހިމެނެނީ ކުރެއްދޫ އައިލެންޑް ރިސޯޓުގެ ތުރުކީގެ ޑޮކްޓަރާއި އެ ރިސޯޓުގެ އެހެން ބިދޭސީ މުވައްޒަފެއް އަދި 11 ޓޫރިސްޓުންނެވެ.

ރާއްޖެ އިން ކޮވިޑް-19 އަށް ޕޮޒިޓިވް ވެފައިވާ ދިވެއްސަކު އެންމެ ފުރަތަމަ ފެނުނު ކަމަށް އެޗްޕީއޭ އިން އިއުލާންކުރީ މިދިޔަ ހުކުރު ދުވަހު އެވެ.