ދޮށީ އުމުރުގެ މީހުންނަށް ހާއްސަ ކުލިނިކެއް ގާއިމްކޮށްފި

އުމުރުން ދުވަސްވީ މީހުންނަށް ހާއްސަ ކްލިނިކެއް އިންދިރާގާންދީ މެމޯރިއަލް ހޮސްޕިޓަލް (އައިޖީއެމްއެޗް)ގައި ގާއިމްކޮށްފި އެވެ.

މިހާރު ފެތުރެމުންދާ ކޮވިޑް-19 އާ ގުޅިގެން ހުމާއި ރޯގާގެ އަލާމާތްތައް ހުންނަ މީހުން ހޮސްޕިޓަލަށް ދިއުމުގެ ބަދަލުގައި ޑޮކްޓަރަށް ދެއްކޭނެ އިންތިޒާމު ހަމަޖެއްސުމަށް މީގެ ކުރިން ވަނީ ތިން ކްލިނިކެއް މާލޭގައި ހުޅުވާފަ އެވެ.

ކޮވިޑް-19 އާ ގުޅިގެން އުފައްދާފައިވާ ނޭޝަނަލް އިމަޖެންސީ އޮޕަރޭޝަން ސެންޓަރުން ރޭ ބޭއްވި ނޫސްވެރިންގެ ބައްދަލުވުމުގައި އެ ސެންޓަރުގެ ތަރުޖަމާނު މުހައްމަދު މަބްރޫކް އަޒީޒް ވިދާޅުވީ، އުމުރުން ދުވަސްވީ މީހުންނަށް ހާއްސަކޮށް އައިޖީއެމްއެޗްގައި ގާއިމްކުރި ކްލިނިކުން އާންމު ބަލިތަކަށް ފަރުވާ ދޭނެ ކަމަށެވެ. އަދި ކޮންމެ ދުވަހަކު ހެނދުނު 9 އިން މެންދުރު 1 އާ ހަމައަށް އެތަނުން ހިދުމަތް ދޭނެ ކަމަށް ވެސް އޭނާ ވިދާޅުވި އެވެ.

ރާއްޖެއިން ކޮވިޑް-19 އަށް 19 މީހަކު މިހާތަނަށް ޕޮޒިޓިވް ވެފައިވެ އެވެ. އޭގެ ތެރެއިން ހަ މީހަކު ފިޔަވައި އެންމެން ވަނީ ރަނގަޅުވެފަ އެވެ. ބާކީ ތިބި ހަ މީހުންގެ ތެރެއިން ހަތަރު މީހުންނަކީ އިނގިރޭސިވިލާތުން ރާއްޖެ އައި ދިވެހިންނެވެ.