ރާއްޖެއިން ދިޔަ މީހަކު ޕޮޒިޓިވްވުމުން ދެ ރަށެއް މޮނިޓަރިންއަށް

ރާއްޖޭގައި ހުރެފައި ދިޔަ ތުރުކީ މީހަކު ކޮވިޑް-19 އަށް ޕޮޒިޓިވްވުމުން ބޮޑުފުށި ރިސޯޓާއި ޖޯލި މޯލްޑިވްސް ރިސޯޓު މޮނިޓަރިންގެ ހާލަތަށް ގެންގޮސްފި އެވެ.

އެޗްޕީއޭ އިން ދެންމެ ކުރި ޓުވީޓެއްގައި ބުނީ އޭނާއާ ގުޅުން ހުރި މީހުންގެ ކޮންޓެކްޓް ޓްރޭސިން ހަދައި ނިމެންދެން ޖޯލި މޯލްޑިވްސް އާއި ބޮޑުފުށި މި ވަގުތަށް ބަންދުކޮށްފައިވާ ކަމަށެވެ.

މީގެ ކުރިން ރާއްޖޭގައި ހުރެފައި ފުރުމަށް ފަހު ކޮރޯނާވައިރަހަށް ހަތަރު މީހަކު ޕޮޒިޓިވްވެފައިވެއެވެ. އެއީ ކުރެއްދޫ ރިސޯޓުގައި ހުރެފައި ދިޔަ އިޓަލީ މީހަކާއި، އައިލެންޑް ސަފާރީގައި ތިބެފައި ކަރަންޓީނުގައި 14 ދުވަސް ހަމަ ކުރި އިޓަލީގެ ދެ މީހެއް އަދި ވަން އެންޑް އޮންލީ ރީތި ރަށް ރިސޯޓުގައި ހުރެފައި ދިޔަ ފުޓުބޯޅަ ކުޅުންތެރިޔާ މަރުއާން ފެލެއިނީއެވެ.

ރާއްޖެ އިން މިހާތަނަށް ވައިރަސްއަށް ޕޮޒިޓީވް 19 މީހަކު ފެނިފައިވާއިރު އޭގެ ތެރެއިން 13 މީހަކު ވަނީ ރަނގަޅުވެފަ އެވެ. ބާކީ ހަ މީހުންގެ ތެރެއިން ހަތަރު މީހުންނަކީ ދިވެހިންނެވެ. އެއީ މުޅިން ވެސް އިނގިރޭސި ވިލާތުން ރާއްޖެ އައިސް ކަރަންޓީން ފެސިލިޓީތަކުގައި ބައިތިއްބާފައި ވަނިކޮށް، ބަލީގެ އަލާމާތް ފެނިގެން ކުރި ޓެސްޓުން ކޮވިޑް-19 އަށް ޕޮޒިޓިވް ވި މީހުންނެވެ.