ޕޮޒިޓިވްވި މީހަކާ ކޮންޓެކްޓުވި ދިވެއްސަކު ޓެސްޓު ކުރަނީ

ރާއްޖޭން ފުރައިގެން ދިޔަ ފަހުން ކޮވިޑް-19 އަށް ޕޮޒިޓިވްވެފައިވާ ބިދޭސީއަކާ ސީދާ ކޮންޓެކްޓުވި ދިވެއްސެއް ޓެސްޓު ކުރުމުގެ މަސައްކަތް ފަށާފައިވާކަމަށް ހެލްޓު ޕްރޮޓެކްޝަން އޭޖެންސީ (އެޗްޕީއޭ)އިން ބުނެފި އެވެ.

އެޗްޕީއޭ އިން މިއަދު ބުނީ ރާއްޖޭން ދިޔަ ފަހުން ކޮވިޑް-19އަށް ޕޮޒިޓިވްވެފައިވާ ބިދޭސީއަކާ ސީދާ ކޮންޓެކްޓުވި ދިވެއްސެއްގެ ކިބައިން އެ ބައްޔަށް ޝައްކުކުރެވޭ އަލާމާތްތައް ފެންނާތީ ރައްކާތެރިކަމުގެ ފިޔަވަޅެއްގެ ގޮތުން އެ މީހާގެ ސާމްޕަލް ނަގައި ޓެސްޓުކުރުމުގެ މަސައްކަތް ކުރަމުންދާކަމަށެވެ.

އަދި އެ މީހާ މިވަގުތުވެސް ހުރީ ކަރަންޓީނު ފެސިލީޓީއެއްގައި އެކަހެރިކޮށްފައިވާކަމަށްވެސް އެޗްޕީއޭއިން އިތުރަށް ބުނެފައިވެ އެވެ.

ޖޯލި މޯލްޑިވްސްއާ ރ. ބޮޑުފުށި ރިސޯޓަށް ޒިޔާރަތްކޮށްފައިވާ ބިދޭސީއެއް ރާއްޖޭން ދިޔަ ފަހުން ކޮވިޑް-19 އަށް ޕޮޒިޓީވްވެފައިވާކަމަށް ސަރުކާރުން ވަނީ ބުނެފަ އެވެ. އަދި އެ މީހާއާއި ކޮންޓެކްޓްވި 33 މީހަކު އެކަހެރިކޮށްފައިވާ ކަމަށް ސަރުކާރުން ވަނީ ބުނެފަ އެވެ.

ރާއްޖެއިން މިހާތަނަށް ކޮވިޑް19 އަށް ޕޮޒިޓިވްވެފައިވަނީ 19 މީހުންނެވެ. އޭގެ ތެރޭގައި ހަތަރު ދިވެހިންވެސް ހިމެނެއެވެ. އަދި ރާއްޖެއިން ޕޮޒިޓިވްވި 13 މީހަކު ވަނީ ރަނގަޅުވެފައެވެ