މާލެއިން ތިންވަނަ ދިވެއްސަކު ކޮވިޑަށް ޕޮޒިޓިވްވެއްޖެ

މާލެއިން ތިން ވަނަ ދިވެއްސަކު ކޮވިޑް-19 އަށް ޕޮޒިޓިވްވެއްޖެ އެވެ. މިއީ 24 ގަޑިއިރުގެ ތެރޭގައި އެ ވައިރަހަށް މާލެއިން ޕޮޒިޓިވްވި ތިން ވަނަ މީހާ އެވެ.

ހެލްތް ޕްރޮޓެކްޝަން އެޖެންސީ (އެޗްޕީއޭ) އިން ހާމަކުރި ގޮތުގައި، މިފަހަރު ބައްޔަށް ޕޮޒިޓިވްވި މީހާއަކީ ވެސް، މާލެއިން ފުރަތަމަ ފަހަރަށް ކޮވިޑް ރޯގާ ޖެހުނު، ޕޭޝަންޓް 21ހާ ޑައިރެކްޓް ކޮންޓެކްޓެކެވެ. އެ މީހާ އަކީ ވެސް ދިވެއްސެއް ކަމަށް ވެސް ބުންޏެވެ.

އެޗްޕީއޭއިން ރޭ އިރާކޮޅު ހާމަކުރި ގޮތުގައި، ޕޭޝަންޓް 21ގެ ތުއްތު ދަރިފުޅަށް ވެސް ވަނީ އެ ވައިރަސް ޖެހިފަ އެވެ. އެ ތުއްތު ކުއްޖާއާއި ރޭ ފެނުނު މީހާއާ އެކު ޖުމްލަ ތިން މީހުންނަށް މިހާތަނަށް މާލެއިން ވަނީ ވައިރަސް ޖެހިފަ އެވެ.

ޕޭޝަންޓް 21އާ ބައްދަލުވި 54 މީހަކު ހޯދިފައިވާ ކަމަށް އެޗްޕީއޭއިން ބުނެފައިވެ އެވެ. އަދި އޭގެ ތެރެއިން 11 މީހެއްގެ ސާމްޕަލް ނެގިއިރު، 11 މީހުންގެ ތެރެއިން "ޕޭޝަންޓް21"ގެ ތުއްތު ދަރިފުޅު ފިޔަވާ ދެންތިބި 10 މީހުން ނެގަޓިވްވެފައިވެ އެވެ.

އިއްޔެ ޕޮޒިޓިވްވި އަންހެން މީހާ އަކީ ފަހުގެ ތާރީހެއްގައި ބޭރު ގައުމަކަށް ދަތުރުކޮށްފައިވާ މީހެއް ނޫނެވެ. އަދި ކޮވިޑް-19 ޖެހުނު މީހަކާ ޑައިރެކްޓް ކޮންޓެކްޓް ވެފައިވާ ކަމަށް އެނގެން ނެތް ކަމަށް ވެސް އެޗްޕީއޭ އިން ވަނީ ބުނެފަ އެވެ.

މިރޭ ޕޮޒިޓިވްވި އިތުރު މީހާއާއެކު މިހާތަނަށް ރާއްޖެއިން ޕޮޒިޓިވްވި މީހުންގެ އަދަދު މިވަނީ 23 އަށް އަރާފަ އެވެ. މިހާތަނަށް 13 ބިދޭސީއަކާއި ތިން ދިވެހިން ވަނީ ވައިރަހުން ރަނގަޅުވެފަ އެވެ.

މި ދުވަސްވަރަކީ ރިސޯޓްތަކުގެ މުވައްޒަފުން ގެ އިތުރުން މާލެއިން އެނބުރި އެ މީހުންގެ ރަށްތަކަށް އައިސް ތިބި ވަގުތެއްކަމުން އަތޮޅުތެރޭގެ ރައްޔިތުންގެ ސަލާމަތާ ރައްކާތެރިކަމަށްވެސް ވަރަށްބޮޑަށް ވިސްނާ ފިޔަވަޅު އަޅަން ޖެހިފައިވާ ވަގުތެކެވެ.