ކުޅުދުއްފުށީގައި ރައްޔިތުންގެ ރައްކާތެރިކަމަށް އަޅަން ޖެހޭ ފިޔަވަޅުތައް މިދަނީ އަޅަމުން: ޓާސްކް ފޯސް

މިއީ ހައްސާސީ ވަގުތެއް ކަމަށާއި ރައްޔިތުންގެ ސަލާމަތާއި ރައްކާތެރިކަމަށް އަޅަން ޖެހޭ ފިޔަވަޅުތައް އެޅުމަށް މަސައްކަތް ކުރަމުންދާކަމަށް ކުޅުދުއްފުށީގައި އުފައްދާފައިވާ ކޮވިޑް-19 ޓާސްކް ފޯސް އިން ބުނެފި އެވެ.

ވެރިރަށް މާލެއިން ކޮވިޑް-19 އަށް ޕޮޒިޓިވްވެފައިވާ ބަޔަކު ފެނުމާއެކު ރާއްޖޭގައި ވައިރަސް ފެތުރިދާނެކަމުގެ ބިރު އޮތީ ވަރަށް ބޮޑުވެފައިވެ އެވެ. އަދި ފާއިތުވި ތިން ވަރަށް ދުވަސްތެރޭގައި ކުޅުދުއްފުށީމަގުން ގިނަ ބަޔަކު ދަތުރުކޮށްފައިވާތީ އެރަށަކީ ބަލި ފެތުރިދާނެކަމުގެ ނުރައްކާ ބޮޑު ރަށެކެވެ. އެކަމާ ގުޅިގެން ރައްޔިތުންގެ މެދުގައި ވަނީ ވަރަށް ބޮޑަށް ނުތަނަވަސްކަން އުފެދިފަ އެވެ.

ކުޅުދުއްފުށީ ރީޖަނަލް ހޮސްޕިޓަލުން މިރޭ ނެރުނު އިއުލާނުގައި ބުނެފައިވަނީ ރަށުތެރޭގައި ބަލި ފެތުރިއްޖެނަމަ ބޮޑެތި ގޮންޖެހުންތަކެއް ކުރިމަތިވާނެ ކަމަށާއި މިދަނޑިވަޅުގައިވެސް ސަރުކާރާ ކަމާ ބެހޭ ފަރާތްތަކުން ދެމުން އަންނަ އިރުޝާދުތަކާއި އެއްގޮތަށް އަމަލު ކުރުމަށް ރައްޔިތުންނަށް އިލްތިމާސް ކޮށްފައިވެ އެވެ.

މި ދަނޑިވަޅުގައި އެކަކު އަނެކަކަށް އިހްތިރާމްކޮށް ރައްޔިތުންގެ މެދުގައި ފިތުނަވެރިކަން އުފެދި، އިޖުތިމާއީ ފޭރާން ހަލާކުވެގެން ހިނގައިދާނެ ފަދަ އެންމެހާ ކަންތައްތަކުން ދުރުހެލިވުމަށްވެސް ކޭއާރުއެޗުގައި އިއުލާނުގައި ނަސޭހަތްތެރިވެފައިވެ އެވެ.

މިކަމާ ގުޅިގެން ކުޅުދުއްފުށީ ކައުންސިލުންވެސް މިރޭ ވަނީ އިއުލާނެއް ނެރެފައި އެވެ. އެއިއުލާނުގަައިވެސް ބުނެފައިވަނީ ކޮވިޑް-19 އާ ގުޅިގެން ކުޅުދުއްފުށީގައި ރައްކާތެރިކަމުގެ ގޮތުން އަޅަން ޖެހޭ ފިޔަވަޅުތައް ވިލަރެސް ކުރުމަށްޓާ އެކުލަވާލާފައިވާ ޓާސްކް ފޯސް އިން އަންނަނީ ގުޅުން ހުރި އިދާރާތަކުގެ އިރުޝާދާއެކު ރައްޔިތުންގެ ރައްކާތެރިކަމަށްޓަކައި އަންނަނީ މަސައްކަތްކުރަމުން ކަމަށެވެ.

އެހެންކަމުން މި ނާޒުކު ހާލަތުގައި ކުޅުދުއްފުށީގައި ދިރިއުޅޭ ހުރިހާ ފަރާތްތަކުން ގޭގައި މަޑުކުރުމަށާއި ތަންތަނަށް އެއްވެ ނޫޅުމަށް ނަސޭހަތްތެރިވެފައިވެ އެވެ. އަދި ކޮންމެހެން ބޭރަށް ނުކުންނަށް ޖެހިގެން ނޫން ގޮތަކަށް ގެއިން ބޭރަށް ނުކުމެ ނޫޅުމަށާއި ބަލި ފެތުރު ކޮންޓްރޯލް ކުރުމަށް ހުރިހާ ރައްޔިތުންވެސް ފަރުދީ ޒިންމާ އަދާކުރުމަށްވެސް ކައުންސިލުން ނަސޭހަތްތެރިވެފައިވެ އެވެ.

ކައުންސިލާއި ކޭއާރުއެޗުގެ އިލްތިމާސް:

ކޭއާރުއެޗާއި ކައުންސިލުން ވަކިވަކިން ނެރުނު އިއުލާނުގައި ބުނެފައިވަނީ ހާއްސަ ގޮތެއްގައި ފާއިތުވެ ދިޔަ 14 ދުވަހުގެ ތެރޭގައި ދަތުރުފަތުރު ކޮށްފައިވާ ފަރާތްތައް ގޭގައި ވަކިން އެކަހެރިވުމަށެވެ. އަދި އާންމު ގޮތެއްގައި އެންމެހާ ރައްޔިތުންގެ ގޭގައި މަޑު ކުރުމަކީ ބަލި ކޮންޓްރޯލު ކުރުމަށް މި ވަގުތު އެޅޭނެ އެންމެ ހަރުދަނާ ފިޔަވަޅުކަން ހަނދާންކަމަށާއި ސަރުކާރުން އަދި ކަމާބެހޭ އިދާރާތަކުން ގިނަ ފިޔަވަޅުތަކެއް އެޅިކަމުގައިވިޔަސް ފަރުދީ ޒިންމާ އަދާކޮށް، އާންމު ސާފުތާހިރުކަމާއި، ގޭގައި މަޑުކުރުމަކީ ކޮވިޑް-19 ގެ އެންމެ ރަނގަޅު ފަރުވާކަމަށެވެ.

އަދި ގޭގައި މަޑުކުރާ 14 ދުވަހުގެ މުއްދަތުގެ ތެރޭގައި ކޮވިޑް-19 އަށް ޝައްކުކުރެވޭ އަލާމާތެއް ފެނިއްޖެނަމަ ކުޅުދުއްފުށީ ރީޖަނަލް ހޮސްޕިޓަލުގެ ކޮވޮޑް-19 ހޮޓްލައިން 7606688 ނަމްބަރު ގުޅުމަށް އެފަރާތްތަކުން އެދެ އެވެ.