ބަންގުލަދޭޝް މީހެއްގެ ހާލު ސީރިއަސްވެ އައިޖީއެމްއެޗްގައި ފަރުވާ ދެނީ

ކޮވިޑް-19 އަށް ޕޮޒިޓިވްވި ބަންގްލަދޭޝްގެ މީހެއްގެ ހާލު ސީރިއަސްވެ އައިޖީއެމްއެޗުގައި ފަރުވާދޭން ފަށާފައިވާ ކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ބުނެފިއެވެ.

އެޗްޕީއޭ އިން ކުރި ޓްވީޓެއްގައި ބުނީ ބަންގުލަދޭޝް މީހާއަށް ފިޓު ޖެހުމުގެ ގޮތްތަކެއް ދިމާވި ކަމަށާއި އޭނާގެ ހާލަތު ސީރިއަސް ކަމަށެވެ. މިކަމާ ގުޅޭ އިތުރު ތަފްސީލެއް އެޗްޕީއޭ އިން ހާމައެއް ނުކުރެއެވެ.

ރާއްޖޭގައި ކޮވިޑް-19 ޖެހުނު މީހުންގެ ތެރެއިން އެންމެ ގިނައީ ބަންގްލަދޭޝްގެ މީހުންނެވެ. އެގޮތުން ރާޢްޖެއިން މިހާތަނަށް މި ބަލި ޖެހުނު 360 ބިދޭސީންގެ ތެރެއިން 282 މީހުންނަކީ ބަންގްލަދޭޝްގެ މީހުންނެވެ. މި ބަލި ޖެހުނު ދިވެހިންގެ އަދަދަކީ 191އެވެ. ރާއްޖޭގައި ޖުމްލަ މި ބަލި މިހާތަނަށް 551 މީހަކަށް ވަނީ ޖެހިފަ އެވެ. އަދި މި ބަލި ޖެހުނު އެކަކު ވަނީ މަރުވެފަ އެވެ.

ރާއްޖޭގައި ގިނަ އަދަދެއްގެ ބިދޭސީންނަށް ކޮވިޑް-19 ޖެހިފައިވާއިރު، މި ބަލި ފެތުރުން ކޮންޓްރޯލް ކުރުމަށްޓަކައި މާލޭގައި ބިދޭސީން ތޮއްޖެހިގެން ދިރިއުޅެމުންދާ ތަންތަނުން އެމީހުން ރައްކާތެރި ތަންތަނަށް ބަދަލުކުރުމުގެ މަސައްކަތް ސަރުކާރުން ވަނީ ފަށާފައެވެ.