އިތުރު 101 މީހަކު ޕޮޒިޓިވްވެ، ޖުމްލަ އަދަދު 1700 އަށް ވުރެން މައްޗަށް އަރައިފި

އިއްޔެ އިރުއޮއްސުމާއި ހަމައަށް އަލަށް 101 މީހަކު ޕޮޒިޓިވްވެ، ރާއްޖެއިން ކޮވިޑް-19 އަށް ޕޮޒިޓިވްވި މީހުންގެ ޖުމްލަ 1773 އަށް އަރައިފި އެވެ.

އަލަށް ޕޮޒިޓިވްވި މީހުންގެ ތެރޭގައި ހިމެނެނީ 71 ބަންގުލަދޭސް މީހުންނާއި 21 އިންޑިއާ މީހުންގެ އިތުރުން 8 ދިވެހިން ކަމަށް ނޭޝަނަލް އެމަޖެންސީ އޮޕަރޭޝަން ސެންޓަރުން (އެންއީއޯސީ) އިން ބުންޏެވެ.

އެންއީއޯސީން ރޭ ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ޑރ. އަފްޒަލް ވިދާޅުވީ މީގެ ތެރޭގައި ގިނައީ ކުރީގެ ކްލަސްޓާތަކާ ގުޅުން ހުރި ކޮންޓެއިންމަންޓް ސައިޓްތަކުގައި އުޅޭ ބިދޭސީން ކަމަށެވެ. އެހެންކަމުން މިއީ ލުއިދިނުމުގެ ސަބަބުން އިތުރުވީ އިތުރުވުމަށް ނުބެލެވޭ ކަމަށް ޑޮކްޓަރު ވިދާޅުވިއެވެ.


އެންއީއޯސީގެ ތަރުޖަމާނު މަބްރޫކް އަޒީޒް ރޭގެ ނޫސްވެރިންގެ ބައްދަލުވުމުގައި ވިދާޅުވީ ރާއްޖޭން ޕޮޒިޓިވްވި މީހުންގެ ތެރެއިން މިހާރު ފަރުވާ ކުރަމުން އަންނަނީ 1،313 މީހުންނަށް ކަމަށާއި ބަލިން ރަނގަޅުވި މީހުންގެ އަދަދު މިހާރު 453 އަށް އަރާފައިވާ ކަމަށެވެ.

މިހާތަނަށް ރާއްޖެއިން ކޮރޯނާ ޖެހިފައިވާ 1773 މީހަކު ފެނިފައިވާއިރު 453 މީހަކު ވަނީ ބަލިން ރަނގަޅުވެފަ އެވެ. އަދި ބަލީގައި ފަސް މީހަކު ވަނީ މިހާތަނަށް ރާއްޖެއިން މަރުވެފައެވެ.