ކޮވިޑް ޖެހުން މީހުންގެ ތެރޭގައި 60 އަހަރުން މަތީގެ 53 މީހުން ހިމެނޭ

މިހާތަނަށް ރައްޖޭން 60 އަހަރުން މަތީގެ 53 މީހަކު ބައްޔަށް ކޮވިޑަށް ޕޮޒިޓިވް ވެފައިވާކަން ޕްރޮޓެކްޝަން އެޖެންސީން އާންމުކޮށްފައިވާ ތަފާސްހިސާބުތަކުން ދައްކައިފިއެވެ.

ކޮވިޑް ޑޭޝްބޯޑުގައިވާ މައުލޫމާތުން އެނގޭ ގޮތުގައި ރާއްޖޭގައި ކޮމިއުނިޓީ ސްޕްރެޑެއް ފެށުނު ފަހުން، މިހާތަނަށް ރާއްޖެއިން ބަލި ޖެހުނު މީހުންގެ ތެރޭގައި 60 އަހަރުން މަތީގެ 53 މީހަކު ހިމެނެއެވެ.

ރާއްޖެއިން މިހާތަނަށް ކޮވިޑަށް ޕޮޒިޓިވްވި އެންމެ ދުވަސްވީ 92 އަހަރުގެ ދިވެހި ފިރިހެނެކެވެ. ބަލި ޖެހިގެން ރާއްޖެއިން މަރުވި ހަތް މީހުންގެ ތެރޭގައި 89 އަހަރުގެ މީހަކާއި، 80 އަހަރުގެ މީހަކާއި 83 އަހަރުގެ މީހަކާއި 88 އަހަރުގެ މީހަކު ވަނީ މަރުވެފައެވެ.

ޕޮޒިިޓިވްވި މީހުންގެ ތެރޭގައި ހިމެނެނީ 20 އަންހެނުންނާއި 33 ފިރިހެނުންނެވެ. ރާއްޖެއިން ބަލި ޖެހުނު މީހުންގެ ތެރޭގައި އުމުރުން 62 އަހަރުގެ ލަންކާ މީހަކާއި 60 އަހަރުގެ ބަންގްލަދޭޝް މީހަކު ހިމެނެއެވެ.

ކޮމިއުނިޓީ ސްޕްރެޑް ފެށުމުގެ ކުރިން އުމުރުން 60 އަހަރުން މަތީގެ ފަސް ފަތުރުވެރިޔަކު ވަނީ ބައްޔަށް ޕޮޒިޓިވްވެފައެވެ. އެ އެންމެން ވެސް ބަލިން ރަނގަޅުވެ މިހާރު ވަނީ ދޫކޮށްލާފައެވެ.