ކޮވިޑްގެ އަލާމާތްތައް ނުފެންނަނަމަ ޓެސްޓު ނުހަދާ ދޫކޮށްލަނީ

ޕޮޒިޓިވްވާ މީހުންގެ ތެރެއިން ބަލީގެ އަލާމާތައް ބޮޑަށް ނުފެންނަ އަދި ހާލު ސީރިއަސް ނުވާ މީހުންގެ ފަރާތުން ބަލީގެ އަލަމާތްތައް ނުފެންނަތާ ތިން ދުވަސް ވުމުން އިތުރު ޕީސީއާރު ޓެސްޓެއް ނުހަދާ އެމީހުން ދޫކޮށްލަން ހެލްތް ޕްރޮޓެކްޝަން އެޖެންސީ (އެޗްޕީއޭ) އިން ނިންމައިިފިއެވެ.

ރާއްޖޭގައި މިހާތަނަށް ކޮވިޑް-19 ޖެހޭ މީހުން ދޫކޮށްލަމުން އައީ ބަލިން ރަނގަޅުވުމަށްފަހު ޕީސީއާރު ޓެސްޓްހަދާ އެމީހަކު ދެފަހަރަށް ނެގެޓިވްވުމުންނެވެ.

ރޭ ނޭޝަނަލް އެމެޖެންސީ އޮޕަރޭޝަން ސެންޓަރު (އެންއީއޯސީ) ގައި ބޭއްވި ނޫސްވެރިންގެ ބައްދަލުުވުމުގައި ވާހަކަ ދައްކަވަމުން ޑރ. ނަޒްލާ މުސްތޮފާ ވިދާޅުވީ މިހާތަނަށް ރާއްޖެއިން ބަލިޖެހޭ މީހުން ދޫކުރަމުން ދިޔައީ ޕީސީއާރު ޓެސްޓު ހެދުމަށްފަހު ކަމަށެވެ. އެ ގޮތަށް ޓެސްޓް ކުރާއިރު ވަރަށް ގިނައިން ޕޮޒިޓިވް ކަމަށް ދައްކާ ކަމަށާ ނަމަވެސް ފަހުން ކުރި ދިރާސާއަކުން އެ ހާލަތުގައި އެކަކު އަނެކެއްގެ ގައިން ވައިރަސް ނާރާނެ ކަމަށް ބުނެފައިވާ ކަމަށެވެ.

ޑރ. ނަޒްލާ ވިދާޅުވީ ދިފާއީ ނިޒާމް ރަނގަޅު މީހުން ބަލިން ރަނގަޅުވުމުން އެއްވެސް އަލާމާތެއް ނެތުުމުން ޕީސީއާރު ޓެސްޓް ނުހަދާގޮތަށް ނިންމިނަމަވެސް އެޑްމިޓްކޮށްގެން ފަރުވާދޭމީހުންނާއި، ދިފާޢީ ނިޒާމް ދަށް މީހުންގެ ޓެސްޓް ހަދަމުންދާނެކަމަށެވެ.

ޑޮކްޓަރު އިތުރަށް ވިދާޅުވީ އެކަމާއި ގުޅިގެން ދުނިޔޭގެ ސިއްހަތު ޖަމިއްޔާއިން ވެސް އާ ގައިޑްލައިނެއް ނެރެފައިވާ ކަމަށެވެ. އެ ގައިޑް ލައިންގައިވާ ގޮތުން ވަކި މުއްދަތުތަކެއް ހަމަކުރުމަށް ފަހު ޓެސްޓް ނުކޮށް ދޫކޮށްލެވޭނެ ކަމަށް ބުނެފައިވާ ކަމަށެވެ. އެހެން ކަމުން ރާއްޖެއިން އަމަލު ކުރަމުން އައި ގޮތް ވެސް މިހާރު ބަދަލުކޮށް، މުއްދަތު ހަމަކުރުމަށް ފަހު ޓެސްޓް ނުހަދާ ދޫކޮށްލާ ގޮތަށް ނިންމާފައިވާ ކަމަށެވެ.

ރާއްޖޭގައި މިހާތަނަށް ކޮވިޑް-19 އަށް ޕޮޒިޓިވްވެފައިވަނީ 1901 މީހުންނެވެ. 763 މީހުން ބަލިން މުޅިން ރަނގަޅުވެފައިވާއިރު 8 މީހަކު ވަނީ މި ބަލީގައި ރާއްޖެއިން މަރުވެފަ އެވެ.