އަތޮޅުތަކުގައި އެންޓިބޮޑީ ޓެސްޓުކުރެވޭ ގޮތް ހަދަނީ

ކޮވިޑް-19 އިން ރަނގަޅުވިކަން ޔަގީންކުރުމަށް ހަދާ އެންޓިބޮޑީ ޓެސްޓު ރާއްޖޭގެ ހުރިހާ އަތޮޅެއްގައި ވެސް ހެދޭނެ އިންތިޒާމު ހަމަޖެއްސުމުގެ މަސައްކަތް ކުރަމުން އަންނަ ކަމަށް ނޭޝަނަލް އެމަޖެންސީ އޮޕަރޭޝަން ސެންޓަރުން (އެންއީއޯސީ) އިން ރޭ ބުނެފި އެވެ.

ރޭ އެންއީއޯސީގައި އޮތް ނޫސްވެރިންގެ ބައްދަލުވުމުގައި ޑރ. ނަޒްލާ ވިދާޅުވީ މަސައްކަތް ކުރަމުން އަންނަނީ އަތޮޅުތަކުގައި އެންޓިބޮޑީ ޓެސްޓު ހެދޭނެ އިންތިޒާމު ވަަރަށް އަވަހަށް ހަމަޖައްސަނެ ކަމަށާއި ވަރަށް ގިނަ އަދަދެއްގެ އަމިއްލަ ކްލިނިކްތަކާއި ސިއްހީ ހިދުމަތްދޭ ތަންތަނުން ވެސް އެންޓިބޮޑީ ޓެސްޓު ކުރުމުގެ ހުއްދައަށް އެދެމުން އަންނަ ކަމަށެވެ.

އޭނާ ވިދާޅުވި ގޮތުގައި އަމިއްލަ ފަރާތްތަކަށް މިހާތަނަށް ވެސް ހުއްދަ ނުދީ އޮތް އެއް ސަބަބަކީ މިއީ އާއްމު ސިއްހަތުގެ ކުއްލި ނުރައްކަލުގެ ހާލަތަކަށް ވާތީކަމަށެވެ. އެފަދަ ހިދުމަތްތައް ސެންޓްރަލްކޮށް މެނޭޖް ކުރަމުން އައުން ކަމަށެވެ. އަނެއް ސަބަބެއް ކަމަށް އޭނާ ވިދާޅުވީ އެންޓިބޮޑީ ޓެސްޓް ހަދަން ބޭނުންކުރާ ގިނަ ބާވަތްތަކެއްގެ ކިޓްތައް ދުނިޔޭގެ ބާޒާރުގައި ހުރި އިރު އޭގެ ތެރެއިން ބައެއް ބާވަތްތައް ރަނގަޅު ނޫންކަން އެނގިފައި ވުމެވެ. މިހާތަަށް ރިކުއެސްޓު ކޮށްފައި ހުރީ ޕީސީއާރް ޓެސްޓިން އަށް ނޫން ކަމަށާއި، އެންޓިބޮޑީ ޓެސްޓިން އަށް ކަމަށެވެ.

އާންމު ހާލަތްތަކުގައިވެސް އެޗްޕީއޭއިން ބަލާ އާންމު ސިއްހަތަށް ނުރައްކާވާނެ ކަހަލަ ވަކި ހާއްސަ ބަލިތަކެއް ހުންނަ ކަމަށާއި އެ ބަލިތަކަށް ވެސް ޓެސްޓުކުރެވެނީ ސީދާ ނެޝަނަލް ޕްރޮގްރާމުގެ ދަށުން، ޕްރޮގްރާމުން ކަނޑައަޅާ ވަކި ތަނެއްގައި، ވަކި މިންގަނޑުތަކަކަށް ކަމަށެވެ.

ޑޮކްޓަރ ވިދާޅުވީ އެޗްޕީއޭ އިން އެންޓިބޮޑީ ޓެސްޓު ކުރަން ބޭނުންކުރަނީ ވެލިޑޭޓްކޮށްގެން ވަކި ސްޓެންޑާޑްތަކެއް ހިފެހެއްޓޭ ޓެސްޓުތައް ކަމަށާއި ކުރިއަށް އޮތް ތަނުގައި ވެސް އެ ސްޓެންޑާޑް ހިފަހައްޓާނެ ކަމަށެވެ.

މިހާރު މާލޭގައި ތިބި އަތޮޅުތެރޭގެ ރައްޔިތުން އަނބުރާ ރަށަށް ގޮސް، 24 ދުވަހަށް ހޯމް ކަރަންޓީނު ވާންޖެހޭ ގޮތަށް އުސޫލު އެކުލަވާލާފައި ވާއިރު، އެމީހުން ވެސް އެންޓިބޮޑީ ޓެސްޓު ހެދުމަށް ވަނީ ނިންމާފައެވެ. އެ ޓެސްޓުގެ ނަތީޖަ ޕޮޒިޓިވްވެއްޖެނަމަ އެމީހަކަށް ރަށަށް ނުދެވޭނެ ކަމަށް ޑރ. ނަޒްލާ ވިދާޅުވިއެވެ.

އަދި އަތޮޅުތެރޭގެ ގޭގޭގައި 24 ދުވަހުގެ ހޯމް ކަރަންޓީން ނިމުމުން ވެސް އެންޓިބޮޑީ ޓެސްޓުކުރުމަށް ވަނީ ނިންމާފައެވެ.