ބަލި މީހުންނަށްވުރެން ރަނގަޅުވި މީހުންގެ އަދަދު އިތުރު ވެއްޖެ

ރާއްޖެއިން ކޮވިޑް-19 އަށް ޕޮޒިޓިވްވެފައި، މި ވަގުތު ފަރުވާދެމުން އަންނަ މީހުންނަށް ވުރެ، އެ ބަލިޖެހި ބަލިން ފަސޭހަވެފައިވާ މީހުންގެ އަދަދުތައް މައްޗަށް ގޮސްފިއެވެ.

ނެޝަނަލް އިމަޖެންސީ އޮޕަރޭޝަން ސެންޓަރު (އެންއީއޯސީ)ގައި ރޭ ބޭއްވި ނޫސްވެރިންގެ ބައްދަލުވުމުގައި ހެލްތު ޕްރޮޓެކްޝަން އޭޖެންސީން އާއްމުކުރި މައުލޫމާތުގައިވާ ގޮތުގައި ރާއްޖެ އިން ކޮވިޑަށް ޕޮޒިޓިވްވީ މީހުންގެ ތެރެއިން މިހާތަނަށް 1010 މީހަކު ވަނީ ބަލިން ރަނގަޅުވެފަ އެވެ. ބަލީގައި މިހާރު އެކްޓިވް ކޭސްގެ ގޮތުގައި ތިބީ 922 މީހުން ކަމަށް ވެސް އެޗްޕީއޭ އިން ބުންޏެވެ.

މިއީ މާލޭ ސަރަހައްދުގައި ކޮވިޑް-19ގެ ކޮމިއުނިޓީ ސްޕްރެޑެއް ފެތުރެން ފެށިފަހުން، ބަލި މީހުންގެ އަދަދުތައް އިތުރުވާން ފެށި ފަހުން އެކްޓިވް ކޭސްތަކަށް ވުރެ ރިކަވަރވި މީހުންގެ އަދަދުތައް އިތުރުވީ ފުރަތަމަ ފަހަރެވެ.

އިއްޔެ ކޮވިޑަށް ޕޮޒިޓިވްވެފައިވަނީ 26 މީހުންނެވެ. ނަމަވެސް 85 މީހަކު ވަނީ އިއްޔެ ބަލިން ރަނގަޅުވެފަ އެވެ.

ރާއްޖެއިން މިހާތަނަށް ޖުމްލަ 1942 މީހަކަށް މި ބަލި ޖެހިފައިވާއިރު އޭގެ ތެރެއިން 8 މީހަކު ވަނީ މަރުވެފަ އެވެ. މިވަގުތު އެޑްމިޓްކޮށްގެން 10 މީހަކަށް ފަރުވާދެމުން އަންނައިރު 532 މީހުން ކަރަންޓީން ފެސިލިޓީތަކުގައި އެބަތިއްބެވެ. އަދި އައިސޮލޭޝަން ފެސިލިޓީގައި 929 މީހުން އެބަތިއްބެވެ.

ރާއްޖެއިން މި ބަލި ޖެހުނު މީހުންގެ ތެރޭގައި ގިނައީ ބިދޭޝީންނެވެ. އެގޮތުން 1277 ބިދޭސީން ޕޮޒިޓިވްވެފައިވާއިރު ދިވެހިންގެ 665 މީހުން ވަނީ ޕޮޒިޓިވްވެފަ އެވެ.