އިތުރު 16 މީހަކު ކޮވިޑަށް ޕޮޒިޓިވް ވެއްޖެ

ކޮވިޑް-19 އަށް އިތުރު 16 މީހަކު ޕޮޒިޓިވްވެއްޖެ އެވެ. މިއާއިއެކު ރާއްޖެ އިން މިހާތަނަށް ޕޮޒިޓިވްވި މީހުންގެ އަދަދު ވަނީ 2،203 އަށް އަރައިފަ އެވެ.

ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ކުރި ޓްވީޓެއްގައި ބުނީ ހަވީރު 6:00 އާ ހަމައަށް އަށް ދިވެއްސަކާއި ބަންގްލަދޭޝްގެ ހަތް މީހުން އަދި އިންޑިއާގެ މީހަކު ޕޮޒިޓިވްވެފައިވާ ކަމަށެވެ.

ރާއްޖެއިން ކޮވިޑް-19 ޖެހުނު ބަންގްލަދޭޝް މީހުންގެ އަދަދު 1،145 އަށް އަރާފައިވާއިރު ދިވެހިންގެ އަދަދު އުޅެނީ 759 ގަ އެވެ. ދެން އެންމެ ގިނައީ އިންޑިއާ އަދި ނޭޕާލްގެ މީހުންނެވެ.

އެ ބަލިން 18 މީހަކު އިއްޔެ ރަނގަޅުވެފައިވާއިރު މިހާރު ފަރުވާ ހޯދަމުން އަންނަ މީހުންގެ އަދަދު ވަނީ 387 އަށް މަދުވެފަ އެވެ.