އެއާޕޯޓެއްގެ ނަމުގައި ކުރީގެ ސަރުކާރުން ދަމާލީ ތާރުފަށެއް، އެތަން އެއާޕޯޓަކަށް ބަދަލުކޮށްލީ މިސަރުކާރުން: އާތިފް

ކުޅުދުއްފުށީގައި އެއާޕޯޓެއް އެޅުމުގެ ނަމުގައި ކުރީގެ ސަރުކާރުން ދަމާލީ ހަމައެކަނި ތާރުފަށެއްކަމަށް ވިދާޅުވެ އިދިކޮޅު ޕީޕީއެމްގެ ނައިބު ރައީސް އަބުދުއްރަހީމް އަބުދުﷲ އަށް، ކުޅުދުއްފުށި ސިޓީ މޭޔަރުކަމަށް ވާދަކުރައްވައި މުހައްމަދު އާތިފް ރައްދުދެއްވައިފި އެވެ.

ކުޅުދުއްފުށީ އެއާޕޯޓް ރައީސް އަބުދުﷲ ޔާމީން ހުޅުވައިދެއްވިތާ އެއްއަހަރާ ދިމާކޮށް އެދުވަހު ހަނދާންތައް އާކުރައްވައި ފޮޓާތަކާއެކު އަބުދުއްރަހީމް އަބުދުﷲ ވަނީ ޓްވީޓްކުރައްވާފައި އެވެ.

"ހަނދާނާ ތާރީހަށްޓަކާއި ރައީސް ޔާމީންގެ ސަރުކާރުން ކުޅުދުއްފުށީގައި ހެދި ވައިގެ ބަނދަރު ހުޅުވުމުގެ ރަސްމިއްޔާތުގެތެރެއިން." އަދުރޭގެ ޓްވީޓްގައިވެ އެވެ.

ކުޅުދުއްފުށީގައި ފުރަތަމަ ދެ އަހަރު ދުވަހުގެ ތެރޭގައި އެއާޕޯޓެއް ތަރައްގީކުރަންވަން ރައީސް އަބުދުﷲ ޔާމީން ވެވަޑައިގެންނެވި ވައުދުފުޅު ދަށުން ހަދަން ފެށި އެއާޕޯޓް ނުނިމެނީސް ވެރިކަމުގެ އެންމެ ފަހު ދުވަސްތަކުގައި އެ އެއާޕޯޓް ވަނީ ހުޅުވައިދެއްވާފައި އެވެ. އޭރު އެތަނުގައި އޮތީ ހަމައެކަނި ރަންވޭ އެކެވެ. ރަންވޭ އެކަނި ނިންމާ އެއާޕޯޓް ހުޅުވުމުން ރައީސް ޔާމީންނަށް ބޮޑެތި ފާޑުކިޔުންތަކެއް އޭރުވެސް ކުރިމަތިވި އެވެ.

އަދުރޭގެ ޓްވީޓަށް ރައްދުދެއްވަމުން އާތިފް ކުރެއްވި ޓްވީޓްގައި ވިދާޅުވެފައިވަނީ ރައްޔިތުން ބޭނުންވީ ރަށުގެ އިރުމަތި ފަރާތުގައި އެއާޕޯޓެއް އަޅަން ކަމަށާ އެހެންނަމަވެސް ރަށުގެ އެންމެ ބޮޑު އެސެޓް ހަލާކުކޮށްލީ ހަމައެކަނި ތާރުފަށެއް ދަމާލައިގެން ކަމަށެވެ. ތާރުފަށެއް ގޮތުގައި އާތިފް ފާހަގަކުރެއްވީ ރަންވޭ އެކަނި އޮތުމުންނެވެ.

Kulhudhuffusheega Airporteh elheemey bunan Adhureymen ladhugannan jeheyne, rahyyithun beynunvee irumathi faraathuga Airport alhan, rashuga oiy emme agubodu asset halaakukohlee hama ekani thaaru fasheh dhamaalan, E thaarufah Airportakah badhalu kohdhinee @ibusolih ge sarukaarun https://t.co/VH1kYSTme3

— 🅰 🆁 🆃 🅷 🅸 🅵 (@ArthifKFCity) September 2, 2020

އެމްޑީޕީގެ ޓިކެޓްގައި ސިޓީގެ މޭޔަރަށް ވާދަކުރައްވައި އާތިފް ވިދާޅުވީ، އެ ތާރުފަށް އެއާޕޯޓަކަށް ބަދަލުކޮށްލަން ދެއްވީ ރައީސް އިބުރާހިމް މުހައްމަދު ސޯލިހް ކަމަށެވެ. އެހެންވުމުން ކުޅުދުއްފުށީ އެއާޕޯޓޭ ކިޔަން އަދުރޭ މެން ލަދުގަންނަ ޖެހޭނެ ކަމަށެވެ.

ހަމައެކަނި ރަންވޭ އަޅައި ނިމުނުތަނުން ރައީސް ޔާމީން ހުޅުވައިދެއްވި މި އެއާޕޯޓުގައި ހުރީ ފަޔަރ ލޮރީ ބާއްވާނެ ތަނަކާއި ޓާމިނަލެކެވެ. ޓާމިނަލުގެ މަސައްކަތްތައްވެސް އެއްކޮށް ނިންމާލެވިއެއް ނުވެ އެވެ. ސަރުކާރު ބަދަލުވުމުން ޓާމިނަލް ބަދަލުގެނެސް އިތުރަށް ބޮޑު ކުރި އެވެ.

ކުޅުދުއްފުށީގައި އެއާޕޯޓް ތަރައްގީކުރަން ހުރިހާ ރައްޔިތުންވެސް ބޭނުންވީ ރަށުގެ އިރުމަތި ފަރާތުގައި އެވެ. މައުލޫމާތު ލިބިފައިވާގޮތުގައި އެ ސަރަހައްދުގައި އެއާޕޯޓް ތަރައްގީނުކުރީ މަޝްރޫއުއަށް ހިނގާނެ ހަރަދު ބޮޑުވުމުންނެވެ.