ހުރިހާ ބޭނުމަކަށްވެސް ރަށްރަށަށް ދާން ހުއްދަ ދީފި

ކޮވިޑް-19އާ ގުޅިގެން މާލެ ސަރަހައްދުގައި އޮތް ލޮކްޑައުންގެ އުސޫލަށް ދިން ލުއިތަކާއި ގުޅިގެން ވަކި ޒަރޫރީ ބޭނުމެއް ނެތްނަމަވެސް މާލެއިން އަތޮޅުތެރޭގެ ރަށްރަށަށް ދެވޭ ގޮތަށް ހެލްތް ޕްރޮޓެކްޝަން އެޖެންސީ (އެޗްޕީއޭ)ގެ އުސޫލަށް ބަދަލު ގެނެސްފި އެވެ.

ކޮވިޑާ ގުޅިގެން މާލެ ލޮކްޑައުން ކުރުމަށް ފަހު ލުއި ދިން ފަހުން މާލެއިން އެހެން ރަށްރަށަށް ދެވެނީ ކޮންމެހެން ދާން ޖެހޭ ޒަރޫރީ ބޭނުންތަކަށް އެޗްޕީއޭއިން ހުއްދަ ނަގައިގެންނެވެ. އަދި ގޮސް 14 ދުވަހުގެ ކަރަންޓީން މުއްދަތެއް ހަމަކުރަން ޖެހެ އެވެ.

އެޗްޕީއޭއިން ބުނީ މިއަދުން ފެށިގެން ހުރިހާ ބޭނުމަކަށް ވެސް ރަށްރަށަށް ދެވޭނެ ކަމަށެވެ. ނަމަވެސް ކުރީގެ އުސޫލާ އެއްގޮތަށް 14 ދުވަހުގެ ކަރަންޓީން މުއްދަތު ފުރިހަމަ ކުރަންޖެހޭނެ ކަމަށެވެ.

ހޯމް ކަރަންޓީނަށް އަތޮޅުތެރެއަށްދާ ފަރާތްތަކުން ހުއްދަ ނަގަން ޖެހެނީ އެޗްޕީއޭގެ ހާލުބެލުން ޕޯޓަލް މެދުވެރިކޮށެވެ. ރަށަށް ދާން ހުއްދަ ދޭނީ ކަރަންޓީންވާން އެކަށީގެންވާ ތަނެއް ހުރިތޯ ބަލައި ކައުންސިލުން އެތަނެއް ފާހަގަކޮށްފަ އެވެ.