ސިއްހީ ކުއްލި ނުރައްކަލުގެ ހާލަތު އިތުރަށް ދަންމާލައިފި

ކޮވިޑް-19 އާ ގުޅިގެން ރާއްޖޭގައި އިއުލާންކޮށްފައިވާ ސިއްހީ ކުއްލި ނުރައްކަލުގެ ހާލަތު ދަމަހައްޓަން ސަރުކާރުން ނިންމައިފި އެވެ.

ސިއްހީ ކުއްލި ނުރައްކަލުގެ ހާލަތު ދަމަހައްޓަން ސަރުކާރުން ނިންމި ނަމަވެސް މާލެ ސަރަހައްދުގައި ކުރިން އަޅާފައިވާ ގިނަ ފިޔަވަޅުތައް ހެލްތު ޕްރޮޓެކްޝަން އެޖަންސީ (އެޗްޕީއޭ) އިން ވަނީ ލުއިކޮށްދީފަ އެވެ.

ރާއްޖެއިން ކޮވިޑް ފެނިގެން ސިއްހީ ކުއްލި ނުރައްކަލުގެ ހާލަތު ފުރަތަމަ އިއުލާން ކުރީ މާޗު 12، 2020 ގަ އެވެ. އޭގެ ފަހުން މިއަދާ ހަމަޔަށް ވެސް ސިއްހީ ކުއްލި ނުރައްކަލުގެ ހާލަތުގައި ރާއްޖެ އޮތް އިރު، ހެލްތު މިނިސްޓަރު އަހުމަދު ނަސީމް ސޮއި ކުރައްވައި މިއަދު ނެރުއްވި ގަރާރުގައި ބުނެފައި ވަނީ އަންނަ މަހުގެ 4 އާ ހަމަޔަށް ކުއްލި ނުރައްކަލުގެ ހާލަތު ދަމަހައްޓަން ނިންމާފައިވާ ކަމަށެވެ.

އެޗްޕީއޭ އިން އެންމެ ފަހުން އާންމު ކުރި ހިސާބުތަކުން ދައްކާ ގޮތުގައި މިހާތަނަށް ރާއްޖެއިން 24،651 މީހުން ވަނީ ޕޮޒިޓިވްވެފަ އެވެ. އޭގެ ތެރެއިން 3،063 މީހުންނަކީ މި ވަގުތު ކޮވިޑް-19 ޖެހިފައިވާ މީހުންނެވެ.