ސްކޫލް ބަންދުގައި މާލެއިން ރަށްރަށަށް ނުދެވޭގޮތް ހަދައިފި

ކުރިއަށް އޮތް ސްކޫލު ބަންދުގައި، މާލެ އިން އަތޮޅު ތެރޭގެ ރަށްތަކަށް ދަތުރު ނުކުރެވޭ ގޮތަށް ހެލްތު ޕްރޮޓެކްޝަން އެޖެންސީ (އެޗްޕީއޭ)އިން އުސޫލު އެކުލަވާލައިފި އެވެ.

އެގޮތުން އެޗްޕީއޭއިން ރޭ ވަނީ މާލެއިން އަތޮޅު ތެރެއަށް ދަތުރުކުރެވޭނެ ޒަރޫރީ ހާލަތްތައް އާންމުކޮށްފަ އެވެ.

މި ހާލަތުގައި މާލެއިން އަތޮޅުތެރެއަށް ދަތުރުކުރެވޭނީ :

1. ސިއްހީ ފަރުވާ ހޯދުމަށް މާލެއަށް އައިސް އެނބުރި ދާންޖެހުމާއި އެފަދަ މީހަކާ އެކުގައި ކޮންމެހެން ދާންޖެހުން.

2. މާލޭގައި އަދާކުރަމުންދާ ވަޒީފާ/ މަސައްކަތް ހުއްޓާލަންޖެހުން ފަދަ ކަންކަން ދިމާވެގެން މާލޭގައި އިތުރަށް ތިބުން ދަތިވެފައިވުން އަދި އެފަދަ މީހުންގެ އާއިލާއިން އެކުގައި ކޮންމެހެން ދާންޖެހުން.

3. މާލޭގައި ދިރިއުޅެވެން ނެތުމުގެ ސަބަބަން ރަށަށް ދިރިއުޅުން ބަދަލު ކުރަންޖެހުން.

4. މާލެއަށް ތައުލީމު ހާސިލުކުރުމަށް އައިސް ތައުލީމު ހާސިލުކުރުން މުޅިން ނިމިފައިވުމުން ރަށަށް އެނބުރި ދާންޖެހިފައިވުން (މީގެ ތެރޭގައި ޗުއްޓީ ލިބުން ނުވަތަ ކިޔެވުން ވަގުތީގޮތުން މެދުކެނޑިފައިވުން ނުހިމެނޭ)

5. މައިންބަފައިން ބަލިވުމާއި އަނބިމީހާ ވިހެއުން ފަދަ އާއިލާއަށް ދިމާވާ ބޮޑެތި ކަންތައްތަކާ ގުޅިގެން ރަށަށް ދާންޖެހުން

މިގޮތަށް ނިންމީ މާލޭގައި ކޮވިޑް19 ފެތުރުން އިތުރުވެގެން ދިއުމާއި އަތޮޅުތެރޭގެ ގިނަ ރަށްރަށުގައި ބަލިފެތުރެމުންދާ ދަނޑިވަޅުގައި ބަލި ފެތުރުން ކޮންޓްރޯލު ކުރުމުގެގޮތުން ކަމަށް އެޗްޕީއޭއިން މައުލޫމާތު ދެއެވެ.

އެފަދަ ޒަރޫރީ ބޭނުންތަކަށް ދަތުރުކުރާ ފަރާތްތަކުން ދަތުރު ކުރުމަށް އެދި ޖޫން ހަވަނަ ދުވަހުން ފެށިގެން ހުށަހަޅާނީ 'ހާލުބެލުން ޕޯޓަލް' މެދުވެރިކޮށް ކަމަށް އެޗްޕީއޭއިން މައުލޫމާތު ދެއެވެ.