ޖަރުމަނުގެ ޒުވާން ޓީމުން ނަސްލީ ފުރައްސާރައާ ހެދި މެޗު ހުއްޓާލާ ދަނޑުން ފައިބައިފި

އިއްޔެ އޮލިމްޕިކްސް އަށް ތައްޔާރުވުމުގެ ގޮތުން ކުޅުނު މެޗެއްގައި ޖަރުމަނު ޒުވާން ޓީމަށް ކުޅޭ ޖޯޑަން ޓޮރުނަރީގާ އަށް ނަސްލީ ފުރައްސާރައިގެ ގޮތުން ބަހެއް ބުނުމުން މެޗު ދޫކޮށްލާ ޖަރުމަނު ޓީމުގެ ކުޅުންތެރިން ދަނޑުން ފައިބައިގެން ހިނގައްޖެ އެވެ.

މެޗު 1 - 1 އެއްވަރުވެފައި ނިމެން ބާކީ ފަސް މިނެޓަށް ވެފައި ހުއްޓާ ދަނޑުން ފައިބަން އެޓީމުން ނިންމުމުން ޖަރުމަނު ޓީމުގެ ކޯޗު ސްޓެފަން ކަންޓްޒް ވަނީ އޭނާގެ ޓީމުން ނިންމި ނިންމުން ދިފާއުކޮށް ވާހަކަ ދައްކާފަ އެވެ.

"އަހަރެމެން ޓީމުގެ އެއް ކުޅުންތެރިޔަކާ ވެސް އެ ގޮތަށް ނަަސްލީ ގޮތުން ދިމާކޮށްފިނަމަ މެޗު ކުޅުމުގެ ވިސްނުމެއް ނޯންނާނެ. މިއީ އަހަރެމެން އިހުތިޔާރު ކުރާ ގޮތް. މިއީ އަހަރެމެން ދޭން ބޭނުންވާ މެސެޖަކީ." ޖަރުމަނު ޓީމުގެ ކޯޗު ބުންޏެވެ.

ޖަރުމަނުގެ މީޑިއާތަކުން ރިޕޯޓްކޮށްފައިވާ ގޮތުން ޓޮރުނަރީގާއާ ނަސްލީ ގޮތުން ދިމާކޮށްލީ ހޮންޑިއުރަސް ބެންޗުންނާއި ދަނޑު މަތީގައި ހުރި ކުޅުންތެރިއެކެވެ. ނަމަވެސް ރަސްމީކޮށް އެކަން ހިނގީ ކިހިނެއްކަމެއް ޖަރުމަނު ފުޓްބޯޅަ ފެޑެރޭޝަނުން ވެސް ބުނެދީފައި ނުވެ އެވެ.

މީގެ ކުރިން ޖަރުމަނުގެ 18 އަހަރުން ދަށުގެ ޓީމަށް ކުޅުނު ޓޮރުނަރީގާއަށް ޖަރުމަނު ކަޕް މެޗެއްގެ ތެރެއިން ވެސް ނަސްލީ ގޮތުން ދިމާކޮށްލާފަ އެވެ.