ކުޑަކުދިން ބޭނުންކޮށްގެން ކުށްކުރުމަށް ޖާގައެއް ނުދޭނަން: ޕީޖީ

ކުޑަކުދިން ބޭނުންކޮށްގެން ކުށްކުރުމަށް ޖާގައެއް ނުދޭނެ ކަމަށާއި، އެފަދަ ކަމެއް ކުޑަކުދިން ލައްވައި ކުރުވާ މީހުންނާއި ދެކޮޅަށް ދައުވާ ކުރައްވާނެ ކަމަ ޕްރޮސެކިއުޓާ ޖެނެރަލް ހުސައިން ޝަމީމް ވިދާޅުވެއްޖެއެވެ.

ޕީޖީ ޝަމީމް މިހެން ވިދާޅުވީ މިދިޔަ މަހުގެ އުމުރުން 13 އަހަރުގެ ކުއްޖަކު ރަހީނުކޮށް މަރާލައި މޫދަށް އެއްލާލާފައި އޮއްވައި ފެނުން މައްސަލައާ ގުޅޭ ގޮތުން މިއަދު ނޫސްވެރިންނާއި ބައްދަލުކުރައްވާ ވާހަކަ ދައްކަވަމުންނެވެ.

ޝަމީމް ވިދާޅުވީ އެއީ ރާއްޖޭގައި ހިނގައިގެން ވާނެ ކަމެއް ނޫން ކަމަށާއި ކުޑަކުދިން ކުށުގެ ތެރެއަށް ނެރޭ މީހުންނާއި ދެކޮޅަށް ގާނޫނީ ގޮތުން ކުރެވެންހުރި ދައުވާތައް ކުރާނެ ކަމަށެވެ. ޝަމީމް ވިދާޅުވީ ކުޑަކުދިން ބޭނުންކޮށްގެން ކުށްކުރުމަށް ޖާގައެއް ނުދެއްވާނެ ކަމަށާއި، އެފަދަ ކަމެއް ކުޑަކުދިން ލައްވައި ކުރުވާ މީހުންނާއި ދެކޮޅަށް ދައުވާ ކުރައްވާނެ ކަމަށެވެ.

ރަހީނުކޮށް މަރާލައި 13 އަހަރުގެ ކުއްޖަކު މޫދަށް އެއްލާލި މައްސަލާގައި ގަސްތުގައި މީހަކު މެރުމުގެ ދައުވާ ވަނީ ކޯޓަށް ފޮނުވަން ނިންމާފައެވެ. މި މައްސަލާގައި ދައުވާ ކުރަނީ ނ. ލަންދޫ ބަގީޗާގޭ އިބްރާހީމް ޒިހާންގެ އިތުރުން 17 އަހަރުގެ ފިރިހެން ކުއްޖެއްގެ މައްޗަށެވެ.

ޕީޖީ ވިދާޅުވީ ހަތް ބާވަތެއްގެ 13 ދައުވާއެއް ޒިހާންގެ މައްޗަށް އުފުލާއިރު މި ދައުވާތައް ސާބިތުވެއްޖެނަމަ ގާތްގަނޑަކަށް 100 އަހަރުގެ ޖަލު ހުކުމެއް ޒިހާންގެ މައްޗަށް އަންނާނެ ކަމަށެވެ.