ކުޅުންތެރިންގެ ސިއްހަތު އެކަކުވެސް ސީރިއަސްކޮށެއް ނުނަގާ: ހެންޑަސަން

ކުޅުންތެރިންގެ ސިއްހަތު ހަގީގަތުގައި އެކަކުވެސް ސީރިއަސްކޮށެއް ނުނަގާކަމަށް ބުނެ އެކަމާ ލިވަޕޫލްގެ ކެޕްޓަން ޖޯޑަން ހެންޑަސަން ކަންބޮޑުވުން ފާޅުކޮށްފި އެވެ.

އާދިއްތަދުވަހު ލިވަޕޫލުން 2 - 2 ން ޓޮޓެންހަމާ އެއްވަރުވިއިރު ކޮވިޑާއި އަނިޔާތައް ގިނަ ނަމަވެސް ލިވަޕޫލުން ދެ ހަފްތާތެރޭ 5 މެޗު ކުޅެން ޖެހޭނެ އެވެ.

"އަހަރެންނަކަށް ހިއެއް ނުވޭ މީހުންނަށް މިކުޅިވަރު ކިހާ އިންޓެންސް ކަމެއް އަމިއްލައަށް މިިކަން ނުކުރަނީސް އެނގޭނެހެނެއް" ހެންޑަސަން ބުންޏެވެ.

ހެންޑަސަން އިތުރަށް ބުނީ ފުޓްބޯޅައަކީ ކުޅުންތެރިންނަށް ހުރިހާ އެއްޗެއްކަމާއި ދަނޑަށް އަރާ ކޮންމެ ފަހަރަކު އެންމެ މޮޅު ކުޅުން ދައްކަން ބޭނުންވާ ކަމަށެވެ. އެހެންނަމަވެސް މިވަގުތު ހާލަތު ހުރިގޮތުން އެއީ ވަރަށް އުދަނގޫކަމެއްކަން އޭނާ ވަނީ ފާހަގަކޮށްފަ އެވެ.

މިކަހަލަ ގޮތަކަށް މިކަން ހިނގާތާ އަހަރުތަކެއް ވެއްޖެކަމަށާއި މިހާރު އެއަށްވުރެ އުދަނގޫވެފައި އޮއްވާ އަނެއްކާ މީގެތެރެއަށް ކޮވިޑް ވަނުމުން އިތުރު ތަކުލީފުތަކެއް ކުރިމަތިވެފައިވާކަން އޭނާ ފާހަގަކުރި އެވެ.

އެކަކުވެސް މިކަން ސީރިއަށް ނުނަގާތީ ވަރަށް ކަންބޮޑުވާކަމަށް ހެންޑަސަން ބުންޏެވެ. މިކަމާ ކުޅުންތެރިންގެ އިތުރުން ކޯޗުން ވެސް އަންނަނީ ކަންބޮޑުވުން ފާޅުކުރަމުންނެވެ.