ހުރިހާ ރަށެއްގައި މާސްކް އެޅުން މަޖުބޫރު، ނާޅާނަމަ ފުލުހުން ފިޔަވަޅު އަޅަނީ

ރާއްޖޭގެ ހުރިހާ ރަށެއްގައި ކޮވިޑުން ރައްކާތެރިވުމަށް މާސްކު އެޅުން މަޖުބޫރު ކުރުމާއި އެކީ އެކަން ތަންފީޒު ކުރުމަށް ފުލުހުން ނުކުމެއްޖެއެވެ.

ރާއްޖޭން ކޮވިޑަށް ފައްސިވާ މީހުންގެ އަދަދު އިތުރުވަމުން އަންނަ މި ދަނޑިވަޅުގައި ރައީސް އޮފީހުން ވަނީ ހުރިހާ ރަށެއްގައި ވެސް މާސްކު އެޅުން މަޖުބޫރުކޮށް، މާސްކު ނާޅާ ފަރާތްތަކާއި މެދު ފިޔަވަޅު އެޅުމަށް ފުލުހުންނަށް އަންގާފައެވެ.

ފުލުހުން މިރޭ ކުރި ޓްވީޓެއްގައި ވަނީ ރާއްޖެއިން ކޮވިޑަށް ޕޮޒިޓިވްވާ މީހުންގެ އަދަދު މަތިވަމުންދާތީ، ރާއްޖޭގެ ހުރިހާ ރަށެއްގައި މިހާރު މާސްއެޅުން ވަނީ މަޖުބޫރު ކުރެވިފައި ކަމަށެވެ. އަދި އެކަން ތަންފީޒުކުރުމުގެ މަސައްކަތް ފުލުހުން ކުރަމުންދާނެ ކަމަށް ވެސް އެ ޓްވީޓުގައިވެއެވެ.

ތިމާއާއި އަނެކާގެ ރައްކާތެރިކަމަށްޓަކައި ބޭރުގައި އުޅުއްވާއިރު މާސްކު އެޅުއްވުމަށް ހަނދުމަފުޅުކޮށް އަރުވަން.#COVID19Maldives #MaskUp #StaySafe #SocialDistancing

— Maldives Police (@PoliceMv) January 6, 2022

ޓުވިޓްގައި އިތުރަށް ފުލުހުން ބުނީ ތިމާއާއި އަނެކާގެ ރައްކާތެރިކަމަށްޓަކައި ބޭރުގައި އުޅޭއިރު އެންމެން ވެސް މާސްކު އެޅުމަށް ހަނދުމަކޮށްދެއްވާފައެވެ.

ހެލްތު މިނިސްޓްރީއާއި ހޯމް މިނިސްޓްރީއަށް ކޮޕީކޮށް ރައީސް އޮފީހުން ފުލުހުންނަށް ފޮނުވާފައިވާ ސިޓީގައި ހުރިހާ ރަށެއްގައި މާސްކު އެޅުން މަޖުބޫރުކޮށްފައިވާތީ އެޗްޕީއޭގެ ގައިޑްލައިނާ އެއްގޮތަށް މާސްކު އަޅަމުންދޭތޯ ކަށަވަރުކޮށްދިނުމަށް ވަނީ އެދިފަ އެވެ.