ކޮވިޑް-19: ކުޅުދުއްފުށީގެ އަދަދު 200 އާ ގާތަށް، ސިޓީ ކައުންސިލްގެ މުވައްޒަފުންވެސް ހިމެނޭ

ކުޅުދުއްފުށި ސިޓީން ކޮވިޑް-19ގެ އެކްޓިވް ކޭސްގެ އަދަދު 192 އަކަށް އަރައިފި އެވެ. މިއަދު އަލަށް ޕޮޒިޓިވްވެފައިވަނީ 54 މީހުންނެވެ.

ކުޅުދުއްފުށިން މިއަދު ކޮވިޑަށް ޕޮޒިޓިވްވި މީހުންގެ ތެރޭގައި މާލޭން ދަތުރުކުރުމަށްފަހު ރަށަށް އައި ފަހުން ނަތީޖާ ލިބުނު މީހުންވެސް ހިމެނެ އެވެ.

ކޭއާރުއެޗުގެ އޮފިޝަލު ވިދާޅުވިގޮތުގައި މިއަދު 10 މީހަކު ވަނީ ބަލިން ރަނގަޅުވެފަ އެވެ.

މިއަދު ކޮވިޑަށް ޕޮޒިޓިވްވި މީހުންގެ ތެރޭގައި ކުޅުދުއްފުށީ ސިޓީ ކައުންސިލްގެ ބައެއް މުވައްޒަފުންވެސް ހިމެނެ އެވެ. އެކަމަކު އެއީ ކިއްތަށް މުވައްޒަފުން ކަމެއް ސާފެއް އަދި ނުވެ އެވެ.

އެނގިފައިވާގޮތުގައި ހޯމަދުވަހުވެސް ސިޓީ ކައުންސިލްގެ މުވައްޒަފަކު ކޮވިޑަށް ޕޮޒިޓިވްވެފައިވާއިރު މިދިޔަ ހަފުތާވެސް އެތަނުގެ ބައެއް މުވައްޒަފުން ޕޮޒިޓިވްވެ ކަރަންޓީނުކޮށްފައިވެ އެވެ. އެކަމަކު އެކަމުގެ ތަފްސީލެއް ހާމައެއް ނުކުރެ އެވެ.

ސިޓީ ކައުންސިލުން ދޭ ގިނަ ހިދުމަތްތަކެއް މިހާރުވެސް ދެމުންދާއިރު އެތަނުގައި ބޭރުގައި މާސްކް އެޅުމަށާއި ގައިދުރުކަން ބެހެއްޓުމަށް އިރުޝާދު ދީފައިވާ ލިޔުންތައް ބަހައްޓާފައިވެ އެވެ.

އާންމުކޮށް ހުޅުވާލައިގެން ކޮންމެ ހޯމަދުވަހެއްގައި ރައްޔިތުންގެ ޝަކުވާތައް އަޑުއެހުމަށް ބާއްވާ ބައްދަލުވުން މިދިޔަ ހޯމަދުވަހުވެސް ސިޓީ ކައުންސިލްގައި ކުރިއަށްގެންގޮސްފައިވެ އެވެ.