ވެކްސިން ޖަހައިފައިވާނަމަ ރާއްޖޭން ބޭރުން އަންނަ އިރު ޕީސީއާރު ހަދަން ނުޖެހޭގޮތަށް ހަދައިފި

ރާއްޖޭން ބޭރުން އަންނަ މީހުންގެ ތެރެއިން، ވެކްސިންގެ ޑޯޒުތައް ފުރިހަމަކޮށް 14 ދުވަސްވެފައިވާ މީހުން ރާއްޖެ އެތެރެވާއިރު ޕީސީއާރު ޓެސްޓު ހަދަން ނުޖެހޭގޮތަށް އުސޫލަށް ބަދަލުގެނެސްފިއެވެ.

ޑިރެކްޓާ ޖެނެރަލް އޮފް ޕަބްލިކް ހެލްތު މައިމޫނާ އަބޫބަކުރު ސޮއިކުރައްވާ މިއަދު ހެލްތު ޕްރޮޓެކްޝަން އޭޖެންސީ (އެޗްޕީއޭ)އިން ނެރުނު އިއުލާނެއްގައި ބުނެފައިވަނީ ރާއްޖެ އަންނަ މީހުންގެ ތެރެއިން ޑަބްލިޔުއެޗްއޯއިން އިމަރޖެންސީ ޔޫސް ލިސްޓުގައި ހިމަނައިފައިވާ ނުވަތަ ރާއްޖޭގައި ބޭނުންކުރުމަށް މޯލްޑިވްސް ފުޑް އެންޑް ޑްރަގް އޮތޯރިޓީއިން ހުއްދަދީފައިވާ ކޮވިޑް-19ގެ ވެކްސިން ފުރިހަމަކޮށް 14 ދުވަސް ވެފައިވާ މީހުން ރާއްޖެ އެތެރެވާއިރު ޕީސީއާރު ހަދަން ނުޖެހޭނެކަމަށެވެ.

މީގެ އިތުރުން، ގެސްޓު ހައުސް ހިންގާ ރަށްތަކުގައި ތިބޭ ފަތުރުވެރިން ރާއްޖޭން ފުރުމުގެ ކުރިން ހަދަންޖެހޭ ޕީސީއާރު ޓެސްޓު ވެސް ހަދަން ނުޖެހޭނެކަމަށް އެ އިއުލާނުގައި ބުނެފައިވެއެވެ.