ސިއްހީ ކުއްލި ނުރައްކަލާ ގުޅިގެން ހޮނިހިރު ބާޒާރު ކެންސަލުކޮށްފި

އުތުރުގެ ދަނޑުވެރިން އުފައްދާ ކާބޯތަކެތި ވިއްކުމަށް ކުޅުދުއްފުށީގައި އޮންނަ "ހޮނިހިރު ބާޒާރު" އަންނަ ހޮނިހިރު ދުވަހު ނުބާއްވާގޮތަށް ހަމަޖައްސައިފި އެވެ.

ކޮވިޑް-19 ގެ ކުޅުދުއްފުށީ ޓާސްކް ފޯސްގެ ފަރާތުން މިއަދު ހެނދުނު ބޭއްވި ބައްދަލުވުމުގައި މަޝްވަރާކުރެވުނީ ހޮނިހިރު ބާޒާރު ވަކި އިންތިޒާމުތަކެއްގެ ދަށުން ބޭއްވުމަށެވެ. ނަމަވެސް މިއަދު ހަވީރު ރާއްޖޭގައި ސިއްހީ ކުއްލި ނުރައްކަލުގެ ހާލަތު އިއުލާނުކުރުމާ ގުޅިގެން ހޮނިހިރު ބާޒާރު ކުއްލި ނުރައްކަލުގެ ހާލަތު ނިންމެން ދެން ކެންސަލުކޮށްފައިވާކަމަށް ކައުންސިލުން ދެންމެ ނެރުނު އިއުލާނުގައިވެ އެވެ.

އިއުލާނުގައި ބުނެފައިވަނީ ކޮވިޑް-19 އާ ގުޅިގެން ކުޅުދުއްފުށީގައި އުފައްދާފައިވާ ޓާސްކް ފޯސްގެ އިރުޝާދުގެ މަތިން އާންމުން ގިނަ އަދަދަކަށް ޖަމާވެ އުޅޭ ހޮނިހިރު ބާޒާރު ވަގުތީގޮތުން ހުއްޓާލަން ހަމަޖެހިފައިވާ ކަމަށެވެ.

ސިއްހީ ކުއްލި ނުރައްކަލުގެ ހާލަތު އިއުލާންކޮށްފައިވާ މިވަގުތުގައި ގިނަ އަދަދެއްގެ މީހުން އެއްތަނަކަށް ޖަމާވެ އުޅުމަކީ ސިއްހީ ގޮތުން ރައްކާތެރިކަމަކަށް ނުވާތީ ހޮނިހިރު ބާޒާރު ކުރިއެކޭ އެއްގިތަށް ބާއްވާނެ ތާރީހެއް ފަހުން އިއުލާނުކުރާނެ ކަމަށެވެ.