ކޭސްތައް އިތުރުވާތީ ކުޅުދުއްފުށި މޮނިޓަރިންގއަށް ލައިފި

ކޮވިޑް 19 ގެ ކޭސްތައް އިތުރުވަމުންދާތީ ކުޅުދުއްފުށި ސިޓީ މޮނިޓަރިންގެ ހާލަތަށް ގެނެސްފި އެވެ. އެޗްޕީއޭއިން ކުޅުދުއްފުށި މޮނިޓަރިންގ ގެ ހާލަތަށް ގެނެސްފައިވަނީ މިއަދު މެންދުރު 12:57 ހާއިރު އެވެ.

ކުޅުދުއްފުށީގެ ކޮވިޑްގެ އެންމެ ފަހުގެ މައުލޫމާތަށް ބަލާލާއިރު އެކްޓިވް ކޭސްގެ އަދަދު ވަނީ 180 އަށް އުފުލިފަ އެވެ. މިއަދު ބަލިން ރަނގަޅުވެފައިވަނީ 22 މީހުންނެވެ.

ހެލްތް އޮފިސަރަކު ކޭއޯއަށް ވިދާޅުވީ މޮނިޓަރިންގއަށްލީ ކޮވިޑް ކޭސްތައް އިތުރުވަމުންދާތީ ކަމަށެވެ. ކޭސްތައް އިތުރުވަމުންދާއިރު މިހާރުވެސް ޓެސްޓް ނުކުރެވި ގިނަ އަދަދެއްގެ ސާމްޕަލް އެބަހުއްޓެވެ. އެހެންވުމުން ނަތީޖާ ލިބުނުގައި ލަސްތަކެއް ކުރިމަތިވާ ކަމަށެވެ.

ހދ އަތޮޅުގެ ގިނަ ރަށްތަކެއްގައި ކޮވިޑް ބަލި ހަލުވިކަމާއެކު ފެތުރެމުންދާއިރު މިވަގުތު ކުޅުދުއްފުށީގެ އިތުރުން 09 ރަށަކުން ދަނީ ކޮވިޑް ކޭސްތައް ފެންނަމުންނެވެ. އެގޮތުން ހަނިމާދޫ، ނޮޅިވަރަންފަރު، ނެއްލައިދޫ، ނޮޅިވަރަމް، ކުރިނބީ، ކުމުންދޫ، ވައިކަރަދޫ، ނޭކުރެންދޫ އަދި މަކުނުދޫއިން ވަނީ ކޭސްތައް ފެނިފައެވެ. އޭގެތެރިން މިވަގުތު ހަނިމާދޫ، ނެެއްލައިދޫ އަދި ނޮޅިވަރަންފަރުވެސް އޮތީ މޮނީޓަރިންގެ ހާލަތުގަ އެވެ.