މައިލޯ އިންޓަރ ސްކޫލު އެތުލެޓިކްސް މީޓުން ކުޅުދުއްފުށީ ޖަލާލުއްދީން ސްކޫލް ރަން ވަނަތަކެއް ހޯދައިފި

ސޯޅަވަނަ މައިލޯ އިންޓަރ ސްކޫލު އެތުލެޓިކްސް މީޓުން ކުޅުދުއްފުށީ ޖަލާލުއްދީން ސްކޫލް ރަން ވަނަތަކެއް ހޯދައިފި އެވެ.

ޖަލާލުއްދީން ސްކޫލުން މި މުބާރާތުގައި ބައިވެރިވި ތިން އުމުރުފާއިން ވެސް ވަނީ ޗެމްޕިއަންކަން ހޯދާފަ އެވެ. އެގޮތުން 15 އަހަރުން ދަށުގެ އުމުރު ފުރާއިން އެންމެ މޮޅު ފިރިހެން އެތުލީޓަކަށް އަހުމަދު އަނޫފް މުހައްމަދު ހޮވިފައިވާއިރު ހަމަ މި އުމުރުފުރާއިން އެންމެ މޮޅު އަންހެން އެތުލީޓަކަށް ހޮވިފައިވަނީ ނާޝާ ނިޒާރެވެ.

14 ސްކޫލަކުން ބައިވެރިވި މި މުބާރާތުގެ 17 އަހަރުން ދަށުގެ އެންމެ މޮޅު ސްކޫލަކަށް ވެސް ހޮވިފައިވަނީ ޖަލާލުއްދީން ސްކޫލެވެ. މާލޭ ކުޅިވަރު އެކުވެނީގައި ކުރިއަށް ދިޔަ މި މީޓްގައި ޖަލާލުއްދީން ސްކޫލުން ވަނީ 37 ރަން މެޑެލްއާއި 6 ރިހި މެޑެލް އަދި 4 ލޯ މެޑެލް ހޯދާފަ އެވެ.

މިމުބާރާތުގައި ސްކޫލުގެ ހުރިހާ ބެލެނިވެރިންނާއި ޓިޗަރުންގެ ފަރާތުން ލިބުނު އެއްބާރުލުން ފާހަގަ ކުރައްވައި އެ ފަރާތްތަކަށް ސުކޫލުގެ މެނޭޖްމެންޓްގެ ނަމުގައި ޝުކުރު އަދާކުރައްވާ ކަމަށް އެސްކޫލުން ބުންޏެވެ.

މި މުބާރާތުގައި ބައިވެރިވި ކުޅުދުއްފުށީ ދެ ސްކޫލް ކަމަށްވާ ހދ. އޭއީސީ އާއި ޖަލާލުއްދީން ސްކޫލުގެ އެތްލީޓުން މިއަދު ރަށަށް އައުމުން ހޫނު މަރުހްބާއެއް ކިޔާފައި ވެއެވެ.