ކުއަންޓަމް އެވޯޑްސްގެ މޮޅު ކުޅުންތެރިޔަކަށް ފަރުހަތު މުހައްމަދު ހޮވިއްޖެ

ކުއާންޓަމް އެވޯޑްސް އިން އެސޯސިއޭޝަން ވިތް ކުޅުދުއްފުށި އޮންލައިން ގެ މޮޅު ކުޅުންތެރިޔަކަށް ފަރުހަތު މުހައްމަދު (ފަރޭ) ހޮވިއްޖެ އެވެ.

ރޭ ތިލަދެކުނު ސިނަމާގައި ކުއަންޓަމް އެވޯޑް ދިނުމަށް އޮތް މި ރަސްމިއްޔާތުގައި އެންމެ މޮޅު ކުޅުންތެރިޔާގެ އިތުރުން 2013 ވަނަ އަހަރުގެ އެންމެ ގިނަ ގޯލު ޖެހި ކުޅުންތެރިޔާއާއި އެންމެ މޮޅު 11 ކުޅުންތެރިންގެ އިތުރުން ވޭތުވެދިޔަ ރަމަޟާން މަހު ކުއާންޓަމްގެ ފަރާތުން ބޭއްވި ފީފާ ކިންގް ގޭމް މުބާރާތުގެ ޗެމްޕިއަނަށް ދިޔަ ފަރާތަށް އިނާމު ދިނުން އޮތެވެ.

ވޭތުވެދިޔަ އަހަރު ބޭއްވުނު އާދަމް އިސްމާއީލް ލީގު، ޕޮލިސް ޔޫތު ކަޕް އަދި ބޭލާ ކަޕްގައި ކުޅުންތެރިން ދެއްކި ކުޅުމަށް ބެލުމަށްފަހު ދެވުނު މިއެވޯޑްގައި އެންމެ ގިނަ ގޯލު ޖެހި ކުޅުންތެރިޔަކަށް ހޮވިފައިވަނީ ޒައިދު މުހައްމަދު އާނިރު (ޒައީ) އެވެ. އޭނާވަނީ މި ތިން މުބާރާތުގައި ޖުމްލަ 20 ގޯލު ކާމިޔާބު ކޮށްފަ އެވެ. އަދި 84 ކުޅުންތެރިންނާ ވާދަކޮށް ފީފާ ކިންގް ގޭމް މުބާރާތުގެ ޗެމްޕިއަންކަން ހޯދާ ޓްރޮފީ ހާސިލް ކޮށްފައިވަނީ އައްސަދު ޤާސިމް ބަނޑިދޫގެ އެވެ.

މިކަމަށްޓަކައި އެކުލަވާލައިފައިވާ ޚާއްސަ ފަނޑިޔާރުންގެ ޕެނަލަކުން ހޮވި ޑްރީމް ޓީމްގައި ހިމެނެނީ މި ތިން މުބާރާތުގައިވެސް ޗެމްޕިއަންކަން ހޯދި ޓީމް ކޮރަލްސް އަށް ނިސްބަތްވާ 7 ކުޅުންތެރިން ކަމުގައިވާ މުހައްމަދު އާތިފް ހިލްމަން، އަބްދުﷲ އަބޫބަކުރު ނާގޯށި(ބަކާ)، އަހްމަދު ނައީމް ޓޯޓަލްގެ (ޔަނާ)، އަހްމަދު ދާވޫދު ރޯމާ (ކުޑަ ފޯޅޭ)، ބަޝީރު ޔޫސުފް ޝާހީނީޒް، ޒައިދު މުހައްމަދު އާނިރު، ފަތުހުﷲ އާދަމް ދިވަރު (ފައްތޭ)، ޓީމް ކޮރަލްސް އަދި ޒިގްޒެގަށް ކުޅުނު ހަސަން މުހައްމަދު ނޫވިލު (ނޫވިލޭ)، ޓީމް ކޮރަލްސް އަދި ހިރަފުހަށް ކުޅުނު ފަރުހަތު މުހައްމަދު ބޮޑުރުއްދޮށުގެ (ފަރޭ)، ހިރަފުސް ޓީމަށް ކުޅުނު އަސްލަމް މުހައްމަދު ބޮޑުރުއްދޮށުގެ (ލަންބޯ)ގެ އިތުރުން ޒިގްޒެގަށް ކުޅުނު އަލީ މުހައްމަދު (ލޭކޮކާ) އެވެ.

ކުޅުދުއްފުށި އޮންލައިންގެ އެހީތެރިކަމާއެކު ކުއާންޓަމް އިން އިންތިޒާމުކުރި ރޭގެ ހަފްލާގައި ކުއާންޓަމް އުފެދިގެން އައި ގޮތާއި އަދި ކުއާންޓަމް އިން ދެމުން އަންނަ ޚިދުމަތްތަކުގެ އިތުރުން ކުއާންޓަމް އިން ހިންގާފައިވާ ހަރަކާތްތަކުގެ މައްޗަށް އަލިއަޅުވާލާ ތައްޔާރު ކޮށްފައިވާ ވީޑިއޯ ރިޕޯޓެއް ދެއްކުންވެސް އޮތެވެ.

މިފަދަ ގޮތަކަށް މުޅިރަށަށް އަމާޒުކޮށްގެން ބޭއްވުނު މިފަދަ ފުރަތަމަ ސްޕޯޓްސް ނައިޓްގައި ވަނަވަނައަށްދިޔަ ފަރާތްތަކަށް އިނާމާއި ހަނދާނީ ފިލާ ހަވާލުކޮށްދެއްވީ ރޭގެ ހަފްލާގެ ޝަރަފްވެރި މެހެމާން މިނިސްޓްރީ އޮފް ޔޫތް އެންޑް ސްޕޯޓްސްގެ ކޯޑިނޭޓަރ މުހައްމަދު ސިނާން (ނާނި) އަދި ކުޅުދުއްފުށީ ކައުންސިލް މެންބަރު އިބްރާހިމް އައްބާސް އެވެ.

ރޭގެ ހަފްލާގައި ޝަރަފްވެރި މެހެމާން ދެއްކެވި ވާހަކަފުޅުގައި ކުޅުދުއްފުއްޓަކީ ކުޅިވަރަށް ލޯބިކުރާ ރައްޔިތެއް އުޅޭ ރަށެއްކަމާއި، ބާސްކެޓާއި ފުޓްބޯޅަ ފަދަ ކުޅިވަރުތަކުގައި ހޯދާފައިވާ ކާމިޔާބީއަށް އަލިއަޅުވާލެއްވި އެވެ. މީގެ އިތުރުން ކުޅުދުއްފުށީގެ ޒުވާނުން މާލޭގެ ފަސްޓް ޑިވިޝަންގެ ކުލްބްތަކުން ފެނުމުގެ އުއްމީދުކުރާ ކަމުގައި ވިދާޅުވި އެވެ. ވާހަކަފުޅު ދައްކަވަމުން އެމަނިކުފާނު ވިދާޅުވީ ކުޅިވަރަށް ސަރުކާރުން ދެވެންހުރި އެއްބާރުލުމެއް ދިނުމަށް މަސައްކަތް ކުރައްވާނެ ކަމަށެވެ.

ރޭގެ ހަފްލާ ނިމިގެން ދިޔައީ މަޝްހޫރު ހިޕްހޮޕް އާޓިސްޓް ސޮއްޕެ އަދި އޭނާގެ ޕާޓްނަރ މުހައްމަދު ޝިފާޒްގެ ހުށަހެޅުންތަކާއެކުގަ އެވެ.

[yass cats=88]