އެފްރިކަން ކަޕް އޮފް ނޭޝަންސްގެ ޗެމްޕިއަންކަން އައިވަރީ ކޯސްޓްއަށް

އިކުއިޓޯރިއަލް ގިނީގައި ކުރިއަށްދިޔަ އެފްރިކަން ކަޕް އޮފް ނޭޝަންސް މުބާރާތުގެ ފައިނަލް މެޗުގައި ގާނާގެ މައްޗަށް ކުރި ހޯދައި، ޗެމްޕިއަންކަން އައިވަރީ ކޯސްޓްއިން ހޯދައިފި އެވެ.

މެޗުގެ 90 މިނެޓް ހަމަވިއިރު އެއްވެސް ޓީމަކަށް ގޯލެއް ކާމިޔާބުކުރެވިފައިނުވާއިރު އިތުރަށް ކުޅުނު 15 މިނެޓްގެ ދެ ހާފްގައި ވެސް ނަތީޖާއަށް ބަދަލެއް އައިސްފައެއް ނުވެ އެވެ. އެހެންކަމުން ނަތީޖާ ނެރުނީ ޕެނަލްޓީ ޖަހައިގެންނެވެ.

ޕެނަލްޓީގައި 8-9 ގެ ނަތީޖާއަކުން ގާނާގެ މައްޗަށް އައިވަރީ ކޯސްޓްއިން ކުރި ހޯދިއިރު ގާނާއަށް ވަނީ އައިވަރީ ކޯސްޓަށް ވުރެ ގިނައިން ލަނޑު ޖަހާނެ ފުރުސަތުތައް ލިބިފަ އެވެ. އެގޮތުން ގާނާގެ އަޓްސޫ އަދި އަޔޫ ކުރިއަށް ފޮނުވާލި ބޯޅަތަށް އަމާޒުވެފައިވަނީ ގޯލުގެ ހުރަސް ދަނޑިއަށެވެ.

ދެ ޓީމުގެވެސް ހަމަހަމަ ކުޅުމެއް ފެނިގެންދިޔަ މި މެޗުގައި އައިވަރީ ކޯސްޓުން ލަނޑުޖެހުމަށް އުފެއްދި ހަމަލާތައް ވަނީ ގާނާގެ ކީޕްރު ދިފާއުކޮށްފަ އެވެ.

އައިވަރީ ކޯސްޓަށް މެޗު ކާމިޔާބުކޮށްދިން ޕެނަލްޓީ ޖަހައިދީފައިވަނީ އެޓީމުގެ ކީޕަރު ބެރީ އެވެ.

މި މުބާރާތުގެ ޗެމްޕިއަންކަން އައިވަރީ ކޯސްޓުން ހޯދި މިއީ ދެވަނަ ފަހަރެވެ. އައިވަރީ ކޯސްޓުން މި މުބާރާތުގެ ޗެމްޕިއަންކަން ފުރަތަމަ ހޯދާފައިވަނީ 1992ގަ އެވެ.