ފަސް ރަށެއްގައި ސާރފިން ސްޕޮޓް ތަރައްގީކުރަނީ

ރާއްޖޭގައި ރާޅާއެޅުން ކުރިއެރުވުމުގެ ގޮތުން ފަސް ސަރފިން ސްޕޮޓް ތަރައްގިކުރުމަށް ނިންމާފައިވާކަމަށް ސްޕޯޓްސް މިނިސްޓަރ އަހުމަދު މަހުލޫފު ހާމަކުރައްވައިފިއެވެ.

ސަރފިން ސްޕޮޓްތައް ތަރައްގީކުރުމަށް ނިންމާފައިވާ ފަސް ރަށަކީ ނ.ޅޮހި، މ.މުލި، ލ.މާބައިދޫ، ގދ.ވާދޫ، އަދި ފުވައްމުލައް ސިޓީއެވެ.

މިކަން ހާމަކޮށްފައިވަނީ މަހުލޫފު ކުރެއްވި ޓުވިޓެއްގައެވެ. ޓުވިޓުގައި ހާމަކޮށްފައިވަނީ މޯލްޑިވްސް ސަރފިން އެސޯސިއޭޝަނާ ގުޅިގެން ފަސް ރަށެއްގައި ސަރފިން ސްޕޮޓްތައް ތަރައްޤީކުރަން ނިންމާފައިވާ ކަމަށާއި އެ ސްޕޮޓްތަކުގައި ރާޅާއެޅުންތެރިން ތިބޭނެ ހިޔާގަނޑުތަކާއި ރާޅާ އަޅާ ބޯޑާއި ސާމާނު ބެހެއްޓޭނެ ރެކްތައް ހިމެނޭނެކަމަށެވެ.

މިނިސްޓަރު އިތުރަށް ފާހަގަކިރެއްވިގޮތުގައި މި ކުޅިވަރަކީ ރާޅާއެޅޫމަކީ ރާއްޖެއަށް ބައިނަލްއަޤުވާމީ މުބާރާތްތަކުން ރަނގަޅު ވަނަތަކެއް ހޯދަމުން އަންނަ ކުޅިވަރެއް ކަމަށާއި، އެހެންކަމުން މި ކުޅިވަރު އިތުރަށް ތަރައްގީކުރުމަށް މަސައްކަތް ކުރަން ޖެހޭކަމަށެވެ.

އަދި މި ފަސް ސްޕޮޓް ތަރައްގީ ކުރެވުމާއެކު ބައިނަލްއަގުވާމީ މުބާރާތްތަކުން އިތުރު ކާމިޔާބީތައް ހޯދަން ފުރުސަތު ފަހިވެ އިތުރު ރާޅާއެޅުންތެރިން އުފެދިގެންދާނެކަމަށް އުންމީދުކުރައްވާކަމަށް މިނިސްޓަރ ވިދާޅުވިއެވެ.