ގައުމީ ޓީމަށް އެންމެ ގިނަ ލަނޑުޖަހައިދީ ދުނިޔޭގެ ރެކޯޑް ރޮނާލްޑޯ މުގުރާލައިފި

ވޯލްޑް ކަޕް ކޮލިފައިންގައި އިއްޔެ ޕޯޗުގަލް އާއި ރިޕަބްލިކް އޮފް އަޔަލޭންޑް ބައްދަލުކުރި މެޗުގައި ޖެހި ދެލަނޑާއެކު ކުރިސްޓިއާނޯ ރޮނާލްޑޯ ގައުމީ ޓީމަށް އެންމެ ގިނަ ލަނޑު ޖަހައިދީގެން އީރާނުގެ އަލީ ދާއީ ހަދާފައިވާ ރެކޯޑް މުގުރާލައިފި އެވެ.

މިމެޗުގައި ޖެހި ދެލަނޑާއެކު ރޮނާލްޑޯ ޕޯޗުގަލްގެ ގައުމީ ޓީމަށް ޖަހައިދިން ލަނޑުގެ އަދަދުވަނީ 111 އަށް އަރާފަ އެވެ. މީގެކުރިން މިރެކޯޑް އޮތީ 109 ލަނޑާއެކު އީރާނުގެ އަލީ ދާއީގެ އަތުގަ އެވެ. 1993 ން 2006 އަށް އަލީ ދާއީ ހަދާފައިވާ މިރެކޯޑާ ރޮނާލްޑޯ އަރާ ހަމަކުރީ އެންމެފަހުން ބޭއްވި ޔޫރޯ ފުޓްބޯޅަ މުބާރާތުގެ ގްރޫޕް ސްޓޭޖްގައި ފްރާންސް ކޮޅަށް ޖެހި ދެލަނޑާއެކުގަ އެވެ.

ރޮނާލްޑޯ އަޔަލޭންޑް ކޮޅަށް ޖެހި ދެލަނޑުވެސް ޖަހާފައިވަނީ ބޮލުންނެވެ. 15 ވަނަ މިނެޓުގައި ޕޯޗުގަލްއަށް ޕެނަލްޓީ އެއްވެސް ލިބުނެވެ. ނަމަވެސް ރޮނާލްޑޯ ފޮނުވާލި މިޕެނަލްޓީ ވަނީ ނާކާމިޔާބުވެފަ އެވެ.

ޓްރާންސްފާ މާކެޓްގެ ފަހު ދުވަހު ޔުވެންޓަސް ދޫކޮށްލާ އަލުން އެނބުރި ޔުނައިޓެޑަށް ސޮއިކުރި ރޮނާލްޑޯއާއި އީރާނުގެ އަލީ ދާއީ ފިޔަވާ އެހެން ކުޅުންތެރިޔަކަށް އަދި މިހާތަނަކަށް ގައުމީ ޓީމަށް 90 ނުވަތަ އެއަށްވުރެ ގިނަ ލަނޑު ޖަހައިދެވިފައެއް ނުވެ އެވެ.