ކަސްޓަމްސް ބަލިކޮށް ކޭއާރުއެޗު ސެމީއަށް، ފަހު ޖާގަ ކޭޕީއެލްއަށް!

މިހާރު ކުރިއަށްދާ ޒިގްޒެގް އިންޓަރ އޮފީސް ފުޓްސަލް ޓޯނަމެންޓުގައި ކަސްޓަމްސް އާރްސީ ބަލިކޮށް ކުލަބް ކޭއާރުއެޗުން ސެމީއަށް ދަތުރުކުރިއިރު ސެމީ ފައިނަލުގެ ފަހު ޖާގަ ކޭޕީއެލްއަށް ލިބިއްޖެ އެވެ.

ރޭ ކުޅެވުނު ކުއާޓާ ފައިނަލުގެ ފަހު ދެމެޗު ވެސް ނިމިގެންދިޔައީ ޕެނަލްޓީ ޖަހައިގެންނެވެ. ރޭ ކުޅެވުނު ފުރަތަމަ މެޗުގައި ބައްދަލުކުރީ ކަސްޓަމްސް އާރްސީއާއި ކުލަބް ކޭއާރުއެޗެވެ. ފޯރިގަދަ މިމެޗު ނިމުނީ 1 - 1 ން އެއްވަރުވެގެންނެވެ. މެޗުގައި ކޭއާރުއެޗުގެ ލަނޑަކީ ކަސްޓަމްސްގެ އަހްމަދު އަބްދުﷲ އަތުން ބައިކޮޅަށް ވަން ލަނޑެކެވެ.

މެޗުގައި ކަސްޓަމަށް ލަނޑު ޖަހައިދިނީ އެޓީމުގެ ޖޯޒީ ނަމްބަރު 5 ހަސަން ނޫރިޝް އެވެ. މުބާރާތުގައި މިހާތަނަށް އެންމެ ގިނަ ލަނޑު ޖެހި ކުޅުންތެރިޔަކީ ވެސް ހަސަން ނޫރިޝް އެވެ. 4 - 2 ން މިމެޗު ކޭއާރުއެޗުން ކާމިޔާބުކުރިއިރު ޕެނަލްޓީ ޝޫޓްއައުޓް ނިމުނީ 3 - 1 ންނެވެ.

ކޭއާރުއެޗުގެ އަސްޖައު، ޑޭވިޑް އަދި އިރުޝާދު އަދުނާނުގެ ޕެނަލްޓީ ކާމިޔާބުކުރިއިިރު ކަސްޓަމްސްގެ އިބްރާހިމް ޝަނޫންގެ ޕެނަލްޓީ ފިޔަވައި އެހެން ހުރިހާ ޕެނަލްޓީއެއް ކޭއާރުއެޗުގެ ކީޕަރު ވަނީ ދިފާއުކޮށްފަ އެވެ. އެގޮތުން ކަސްޓަމްސްގެ ކެޕްޓަން ފަތުހުﷲއާއި ހަސަން ނޫރިޝްގެ އިތުރުން އަހްމަދު އަބްދުﷲގެ ޕެނަލްޓީ ވަނީ ނާކާމިޔާބުވެފަ އެވެ. މެޗުގެ އެންމެ މޮޅު ކުޅުންތެރިޔަކަށް ހޮވުނީ ކޭއާރުއެޗުގެ ކީޕަރު އަބްދުލް ގުއްދޫސް އުމަރެވެ.

ރޭގެ ފަހު މެޗުގައި ކޭޕީއެލުން ވަނީ ޕެނަލްޓީގައި އެސްޓީއޯ އާރްސީ ބަލިކޮށްފަ އެވެ. މިމެޗުވެސް ފުރިހަމަ ވަގުތު ހަމަވީއިރު އޮތީ 1 - 1 ން އެއްވަރުވެފަ އެވެ. މެޗުގައި ކެޕީއެލްގެ ލަނޑު ޖަހައިދިނީ ނާއިހް މުފީދެވެ. އަދި އެސްޓީއޯގެ ލަނޑު ޖެހީ ހަސަން މުހައްމަދެވެ.

މިމެޗުގެ ޕެނަލްޓީ ޝޫޓްއައުޓަކީ މިމުބާރާތުގައި މިހާތަނަށް ފެނުނު އެންމެ ފޯރިގަދަ ޕެނަލްޓީ ޝޫޓްއައުޓެވެ. ޕެނަލްޓީ ޝޫޓްއައުޓް 8 - 7 ން ކާމިޔާބުކުރީ ކޭޕީއެލުންނެވެ. އަދި މެޗު ނިމުނީ 9 - 8 ން ކޭޕީއެލް މޮޅުވެގެންނެވެ. މިމެޗުގެ އެންމެ މޮޅު ކުޅުންތެރިޔަކަށް ހޮވުނީ ކޭޕީއެލްގެ ޖޯޒީ ނަމްބަރު 4 ނާއިހް މުފީދު އެވެ.

ސެމީގެ ފުރަތަމަ މެޗުގައި މާދަމާ ރޭ 08:15 ގައި އުރީދޫއާއި ކޭއާރުއެޗު ވާދަކުރާއިރު ސެމީގެ ދެވަނަ މެޗުގައި މާދަމާ ރޭ 09:15 ގައި ބައްދަލުކުރާނީ ދިރާގާއި ކޭޕީއެލް އެވެ.