މާޒިޔާއިން 13 ލަނޑުޖަހާ ވެލެންސިއާ ލަދުގަންނަވާލާ އަލުން ލީގުގެ އެއްވަނައަށް

އުރީދޫ ދިވެހި ޕްރިމިއާ ލީގުގެ މިރޭ މާޒިޔާ ސްޕޯޓްސް އެންޑް ރެކްރިއޭޝަން ކުލަބުން ކުލަބް ވެލެންސިއާ 13 - 0 ގެ ބޮޑު ތަފާތަކުން ބަލިކޮށް އަލުން ލީގު ތާވަލުގެ އެއްވަނައަށް ޖެހިލައިފި އެވެ.

މިރޭ ކުޅެވުނު މިމެޗުގައި މާޒިޔާއިން ފަސޭހަކަމާއެކު ވެލެންސިއާ ކޮޅަށް ލަނޑު ގޯންޏެއް އޮއްސާލާ މެޗު ކާމިޔާބުކޮށްފައިވާއިރު މިމެޗުގައި މާޒިޔާގެ ލަނޑުތައް ޖަހައިދިނީ ހަމްޒާ މުހައްމަދު (ހަމްޕު) ހަތަރު ގޯލު، ކޮނޭލިއަސް ސްޓެވާޓް ދެ ގޯލު، ނާއިޒު ހަަސަން (ދާދު) ހެޓްރިކެކެވެ.

އަދި ދެންހުރި ލަނޑުތައް ޖަހައިދިނީ ޓަނާ ޑޮމިންގޭޒް ދެ ގޯލު އަދި އިބްރާހިމް އައިސަމް ގޯލެކެވެ. އަނެއް ގޯލަކީ ވެެލެންސިއާގެ ކުޅުންތެރިއަކު އަތުން ބައިކޮޅަށް ވަން ލަނޑެކެވެ.

ހޮނިހިރު ދުވަހުގެ ރޭ ޓީސީ ސްޕޯޓްސް ކުލަބް ބަލިކޮށް ކުލަބް އީގަލްސްއިން ތާވަލުގެ އެއްވަނައަށް ޖެހިލި ނަމަވެސް މިރޭ ބޮޑު ތަފާތަކުން ވެލެންސިއާ ބަލިކޮށް ހޯދި މޮޅާއެކު މާޒިޔާ މިވަނީ އަލުން އެއްވަނައަށް އަރާފަ އެވެ. އެއްވަނައިގައި މާޒިޔާ އޮތީ ކުޅުނު 9 މެޗުން ލިބުނު 24 ޕޮއިންޓާއެކު އެވެ.

ދެވަނައިގައި ކުޅުނު 9 މެޗުން ހޯދި 22 ޕޮއިންޓާއެކު އީގަލްސް އޮތްއިރު ތިންވަނައިގައި އޮތީ މިރޭ މާޒިޔާ އަތުން ބަލިވި ވެލެންސިއާ އެވެ. ވެލެންސިއާއަށް 9 މެޗުން ލިބިފައިވަނީ 13 ޕޮއިންޓެވެ.