ޒިގްޒެގާއި ހަނިމާދޫ ޒުވާނުންގެ ޖަމިއްޔާގެ ކުރިމަތިލުމަކުން ކުޅުދުއްފުށި ޗެމްޕިއަންޝިޕް ފަށަނީ

ކުޅުދުއްފުށި ޗެމްޕިއަންޝިޕް 2023 ގެ ގުރުއަތުލުމުގެ ރަސްމިއްޔާތު މިއަދު ބޭއްވުނުއިރު މުބާރާތް ހުޅުވާ މެޗުގައި ކުޅުދުއްފުށީގެ ޒިގްޒެގް ފޯ ޔޫތް ލިންކޭޖާއި ހަނިމާދޫ ޒުވާނުންގެ ޖަމިއްޔާ ބައްދަލުކުރަން ޖެހިއްޖެ އެވެ.

މުބާރާތުގެ ޓީމުތައް ދެ ގްރޫޕަކަށް ބަހާލާފައިވާއިރު ގްރޫޕް އޭގައި ހިމެނެނީ ޒިގްޒެގާއި ހަނިމާދޫ ޒުވާނުންގެ ޖަމިއްޔާގެ އިތުރުން މާއްޓޭ ސްޕޯޓްސްއާއި ނޮޅިވަރަންފަރު ސްޕޯޓްސް ކުލަބެވެ. ގްރޫޕް ބީގައި ހިމެނެނީ ކުލަބް ހުވާސްއާއި ކުލަބް ކޮރަލްސްގެ އިތުރުން ހިރަފުސް ސްޕޯޓްސް ކުލަބާއި ނައިވާދޫ ޓްރެއިނާސް ސްޕޯޓްސް ކުލަބެވެ.

ކުޅުދުއްފުށީގައި ބާއްވާ އެންމެ ބޮޑު ފުޓްބޯޅަ މުބާރާތްކަމުގައިވާ ކުޅުދުއްފުށީ ޗެމްޕިއަންޝިޕް ފުޓްބޯޅަ މުބާރާތުގެ ގުރު ނެގުމުގެ ރަސްމިއްޔާތު މިއަދު މެންދުރު ކުރިއަށްގެންގޮސްފައިވާއިރު މި ރަސްމިއްޔާތު ޝަރަފުވެރިކޮށްދެއްވީ ކުޅުދުއްފުށީގެ ފުޓްބޯޅަ ދެ ލެޖެންޑުންކަމުގައިވާ އަބްދުއްސައްތާރު އަބޫބަކުރު އަދި އަބްދުއްރަޙްމާން އާދަމެވެ.

މި އަހަރުގެ މުބާރާތުގައި ޖުމްލަ 8 ޓީމަކުން ބައިވެރިވެފައިވާއިރު މި މުބާރާތުގެ ޗެމްޕިއަން ޓީމަށް 60،000 ރުފިޔާގެ ފައިސާގެ އިނާމެއް ލިބޭނެ އެވެ. މި މުބާރާތް މިމަހުގެ ތިންވަނަ ދުވަހު ހަވީރު ކުޅުދުއްފުށީ ޒޯން ސްޓޭޑިއަމްގައި ފެށޭނެ އެވެ.