ކުޑަހުވަދޫގައި ބޭއްވި ބީޗް ހޭންޑްބޯލް މުބާރާތުގެ ޗެމްޕިއަންކަން ކުޅުދުއްފުށީ ޓީމު ހޯދައިފި

ކުޑަހުވަދޫ ގައި ބޭއްވި ބީޗު ހޭންޑްބޯޅަ މުބާރާތުގެ ފިރިހެން ޑިވިޝަންގެ ޗެމްޕިއަންކަން ކުޅުދުއްފުށީގެ ފެމެލީ ބޭކާސް ޓީމުން ހޯދައިފިއެވެ.

މި މުބާރާތަކީ ކުޑަހުވަދޫ ސްޕޯޓްސް ކުލަބާއި ހޭންޑްބޯޅަ މޯލްޑިވްސް ގުޅިގެން، މުޅި ރާއްޖެއަށް ހުޅުވާލައިގެން ދ.ކުޑަހުވަދޫގައި ބޭއްވި މުބާރާތެކެވެ. މި މަހު 1 ން 3އަށް ކުޑަހުވަދޫގައި ކުރިއަށްދިޔަ މި މުބާރާތަކީ އެ ރަށުގައި ބޭއްވި ދެވަނަ ބީޗު ހޭންޑްބޯޅަ މުބާރާތެވެ.

ކުޅުދުއްފުށީ ޓީމުން މި މުބާރާތުގައި ފައިނަލަށް ގޮސްފައިވަނީ ކުޅުނު އެއްވެސް މެޗަކުން ބަލި ނުވެއެވެ. އެގޮތުން ފައިނަލްގައިވެސް ސީދާ ދެ ސެޓުން ޒޯރު ސްޕޯޓްސް ކުލަބު ބަލިކޮށް މި ވަނީ ކާމިޔާބުކޮށްފަ އެވެ. މުބާރާތުގެ ފައިނަލުން ކުޅުދުއްފުށީ ޖާގަ ހޯދާފައިވަނީ ލީގު ބުރުގައި ކުޅުނު ހަތަރު މެޗުން މޮޅުވެ ލީގުގެ އެއްވަނަ ޓީމުގެ ގޮތުގައެވެ.

ފައިނަލް މެޗުގެ މޮޅު ކުޅުންތެރިއަކަށް ހޮވިފައިވަނީ ކުޅުދުއްފުށީ ޓީމުގެ ޖޯޒީ ނަންބަރު 8 އަހުމަދު އަލީ އެވެ.

ކުޅުދުއްފުށީ ޓީމުން ބުނީ މި މުބާރާތުގައި ބައިވެރިވުމުގެ މަގުސަދަކީ މުޅި ރާއްޖެއަށް ހުޅުވާލައިގެން ބާއްވާ މުބާރަތަކަށްވެފައި ރަށުގެ ޓީމެއް ތަމްސީލުކުރުމާއި ރަށުގައި މޮޅެތި އަދި އުންމީދީ ކުޅުންތެރިން ތިބުމާއި މުބާރާތުގެ ޗެމްޕިއަންކަން ލިބޭނެ ކަމުގެ އުންމީދު އޮތުމުން ކަމަށެވެ. އަދި މުޅި ރާއްޖެއަށް ހުޅުވާލައިގެން ބާއްވާ އެހެން މުބާރާތްތަކުގައި މި ޓީމުން ބައިވެރިވުމަށް ގަސްތުކުރާ ކަމަށެވެ.

ދެ ޖިންސަށް ހުޅުވާލައިގެން ކުރިއަށްދިޔަ މި މުބާރާތުގައި ޖުމްލަ 9 ޓީމަކުން ބައިވެރިވެފައިވާއިރު ހިމެނެނީ ފިރިހެން 5 ޓީމާއި އަންހެން 4 ޓީމެވެ. އޭގެ ތެރެއިންވެސް ރަށުން ބޭރު ޓީމަކަށް ބައިވެރިވެފައިވަނީ ކުޅުދުއްފުށީ ޓީމުން އެކަންޏެވެ.

ނަމަވެސް ކުޑަހުވަދޫން ބައިވެރިވެފައިވާ ޓީމުތަކުގައި މާލޭގެ މޮޅެތި ކުޅުންތެރިންގެ އިތުރުން ގައުމީ ޓީމުގެ ކުޅުންތެރިންވެސް ހިމެނެ އެވެ.